.jpg)
នារីម្នាក់ពេលកំពុងបើក App Tik Tok កាលពីថ្ងៃទី ៦ តុលា។ ហុង មិនា
ភ្នំពេញ: បណ្ដាញសង្គមល្បីខាងវីដេអូខ្លីៗដ៏គួរឱ្យចាប់អារម្មណ៍ TikTok បានចុះផ្សាយរបាយការណ៍អនុវត្ដគោលការណ៍ណែនាំសហគមន៍ចន្លោះពីខែមេសា ដល់ខែមិថុនា ដែលអះអាងអំពីការរីកចម្រើននៃវិធានការទប់ស្កាត់ព័ត៌មានក្លែងក្លាយនៅលើប្លេតហ្វមរបស់ខ្លួន។
គោលនយោបាយទប់ស្កាត់ព័ត៌មានក្លែងក្លាយបង្កគ្រោះរបស់ប្លេតហ្វមនេះហាមឃាត់មាតិកាដែលអាចបំភាន់សហគមន៍របស់ TikTok អំពីការលើកកម្ពស់គុណភាពនៃការរស់នៅក្នុងសហគមន៍ សុខភាពសាធារណៈ ឬសុវត្ថិភាព។ ជាក់ស្ដែង TikTok មិនអនុញ្ញាតឱ្យមានព័ត៌មានក្លែងក្លាយផ្នែកវេជ្ជសាស្ដ្រអំពីថ្នាំបង្ការឬជំងឺកូវីដ ១៩ និងមិនអនុញ្ញាតឱ្យមានព័ត៌មានខុសអំពីការបោះឆ្នោតនោះទេ។
ដើម្បីលើកកម្ពស់ភាពត្រឹមត្រូវនៃការបោះឆ្នោត TikTok បង្កើតមជ្ឈមណ្ឌលបោះឆ្នោត ដើម្បីផ្តល់សិទ្ធិទទួលបានព័ត៌មានពិតអំពីការបោះឆ្នោត និងការបោះឆ្នោតក្នុងស្រុក [ពីអង្គការនានាដូចជាសមាគមជាតិនៃរដ្ឋមន្ដ្រីការបរទេសនិង Ballotpedia]។
យោងតាម TikTok បានបង្ហាញថា TikTok បានលុបមាតិកាដែលបំពានគោលនយោបាយរបស់ខ្លួនចេញ ដើម្បីជួយឱ្យប្លេតហ្វមរបស់ខ្លួននៅតែផ្ដល់ភាពកក់ក្ដៅ និងប្រាកដនិយមសម្រាប់អ្នកប្រើប្រាស់។
លោក Cormac Keenan ប្រធានផ្នែកទំនុកចិត្ដ និងសុវត្ថិភាពនៅ TikTok បានឱ្យដឹងថា៖ «ព័ត៌មានក្លែងក្លាយមិនមែនជាបញ្ហាថ្មីនោះទេ តែអ៊ីនធឺណិតផ្តល់នូវលទ្ធភាពថ្មីដល់បញ្ហាប្រឈមចាស់។ យើងទទួលស្គាល់នូវផលប៉ះពាល់ដែលព័ត៌មានក្លែងក្លាយអាចកើតមាននៅក្នុងការធ្វើឱ្យបាត់បង់ជំនឿទុកចិត្តលើសុខភាពសាធារណៈ ដំណើរការបោះឆ្នោតការពិតនិងវិទ្យាសាស្ត្រ»។
TikTok បានឱ្យដឹងថា ចាប់តាំងពីការចាប់ផ្តើមកម្មវិធីនេះកាលពីត្រីមាសមុន TikTok បានកំណត់អត្តសញ្ញាណព័ត៌មានក្លែងក្លាយចំនួន ៣៣ ប្រភេទ ដែលបណ្តាលឱ្យមានការលុបវីដេអូចំនួន ៥៨ ០០០ ឃ្លីប ចេញពីប្លេតហ្វម។
យោងតាមទិន្នន័យពី TikTokបានបញ្ជាក់ថា នៅកម្ពុជា វីដេអូសរុប ៧៩៦ ៤៥៣ ត្រូវបានដកចេញពីប្លេតហ្វម ដោយមានអត្រានៃការដកចេញសកម្មរហូតដល់ ៩៩,៥ ភាគរយ ហើយការដកចេញមុនពេលចូលមើល ៩០,១ ភាគរយ និងការដកចេញក្នុងរយៈពេល ២៤ ម៉ោង មានអត្រា ៩៤,៤ ភាគរយ។
របាយការណ៍របស់ TikTok បានបង្ហាញថា ប្លេតហ្វមមួយនេះ បំពាក់នូវបច្ចេកវិទ្យា និងមានអ្នកជំនាញផ្នែកសុវត្ថិភាពរាប់ពាន់នាក់ធ្វើការរួមគ្នា ដើម្បីអនុវត្តគោលការណ៍ណែនាំសហគមន៍របស់ខ្លួន និងវិនិយោគលើយន្ដការកែសម្រួលដោយស្វ័យប្រវត្តិនៅពេលដែលប្រព័ន្ធបច្ចេកវិទ្យានិងអ្នកជំនាញពិនិត្យឃើញថា មាតិកានោះបានបំពាន។ ដូច្នេះប្លេតហ្វម អាចលុបនូវរាល់ការបំពានគោលនយោបាយរបស់ខ្លួនភ្លាមៗ។
