ក្នុងអាណត្តិទី ៦ នេះ រាជរដ្ឋាភិបាលកម្ពុជាបានដាក់ចេញយុទ្ធសាស្ត្រចតុកោណដំណាក់កាលទី ៤ ដោយបានចាត់ទុកការអភិវឌ្ឍធនធានមនុស្ស ជាអាទិភាពទី ១ ។ ដើម្បីសម្រេចឱ្យបាននូវសមិទ្ធផលវិស័យអប់រំរយៈពេល ៥ ឆ្នាំនេះ ក្រសួងអបរំ យុវជន និងកីឡា បានដាក់ចេញនូវយុទ្ធសាស្ដ្រកំណែទម្រង់វិស័យអប់រំ យុវជន និងកីឡា ២០១៨-២០២៣ ដោយផ្តល់អាទិភាពលើ ៧ ចំណុច៖ (១) ការយកចិត្តទុកដាក់លើគ្រូ-បង្រៀន (២) ការពង្រីកវិសាលភាពសាលារៀនគ្រប់កម្រិត (៣) ការពង្រឹងអធិការកិច្ចគ្រប់ជ្រុងជ្រោយលើការគ្រប់គ្រងសាលារៀន (៤) ការជំរុញការអប់រំបច្ចេកទេសនៅមធ្យមសិក្សាទុតិយភូមិ (៥) ការអប់រំបំណិនឱ្យស្របតាមទីផ្សារការងារ (៦) ការអភិវឌ្ឍកម្មវិធីសិក្សា និងសៀវភៅសិក្សាគោលគ្រប់ជ្រុងជ្រោយ និង (៧) ការត្រៀមប្រកួតកីឡាស៊ីហ្គេមឆ្នាំ ២០២៣។ ដូចនេះ ខ្លឹមសារក្នុងអត្ថបទនេះ នឹងផ្ដោតសំខាន់ទៅលើ យុទ្ធសាស្ដ្រកំណែទម្រង់វិស័យអប់រំ យុវជន និងកីឡា និង សមិទ្ធផលវិស័យអប់រំដែលសម្រេចបានរយៈពេល ៥ ឆ្នាំ (២០១៨-២០២២)។
យុទ្ធសាស្ដ្រកំណែទម្រង់វិស័យអប់រំ យុវជន និងកីឡា ២០១៨-២០២៣ មានចក្ខុវិស័យ កសាង និងអភិវឌ្ឍធនធានមនុស្សប្រកបដោយគុណភាព និងគុណធម៌ប្រសើរបំផុតលើគ្រប់ផ្នែក ដើម្បីកសាងសង្គមកម្ពុជាឱ្យក្លាយជាសង្គមរីកចម្រើនផ្អែកលើចំណេះដឹង និងចំណេះធ្វើជាមូលដ្ឋាន។ យុទ្ធសាស្ដ្រកំណែទម្រង់នេះមានបេសកកម្ម ដឹកនាំ គ្រប់គ្រង និងអភិវឌ្ឍវិស័យអប់រំ យុវជន និងកីឡានៃព្រះរាជាណាចក្រកម្ពុជាឱ្យឆ្លើយតបទៅនឹងតម្រូវការអភិវឌ្ឍសេដ្ឋកិច្ច សង្គមកិច្ច វប្បធម៌របស់កម្ពុជា និងការរីកចម្រើននៅក្នុងតំបន់ និងសកលលោក។
ក្រសួងអប់រំ យុវជន និងកីឡាបានដាក់ចេញនូវយុទ្ធសាស្ត្រកំណែទម្រង់វិស័យអប់រំ យុវជន និងកីឡាមាន ៤ ចំណុច៖ យុទ្ធសាស្ដ្រកំណែទម្រង់ការគ្រប់គ្រងអប់រំ យុទ្ធសាស្ដ្រកំណែទម្រង់ឧត្តមសិក្សា យុទ្ធសាស្ដ្រកំណែទម្រង់ការអភិវឌ្ឍយុវជន និងយុទ្ធសាស្ដ្រកំណែទម្រង់ការអភិវឌ្ឍវិស័យអប់រំកាយ និងកីឡា ដោយនៅក្នុងនោះ យុទ្ធសាស្ដ្រកំណែទម្រង់ការគ្រប់គ្រងអប់រំផ្ដោតលើ ៤ ចំណុច៖ (១) កំណែទម្រង់ការគ្រប់គ្រងការសិក្សា ផ្តោតលើរង្វាយតម្លៃការសិក្សារបស់សិស្សជាប្រចាំ ការកែលម្អវិធីសាស្ត្របង្រៀន និងការដាក់បញ្ចូលភាពជាពលរដ្ឋមានគុណភាពក្នុងកម្មវិធីសិក្សា និងសៀវភៅសិក្សាគោល (២) កំណែទម្រង់ការគ្រប់គ្រងរដ្ឋបាលផ្តោតលើការធានាការចូលរួមរបស់មាតាបិតាសិស្ស និងសហគមន៍មូលដ្ឋាន ការអនុវត្តការគ្រប់គ្រងតាមសាលារៀន និងការអនុវត្តគោលនយោបាយអប់រំ និងផែនការយុទ្ធសាស្ត្រវិស័យអប់រំ (៣) កំណែទម្រង់ការគ្រប់គ្រងហិរញ្ញវត្ថុ ផ្តោតលើការបង្កើនស្វ័យភាព និងគណនេយ្យភាព ហិរញ្ញវត្ថុនៅសាលារៀន ការធ្វើសវនកម្មថវិកាអប់រំជាទៀងទាត់ និងការបង្កើនការបែងចែកថវិកា ផ្សារភ្ជាប់នឹងគោលនយោបាយអប់រំ និង (៤) កំណែទម្រង់ការគ្រប់គ្រងធនធានមនុស្ស ផ្តោតលើការបណ្តុះបណ្តាលដោយផ្តោតលើវិធីសាស្ត្របង្រៀន និងកម្មវិធីបំប៉ននៅនឹងកន្លែង ការបង្កើនការបណ្តុះបណ្តាលគ្រូបង្រៀន និងការអនុវត្តការវាយតម្លៃការបំពេញការងាររបស់បុគ្គលិកអប់រំ។
ជាមួយគ្នានេះដែរ យុទ្ធសាស្ដ្រកំណែទម្រង់ឧត្តមសិក្សាផ្ដោតលើ ៥ ចំណុច៖ (១) ពិនិត្យលទ្ធភាពប្រែក្លាយគ្រឹះស្ថានឧត្តមសិក្សាសាធារណៈទៅជាគ្រឹះស្ថានឧត្តមសិក្សាសាធារណៈរដ្ឋបាល (២) ផ្តល់ស្វ័យភាពដល់គ្រឹះស្ថានឧត្តមសិក្សាសាធារណៈក្នុងការគ្រប់គ្រងហិរញ្ញវត្ថុ និងធនធានមនុស្ស (៣) រៀបចំក្របខ័ណ្ឌកម្មវិធីសិក្សាឱ្យឆ្លើយតបទៅនឹងការវិវត្តឧស្សាហកម្ម (៤) ជំរុញការស្រាវជ្រាវ និងលើកទឹកចិត្តការបង្កើតមជ្ឈមណ្ឌលស្រាវជ្រាវឧត្តមភាពនៅតាមគ្រឹះស្ថានឧត្តមសិក្សាសាធារណៈ និង (៥) វាយតម្លៃគុណភាពអប់រំផ្ទៃក្នុង និងវាយតម្លៃគុណភាពអប់រំនៅតាមគ្រឹះស្ថានឧត្តមសិក្សា។
ផ្អែកក្រោមយុទ្ធសាស្ដ្រទាំង ២ នេះ ក្រសួងអប់រំ យុវជន និងកីឡា សម្រេចបាននូវសមិទ្ធផលអប់រំជាច្រើនដែលគួរជាទីកត់សម្គាល់ក្នុងរយៈពេល ៥ ឆ្នាំនេះ។ គិតត្រឹមឆ្នាំសិក្សា ២០២១-២០២២ សាលាមត្តេយ្យសិក្សា និងសាលារៀនចំណេះទូទៅទាំងសាធារណៈ និងឯកជនមានចំនួន ១៨ ៤៣០ និងគ្រឹះស្ថានឧត្តមសិក្សានៅទូទាំងប្រទេសមានចំនួន ១៣០។ ក្រសួងអប់រំ យុវជន និងកីឡាបានសាងសង់អគារសិក្សាចំនួន ៤២៧ ខ្នង បានជួសជុលអគារសិក្សាចំនួន ៣៩៥ ខ្នង និងបានសាងសង់ហេដ្ឋារចនាសម្ព័ន្ធថ្មីៗ ដូចជាបន្ទប់ពិសោធន៍ បណ្ណាល័យ អន្តេវាសិកដ្ឋាន និងបន្ទប់កុំព្យូទ័របំពាក់បន្ទះសូឡា ផ្ទះសំណាក់គ្រូ ផ្ទះសំណាក់សិស្ស បង្គន់អនាម័យ អណ្តូងទឹក ផ្លូវបេតុង របងសាលារៀន តារាងបាល់បោះ តារាងបាល់ទាត់ និងទីលានហាត់កីឡានៅតាមបណ្ដាខេត្តផ្សេងៗ។
គិតមកត្រឹមថ្ងៃទី ៤ ខែមេសា ឆ្នាំ ២០២២ សំណង់អគារសិក្សា ដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន មាន ៤ ៤៨៧ ខ្នង ស្មើនឹង ២៨ ៨១០ បន្ទប់។
