.jpg)
លោកលី ធុជ ពេលថ្លែងទៅកាន់អ្នកចូលរួម ក្នុងពិធីនៅខេត្តត្បូងឃ្មុំ នៅថ្ងៃទី៥តុលា។ រូបថត អាជ្ញាធរមីន
ត្បូងឃ្មុំៈការងារបោសសម្អាតមីន និងកម្ទេចគ្រាប់មីន បានកើតចេញពីកិច្ចខិតខំប្រឹងប្រែង និងការយកចិត្តទុកដាក់របស់រាជរដ្ឋាភិបាល ក្នុងការដោះស្រាយបញ្ហាគ្រាប់មីន និងសំណល់ជាតិផ្ទុះពីសង្រ្គាមនៅសេសសល់ក្រោយសង្រ្គាម។ នេះជាការថ្លែងរបស់លោកទេសរដ្ឋមន្ត្រីលី ធុជ អនុប្រធានទី១ នៃអាជ្ញាធរមីន។
លោក លី ធុជ បានថ្លែងក្នុងពេលចុះពិនិត្យសកម្មភាពបោសសម្អាតមីន ក្រោមគម្រោង «សម្តេចតេជោសម្រាប់សកម្មភាពមីន» “ផ្តល់ដីសុវត្ថិភាព បង្កើតស្នាមញញឹម" និងជួបជាមួយនឹងកងកម្លាំងបោសសម្អាតមីននៃមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និងកាកសំណល់សង្រ្គាម (NPMEC) និងប្រជាពលរដ្ឋស្ថិតក្នុងឃុំជាំក្រវៀន ស្រុកមេមត់ ខេត្តត្បូងឃ្មុំ នាថ្ងៃទី ៥ ខែតុលា។
លោក លី ធុជ មានប្រសាសន៍ថា ៖ «ការងារបោសសម្អាតមីន នៅខេត្តត្បូងឃ្មុំ ក្រោមគម្រោងសម្តេចតេជោសម្រាប់សកម្មភាពមីន សម្រេចបាន ៧០% នៃផែនការហើយ បន្ទាប់ពីបានចាប់ផ្តើមអនុវត្តគម្រោង និងបើកការដ្ឋានបោសសម្អាតមីនកាលពីខែកក្កដា កន្លងមក»។
យោងតាមអាជ្ញាធរមីន ក្រោមគម្រោង «សម្តេចតេជោ» ការងារបោសសម្អាតមីននៅខេត្តត្បូងឃ្មុំ សម្រេចបានប្រមាណ ៧០% នៃផែនការបោសសម្អាតលើផ្ទៃដីសរុប ៤ ៦៨៧ ៣១៧ ម៉ែត្រក្រឡា ស្មើនឹង ៩០ ចម្ការមីន ដោយបានរកឃើញ និងកម្ទេចគ្រាប់មីនប្រឆាំងមនុស្សចំនួន ៧៦ គ្រាប់ មីនប្រឆាំងរថក្រោះ ១៥ គ្រាប់ និងយុទ្ធភ័ណ្ឌមិនទាន់ផ្ទុះ ១ ០៨០ គ្រាប់។
លោក លី ធុជ មានប្រសាសន៍ថា ៖ «ការងារបោសសម្អាតមីន និងកម្ទេចគ្រាប់នាថ្ងៃនេះ បានកើតចេញពីកិច្ចខិតខំប្រឹងប្រែង និងការយកចិត្តទុកដាក់របស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោនាយករដ្ឋមន្រ្តី ក្នុងការដោះស្រាយបញ្ហាគ្រាប់មីន និងសំណល់ជាតិផ្ទុះពីសង្រ្គាមនៅសេសសល់ក្រោយសង្រ្គាម ដែលធនធានទាំងនេះ បានមកពីការបំផុសឱ្យមានចលនាជាតិលុបបំបាត់គ្រាប់មីនឱ្យអស់ក្នុងឆ្នាំ ២០២៥ របស់សម្តេចតេជោ»។
