The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋមន្ត្រីធនធានទឹក អំពាវនាវឱ្យពលរដ្ឋ​ចូល​រួម​រក្សា​នូវ​ទំហំច្រក​មុខ​ទឹក​ចាស់ នៅតាមដងស្ទឹងព្រែក​ត្នោត​ ដើម្បី​បញ្ចៀសទឹកជំ​នន់​

រដ្ឋមន្ត្រីធនធានទឹក អំពាវនាវឱ្យពលរដ្ឋ​ចូល​រួម​រក្សា​នូវ​ទំហំច្រក​មុខ​ទឹក​ចាស់ នៅតាមដងស្ទឹងព្រែក​ត្នោត​ ដើម្បី​បញ្ចៀសទឹកជំ​នន់​

Content image - Phnom Penh Post
ទិដ្ឋភាពស្ទឹងព្រែកត្នោតនៅប៉ែកខាងលិចរាជធានីភ្នំពេញ​នៅថ្ងៃទី​៤​តុលា។ រូបថត ក្រសួង​ធនធានទឹក​

រដ្ឋមន្ត្រីធនធានទឹក អំពាវនាវឱ្យពលរដ្ឋ​ចូល​រួម​រក្សា​នូវ​ទំហំច្រក​មុខ​ទឹក​ចាស់ នៅតាមដងស្ទឹងព្រែក​ត្នោត​ ដើម្បី​បញ្ចៀសទឹកជំ​នន់​

ភ្នំពេញៈ រដ្ឋ​មន្ត្រី​ក្រសួង​ធន​ធាន​ទឹក និង​ឧតុ​និយម លោក លឹម គា​នហោ បាន​អំពាវនាវសុំឱ្យ​ពលរដ្ឋ​ដែល​មាន​លំនៅ​ឋាន​នៅ​តាម​បណ្តោយ​ស្ទឹងព្រែ​កត្នោត ក្នុង​ភូមិសាស្រ្ត​ខាង​លិច​រាជ​ធានី​ភ្នំពេញ និង​ខេត្ត​កណ្តាល ចូល​រួម​រក្សា​នូវ​ទំហំ ឬច្រក​មុខ​ទឹក​ចាស់ ដើម្បី​ធានា​ដល់​ការដោះ​ទឹក​ឱ្យ​មាន​ប្រសិទ្ធ​ភាព និង​ទាន់​ពេល​វេលា​ បើពុំនោះ​ទេ រាជ​ធានី​ភ្នំពេញ​នឹងទទួល​រង​ការ​គំរាម​កំហែង​ដោយ​ទឹកជំ​នន់​។

ការ​អំពាវ​នាវ​នេះ បាន​ធ្វើ​ឡើងនៅ​ព្រឹកថ្ងៃ​ទី ៤ ខែតុលា ឆ្នាំ​ ២០២២ ​ក្នុង​អំឡុង​ពេល​លោក​ដឹក​នាំក្រុម​ការងារ​បច្ចេក​ទេស​ ចុះត្រួត​ពិនិត្យ​ស្ថាន​ភាព​ទឹក​ស្ទឹង​ព្រែក​ត្នោត​នៅ​ភូមិ​សាស្រ្តភាគ​ខាង​លិច​រាជធានី​ភ្នំពេញ និង​ខេត្ត​កណ្តាល ព្រម​ទាំង​ពិនិត្យ​អំពី​វឌ្ឍនភាព​ការងារ ​អនុវត្ត​គម្រោង​សាងស​ង់​ប្រព័ន្ធ​ស្រោច​ស្រព និង​ការពារ​ទឹក​ជំនន់​ព្រែក​ត្នោត ស្ថិត​នៅ​រាជ​ធានី​ភ្នំពេ​ញ ខេត្ត​កណ្តាល ខេត្ត​តាកែវ និង​ខេត្តកំព​ង់​ស្ពឺ ដែល​ជាជំនួយ​ហិរញ្ញប្ប​ទាន​ពី​សាធា​រណរដ្ឋ​ប្រជាមានិត​ចិន​។

