ភ្នំពេញៈ អាជ្ញាធរពាក់ព័ន្ធ ត្រូវបានអនុញ្ញាតឱ្យចាត់វិធានការ ចំពោះពលរដ្ឋដែលនៅតែបន្តកាត់របង និងអ្នកបើកបរម៉ូតូធុនតូចចូលទៅបើកបរនៅលើផ្លូវល្បឿនលឿន ខណៈពេល ៥ ថ្ងៃ នៃសប្តាហ៍ដំបូងក្នុងការដាក់ឱ្យដំណើរការសាកល្បងប្រើប្រាស់ផ្លូវនេះ មានយានយន្តជាង ៥ ម៉ឺនគ្រឿង បានធ្វើដំណើរឆ្លងកាត់។
ផ្លូវល្បឿនលឿនភ្នំពេញ-ព្រះសីហនុ ត្រូវបានក្រសួងសាធារណការ និងដឹកជញ្ជូន ប្រកាសបើកដំណើរការសាកល្បងដោយឥតគិតថ្លៃចាប់ពីថ្ងៃទី ១ ដល់ថ្ងៃទី ៣១ ខែតុលា ដោយអ្នកប្រើប្រាស់អាចចំណាយពេលប្រមាណ ២ ម៉ោងប៉ុណ្ណោះក្នុងការធ្វើដំណើរពីរាជធានីភ្នំពេញទៅក្រុងព្រះសីហនុ ដែលកន្លងមកត្រូវចំណាយពេលពី ៥ ទៅ ៦ ម៉ោង តាមផ្លូវជាតិលេខ ៤។
លោក ហ៊ាង សុធាយុត្តិ អ្នកនាំពាក្យក្រសួងសាធារណការប្រាប់ ភ្នំពេញ ប៉ុស្តិ៍ នៅថ្ងៃទី ៦ តុលាថា គិតចាប់ពីថ្ងៃទី ១ ដល់ថ្ងៃទី ៥ តុលា មានយានយន្តជាង ៥ ម៉ឺនគ្រឿង បានចូលប្រើប្រាស់លើផ្លូវល្បឿនលឿន ដោយក្នុង១ ថ្ងៃៗ មានចន្លោះពីជិត ៩ ០០០ គ្រឿង ដល់ជាង ១៤ ០០០ គ្រឿង ខណៈការតេតាមប្រព័ន្ធទូរស័ព្ទសង្គ្រោះក្នុង ១ ថ្ងៃៗ មានប្រមាណ ៣០ ករណី។
ចំពោះបញ្ហាគ្រោះថ្នាក់ចរាចរណ៍វិញ លោក សុធាយុត្តិ នៅតែអះអាងថា មិនមានករណីគ្រោះថ្នាក់ចរាចរណ៍ដែលបណ្តាលឱ្យប៉ះពាល់ដល់អាយុជីវិតអ្នកធ្វើដំណើរនោះទេ ដោយក្នុងរយៈពេល ៥ ថ្ងៃកន្លងមកនេះ គឺគ្រាន់ តែកើតមានគ្រោះថ្នាក់ និងភាពមិនប្រក្រតីបន្តិចបន្តួចតែប៉ុណ្ណោះ។
លោកបានរៀបរាប់ថា៖ «ចំពោះបញ្ហាវិញ គឺតែងតែមានហើយ។ ប៉ុន្តែអ្វីដែលយើងឃើញ គឺមិនមានជាដុំកំភួននោះទេ ហើយយើងក៏បានអប់រំផ្សព្វផ្សាយបន្ថែមទៀត ជាមួយនឹងស្មារតីយោគយល់ខ្ពស់ចំពោះអ្នកបើកបរ ព្រោះអ្នកខ្លះ គាត់នៅតែមិនទាន់យល់។ ចំពោះគ្រោះថ្នាក់ចរាចរណ៍ តាមរបាយការណ៍ដូចជាមាន ១ ឬ ២ ករណីដែរ។ ប៉ុន្តែមិនមែនជាគ្រោះថ្នាក់ចរាចរណ៍បែបបុកគ្នានោះទេ គ្រាន់តែអ្នកបើកបរ គាត់បើកទៅប៉ះនឹងរបងផ្លូវប៉ុណ្ណោះ ដែលនេះគឺជាកត្តាយានយន្តរបស់អ្នកបញ្ជារដៃចង្កូតទេ»។