ខេត្តត្បូងឃ្មុំជាខេត្តអាទិភាពក្នុងការអនុវត្តគម្រោងសម្តេចតេជោសម្រាប់សកម្មភាពមីន «ផ្តល់ដីសុវត្ថិភាព បង្កើតស្នាមញញឹម» ដើម្បីប្រកាសជាខេត្តអស់មីន ក្នុងរយៈពេល ៦ ខែ គិតចាប់ពីថ្ងៃចាប់ផ្តើមអនុវត្តគម្រោងពីខែកក្កដាមក។
ខេត្តត្បូងឃ្មុំក៏ជាខេត្តប្រវត្តិសាស្ត្រ ដែលលោកនាយករដ្ឋមន្រ្តី ហ៊ុន សែន បានសម្រេចចិត្ត និងពលីសាច់ស្រស់ ឈាមស្រស់ ដើម្បីរំដោះប្រទេសជាតិ និងសង្គ្រោះប្រជាពលរដ្ឋចេញពីរបបប្រល័យពូជសាសន៍កាលពីឆ្នាំ ១៩៧៧ ហើយវាក៏ជាខេត្តមួយដែលរងផលប៉ះពាល់ច្រើន ដោយសារគ្រាប់មីន និងសំណល់ជាតិផ្ទុះពីសង្គ្រាម។
ការអនុវត្តដំណាក់កាលដំបូងនៃគម្រោងនេះសម្រាប់សកម្មភាពមីននឹងត្រូវបោសសម្អាតគ្រាប់មីនឱ្យអស់ក្នុងរយៈពេល ០៦ ខែក្នុងខេត្តចំនួន ០៣ និងស្រុក/ក្រុងចំនួន ០៩។ ខេត្ត និងក្រុង/ស្រុកទាំងនោះមាន៖ ខេត្តត្បូងឃ្មុំ ខេត្តកំពត និងខេត្តតាកែវ រីឯក្រុង/ស្រុក ០៩ មាន ស្រុកស្រែអំបិល (ខេត្តកោះកុង) ស្រុកឆ្លូង ស្រុកចិត្របុរី (ខេត្តក្រចេះ) ក្រុងព្រះវិហារ ស្រុកត្បែងមានជ័យ (ខេត្តព្រះវិហារ) ស្រុកឧត្តុង្គ (ខេត្តកំពង់ស្ពឺ) ក្រុងសិរីសោភ័ណ្ឌ ស្រុកមង្គលបុរី (ខេត្តបន្ទាយមានជ័យ) និងស្រុកចុងកាល់ (ខេត្តឧត្តរមានជ័យ)។
សូមបញ្ជាក់ថា ក្រោមចលនាជាតិរបស់លោកនាយករដ្ឋមន្ត្រីមានប្រជាជនគ្រប់ទិសទីបានគាំទ្រ និងចូលរួមយ៉ាងផុសផុលបរិច្ចាគវិភាគទានផ្ទាល់ខ្លួន ទទួលបានថវិកាប្រមាណជាង ២០ លានដុល្លារអាមេរិក ក្នុងការចូលរួមដោះស្រាយបញ្ហាគ្រាប់មីននៅកម្ពុជា និងឆ្ពោះទៅកម្ពុជាសូន្យមីននៅឆ្នាំ ២០២៥។
ខេត្តចំនួន ០៦ នឹងត្រូវប្រកាសជាខេត្តអស់មីន ក្រោមគម្រោងសម្តេចតេជោសម្រាប់សកម្មភាពមីន “ផ្តល់ដីសុវត្ថិភាព បង្កើតស្នាមញញឹម” ដំណាក់កាលទី១ រួមមាន ខេត្តត្បូងឃ្មុំ ខេត្តកំពង់ចាម ខេត្តតាកែវ ខេត្តកំពង់ឆ្នាំង ខេត្តកំពត និងខេត្តស្វាយរៀង។
ខេត្តទាំង៦នោះ មានទំហំផ្ទៃដីសរុបចំនួន ៤២ ៥១៣ ៧២៩ ម៉ែត្រក្រឡា (៤២,៥១ គីឡូម៉ែត្រក្រឡា)ដែលស្មើនឹង ៥២០ ចម្ការមីន ដោយប្រើប្រាស់ថវិកាប្រមាណជាង ៥,៧ លានដុល្លារអាមេរិក ដោយរួមបញ្ចូលទាំងឃុំចំនួន ០៧ ស្ថិតក្នុងស្រុកភ្នំស្រួច ខេត្តកំពង់ស្ពឺ ផងដែរ៕
