ភ្នំពេញៈ សហភាពសហព័ន្ធយុវជនកម្ពុជា (សសយក) នឹងរៀបចំកម្មវិធី «សមាធិរំឭកដួងព្រះវិញ្ញាណក្ខន្ធ» នៅថ្ងៃទី ១៥ ខែតុលា នៅសួនច្បារខាងមុខព្រះបរមរាជវាំង ដើម្បីសុខភាពផ្លូវចិត្ត និងរំឭកគម្រប់ខួប ១០ ព្រះវស្សា នៃការយាងសោយទិវង្គត និងគំរូវីរភាព នៃព្រះបរមរតនកោដ្ឋ។នេះបើតាមក្រុមការងារផ្សព្វផ្សាយនៃ (សសយក)។
លោក ទិត ច័ន្ទតារា ក្រុមការងារផ្សព្វផ្សាយ (សសយក) បានឱ្យដឹងនៅថ្ងៃទី ៥ ខែតុលាថា តាមការរំពឹងទុកចំនួនអ្នកចូលរួមក្នុងកម្មវិធីនេះអាចមានចំនួនប្រមាណ ២ ៥៦៦ អង្គ/នាក់ ដែលរួមមានទាំងព្រះសង្ឃ និងមហាជនចូលរួមផងដែរ។
លោកប្រាប់ថា ថ្ងៃដំបូងនៃការចាប់ផ្តើមផ្សព្វផ្សាយមានអ្នកចុះឈ្មោះចូលរួមជាប្រមាណ ១០ ភាគរយ នៃចំនួនដែល (សសយក) បានរំពឹងទុកនោះ។ លោកថា ការចូលរួមកម្មវិធីនេះបងប្អូនប្រជាពលរដ្ឋអាចចូលរួមបានដោយមិនកំណត់វ័យក្មេងចាស់យ៉ាងណានោះទេ សំខាន់បានចុះឈ្មោះចូលរួម ព្រោះការចុះឈ្មោះនេះហើយដែលអំណោយផលដល់ក្រុមការងារ (សសយក) ងាយស្រួលរៀបចំ។
លោកថ្លែងថា៖ «យើងធ្វើនេះទី១ គឺដើម្បីសេចក្តីសុខផ្លូវចិត្តរបស់យើងដែរតាមការសមាធិ ហើយមួយទៀតក៏ជាការចូលរួមនឹករឭកទៅដល់អង្គព្រះមហាក្សត្រព្រះបរមរតនកោដ្ឋរបស់យើងផងដែរ អ៊ីចឹងក៏សូមអំពាវនាវឱ្យមានការចូលរួមតាមរយៈការចុះឈ្មោះអនឡាញផង ដោយផ្ទាល់ផង សង្ឃឹមថា អាចជួយសម្រួលដល់ការចូលរួមរបស់បងប្អូន»។
សេចក្តីជូនដំណឹងរបស់ (សសយក) ចុះថ្ងៃទី ៣ ខែតុលាបានឱ្យដឹងថា កម្មវិធី «សមាធិរំឭកដួងព្រះវិញ្ញាណក្ខន្ធ» ត្រូវបានរៀបចំឡើងក្នុងគោលបំណង៖ (១) ចូលរួមរំឭកគម្រប់ខួប ១០ ព្រះវស្សានៃការយាងសោយព្រះទិវង្គតរបស់ព្រះករុណា ព្រះមហាវីរក្សត្រ ព្រះបរម រតនកោដ្ឋ (២) បង្ហាញពីទឹកចិត្ត និងស្មារតីនៃការចងចាំចំពោះព្រះរាជបណ្តាំដ៏ថ្លៃថ្លា និងពោរពេញដោយអត្ថន័យទូន្មានដែលបានឆ្លាក់លើផ្ទាំងសិលា ដែលជាព្រះរាជឱង្កា របស់ព្រះករុណា ព្រះមហាវីរក្សត្រ ព្រះបរម រតនកោដ្ឋ ដែលបានឆ្លាក់លើផ្ទាំងសិលានៅសួនច្បារ ព្រះរាជបណ្តាំ។
និង (៣) រំឭកពីគំរូវីរភាព និងការសម្តែងនូវមនោសញ្ចេតនាកតញ្ញកតវេទីប្រកបដោយការគោរពដ៏ខ្ពង់ខ្ពស់ថ្វាយព្រះមហាករុណាទិគុណដ៏ប្រសើរថ្លៃថ្លា ប្រកបដោយសេចក្តីនឹករឭកសោកស្តាយរកអ្វីប្រៀបផ្ទឹមពុំបានជាមួយនឹងសេចក្តីអំណរព្រះរាជគុណជាអនេកអនគ្ឃគ្មានថ្ងៃបំភ្លេចបាន។
កម្មវិធីសមាធិរំឭកជួងព្រះវិញ្ញាណក្ខន្ធ ជាកម្មវិធីដែលមានព្រះសង្ឃ និងពុទ្ធបរិស័ទនិមន្ត និងអញ្ជើញចូលរួមពីគ្រប់ទិសទី ដើម្បីថ្វាយគ្រឿងសក្ការៈ និងធ្វើសមាធិសូត្រសត្តប្បករុណាភិធម្មបង្សុកូលឧទ្ទិស មហាព្រះរាជកុសលថ្វាយដួងព្រះវិញ្ញាណក្ខន្ធ ព្រះបរមរតនកោដ្ឋ សូមព្រះវិញ្ញាណក្ខន្ធព្រះអង្គបានយាងគង់ ប្រថាប់សោយសុខក្នុងព្រះបរមសុគតិភពនាឋានព្រះបរមសុខដ៏ខ្ពង់ខ្ពស់។
ប្រភពដដែលបានឱ្យដឹងថា ព្រះសង្ឃ និងពុទ្ធបរិស័ទ សមាជិក សមាជិកា (សសយក) សាធារណជន យុវជន យុវនារី សិស្សានុសិស្ស និស្សិត និងអ្នកសារព័ត៌មានជាតិ និងអន្តរជាតិ (ដោយមានការចុះឈ្មោះដើម្បីចូលរួមទុកជាមុន) នឹងមកចូលរួមក្នុងកម្មវិធីនេះ។
សហភាពសហព័ន្ធយុវជនកម្ពុជា បានឱ្យដឹងទៀតថា មានវិធីមួយចំនួនដែលអ្នកចង់ចូលរួមក្នុងកម្មវិធីនេះ អាចចុះឈ្មោះ បាន។កម្មវិធីនោះមានដូចជា ការចុះឈ្មោះតាមប្រព័ន្ធអនឡាញតាមរយៈគេហទំព័រ www.uyfcsamati.
com ការចុះឈ្មោះ ដោយផ្ទាល់នៅទីតាំងក្នុងអគារ The KAMPUS ជាន់ផ្ទាល់ដី (ជាន់ G) រៀងរាល់ម៉ោងធ្វើការ ដែលមានអាសយដ្ឋានលើផ្លូវព្រះមុនីវង្ស រាជធានីភ្នំពេញ (ត្រង់ផ្លូវបំបែកក្បាលថ្នល់) និងចុះឈ្មោះ ឬស្វែងរកព័ត៌មានបន្ថែមដោយទាក់ទងទៅកាន់ទូរស័ព្ទលេខ ០៦១ ៥១៤ ៤៤៤ ឬ ០៩២១០៥៤៥២៕