.jpg)
លោក មាស នី កាលពីពេលកន្លងមក ។ រូបថត សហការី
ភ្នំពេញៈ អ្នកឃ្លាំមើលបញ្ហាសង្គមសាទរចំពោះកិច្ចការរបស់ក្រសួងមហាផ្ទៃ និង ADB លើគម្រោងបង្កើតសាលាជាតិរដ្ឋបាលមូលដ្ឋាន បន្ទាប់ពីបានទទួលព័ត៌មានថា រដ្ឋមន្ត្រីក្រសួងមហាផ្ទៃលោក ស ខេង បានស្នើដល់ធនាគារអភិវឌ្ឍន៍អាស៊ី (ADB) ផ្តល់ជំនួយថវិកាបន្ថែម ដើម្បីទ្រទ្រង់គម្រោងសាលានេះក្នុងការធ្វើកំណែទម្រង់វិមជ្ឈការ និងវិសហមជ្ឈការ។
លោក មាស នី អ្នកតាមដានការអភិវឌ្ឍសង្គមបានថ្លែងថា ភាពវិជ្ជមាននៃជំនួយរបស់ ADB បានជួយលើកកម្ពស់វិស័យរដ្ឋបាលថ្នាក់ក្រោមជាតិមានមួយកម្រិតក្នុងរយៈពេលជាង ២០ ឆ្នាំមកនេះ ថ្វីបើវានៅមានកម្រិតតិចនៅឡើយក្ដី។ លោកថា សមត្ថភាពនៃរដ្ឋបាលនៅថ្នាក់ក្រោមជាតិនៅកម្ពុជា មិនទាន់ឆ្លើយតបនឹងតម្រូវការជាក់ស្ដែងទេ ដែលចាំបាច់ត្រូវមានការជួយជ្រោមជ្រែងពីដៃគូនានា។
លោកបានគូសបញ្ជាក់ថា ពីកម្រិតសមត្ថភាពនៃវិស័យរដ្ឋបាលថ្នាក់ក្រោមជាតិយ៉ាងដូច្នេះថា៖ «ទោះបីវាមានការប្រសើរឡើងជាមុនក្តី ប៉ុន្តែវានៅមានកម្រិតខ្លាំងណាស់ដែលមិនទាន់មានស្តង់ដាមួយត្រឹមត្រូវ យើងឃើញថា តម្លាភាពក្នុងភូមិ ឃុំ នៅមានកម្រិត ហើយសមត្ថភាពមន្ត្រីមូលដ្ឋានក៏នៅមានកម្រិតខ្ញុំឃើញជាក់ស្តែង សូម្បីកុំព្យូទ័រក្នុងមូលដ្ឋានខ្លះ គ្មានអ្នកចេះច្បាស់លាស់ផង ជាការរាំងស្ទះការងារមូលដ្ឋាន »។
លោកបានបន្ដថា៖ «ខ្ញុំសាទរនឹងជំនួយពីធនាគារអភិវឌ្ឍន៍អាស៊ីក្នុងការកែលម្អវិស័យរដ្ឋបាលថ្នាក់ក្រោមជាតិ ហើយក៏អំពាវនាវដល់រដ្ឋាភិបាលកម្ពុជា គិតគូរពង្រឹងវិស័យនេះឲ្យកាន់តែប្រសើរ ទាំងការបណ្តុះសមត្ថភាពមន្ត្រី និងការផ្តល់កញ្ចប់ថវិកាជំនួយបច្ចេកទេសនានាដល់ថ្នាក់មូលដ្ឋានផងដែរ»។
កាលពីថ្ងៃទី ៤ ខែតុលា ឆ្នាំ ២០២២ លោក ស ខេង រដ្ឋមន្ត្រីក្រសួងមហាផ្ទៃកម្ពុជា បានធ្វើជំនួបទ្វេភាគីជាមួយលោកស្រី Jyotsana Verma តំណាងធនាគារអភិវឌ្ឍន៍អាស៊ី (ADB) ប្រចាំនៅកម្ពុជាទើបតែងតាំងថ្មីនៅវិមានរដ្ឋសភា ដើម្បីពិភាក្សាការងារ។
លោក ស ខេង បានលើកឡើងពីគម្រោងបង្កើតសាលារដ្ឋបាលមូលដ្ឋានដែលមានការសហការពី ADB ក្នុងរយៈពេល ៥ ឆ្នាំ ដោយមានវិបត្តិមួយចំនួនធ្វើឲ្យរាំងស្ទះដល់គម្រោងនេះ។លោកបានស្នើឲ្យ ADB បន្តជួយគាំទ្រដល់គម្រោងនេះក្នុងគោលដៅកំណែទម្រង់វិមជ្ឈការ និងវិសហមជ្ឈការនៅកម្ពុជា។
លោកបានស្នើធនាគារអភិវឌ្ឍន៍អាស៊ីឲ្យគាំទ្របន្ថែមទៀតសម្រាប់ថវិកាគលើគម្រោងសាលាជាតិរដ្ឋបាលមូលដ្ឋានដែលនៅខ្វះខាត និងការសាងសង់ហេដ្ឋារចនាសម្ព័ន្ធផ្សេងទៀតក្រៅពីអគារសាលាជាតិរដ្ឋបាលមូលដ្ឋាន រួមមានដូចជា សួនច្បារ ទីធ្លាកីឡា និងស្រះទឹកជាដើម។
លោកថា គម្រោងបង្កើតសាលារដ្ឋបាលជាតិមូលដ្ឋាននេះកំពុងមានភាពយឺតយ៉ាវក្នុងការអនុវត្តដោយហេតុវិបត្តិកូវីដ ១៩ និងការគ្រប់គ្រងដីធ្លីសម្រាប់សាងសង់សាលាដែលក្រសួងគ្រោងទុកត្រឹម ៥ ខែប៉ុណ្ណោះ តែត្រូវអូសបន្លាយពេល។
លោកស្រី Jyotsana Verma តំណាងធនាគារអភិវឌ្ឍន៍អាស៊ី (ADB) ប្រចាំកម្ពុជា បានទទួលយកសំណើទាំងនេះ ហើយថា ADB នឹងបន្តធ្វើការសិក្សាជាមួយក្រុមការងារក្រសួងមហាផ្ទៃ ដើម្បីធានាបាននូវប្រសិទ្ធភាពការងារក្នុងគម្រោងរបស់ ADB និងក្រសួងមហាផ្ទៃកម្ពុជា។
លោកស្រីបានសម្តែងការសាទរជាខ្លាំងចំពោះការប្តេជ្ញាចិត្តរបស់រដ្ឋាភិបាលកម្ពុជាក្នុងការអនុវត្តលើកំណែទម្រង់វិមជ្ឈការ និងវិសហមជ្ឈការ ដែលលោកស្រីសង្កត់ធ្ងន់ថា ជាការងារទាមទាររយៈពេលយូរអង្វែង។
ADB បានជួយគាំទ្រដល់ប្រទេសកម្ពុជាក្នុងកិច្ចការងារកំណែទម្រង់វិមជ្ឈការនិងវិសហមជ្ឈការនេះតាំងពីឆ្នាំ ២០០២ ម្ល៉េះ ស្របជាមួយនឹងគម្រោងអភិវឌ្ឍន៍មួយចំនួនទៀតពីបណ្ដាប្រទេសនៅក្នុងតំបន់ទន្លេមេគង្គ៕