លោក​ គាន​ហោ បា​នថ្លែងថា បច្ចុប្បន្នការងារ​អនុវត្ត​គម្រោង​សាង​សង់​ប្រព័ន្ធ​ស្រោច​ស្រព និង​ការពារ​ទឹក​ជំនន់​ព្រែក​ត្នោត ក្នុង​ភូមិ​សាស្ត្រ​រាជ​ធានី-ខេត្តទាំង ​៤ សម្រេច​បាន​ ៧០ ​ភាគ​រយហើ​យ។

បើប្រៀប​ធៀប​ស្ថាន​ភាព​កម្ពស់​ទឹក​ស្ទឹង ក្នុង​រយៈ​ពេល​ដូច​គ្នាកាល​ពីឆ្នាំមុ​ន គម្រោង​នេះ​បាន​ចូល​​រួម​ចំណែក​​ជួយ​សម្រួល​លំហូរ​ទឹក​បាន​យ៉ាង​ច្រើន​។

លោក​បាន​បន្ត​ថា បច្ចុប្ប​ន្នស្ថាន​ភាព​ទឹក​តាម​ខ្នង​ទំនប់​សណ្តស្ទឹង​ព្រែក​ត្នោត មិនទាន់​មាន​សភាព​ធ្ងន់​ធ្ងរ​នៅ​ឡើយ​ទេ ព្រោះកម្ពស់​ទឹក​ស្ទឹង​ព្រែក​ត្នោត នៅ​សំណង់​ទ្វារ​ទឹក​ទំនប់​អាង ៧​ មករា នៅព្រឹក​ថ្ងៃ​ទី ៤ ខែ​តុលា​ ទឹក​មាន​កម្ពស់​៤,៨០ ​ម៉ែត្រ​ ទាប​ជាង​កម្រិត​កម្ពស់​ប្រកាស​ឱ្យប្រុង​ប្រយ័ត្ន​ ០,៥០​ ម៉ែត្រ។

លោក​បាន​បញ្ជាក់​ថា៖​ «បើទោះជា​យ៉ាង​នេះ​ក្តី ខ្ញុំសូម​សំណូមពរ​ឱ្យបង​ប្អូន​ប្រជាព​លរដ្ឋ​យើង ​ដែល​មាន​លំនៅ​ឋាន​ នៅ​តាម​បណ្តោយ​ស្ទឹង​ព្រែក​ត្នោត ក្នុង​ភូមិ​សាស្រ្តខាង​លិច​រាជធានី​ភ្នំពេញ និង​ខេត្ត​កណ្តាល មេត្តា​រក្សា​នូវ​ទំហំ ឬច្រក​មុខ​ទឹក​ចាស់ ដើម្បី​ធានា​ដល់​ការ​ដោះទឹក​ឱ្យមាន​ប្រសិទ្ធ​ភាព និង​ទាន់​ពេល​វេលា បើពុំនោះ​ទេ រាជ​ធានី​ភ្នំពេញ​នឹងទទួល​រង​ការ​គំរាម​កំហែង​ដោយ​ទឹកជំ​នន់​យ៉ាង​ធ្ងន់​ធ្ងរ»។

ពាក់​ព័ន្ធ​នឹង​បញ្ហា​គ្រោះទឹ​ក​ជំនន់​នេះផ​ង​ដែរ នៅ​ឯខេត្ត​ពោធិ៍​សាត់ បុរស​ម្នាក់​ឈ្មោះ ម៉ាន​ ភឿក អាយុ​ ៤៨ ​ឆ្នាំ បានលង់​ទឹក​អូរ​ស្លាប់ បន្ទាប់​ពី​គាត់​បាន​ដេញ​ក្របី​ឆ្លង​អូរ​យក​ទៅឃ្វាល នៅ​ចំណុច​ក្រោយ​ផ្ទះ​របស់​គាត់ ស្ថិត​នៅភូមិ​ស្រះ​រុន ឃុំអូរតា​ប៉ោង ស្រុកបាកា​ន កាល​ពីថ្ងៃទី​ ៣ ខែតុលា​ ឆ្នាំ​ ២០២២។ នេះ​បើ​តាម​ការ​ប្រាប់​ឱ្យដឹង​ពី លោក យ៉ែម​ យឿន​ អធិការ​រង ទទួល​ផែន​សន្តិសុខ​នៃ​អធិការដ្ឋាន​នគរ​បាល​​​​​​ស្រុក​បា​កាន។

