ភ្នំពេញៈ លោកនាយករដ្ឋមន្ត្រី ហ៊ុន សែន បញ្ជាក់ថា លោកកំពុងរៀបចំប្រាប់ទៅរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ត្រូវរកវិធីបង្កើនចំនួនគ្រួសារពលរដ្ឋមួយចំនួនដែលរងផលប៉ះពាល់ដោយសារជំងឺកូវីដ ដោយបន្ថែមបណ្ណក្រីក្រឱ្យបានពី ២ ទៅ ៣ ឬពី ៤ ទៅ ៥ ម៉ឺនបណ្ណទៀត ខណៈដែលលោកបានផ្តាំផ្ញើទៅពលរដ្ឋឱ្យឆាប់រុះរើលំនៅឋានខុសច្បាប់ចេញពីតំបន់អង្គរជាមួយនឹងការព្រមានមិនផ្តល់សំណង ពេលចំណាត់ការរបស់អាជ្ញាធរមកដល់។
លោកនាយករដ្ឋមន្រ្ដី បានថ្លែងបែបនេះពេលធ្វើជាអធិបតីក្នុងពិធីប្រគល់សញ្ញាបត្រដល់និស្សិតនៃវិទ្យាស្ថានវ៉ាន់ដាប្រមាណជិត ៤ ពាន់នាក់ កាលពីថ្ងៃទី៣ ខែតុលា។ លោកបានឱ្យដឹងថា បច្ចុប្បន្នរាជរដ្ឋាភិបាលបានចំណាយ ក្នុង ១ ខែជិត ៥០ លានដុល្លារសម្រាប់ប្រជាពលរដ្ឋដែលមានបណ្ណក្រីក្រ។ ប៉ុន្តែរដ្ឋាភិបាលនឹងបន្តចំណាយថែមទៀត ដើម្បីជួយដល់ពលរដ្ឋក្រីក្រ។ លោកលើកឡើងថា អ្នកណាថា រដ្ឋាភិបាល ហ៊ុន សែន អត់លុយ អាហ្នឹងអ្នកឯងអ្នកថា។ តែប្រជាពលរដ្ឋទទួលបានលុយពិតប្រាកដ។
ជាមួយគ្នានេះ លោកនាយករដ្ឋមន្ត្រីបានព្រមានពលរដ្ឋដែលរស់នៅក្នុងតំបន់អង្គរក្នុងសភាពខុសច្បាប់ដែលមិនព្រមចាកចេញ ដើម្បីរង់ចាំតថ្លៃចង់បានសំណងច្រើន និងទទួលបានដីធំនោះថា នឹងមិនអាចទទួលបានសំណងអ្វីឡើយ នៅពេលវេលាដែលចំណាត់ការអាជ្ញាធរមកដល់ ពីព្រោះរដ្ឋាភិបាលក៏រងសម្ពាធពីអង្គការយូណេស្កូដែរ ក្នុងកិច្ចការពាររមណីយដ្ឋានអង្គរនេះ។
លោកបញ្ជាក់ថា៖ «ខ្ញុំសូមជម្រាបជូន ពេលនេះជាពេលដែលរាជរដ្ឋាភិបាលធ្វើការថ្នាក់ថ្នម អង្វរករបងប្អូនឱ្យចាកចេញ។ ខ្ញុំទៅជួបផ្ទាល់ជិត ៤ ពាន់គ្រួសារ បើបូកទាំងអ្នកចេញពីសៀមរាបផង។ ប៉ុន្ដែនៅពេលវេលាមកដល់ ១ សេនក៏អត់ឱ្យហើយបញ្ជូនចេញពីតំបន់នោះតែម្ដងសូមផ្ដាំទៅឱ្យហើយ»។
លោកនាយករដ្ឋមន្រ្ដីផ្ដាំទៅពលរដ្ឋថា សូមកុំសង្ឃឹមទុកមិនព្រមចាកចេញ ដើម្បីតថ្លៃដើម្បីបានសំណងច្រើនឬដីធំឱ្យសោះ និងសូមកុំចាញ់បោកគណបក្សនយោបាយណាមួយ ដែលមកសន្យា ឬធានាថា ផ្ដល់កម្មសិទ្ធិដីធ្លីឱ្យនោះ។