ចំពោះភាពមិនប្រក្រតីនៃការល្មើសនឹងការបើកម៉ូតូធុនតូច និងការកាត់របងផ្លូវល្បឿនលឿនវិញលោក ហ៊ាង សុធាយុត្តិ បានអះអាងថា អាជ្ញាធរ នឹងចាត់វិធានការតាមផ្លូវច្បាប់ ដោយធ្វើការឃាត់ខ្លួន និងឃាត់មធ្យោបាយធ្វើដំណើរទាំងនោះយកទៅរក្សាទុក ដើម្បីធ្វើកិច្ចសន្យា ហើយបើនៅតែបន្តល្មើស នឹងឈានទៅរកវិធានការពិន័យបន្ថែមទៀត។
លោកបានបញ្ជាក់ថា ការដែលសមត្ថកិច្ចពាក់ព័ន្ធត្រូវបានអនុញ្ញាតឱ្យអនុវត្តវិធានការចំពោះសកម្មភាពល្មើសទាំង ២ នេះ ក៏ព្រោះតែមើលឃើញពីកត្តាហានិភ័យធ្ងន់ធ្ងរ ដែលអាចបណ្តាលឱ្យមានគ្រោះថ្នាក់ចរាចរណ៍ដល់អាយុជីវិត និងប៉ះពាល់ដល់សណ្តាប់ធ្នាប់សង្គមធ្ងន់ធ្ងរ។
លោក បញ្ជាក់ថា៖«យើងកំពុងយកចិត្តទុកដាក់ ដោយសារតែពួកគាត់ដឹងហើយ ណែនាំហើយ ប៉ុន្តែនៅតែបំពាន។ ដូចនេះសកម្មភាពនេះ គឺជាកម្រិតមួយដែលយើងត្រូវចាត់វិធានការហើយ ដូចជាការកាត់របង និងការលើកម៉ូតូចូលអីហ្នឹង។ វិធានការដែលថ្នាក់ដឹកនាំបានដាក់ចេញ គឺការឃាត់ម៉ូតូហ្នឹងយកមករក្សាទុក ហើយយកម្ចាស់ហ្នឹងទៅធ្វើការអប់រំ ពិន័យ ឬមានវិធានការលើសពីហ្នឹងទៀត»។
យ៉ាងណា លោក សុធាយុត្តិ បញ្ជាក់ថា៖ «ទាំងនេះគឺជារឿងធ្ងន់ធ្ងរណាស់ ព្រោះយើងបានហែករបង ហើយយកម៉ូតូឡើងលើផ្លូវ ទាំងដែលខ្លួនឯងដឹងថា គេហាមមិនឱ្យចូលហើយ។ ទាំងនេះ ជាវិធានការដែលយើងបានជជែកគ្នា ហើយក៏មានការចូលរួមពីកងកម្លាំងយើងដែរ។ រាជរដ្ឋាភិបាល មន្ត្រីជំនាញយើង មិនចង់ធ្វើបែបនេះនោះទេ ព្រោះពេលខ្លះ វាប៉ះពាល់បងប្អូនប្រជាពលរដ្ឋ គ្រាន់តែពេលខ្លះបងប្អូនយើង ៤ ទៅ ១០ នាក់ហ្នឹង គាត់គួរតែមានការយល់ដូចគ្នា»។
កាលពីថ្ងៃទី ៥ ខែតុលា លោក ស៊ុន ចាន់ថុល រដ្ឋមន្ត្រីក្រសួងសាធារណការ បានដឹកនាំកិច្ចប្រជុំប្រចាំសប្តាហ៍ទី១ ដោយមានការចូលរួមពីថ្នាក់ដឹកនាំក្រសួង និងមន្ត្រីរាជការមកពីអង្គភាពក្រោមឱវាទក្រសួង ដើម្បីពិនិត្យពិភាក្សាលើការងារសំខាន់ៗទាក់ទងនឹងការអនុវត្តគម្រោងហេដ្ឋារចនាសម្ព័ន្ធផ្លូវថ្នល់ ការងារដឹកជញ្ជូនតាមផ្លូវទឹក ការងារទឹកកខ្វក់ ការអភិវឌ្ឍគម្រោងបច្ចេកវិទ្យាថ្មី។