ចំណែក​អាជ្ញាធរ​ខេត្ត​ព្រះវិហារ នៅ​ព្រឹកថ្ងៃ​ទី ៤ ខែតុលា ឆ្នាំ​ ២០២២ បាន​សម្រេច​បិទ​ការ​ធ្វើ​ចរា​ចរណ៍​រថ​យន្ត​គ្រប់​ប្រភេទ ឆ្លង​កាត់​លើកំ​ណាត់ផ្លូវ​ជាតិ​លេខ ​៩២ ជា​បណ្ដោះ​អាសន្ន ចាប់ពី​ចំណុច​ គីឡូ​ម៉ែត្រ​លេខ​ ១០០ ដល់​ គីឡូ​ម៉ែត្រ​លេខ​ ១០១ ស្ថិត​ក្នុង​ឃុំ​មរកត (ចំណុច​ក្បាល​ដំរី) ស្រុក​ជាំក្សាន្ត​។

លោក សំ លាងទ្រី ប្រធាន​មន្ទីរ​សាធា​រណ​ការ និង​ដឹក​ជញ្ជូន​ខេត្ត​ព្រះវិហារ បាន​ប្រាប់ ​ភ្នំពេញ​ ប៉ុស្តិ៍​ថា ដោយ​សារ​ស្ថាន​ភាព​គ្រោះជំនន់​ទឹក​ភ្លៀង បាន​បន្ត​ជន់ឡើង​ រហូត​ដល់​កម្រិត​ប្រកាស​អាសន្ន ហើយ​បាន​ជន់​លិច​ហូរ​កាត់​ពីលើ​កំណាត់​ផ្លូវជាតិ​លេខ​ ៩២ ក្នុង​ភូមិ​សាស្ត្រ​ខាងលើ​នេះ ដែល​ចាំបាច់​ត្រូវ​ធ្វើការ​ហាម​ឃាត់​​ការធ្វើ​ចរាចរណ៍​រថ​យន្ត​គ្រប់​ប្រភេទ​ឆ្លង​កាត់​ជាបណ្ដោះ​អាសន្ន ដើម្បី​ថែរក្សា​ផ្លូវថ្នល់ ស្ពាន កុំឱ្យ​បាក់​ស្រុត និង​ធានា​ដល់ការ​ធ្វើច​រាចរ​ណ៍ ប្រកប​ដោយ​សុវត្ថិ​ភាព​។

លោក​បាន​បញ្ជាក់​ថា​៖ «ក្នុង​ស្ថាន​ភាព​ទឹក​ជំនន់​នាពេល​បច្ចុប្បន្ន ការ​ធ្វើ​ចរាចរណ៍ឆ្លង​កាត់​លើ​កំណាត់​ផ្លូវ​ជាតិ​លេខ ​៩២ ក្នុង​ភូមិ​សាស្ត្រ​ខាង​លើ​នេះ អាច​នឹង​បង្កឱ្យ​មាន​គ្រោះថ្នាក់​ដល់អ្នក​ដំណើរ​ និង​ខូច​ខាត​ផ្លូវ​កាន់​តែ​ធ្ងន់​ធ្ងរ ដោយសារ​មាន​ទឹក​ហូរ​កាត់​ពីលើផ្លូវ​។ ដូច្នេះ​យើង​ចាំបាច់​ត្រូវផ្អាក​ការ​ធ្វើ​ចរា​ចរណ៍​ជា​បណ្ដោះ​អាសន្ន រហូត​ដល់​ទឹក​ស្រក​ »។

លោក ចាប កុយ ប្រធាន​មន្ទី​រ​ធន​ធាន​ទឹក​និង​ឧតុនិយម ខេត្ត​ព្រះវិហារ បាន​ប្រាប់​ ភ្នំពេញ ​ប៉ុស្តិ៍ថា កម្ពស់​ទឹក​ក្នុង​អាង​រក្សា បាន​ហក់​ឡើង​ដល់​កម្រិត ​៤៦,៨២​ ម៉ែត្រ ធៀប​នឹង​នីវ៉ូស​មុទ្រ ខណៈ​កម្ពស់​ទឹក​ស្ទឹង​សែន​នៅ​ក្នុង​ខេត្តនេះ​បាន​ជន់​ឡើង​ដល់​កម្រិត ១៤,៤៣ ​ម៉ែត្រ ខ្ពស់​ជាង​កម្ពស់​ទឹក​ ដែល​ត្រូវ​ប្រកាស​ឱ្យប្រុង​ប្រយ័ត្ន ២,០៧​ ម៉ែត្រ​។

