.jpg)
លោក ឃួង ស្រេង (កណ្ដាល) នៅក្នុងកិច្ចប្រជុំកាលពីថ្ងៃទី ៥ តុលា ។ រូបថត រដ្ឋបាលរាជធានីភ្នំពេញ
ភ្នំពេញៈ អភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ លោក ឃួង ស្រេង បានដាក់បញ្ជាដល់គណៈបញ្ជាការឯកភាពរដ្ឋបាលខណ្ឌទាំង ១៤ ត្រូវបង្ក្រាបបទល្មើសល្បែងស៊ីសង និងកុងស៊ីបញ្ចាំខុសច្បាប់ក្នុងមូលដ្ឋានឱ្យអស់ដូចភ្លៀងរលឹម។
ការណែនាំនេះបានធ្វើឡើងនៅក្នុងកិច្ចប្រជុំគណៈបញ្ជាការឯកភាពរដ្ឋបាលរាជធានីភ្នំពេញ កាលពីថ្ងៃទី ៥ ខែតុលា ដើម្បីត្រួតពិនិត្យលទ្ធផលការងារ ដកស្រង់បទពិសោធ និងដាក់ចេញវិធានការបន្តលើការងារត្រួតពិនិត្យនិងបង្ក្រាបបទល្មើសល្បែងស៊ីសងខុសច្បាប់គ្រប់ប្រភេទ និងទីតាំងទទួលបញ្ចាំខុសច្បាប់នៅរាជធានីភ្នំពេញ។
កិច្ចប្រជុំនេះ មានការចូលរួមពីលោកស្នងការរងនរគបាលរាជធានីភ្នំពេញ មេបញ្ជាការកងរាជអាវុធហត្ថរាជធានី ប្រធានគណៈបញ្ជាការឯកភាពរដ្ឋបាលខណ្ឌទាំង ១៤ និងមន្ទីរពាក់ព័ន្ធមួយចំនួនទៀត។
នៅក្នុងកិច្ចប្រជុំនោះលោក ឃួង ស្រេង បានថ្លែងថា ប្រធានគណៈបញ្ជាការឯកភាពរដ្ឋបាលខណ្ឌទាំង ១៤ ត្រូវបង្ក្រាបបទល្មើសល្បែងស៊ីសង និងកុងស៊ីបញ្ចាំខុសច្បាប់ឱ្យអស់ពីមូលដ្ឋានឱ្យដូចភ្លៀងរលឹមស្របតាមអនុសាសន៍លោកនាយករដ្ឋមន្ត្រីហ៊ុនសែន។ លោកថា៖ «ធ្វើយ៉ាងណាលុបបំបាត់ឱ្យបានចំពោះកុងស៊ីបញ្ចាំមិនស្របច្បាប់»។
អភិបាលខណ្ឌឫស្សីកែវ លោក ឯក ឃុនដឿន ប្រាប់ ភ្នំពេញ ប៉ុស្តិ៍ថា វិធានការចំពោះមុខ គឺអាជ្ញាធរមានសមត្ថកិច្ចបានចុះអនុវត្តត្រួតពិនិត្យជាប្រចាំចំពោះទីតាំងកុងស៊ីបញ្ចាំក៏ដូចជាការបង្ក្រាបល្បែងស៊ីសង។ ក្នុងប្រតិបត្តិការនោះបង្ក្រាបល្បែងស៊ីសងបានចំនួន ១៣ ទីតាំង ដោយឃាត់មេកន្ទុយលេខ ២ នាក់ និងបានចុះត្រួតពិនិត្យកុងស៊ីបញ្ចាំផងដែរ។
លោកបានបញ្ជាក់ថា៖ «យើងបានសហការជាមួយព្រះរាជអាជ្ញា ចុះពិនិត្យកុងស៊ីបញ្ចាំចំនួន ១៤ ទីតាំង រកឃើញថា ពួកគាត់មានច្បាប់ពីមន្ទីរ-ក្រសួងពាក់ព័ន្ធនិងមានលិខិតអនុញ្ញាតត្រឹមត្រូវ។ បានន័យថា បញ្ចាំម៉ូតូ គឺគាត់ដាក់កាតគ្រី សំបុត្រពន្ធ និងឯកសារពាក់ព័ន្ធ»។
លោក ឯក ឃុនដឿន បន្តថា ក្រុមការងារក៏បានណែនាំដល់ម្ចាស់អាជីវកម្ម និងអ្នកពាក់ព័ន្ធ ដោយឱ្យធ្វើកិច្ចសន្យាបញ្ឈប់សកម្មភាពល្បែងស៊ីសង។ ទន្ទឹមនឹងនេះអាជ្ញាធរនឹងបន្តត្រួតពិនិត្យជាប្រចាំ ដើម្បីចូលរួមទប់ស្កាត់មិនឱ្យមានល្បែងស៊ីសង ឬការបញ្ចាំខុសច្បាប់នៅក្នុងខណ្ឌឫស្សីកែវ ។