កិច្ចប្រជុំប្រចាំសប្តាហ៍នេះ ក៏បានពិភាក្សាគ្នាពីវឌ្ឍនភាពនិងបញ្ហាប្រឈមមួយចំនួនពាក់ព័ន្ធនឹងការបើកឱ្យប្រើប្រាស់សាកល្បងផ្លូវល្បឿនលឿនភ្នំពេញ-ព្រះសីហនុ ព្រមទាំងការបំពាក់មេដាយជូនក្រុមការងារបច្ចេកទេសក្រុមហ៊ុន Cambodian PPSHV Expressway Co., Ltd ដែលមានស្នាដៃល្អក្នុងការសាងសង់ផ្លូវល្បឿនលឿនភ្នំពេញ-ព្រះសីហនុផងដែរ។
តាមទំព័រហ្វេសបុករបស់ក្រសួងបានឱ្យដឹងថា៖ «អង្គប្រជុំបានពិភាក្សាដោយផ្តោតជាសំខាន់លើបញ្ហាប្រឈមមួយចំនួនដែលបានកើតឡើងក្នុងអំឡុងពេលនៃការបើកឱ្យប្រើប្រាស់សាកល្បងផ្លូវល្បឿនលឿនភ្នំពេញ-ក្រុងព្រះសីហនុ និងដំណោះស្រាយដើម្បីទប់ស្កាត់សកម្មភាពខុសច្បាប់ ក្នុងន័យជំរុញឱ្យការប្រើប្រាស់ផ្លូវល្បឿនលឿនអាចប្រព្រឹត្តទៅដោយរលូន និងប្រសិទ្ធភាព»។
ក្រសួងសាធារណការបានឱ្យដឹងថា ខ្លួននឹងពិនិត្យបន្ថែមទៀតដោយធ្វើយ៉ាងណា ឱ្យមានភាពប្រសើរឡើងការប្រមូលកម្រៃពីការប្រើប្រាស់ផ្លូវល្បឿនលឿន និងការចែករំលែកទិន្នន័យប្រតិបត្តិការ ធានាតម្លាភាពអាជីវកម្មក្រុមហ៊ុន និងសុវត្ថិភាពចរាចរណ៍ ជូនដល់ប្រជាពលរដ្ឋ តាមរយៈយន្តការបច្ចេកវិទ្យា DIP ដែលជាបច្ចេកវិទ្យាទំនើបជួយកាត់បន្ថយពេលវេលា និងផ្តល់ភាពងាយស្រួលដល់អ្នកប្រើប្រាស់ផ្លូវល្បឿនលឿននេះ។
ផ្លូវល្បឿនលឿននេះបានបើកការដ្ឋានសាងសង់ពីថ្ងៃទី ២២ ខែមីនា ឆ្នាំ ២០១៩ ដែលតួផ្លូវមានទទឹង ២៤ ម៉ែត្រមាន ៤ គន្លង (២ ទៅ ២ មក) និងគន្លងឈប់បន្ទាន់ (១ ទៅ ១ មក) តភ្ជាប់ពីភ្នំពេញដល់សង្កាត់លេខ ៣ ក្រុងព្រះសីហនុ ដោយឆ្លងកាត់ខេត្តកណ្តាល កំពង់ស្ពឺ និងខេត្តកោះកុង។
ផ្លូវនេះមានសួនច្បារខណ្ឌកណ្តាល មានផ្លូវបំបែកប្តូរទិស (Inter-Change) ភ្ជាប់មកផ្លូវជាតិលេខ ៤ ចំនួន ៦ កន្លែង មានកន្លែងឈប់សម្រាក ៣ កន្លែង និងចំណតរថយន្ត ១ កន្លែងផងដែរ។ នេះបើតាមក្រសួងសាធារណការ និងដឹកជញ្ជូន៕
វីដេអូ៖