.jpg)
លោក អ៊ូ ច័ន្ទរ័ត្ន ស្ថាបនិកគណបក្សកែទម្រង់កម្ពុជា (ស្ដាំ) និងតំណាងគណបក្សផ្សេងទៀត។ ហុង មិនា
ភ្នំពេញៈ ស្ថាបនិកគណបក្សកែទម្រង់កម្ពុជាបានចាត់ទុកជាការលំបាកក្នុងការចូលរួមជាមួយនឹងគណបក្សភ្លើងទៀន តាមការអំពាវនាវរបស់គណបក្សនេះ ឱ្យចូលរួមជាមួយខ្លួន ក្រោយពេលគណបក្សឆន្ទៈខ្មែរ បានសម្រេចចិត្តចូលរួម ជាគណបក្សតែមួយ ដើម្បីជាកម្លាំងចលករប្រជាធិបតេយ្យដ៏ធំមួយ ឈានទៅរកជ័យជម្នះ ក្នុងការបោះឆ្នោតជ្រើសតាំងតំណាងរាស្ត្រ អាណត្តិទី៧ ដែលនឹងប្រព្រឹត្តទៅនៅថ្ងៃអាទិត្យ ទី ២៣ ខែកក្កដា ឆ្នាំ ២០២៣ ខាងមុខនេះ។
លោក អ៊ូ ច័ន្ទរ័ត្ន ស្ថាបនិកគណបក្សកែទម្រង់កម្ពុជា ប្រាប់ ភ្នំពេញ ប៉ុស្តិ៍ នៅថ្ងៃទី ៦ ខែតុលា ថា អ្វីដែលលោក ចាត់ទុកថាលំបាកនោះ គឺគណបក្សនេះ បានប្រកាន់ជំហររឹងមាំ និងចាត់ទុកខ្លួនឯងជាគណបក្សធំ រួមទាំងមិនមានគោលការណ៍ច្បាស់លាស់ក្នុងការបង្រួបង្រួមជាមួយនឹងគណបក្សតូចៗផ្សេងទៀត។ មួយវិញទៀត ថ្នាក់ដឹកនាំមូលដ្ឋាននៃគណបក្សនេះ ក៏បានប្រកាន់ជំហរក្នុងការមិនឱ្យមានការបង្រួបង្រួមផងដែរ។
លោកបន្តថា ដោយឡែកចំពោះការប្រកាសចូលរួមរបស់គណបក្សឆន្ទៈខ្មែរជាមួយគណបក្សភ្លើងទៀត គឺមានភាពងាយស្រួល ព្រោះថ្នាក់ដឹកនាំនៃគណបក្សទាំង ២ នេះ ធ្លាប់ធ្វើការជាមួយគ្នា និងយល់ចិត្តគ្នាច្រើន។ មួយវិញទៀត លោក គង់ គាំ ក៏ធ្លាប់ធ្វើជាប្រធានគណបក្សតាំងពីដើមមកដែរ។ ដូច្នេះ ការវិលត្រឡប់ទៅវិញ គ្មានអ្វីជាបញ្ហានោះទេសម្រាប់គណបក្សឆន្ទៈខ្មែរ។
ទោះជាយ៉ាងណា លោកថា ជាគោលការណ៍ គឺគណបក្សកែទម្រង់កម្ពុជា ចង់ឱ្យមានការបង្រួបបង្រួមទៅជ្រកក្រោមគណបក្សណាមួយ ប៉ុន្តែការបង្រួបបង្រួមនេះត្រូវស្ថិតក្រោម គោលការណ៍ច្បាស់លាស់ ជាពិសេសត្រូវរៀបចំឱ្យមានការជជែកគ្នាលើគោលការណ៍ទាំង ៣ ទោះបីគណបក្សនោះតូច ឬធំក៏ដោយ។
លោកថ្លែងថា៖ «ការចូលរួមជាមួយនឹងគណបក្សភ្លើងទៀន គឺត្រូវតែមានការជជែកគ្នា ជាពិសេសគណបក្សនេះ គួរតែមានការផ្លាស់ប្តូរជំហរ និងឥរិយាបថខ្លះ ទើបអាចជជែកគ្នាជាមួយគ្នាបាន ពីព្រោះកន្លងមកនេះ ថ្នាក់ដឹកនាំនៃគណបក្សនេះ មិនមានជំហរណាមួយ ក្នុងការបង្រួបបង្រួមនោះទេ។ អ្នកណាចូលក៏ចូលមក ភាសាសាមញ្ញ មានន័យថាអ៊ីចឹង»។
បើតាម លោក អ៊ូ ច័ន្ទរ័ត្ន ពាក់ព័ន្ធនឹងការបង្រួបបង្រួមឬចូលរួមជាមួយគណបក្សភ្លើងទៀននេះលោកនឹងពិចារណាឱ្យបានហ្មត់ចត់ ថាតើ វាអាចំណេញ ឬទេ? បើសិនគ្រាន់តែទៅជ្រកក្រោមគណបក្សនេះ មិនចំណេញទេ គណបក្សរបស់លោកក៏មិនចាំបាច់ជ្រកនោះទេ គណបក្សលោកសុខចិត្តធ្វើដូចបច្ចុប្បន្ន ហើយនឹងស្វែងរកយុទ្ធសាស្ត្រណាមួយក្នុងការធ្វើការជាមួយគ្នា។ គណបក្សរបស់លោក ក៏កំពុងជជែកគ្នាជាមួយគណបក្សចំនួន ៤ ផ្សេងទៀតការបង្រួបបង្រួមគ្នានេះផងដែរ។
