ភ្នំពេញៈ កម្ពុជា​មិន​អញ្ជើញ​មេដឹកនាំ​យោធា​មីយ៉ាន់ម៉ា​លោក​ មីន អ៊ុងឡាំង (Min Aung Hlaing) ​មក​ចូលរួម​កិច្ចប្រជុំ​កំពូល​អាស៊ាន​លើក​ទី​ ៤០ ​និង​ ៤១​ និង​កិច្ច​ប្រជុំ​ពាក់ព័ន្ធ​ ដែល​គ្រោង​ធ្វើ​នៅ​រាជធានី​ភ្នំពេញ​នៅ​ខែក្រោយ​នោះទេ​ តែ​កម្ពុជា​នៅ​រក្សា​ជំហរ​អញ្ជើញ​តំណាង​មិន​នយោបាយ​របស់​ប្រទេស​នេះ​មក​ចូលរួម​ជំនួស​វិញ ​ខណៈ​ប្រទេស​នេះ​ត្រូវ​បាន​គេ​មើល​ឃើញ​ថា​ មាន​ការ​វិវឌ្ឍ​តិចតួច​ក្នុង​ការ​អនុវត្ត​កិច្ចព្រមព្រៀង​ជា​ឯកច្ឆន្ទ ​(​កុងសង់ស៊ីស​) ​៥​ ចំណុច​របស់​មេដឹកនាំ​អាស៊ាន​។

លោក​ ជុំ សុន្ទរី​ អ្នក​នាំពាក្យ​ក្រសួង​ការបរទេស​ប្រាប់​ ភ្នំពេញ​ ប៉ុស្តិ៍​ តាមរយៈ Telegram ​ជា​ភាសា​អង់គ្លេស​ នា​ថ្ងៃទី​ ៣ ខែ​តុលា ​ដែល​មាន​ខ្លឹមសារ​ថា​៖ «​យើង​បាន​ផ្ញើ​លិខិត​អញ្ជើញ​ទៅ​កាន់​រដ្ឋ​ជា​សមាជិក​អាស៊ាន​ទាំងអស់ ​(​លើកលែង​តែ​ប្រទេស​មីយ៉ាន់ម៉ា ដែល​យើង​ស្នើសុំ​ឱ្យ​បញ្ជូន​តំណាង​មិន​នយោបាយ​) ​អគ្គលេខាធិការដ្ឋាន​អាស៊ាន​ដៃគូ​សន្ទនា​អាស៊ាន​ចំនួន​ ១០​ អង្គការ​ក្នុង​តំបន់​ និង​អន្តរជាតិ​មួយ​ចំនួន​»​។

លោក ​ថុង ម៉េងដាវិត​ អ្នកសិក្សា​ស្រាវជ្រាវ​នៅ​មជ្ឈមណ្ឌល​មេគង្គ សម្រាប់​ការសិក្សា​យុទ្ធសាស្ត្រ​នៃ​វិទ្យាស្ថាន​ចក្ខុវិស័យ​អាស៊ី ​(AVI)​ ប្រាប់ ​ភ្នំពេញ ​ប៉ុស្តិ៍​ នា​ថ្ងៃទី ​៣ ខែ​តុលា ​ថា​កម្ពុជា​ក្នុង​នាម​ជា​ប្រធាន​អាស៊ាន​បាន​សម្រេច​ចិត្ត​ធ្វើ​ដូច​នេះ​គឺ​កម្ពុជា​មិន​ចង់​បង្ហាញ​ជំហរ​ថា​កម្ពុជា​គាំទ្រ​មេដឹកនាំ​យោធា​មីយ៉ាន់ម៉ា​ ឬ​បោះបង់​មីយ៉ាន់ម៉ា​ដែល​ជា​សមាជិក​អាស៊ាន​នោះ​ដែរ​ ស្រប​ពេល​ដែល​សមាជិក​អាស៊ាន​ដទៃ​ទៀត​ក៏​មិន​ចង់​ឱ្យ​វិបត្តិ​នយោបាយ​នៅ​មីយ៉ាន់ម៉ា​ក្លាយ​ជា​ចំណាប់ខ្មាំង​អាស៊ាន​ផង​ដែរ​។

លោក​ថ្លែង​បន្តថា ​ការ​មិន​លូក​ដៃ​ចូល​នយោបាយ​ផ្ទៃក្នុង​នៃ​ប្រទេស​មីយ៉ាន់ម៉ា​ស្រប​តាម​គោលការណ៍​មជ្ឈភាព​អាស៊ាន​បាន​ធ្វើឱ្យ​អាស៊ាន​មាន​ការលំបាក​ក្នុង​ការ​ជំរុញ​ឱ្យ​មីយ៉ាន់ម៉ា​គោរព​តាម​ចំណុច​កុងសង់ស៊ីស​ទាំង​ ៥​ របស់​អាស៊ាន​ក្នុង​ការជួយ​ដល់​វិបត្តិ​មីយ៉ាន់ម៉ា​។