លោកនាយករដ្ឋមន្រ្ដីបានប្តេជ្ញាថែរក្សាតំបន់បេតិកភណ្ឌអង្គរ ដែលកម្ពុជាបានចុះបញ្ជីជាមួយអង្គការយូណេស្កូកាលពីឆ្នាំ ១៩៩២ ដោយកម្ពុជាមិនអាចទុកឱ្យអង្គរវត្ត ត្រូវបានដកចេញពីបេតិកភណ្ឌពិភពលោកឡើយ គឺមានតែគ្រួសារដែលមិនព្រមរុះរើចាកចេញពីលំនៅឋានក្នុងបរិវេណតំបន់អង្គរទេ ដែលត្រូវបានដកចេញ។
បើតាមអាជ្ញាធរជាតិអប្សរាតំបន់រមណីយដ្ឋានអង្គរបានចុះបញ្ជីក្នុងសម្បត្តិបេតិកភណ្ឌពិភពលោកកាលពីឆ្នាំ ១៩៩២ ដោយអង្គការយូណេស្កូ មានទំហំផ្ទៃដីចំនួន ៤០១ គីឡូម៉ែត្រការ៉េជាតំបន់ចាត់ទុកជាសម្បត្តិសាធារណៈរបស់រដ្ឋ។
អ្នកនាំពាក្យសមាគមអាដហុក លោក សឹង សែនករុណា លើកឡើងថា លោកនាយករដ្ឋមន្ត្រី គួរចាត់ឱ្យអាជ្ញាធរពាក់ព័ន្ធព្យាយាមសម្របសម្រួល និងចរចារកដំណោះស្រាយរួម សម្រាប់ពលរដ្ឋដែលមិនទាន់ព្រមចាកចេញក្នុងតំបន់អង្គរទាំងនោះ ចៀសវាងការប្រើចំណាត់ការបង្ខំឱ្យចាកចេញដែលអាចបង្កសោកនាដកម្មក្នុងសង្គមនៅថ្ងៃក្រោយ។ «ខ្ញុំយល់ថា ប្រជាពលរដ្ឋ គាត់ចង់បានដំណោះស្រាយដែលសមស្រប ហើយមិនគួរណាប្រើចំណាត់ការដែលធ្វើឱ្យពួកគាត់រងគ្រោះទេ។ អាជ្ញាធរគួរដោះស្រាយដោយសន្តិវិធីដែលអាចទទួលយកបាន ចៀសវាងបង្កការលំបាកដល់ពួកគាត់ពី ១ ជាន់ហើយទៅ ១ ជាន់ទៀត។ ណាមួយពួកគាត់រស់នៅទីនោះច្រើនឆ្នាំហើយដែរហើយអាជ្ញាធរក៏បានជ្រាបដែរ»។
លោក អំ សំអាត នាយកទទួលបន្ទុកកិច្ចការទូទៅនៃអង្គការលីកាដូ អំពាវនាវដល់រដ្ឋាភិបាលសូមឱ្យព្យាយាមរកដំណោះស្រាយដោយសន្តិវិធីជាមួយប្រជាពលរដ្ឋដែលមិនទាន់ចាកចេញពីតំបន់អង្គរ។ «ខ្ញុំគិតថា រឿងនេះ យើងអាចនៅបន្តជជែកគ្នារកដំណោះស្រាយបានជាជាងប្រើកម្លាំងបណ្តេញពលរដ្ឋចេញ ព្រោះពួកគាត់រស់នៅកន្លែងចាស់យូរលង់ហើយ មានមុខរបរ ហើយគាត់មិនចង់ចាកចេញទេ។ ដូច្នេះយើងត្រូវចរចារកដំណោះស្រាយរួមដោយសន្តិវិធី»។
បើតាមអាជ្ញាធរអប្សរាគិតត្រឹមពាក់កណ្តាលខែកញ្ញា មានប្រជាពលរដ្ឋចំនួន ៥៩៤ គ្រួសារហើយដែលព្រមចាកចេញពីតំបន់អង្គរ ដោយបានស្ម័គ្រចិត្តផ្លាស់ប្តូរលំនៅដែលចែកដោយរដ្ឋនៅតំបន់រុនតាឯក ក្នុងស្រុកបន្ទាយស្រី។ ពលរដ្ឋដែលស្ម័គ្រចិត្តព្រមចាកចេញនឹងទទួលបានដីឡូត៍ក្នុងទំហំទទឹងប្រវែង ២០ ម៉ែត្រ និងបណ្តោយ ៣០ ម៉ែត្រ និងអត្ថប្រយោជន៍ជាច្រើនទៀត ហើយរដ្ឋាភិបាល ក៏បានសន្យាកែប្រែតំបន់នោះទៅជាក្រុង ១ ក្នុងខេត្តសៀមរាបផងដែរ៕