យោងតាមច្បាប់ស្តីពីការបង្ក្រាបល្បែងស៊ីសងដែលត្រូវបានដាក់ឱ្យប្រើប្រាស់កាលពីឆ្នាំ ១៩៩៦ មាន ១៣ មាត្រា ក្នុងនោះមាត្រា ៤ ចែងថា ជនណាលេងល្បែងស៊ីសងជននោះត្រូវផ្តន្ទាទោសពិន័យជាប្រាក់ ១ ម៉ឺនរៀល ដល់ ១៥ ម៉ឺនរៀល ឬដាក់គុកពី ១ សប្តាហ៍ ដល់ ១ ខែ។
ក្នុងមាត្រាដដែលបន្តថា៖ «ក្នុងករណីពុំរាងចាលត្រូវផ្តន្ទាទោសជាប្រាក់ពី ៥ ម៉ឺនរៀល ដល់ ៥ សែនរៀល និងដាក់គុកពី ១ ខែ ដល់ ១ ឆ្នាំ»។
ចំណែកមាត្រា ៥ ចែងថា ត្រូវផ្តន្ទាទោសពិន័យជាប្រាក់ពី ៥ លានរៀលដល់ ២០ លានរៀលនិងដាក់គុកពី ១ ឆ្នាំ ដល់ ៥ ឆ្នាំ ចំពោះអ្នកបើកកន្លែងលេងល្បែងស៊ីសង អ្នកកាន់កាប់ល្បែងស៊ីសង អ្នកចាត់ចែងនិងភ្នាក់ងារស៊ីសង។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព លោក យង់ គិមអេង ធ្លាប់លើកឡើងថា ការបង្ក្រាបល្បែងស៊ីសងខុសច្បាប់មិនមែនជារឿងងាយស្រួលឡើយដែលទាមទារឱ្យមានយន្តការច្បាស់លាស់ និងការប្តេជ្ញាខ្ពស់។ លោកកត់សម្គាល់ថា ការប្រឹងប្រែងរបស់អាជ្ញាធរជារឿងមួយល្អ ប៉ុន្តែការបង្ក្រាបទាំងអស់នេះ ត្រូវតែធ្វើឡើងដោយស្មើភាព ដោយមិនមានការលើកលែងឱ្យនរណាម្នាក់ឡើយ។
លោកថា៖ «ការបង្ក្រាបល្បែងស៊ីសងខុសច្បាប់ ត្រូវធ្វើដោយហ្មត់ចត់ ដោយរដ្ឋាភិបាលត្រូវគិតគូរពីសកម្មភាពជាមុន និងការត្រួតពិនិត្យនៅតាមសហគមន៍ ដែលមានការលេងល្បែងស៊ីសងនានា»។
អភិបាលរងរាជធានីភ្នំពេញលោក ឃ្លាំង ហួត ស្នើឱ្យមានការចូលរួមសហការពីសំណាក់ម្ចាស់ដី ម្ចាស់ផ្ទះ ឬម្ចាស់ឃ្លាំងជួលដោយត្រូវពិនិត្យទីតាំងរបស់ខ្លួនជាបន្ទាន់គឺ ដើម្បីឱ្យប្រាកដថាទីតាំងរបស់បងប្អូនមិនមានជួលយកធ្វើកន្លែងទុកដាក់របស់ខុសច្បាប់ហើយបើរកឃើញភាពមិនប្រក្រតីអាចរាយការណ៍ជូនអាជ្ញាធរមានសមត្ថកិច្ច។
ជាមួយគ្នានេះលោកបានអំពាវនាវដល់ប្រជាពលរដ្ឋបន្តសហការរាយការណ៍មកហ្វេសប៊ុកផេក លោក ឃួង ស្រេង ឈ្មោះ (Khuong Sreng) ឬហ្វេសប៊ុកផេករបស់លោកផ្ទាល់ឈ្មោះ (ឃ្លាំង ហួត Khliang Huot) អំពីទីតាំងលួចបើកលេងល្បែងស៊ីសង និងកុងស៊ីបញ្ចាំខុសច្បាប់ទូទាំងរាជធានីភ្នំពេញ។
យោងតាមរបាយការណ៍ដែលត្រូវបានប្រកាសនៅក្នុងកិច្ចប្រជុំគណៈបញ្ជាការឯកភាពរដ្ឋបាលរាជធានីភ្នំពេញកាលពីថ្ងៃទី ៥ ខែតុលា បានឱ្យដឹងថា ពាក់ព័ន្ធនឹងការបង្ក្រាបបទល្មើសល្បែងស៊ីសងនិងកុងស៊ីបញ្ចាំនេះ បើគិតពីថ្ងៃទី១៧ ខែកញ្ញា ដល់ថ្ងៃទី ៣ តុលា ឆ្នាំ ២០២២ បានត្រួតពិនិត្យនិងបង្ក្រាបបទល្មើសល្បែងស៊ីសងខុសច្បាប់សរុបចំនួន ១ ៣៣៨ទីតាំងនិងត្រួតពិនិត្យកន្លែងកុងស៊ីបញ្ចាំខុសច្បាប់សរុបចំនួន ៧៤ ទីតាំង៕