លោក ឡឹក សុធារ អ្នកនាំពាក្យគណបក្សប្រជាធិបតេយ្យមូលដ្ឋានប្រាប់ ភ្នំពេញ ប៉ុស្តិ៍ នៅថ្ងៃទី ៦ ខែតុលាថា ការប្រកាសចូលរួមរបស់គណបក្សឆន្ទៈខ្មែរ ជាមួយគណបក្សភ្លើងទៀន គឺជារឿងមួយដ៏ល្អសម្រាប់ការបោះឆ្នោតជ្រើសតាំងតំណាងរាស្ត្រ ឆ្នាំ ២០២៣ ប៉ុន្តែសម្រាប់គណបក្សរបស់លោកវិញមិនទាន់សម្រេចយ៉ាងណានោះទេ រងចាំការកោះប្រជុំពិភាក្សាជាថ្នាក់ដឹកនាំនៅពេលខាងមុខ។
លោកបន្តថា ចំពោះគណបក្សប្រជាធិបតេយ្យមូលដ្ឋានយល់ឃើញថា ការរួមបញ្ចូលគ្នាជាគណបក្សតែមួយ ឬក៏ចែកមណ្ឌលគ្នាបោះឆ្នោត ឬក៏ក្នុងទម្រង់ណាមួយនោះ សុទ្ធសឹងតែមានការលំបាកដូចគ្នាទាំងអស់ ប៉ុន្តែបើអ្នកនយោបាយដែលមាននិន្នការ និងស្រឡាញ់លទ្ធិប្រជាធិបតេយ្យដូច្នេះ គិតគូរពីប្រយោជន៍ជាតិ និងប្រជាជន លុះត្រាតែមានការលះបង់ខ្លះ ទើបអាចបង្រួបបង្រួមគ្នាបាន។
លោកថ្លែងថា៖ «ជាធម្មតា ឱ្យតែធ្វើការចាប់ពី ២ នាក់ឡើង គឺលំបាក ដូច្នេះ យើងត្រូវលះបង់ខ្លះ បើយើងនៅតែប្រកាន់ថា ទៅមិនរួចទេ ព្រោះខ្ញុំនៅនេះ ប្រធានបក្សហើយ ខ្ញុំទៅដល់នោះ ឱ្យខ្ញុំធ្វើអីតូចជាងហ្នឹង ខ្ញុំគិតថាវាលំបាកហើយ បើសិនយើងគិត ទម្លាក់ចុះអញនិយម គិតពីប្រយោជន៍ជាតិ និងលទ្ធិប្រជាធិបតេយ្យ ប្រហែលជាមិនលំបាកទេ»។
លោក ថាច់ សេដ្ឋា អនុប្រធានគណបក្សភ្លើងទៀនប្រាប់ ភ្នំពេញ ប៉ុស្តិ៍ នៅថ្ងៃទី ៦ ខែតុលាថា សម្រាប់ ថ្នាក់ដឹកនាំរបស់គណបក្សឆន្ទៈខ្មែរ ដែលមានលោក គង់ គាំ ដែលធ្លាប់ធ្វើការជាមួយគ្នាកន្លងមក គឺមានភាពងាយស្រួលក្នុងការជជែក និង រួមបញ្ចូលគ្នាប៉ុន្តែសម្រាប់គណបក្សផ្សេងទៀតត្រូវការពេលវេលាជជែកគ្នា។
នៅពេលសួរថា តើគណបក្សភ្លើងទៀននឹងទៅជជែកជាមួយគណបក្សតូចៗផ្សេងទៀត ឱ្យមកចូលរួមជាមួយខ្លួន ឬក៏ឱ្យគណបក្សទាំងនោះមកជជែកជាមួយខ្លួន ? លោក ថាច់ សេដ្ឋា ឆ្លើយថា៖ «យើងគិតរឿងជាតិ មិនថា នរណាទៅជជែកជាមួយនរណាទេ។ ខ្ញុំធ្លាប់ទៅដល់ផ្ទះលោក គង់គាំ ដើម្បីជជែកគ្នា។ បើយើងនៅតែប្រកាន់ថា ទាល់តែអ្នកនោះមកនិយាយ ឬ អ្នកនោះទៅនិយាយ ឬក៏មានតួនាទី បុណ្យស័ក្តិ ទើបអាចជជែកគ្នាបាន ។ នោះមិនមែនជាតិនិយមពិតប្រាកដទេ យើងត្រូវតែហ៊ានលះបង់ ប៉ុន្តែ បើយើងមិនទាន់បានធ្វើអ្វីផង ហើយគិតពីតួនាទីនោះក៏មិនកើតដែរ»៕