ក្នុងការកែទម្រង់វិស័យអប់រំ ក្រសួងអប់រំ យុវជន និងកីឡា បាននិងបន្ដផ្តោតលើអាទិភាពសំខាន់ៗដូចជា៖ ការពង្រីកសេវាអប់រំកុមារតូច ការបង្កើនការចូលរៀននៅបឋមសិក្សា ការបង្កើនការចូលរៀននៅមធ្យមសិក្សាបឋមភូមិ ការបង្កើនការចូលរៀននៅមធ្យមសិក្សាទុតិយភូមិ ការពង្រីកវិសាលភាពនៃការអប់រំពហុភាសាដល់កុមារជនជាតិដើមភាគតិច ការលើកកម្ពស់ការអប់រំឌីជីថល សេដ្ឋកិច្ចឌីជីថល សហគ្រិនភាព ការដាក់ឱ្យដំណើរការការសិក្សាពីចម្ងាយ និងការសិក្សាតាមប្រព័ន្ធអេឡិចត្រូនិកក្នុងវិបត្តិកូវីដ ១៩ ក៏ដូចជាការផ្ដល់អាហារូបករណ៍ដល់សិស្សក្រីក្រចំនួន ២៦២ ១៦៣ នាក់ ផងដែរ។
ស្របតាមយុទ្ធសាស្ដ្រកំណែទម្រង់ការគ្រប់គ្រងអប់រំ ក្រសួងអប់រំ យុវជន និងកីឡាបានពង្រឹងការគ្រប់គ្រងតាមសាលារៀន ការបង្កើតសាលារៀនជំនាន់ថ្មីចំនួន ១០ ការបណ្តុះបណ្តាលគ្រូអំពីវិធីសាស្ត្របង្រៀនតាមបែបស្ថាបនានិយម វិធីរិះរក ការសិក្សាបែបសហការ និងប្រើប្រាស់បច្ចេកវិទ្យាព័ត៌មានក្នុងការបង្រៀន និងរៀនរៀបចំបន្ទប់ពិសោធន៍វិទ្យាសាស្ត្រតាមមុខវិជ្ជា បន្ទប់កុំព្យូទ័រ និងបំពាក់កុំព្យូទ័រ បន្ទប់មុខវិជ្ជា បន្ទប់គ្រូបង្រៀន និងបណ្ណាល័យសតវត្សរ៍ទី ២១ បន្ទប់សង្គ្រោះបឋម អប់រំបំណិនជីវិត ការអប់រំស្ទែម ក្រុមប្រឹក្សាអាជីព ក្រុមប្រឹក្សាយុវជន និងក្លិបសិក្សាលើមុខវិជ្ជាគណិតវិទ្យា អក្សរសាស្ត្រខ្មែរ រូបវិទ្យា គីមីវិទ្យា ជីវវិទ្យា សារព័ត៌មាន បច្ចេកវិទ្យាព័ត៌មាន និងប្រវត្តិវិទ្យា ការលើកកម្ពស់ការសិក្សាមុខវិជ្ជាស្ទែម ដើម្បីឆ្លើយតបទៅនឹងទីផ្សារការងារ ការលើកកម្ពស់កម្មវិធីអំណាន និងគណិតវិទ្យាថ្នាក់ដំបូង ការលើកកម្ពស់ការអប់រំបច្ចេកទេស ការអប់រំបំណិនជីវិត និងការប្រឹក្សាអាជីព ក៏ដូចជាការលើកកម្ពស់តម្លៃវិជ្ជាជីវៈគ្រូបង្រៀន តាមរយៈការបណ្ដុះបណ្ដាលគ្រូបង្រៀន នៅតាមវិទ្យាស្ថានគរុកោសល្យគ្រប់រាជធានី- ខេត្ត។
ក្រសួងអប់រំ យុវជន និងកីឡាក្នុងយន្តការកំណែទម្រង់វិស័យអប់រំ នៅកម្ពុជា បានអនុវត្តយ៉ាងខ្ជាប់ខ្ជួននូវយុទ្ធសាស្ដ្រកំណែទម្រង់វិស័យអប់រំ យុវជន និងកីឡា ២០១៨-២០២៣ ក៏ដូចជាបានសហការយ៉ាងស្វាហាប់ជាមួយដៃគូអភិវឌ្ឍន៍ ក្នុងការបង្កើតគម្រោង និងសកម្មភាពលើកកម្ពស់ និងអភិវឌ្ឍវិស័យអប់រំគ្រប់ប្រភេទ និងការផ្ដល់នូវថវិកា ដើម្បីគាំទ្ររាល់សកម្មភាពទាំងឡាយផងដែរ។
ក្នុងរយៈពេល ៥ ឆ្នាំនេះ ក្រសួងអប់រំ យុវជន និងកីឡាបានបង្ហាញឱ្យឃើញនូវសមិទ្ធផលនានាគ្រប់អនុវិស័យ ជាពិសេសវិស័យអប់រំ ដែលស្ថិតក្រោមយន្ដការនៃយុទ្ធសាស្ដ្រកំណែទម្រង់វិស័យអប់រំ យុវជន និងកីឡា ២០១៨-២០២៣ នេះ។ យុទ្ធសាស្ដ្រកំណែទម្រង់នេះ ក៏អាចជាផែនទីបង្ហាញផ្លូវ សម្រាប់ការបំពេញចន្លោះខ្វះខាតណាមួយ ឬជាទិសដៅបន្ទាប់នៅឆ្នាំក្រោយ ក្នុងការអភិវឌ្ឍវិស័យអប់រំនៅកម្ពុជា៕