លោក​ ថុង ម៉េងដាវិត​ ថ្លែង​ថា​៖ «​បើទោះបី​ជា​មាន​ការ​ដោះស្រាយ​បញ្ហា​នយោបាយ​មីយ៉ាន់ម៉ា​មាន​ដំណើរការ​យឺត​ក្តី ក៏​កម្ពុជា​ និង​សមាជិក​អាស៊ាន​ដទៃ​ទៀត​បាន​ផ្តោត​សំខាន់​ និង​ជំរុញ​កាន់​តែខ្លាំង​ក្នុង​ការផ្តល់​ជំនួយ​មនុស្សធម៌​ដល់​ប្រជាជន​មីយ៉ាន់ម៉ា​ដូច​ជា​វ៉ាក់សាំង​កូវីដ- ១៩​ ស្បៀង​អាហារ​ ថ្នាំ​ពេទ្យ​ និង​ស្វះ​ស្វែងរក​ការការពារ​ និង​កន្លែង​សុវត្ថិភាព​ជូន​ដល់​ប្រជាជន​មីយ៉ាន់ម៉ា​»​។

លោក ម៉េងដាវិត​ បាន​ថ្លែង​បន្ថែម​ថា​៖ «​មេដឹកនាំ​យោធា​មីយ៉ាន់ម៉ា ​និង​ក្រុម​ប្រដាប់​អាវុធ​ជនជាតិ​ភាគតិច​ (EAOs) ​គួរ​តែ​បញ្ឈប់​ការវាយ​ប្រហារ​លើ​គ្នា​ទៅវិញ​ទៅ​មក ហើយ​វិលមក​រក​តុ​ចរចា​ស្វែងរក​ដំណោះស្រាយ​រួម​តាម​នយោបាយ​ឈ្នះ​ ឈ្នះ​ដូច​ជា​ការ​ធ្វើ​សម្បទាន​នយោបាយ យោធា ​ធានា​​សុខ​សុវត្ថិភាព​ប្រជាជន​ និង​ការ​បោះ​ឆ្នោត​តាម​លទ្ធិប្រជាធិបតេយ្យ​»​​។

គួរ​បញ្ជក់​ថា​ ប្រទេស​មីយ៉ាន់ម៉ា​បាន​ធ្លាក់​ចូល​ក្នុង​វិបត្តិ​ ក្រោយ​ពី​លោក មីនអ៊ុងឡាំង​ បាន​ធ្វើ​រដ្ឋ​ប្រហារ​ទម្លាក់​រដ្ឋាភិបាល​ស៊ីវិល​ដែល​ដឹកនាំ​​ដោយ​លោកស្រី​ អ៊ុងសាន ស៊ូជី ​កាល​ពី​ថ្ងៃទី​ ១ ​ខែ​កុម្ភៈ​ ឆ្នាំ​ ២០២១​ ដែល​មក​ដល់​ពេល​នេះ​វិបត្តិ​នេះ​បាន​អូស​បន្លាយ​រយៈពេល​ជាង​ ១ ​ឆ្នាំ​មក​ហើយ​​។

កម្ពុជា​ដែល​ធ្វើជា​ម្ចាស់​ផ្ទះ​កិច្ចប្រជុំ​ចង្អៀត​រដ្ឋមន្ត្រី​ការបរទេស​អាស៊ាន​កាល​ពី​ខែកុម្ភៈ​មិន​បាន​អញ្ជើញ​រដ្ឋមន្ត្រី​ការបរទេស​មីយ៉ាន់ម៉ា លោក វុនណា ម៉ោងលីន (Wunna Maung Lwin) ​មក​ចូលរួម​នោះទេ​ ដោយ​សារ​តែ​មាន​ការ​វិវឌ្ឍ​តិចតួច​ក្នុង​ការ​អនុវត្ត​កុងសង់ស៊ីស ​៥​ ចំណុច​នេះ ​តែ​បាន​ស្នើឱ្យ​មីយ៉ាន់ម៉ា​បញ្ជូន​តំណាង​ មិន​នយោបាយ​មក​ជំនួស​វិញ​ហើយ​ក៏​មិន​បាន​ទទួល​ការបញ្ជាក់​ពី​ការចូលរួម​នេះ​ដែរ​។

ក្រសួង​ព័ត៌មាន​បាន​បើក​ដំណើរការ​ចុះឈ្មោះ​អ្នក​សារព័ត៌មាន​ជាតិ​ និង​អន្តរជាតិ​ ដែល​មាន​បំណង​ចុះ​យក​ព័ត៌មាន​ និង​ផ្សព្វផ្សាយ​អំពី​កិច្ចប្រជុំ​កំពូល​អាស៊ាន ​និង​កិច្ច​ប្រជុំ​ពាក់ព័ន្ធ​ចាប់ពី​ថ្ងៃទី​ ៣ ​រហូត​ដល់​ថ្ងៃទី​ ៣១ ​ខែតុលា ដែល​កិច្ច​ប្រជុំ​នេះ​នឹង​ប្រព្រឹត្ត​ទៅ​ចាប់​ពី​ថ្ងៃទី​​ ៨-១៣​ ខែវិច្ឆិកា​។

ជាមួយ​គ្នា​នេះ​ផង​ដែរ​កម្ពុជា​បាន​ចាប់​ផ្តើម​ធ្វើ​ជា​ម្ចាស់​ផ្ទះ​កិច្ចប្រជុំ​ឧត្តមមន្ដ្រី​បរិស្ថាន​អាស៊ាន​លើក​ទី​ ៣៣ ​និង​កិច្ចប្រជុំ​ពាក់ព័ន្ធ​នៅ​លើ​ទឹក​ដី​អង្គរ​ ខេត្ដ​សៀមរាប​ ពី​ថ្ងៃ​ទី​ ៣ ​ដល់​ ថ្ងៃ​ទី​ ៧ ​ខែ​តុលា​៕