បន្ថែមពីលើការដកចេញនូវមាតិកាដែលមិនត្រឹមត្រូវ និងធ្វើឱ្យប៉ះពាល់ដល់សហគមន៍ TikTok ក៏ដកចេញនូវគណនីដែលប៉ងបំភាន់ដល់មហាជន ឬប្រើប្រាស់ TikTok ដើម្បីបោកបញ្ឆោតមតិសាធារណៈផងដែរ។ វិធានការទាំងនេះមានចាប់ពីការបង្កើតគណនីមិនពិត ឬក្លែងក្លាយរហូតដល់កិច្ចខិតខំប្រឹងប្រែងដ៏ប៉ិនប្រសប់ក្នុងការបំផ្លាញទំនុកចិត្តជាសាធារណៈ។
លោក Keenan បានអះអាងថា៖ «យើងប្តេជ្ញាធ្វើជាផ្នែកមួយនៃដំណោះស្រាយ។ យើងចាត់ទុកព័ត៌មានក្លែងក្លាយជាករណីធ្ងន់ធ្ងរបំផុត។ យើងប្រកាន់យកនូវវិធីសាស្រ្តច្រើនយ៉ាងក្នុងការបញ្ឈប់ពីការរីករាលដាល ខណៈពេលដែលការបង្កើនព័ត៌មានត្រឹមត្រូវ និងការវិនិយោគលើការអប់រំអក្ខរកម្មឌីជីថលដើម្បីជួយដោះស្រាយបញ្ហាធំៗ»។
TikTok បានឱ្យដឹងថា ខ្លួនមានដៃគូត្រួតពិនិត្យការពិតជាច្រើននៅជុំវិញពិភពលោកដែលពិនិត្យមើលខ្លឹមសារមាតិកាជាង ៣០ ភាសា។ ដៃគូត្រួតពិនិត្យការពិតទាំងអស់របស់ខ្លួនត្រូវបានទទួលស្គាល់ដោយបណ្តាញត្រួតពិនិត្យការពិតអន្តរជាតិជាហត្ថលេខីដែលបានផ្ទៀងផ្ទាត់នៃក្រមគោលការណ៍របស់បណ្តាញត្រួតពិនិត្យការពិតអន្តរជាតិ។
TikTok បានលាតត្រដាងអំពីគន្លឹះសំខាន់ៗក្នុងការបង្កើនសមត្ថភាពស្វែងរក និងលុបព័ត៌មានក្លែងក្លាយតាមរយៈការបន្ដវិនិយោគគំរូកម្មវិធីវិភាគទិន្នន័យដោយស្វ័យប្រវត្ដិ និងបង្កើនសមត្ថភាពវិភាគលើគំរូទាំងនេះយ៉ាងឆាប់រហ័ស ស្របទៅតាមការផ្លាស់ប្តូរឥតឈប់ឈរនៃការវិវត្ដព័ត៌មានក្លែងក្លាយ ការធ្វើឱ្យប្រសើរឡើងនូវការរកឃើញនៃសំឡេងនិងរូបភាពដែលបំភាន់ ដើម្បីកាត់បន្ថយមាតិកាបោកប្រាស់ ការណែនាំមូលដ្ឋានទិន្នន័យនៃការអះអាងដែលបានត្រួតពិនិត្យការពិតពីមុន ដើម្បីជួយអ្នកកែសម្រួលព័ត៌មានក្លែងក្លាយដោយធ្វើការសម្រេចចិត្តបានរហ័ស និងត្រឹមត្រូវ។
គន្លឹះមួយទៀត គឺការដំណើរការកម្មវិធីស៊ើបអង្កេតយ៉ាងសកម្មជាមួយអ្នកត្រួតពិនិត្យការពិតរបស់ខ្លួនដែលរាយការណ៍មាតិកាបំពានថ្មី និងផ្លាស់ប្ដូរឥតឈប់ឈរ ដែលពួកគេកំពុងមើលឃើញនៅលើអ៊ីនធឺណិត។ នេះអនុញ្ញាតឱ្យ TikTok រកមើលមាតិកាបំពានទាំងនេះនៅលើប្លេតហ្វម និងលុបចោលរាល់ការបំពាន។
TikTok បានបញ្ជាក់ថា ខណៈការបំពានលើគោលនយោបាយសុចរិតភាពនិងភាពត្រឹមត្រូវរបស់ TikTok មានត្រឹមចំនួនតិចជាង ១ ភាគរយ នៃវីដេអូដែលត្រូវលុបចោលទាំងអស់ ការវិនិយោគទាំងនេះបានផ្ដល់នូវគុណប្រយោជន៍ចំពោះការរកឃើញ និងការអនុវត្ដដ៏សកម្មនៃគោលនយោបាយរបស់ខ្លួន៕
