ភ្នំពេញៈ គណៈកម្មការទន្លេមេគង្គ (MRC) នៅថ្ងៃទី ៥ ខែតុលា បានសម្ពោធដាក់ចេញនូវកម្មវិធីប្រកួតប្រជែងដ៏ពិសេសមួយ ដែលជួយជំរុញឱ្យនិស្សិតសាកលវិទ្យាល័យក្នុងតំបន់រៀបចំបង្កើតបច្ចេកវិទ្យាប្រកបដោយចីរភាពនិងប្រសិទ្ធភាពចំណាយ ដើម្បីតាមដានពីកម្រិតទឹកទន្លេមេគង្គ បរិមាណភ្លៀងធ្លាក់ សំណើមដី និងគុណភាពទឹក។
MRC បញ្ជាក់ក្នុងសេចក្តីប្រកាសព័ត៌មានដែល ភ្នំពេញ ប៉ុស្តិ៍ ទទួលបាននៅថ្ងៃទី ៦ ខែតុលាថា «កម្មវិធីប្រកួតប្រជែងបច្ចេកវិទ្យាសម្រាប់តាមដានទន្លេរបស់ MRC រៀបចំឡើងក្នុងគោលបំណងផ្តល់ឱកាសដល់និស្សិតដែលមានគំនិតច្នៃប្រឌិតខ្ពស់នៅក្នុងប្រទេសកម្ពុជា ឡាវ ថៃ និងវៀតណាម ដែលមកពីសាកលវិទ្យាល័យមួយក្នុងចំណោមសាកលវិទ្យាល័យទាំង ១៥ ដែលបានជ្រើសរើសជាមុនសម្រាប់តំបន់អាងទន្លេមេគង្គក្រោមទាំងមូល ដើម្បីជួយថែគាំពារជីវិតរាប់លាននាក់នៃក្រុមគ្រួសារអ្នកនេសាទ និងប្រជាកសិករ»។
MRC បានធ្វើការថែទាំស្ថានីយតាមដានប្រមាណជាង ២៥០ ដែលធ្វើការតាមដានជលសាស្ត្រ បរិមាណភ្លៀងធ្លាក់ គុណភាពទឹក សុខភាពអេកូឡូស៊ី ជលផល និងគ្រោះរាំងស្ងួត ដែលប៉ះពាល់ដល់ទន្លេធំជាងគេប្រចាំតំបន់អាស៊ីអាគ្នេយ៍នេះ។ក៏ប៉ុន្តែភាគច្រើននៃបច្ចេកវិទ្យាតាមដានទាំងនេះពឹងអាស្រ័យខ្លាំងលើបរិក្ខារសម្ភារពីបរទេសដែលជាញឹកញាប់ វាមានតម្លៃថ្លៃ និងពេលខ្លះទៀត វាហួសសម័យ។
ខណៈដែល MRC ឱ្យតម្លៃលើដៃគូអន្តរជាតិរបស់ខ្លួន លោក អនុល័ក ខិធិឃួន (Anoulak Kittikhoun) នាយកប្រតិបត្តិនៃលេខាធិការដ្ឋាន MRC បានថ្លែងថា ដំណោះស្រាយក្នុងស្រុកគួរតែមានតម្លៃទាប អាចកសាងសមត្ថភាពមន្ត្រីជំនាញតាមមូលដ្ឋាន និងផ្តល់នូវអត្ថប្រយោជន៍ផ្សេងទៀត។តួយ៉ាងដូចជាការបណ្តុះគំនិតដែលថា ប្រជាជនតាមដងទន្លេមេគង្គអាចមានសមត្ថភាពដោះស្រាយបញ្ហាទន្លេមេគង្គបានតាមរយៈនវានុវតន៍ផ្នែកបចេ្ចកវិទ្យា។
លោកថ្លែងថា៖ «យើងរំពឹងនឹងជួយជំរុញយុវជនទន្លេមេគង្គរបស់យើងសម្រេចឱ្យបាននូវសក្តានុពលពិតប្រាកដរបស់ខ្លួន និងផ្តល់នូវការឆ្លើយតបបែបច្នៃប្រឌិតដែលអាចដោះស្រាយបញ្ហាប្រឈមដ៏លំបាកជាច្រើនរបស់យើង។ នេះ គឺជាពេលវេលាសម្រាប់អ្នកនិងសម្រាប់យើងដើម្បីបញ្ជាក់ថា ខ្លួនយើងផ្ទាល់អាចអភិវឌ្ឍបច្ចេកវិទ្យាដែលតែងតែបង្កើតឡើងនៅឆ្ងាយពីយើងបាន។ អ្នកនឹងភ្ញាក់ផ្អើលពីអ្វីដែលអ្នកអាចធ្វើបាន ធ្វើសម្រាប់ខ្លួនអ្នក សាកលវិទ្យាល័យ សង្គម និងសម្រាប់ទន្លេមេគង្គតែមួយគត់របស់អ្នក»។