លោក​បាន​បញ្ជាក់​ថា៖ «​ក្នុង​ស្ថាន​ភាព​នេះ ធ្វើ​ឱ្យបណ្ដា​តំបន់​ផ្ទៃរង​ទឹក​ភ្លៀង និង​ទំនាប​ជាប់​មាត់​ទឹក ដែល​ស្ថិត​នៅ​ផ្នែក​ខាង​ក្រោម​នៃ​ទំនប់​អាង​ទឹក​រក្សា និងដង​ស្ទឹង​សែន​ទទួល​រង​ការជន់​លិច​ជា​បន្ត​ន្ទាប់»។

បើតាម​លោក ​ចាប កុយ ស្ថាន​ភាព​អាកាស​ធាតុ នៅក្នុង​​ខេត្ត​ព្រះវិហារ មា​នសភាព​ធូរស្រាល​ឡើង​វិញ ដោយ​មាន​ភ្លៀង​ធ្លាក់​ក្នុង​កម្រិត​ខ្សោយ​។

យ៉ាង​ណា​ក៏ដោយ ក្រសួង​ធន​ធាន​ទឹក​និង​ឧតុ​និយម នៅ​ព្រឹកថ្ងៃ​ទី​ ៤ ខែ​តុលា ឆ្នាំ​ ២០២២ បាន​បន្ត​ព្រមាន​ថា ភ្លៀង​នឹង​បន្ត​ធ្លាក់​ក្នុង​កម្រិត​ពីខ្សោយទៅ​ខ្លាំង នឹង​មាន​លាយឡំដោយ​ខ្យល់​កន្ត្រាក់ និង​ផ្គររន្ទះ នៅ​ក្នុង​តំបន់​ទំនាប​កណ្តាល​ជាប់​ព្រំ​ប្រទល់​​ប្រទេស​វៀត​ណាម និង​តំបន់​ជួរភ្នំ​និង​ខ្ពង់​រាបភាគ​ឦ​សាន រួម​ទាំង​តំបន់​ទំនាប​ជាប់​មាត់​សមុទ្រ​។

ការ​ព្រមាន​នេះ​បាន​ធ្វើ​ឡើង បន្ទាប់​ពីក្រុម​មន្ត្រី​ជំនាញ​ឧតុនិយម បានពិនិត្យ​ឃើញថា​ ប្រព័ន្ធ​សម្ពាធ​ទាប ដែល​កើត​មាន​ជាថ្មី បាន​បន្ត​អូស​កាត់​លើ​ប្រទេស​កម្ពុជា ជាមួយ​នឹង​ខ្យល់មូសុង​និរតី​ខ្សោយ។

ទន្ទឹម​នឹង​នេះ មាន​ការជួប​ប្រសព្វ​គ្នា រវាង​ទ្រនុង​សម្ពាធ​ខ្ពស់ រុញ​ចុះ​ពី​ប្រទេស​ចិន (​ភាគ​ខាងជើង​) និង​សម្ពាធ​ទាប ដែល​រុញ​ពីភាគខាង​ត្បូង​ ដែលស្ថានភាពនេះ នឹង​ធ្វើឱ្យ​ប្រទេស​កម្ពុជាមាន​ភ្លៀង​ធ្លាក់ ក្នុង​កម្រិត​ពី​តិច​ទៅ​បង្គួរ លាយឡំ​ទៅ​ដោយ​ផ្គររន្ទះ និង​ខ្យល់​កន្ត្រាក់​ ជាពិសេស​នៅក្នុង​តំបន់​វាលទំនាប​ជាប់​ព្រំប្រទល់​​ប្រទេស​វៀត​ណាម ដែល​ទាម​ទារ​ឱ្យមាន​ការ​ប្រុង​ប្រយ័ត្ន​ខ្ពស់៕

វីដេអូ៖

អត្ថបទគួរចាប់អារម្មណ៍