សម្រាប់កម្មវិធីប្រកួតនេះ ភារកិច្ចជាក់លាក់ គឺការបង្កើតឧបករណ៍ចាប់សញ្ញាទូរមាត្រវិទ្យា (telemetry-sensor technology) ដែលអាចវាស់ស្ទង់ផ្នែកទាំង ៤ ដាច់ពីគ្នាបានដែលរួមមាន កម្រិតទឹក បរិមាណភ្លៀងធ្លាក់ សំណើមដី និងគុណភាពទឹក។ ជាទូទៅឧបករណ៍ចាប់សញ្ញាបែបនេះ ត្រូវបានគេបំពាក់នៅក្នុងស្ថានីយដាច់ដោយឡែក ឬនៅខាងក្រៅលើច្រាំងទន្លេ ជាពិសេសក្នុងតំបន់កសិកម្ម។
MRC បញ្ជាក់ថា បេក្ខជនប្រកួត គួរតែរៀបចំបង្កើតស្ថានីយមួយ សមស្របទៅនឹងភូមិសាស្ត្រ ទីតាំង អាកាសធាតុ និងមុខងាររបស់ខ្លួន ហើយស្ថានីយនេះអាចប្រតិបត្តិការបានដោយថាមពលពន្លឺព្រះអាទិត្យនិងមានសមត្ថភាពប្រមូល និងបញ្ជូនទិន្នន័យទូរមាត្រវិទ្យាពីស្ថានីយ ទៅកាន់ម៉ាស៊ីនមេ តាមពេលវេលាជាក់ស្តែង។
ជ័យជម្នះពីការចូលរួមប្រកួត នឹងត្រូវវិនិច្ឆ័យ ដោយយោងលើសុក្រឹតភាព ភាពធន់ ប្រសិទ្ធភាពចំណាយ និងនវានុវត្ដន៍។កម្មវិធីប្រកួតនេះ បើកទូលាយសម្រាប់និស្សិតថ្នាក់បរិញ្ញាបត្រ ឬបរិញ្ញាបត្រជាន់ខ្ពស់សិក្សានៅសាកលវិទ្យាល័យមួយក្នុងចំណោមសាកលវិទ្យាល័យដៃគូទាំង ១៥ ដែលមានទីតាំងក្នុងប្រទេសសមាជិកទាំង ៤ របស់ MRC ក្នុងប្រទេស កម្ពុជា ឡាវ ថៃ និង វៀតណាម។
និស្សិតអាចចូលរួមការប្រកួតនេះជាលក្ខណៈបុគ្គល ឬជាក្រុម ក្រោមការដឹកនាំរបស់ទីប្រឹក្សាម្នាក់មកពីសាកលវិទ្យាល័យរបស់ខ្លួន។ ដោយហេតុថា សាកលវិទ្យាល័យនីមួយៗអាចដាក់ស្នើគូប្រកួតបានតែម្នាក់ ឬមួយក្រុមសរុបទាំងអស់សម្រាប់វិញ្ញាសាទាំង ៤ គេត្រូវតែកំណត់យកបេក្ខជន ឬក្រុមដែលមានសក្តានុពលសំណើខ្លាំងបំផុត។
បន្ទាប់មកបេក្ខជននឹងត្រូវបានអញ្ជើញទៅទីក្រុងបាងកក ប្រទេសថៃ ដើម្បីបង្ហាញគំនិតរបស់គេទៅកាន់គណៈវិនិច្ឆ័យនៃលេខាធិការដ្ឋាន MRC។ គម្រោងដែលបានទទួលយកនឹងទទួលបានថវិកា ៨០០ ដុល្លារអាមេរិក ដើម្បីធ្វើការស្រាវជ្រាវ និងអភិវឌ្ឍគំរូដើមរបស់គេ។
នៅចុងខែមីនា ឆ្នាំ ២០២៣ បេក្ខជននីមួយៗនឹងធ្វើបទបង្ហាញគំរូដើមទៅកាន់ក្រុមគណៈវិនិច្ឆ័យអន្តរជាតិនៅទីក្រុងវៀងចន្ទន៍ ប្រទេសឡាវ ដែលនឹងជ្រើសរើសក្រុមជយលាភីទាំង ៤ ពោលគឺ ១ ក្រុម សម្រាប់ ១ វិញ្ញាសា។
ក្រៅពីទទួលបានប្រាក់រង្វាន់ចំនួន ៥ ០០០ ដុល្លារអាមេរិក បេក្ខជនជយលាភីនឹងទទួលបានការអញ្ជើញទៅទីក្រុងវៀងចន្ទន៍ ដើម្បីធ្វើបទបង្ហាញពីគម្រោងទៅកាន់ប្រមុខរដ្ឋាភិបាលក្នុងតំបន់ និងឥស្សរជនចូលរួមផ្សេងទៀតនៅខែមេសា ឆ្នាំ ២០២៣ ទាំងនៅក្នុងកិច្ចប្រជុំកំពូល MRC លើកទី៤ និងសិក្ខាសាលាអន្តរជាតិមុនកិច្ចប្រជុំកំពូលរបស់ MRC។
MRC បញ្ជាក់ថា «បន្ទាប់ពីនោះបេក្ខជនជយលាភីនឹងធ្វើការជាមួយ MRC ដើម្បីអនុវត្តបច្ចេកវិទ្យាដ៏ជោគជ័យរបស់ខ្លួនសម្រាប់ទន្លេមេគង្គ»៕