ភ្នំពេញៈ លោកនាយករដ្ឋមន្ត្រី ហ៊ុន សែន ប្រកាសថា ការផ្តល់សាច់ប្រាក់ដល់ពលរដ្ឋក្រីក្រ តាមរបបគាំពារសង្គម ចំពោះវិបត្តិកូវីដ ១៩ និងអតិផរណា មិនមែនជាការទាញយកសន្លឹកឆ្នោតនៅក្នុងការបោះឆ្នោតឆ្នាំ ២០២៣ ឡើយ។
លោក ហ៊ុន សែន បានប្រកាសបែបនេះ នៅព្រឹកថ្ងៃទី ០៦ ខែតុលា ក្នុងពិធីបើកសន្និសីទ «ចក្ខុវិស័យកម្ពុជាឆ្នាំ ២០២២» នៅភ្នំពេញ។
លោក ហ៊ុន សែន បានស្នើបណ្តាគណបក្សប្រឆាំង និងអង្គការសង្គមស៊ីវិល កុំឱ្យមានការលើកឡើងថា រដ្ឋាភិបាលកំពុងកេងចំណេញនយោបាយតាមរយៈយន្តការផ្តល់សាច់ប្រាក់ដល់អ្នកដែលប៉ះពាល់សេដ្ឋកិច្ចពីជំងឺកូវីដ ១៩ និងការត្រៀមបម្រុង ដើម្បីអន្តរាគមន៍សម្រាប់ផលប៉ះពាល់អតិផរណា។
លោកបញ្ជាក់ថា៖ «ខ្ញុំក៏សូមសំណូមពរ ឱ្យបណ្តាបក្សនយោបាយ សង្គមស៊ីវិល យោគយល់ចំពោះរាជរដ្ឋាភិបាល កុំចាត់ទុកថា ការធ្វើរបស់រាជរដ្ឋាភិបាល គឺជាល្បែងដើម្បីទាញយកសន្លឹកឆ្នោត នៅឆ្នាំ ២០២៣ ខាងមុខ»។
លោកសង្ឃឹមថា ប្រជាពលរដ្ឋដែលគ្រប់លក្ខខណ្ឌទទួលបានជំនួយសាច់ប្រាក់ នឹងទទួលបានផលប្រយោជន៍ ដោយមិនមែនជាការលេងសើចនយោបាយនោះទេ ពីព្រោះនេះគឺជាការទទួលខុសត្រូវរបស់ជាតិ។
«សង្ឃឹមថា បណ្តាគណបក្សនយោបាយនានានិងសង្គមស៊ីវិល មិនយកបញ្ហានេះធ្វើជាអាវុធវ៉ៃរដ្ឋាភិបាលថា រៀបចំគម្រោងបន្តផ្តល់សាច់ប្រាក់ដល់អ្នករងគ្រោះដោយសារកូវីដ បន្ថែមទៅដោយត្រៀមបម្រុងដើម្បីអន្តរាគមន៍សម្រាប់ផលប៉ះពាល់ទៅលើអតិផរណាថា ជាការកេងចំណេញនយោបាយ»។
ឆ្លើយតបនឹងការលើកឡើងនេះ លោក ថាច់ សេដ្ឋា អនុប្រធានគណបក្សភ្លើងទៀន អះអាងថា រដ្ឋាភិបាលមិនគួរណាមានក្តីបារម្ភអំពីការរិះគន់ណាមួយឡើយ នៅពេលដែលរដ្ឋាភិបាលបានធ្វើអំពើល្អជាមួយពលរដ្ឋ។ សម្រាប់លោក ថាច់ សេដ្ឋា លោកសាទរដែលរដ្ឋាភិបាលបានគិតគូរពីបញ្ហាប្រឈមរបស់ប្រជាពលរដ្ឋ និងបានជួយអន្តរាគមន៍ទៅលើបញ្ហាទាំងនោះ។
លោកបញ្ជាក់ថា៖ «រដ្ឋាភិបាលការពារផលប្រយោជន៍ ធនធានធម្មជាតិ អាហ្នឹងរឹតតែសប្បាយចិត្តថែមទៀតផង។ យើងអបអរសាទរតើ ឱ្យតែបានជួយដល់ប្រជាពលរដ្ឋឱ្យមានជីវភាពសមរម្យ កុំឱ្យប្រជាពលរដ្ឋក្លាយទៅជាអ្នកក្រីក្រសុំបណ្ណក្រីក្រ អាហ្នឹងយើងមិនសប្បាយចិត្តដែរ។ យើងចង់ឃើញប្រជាពលរដ្ឋរស់នៅសមរម្យ អ៊ីចឹងខ្ញុំគិតថា វាមិនកេងចំណេញនយោបាយអីទេ តែបានជួយប្រជាពលរដ្ឋ»។
យ៉ាងណាមិញ លោក ថាច់ សេដ្ឋា លើកឡើងថា ទង្វើរបស់រដ្ឋាភិបាល ក៏មិនត្រូវផ្សារភ្ជាប់ទៅនឹងឈ្មោះរបស់គណបក្សនោះដែរ ពីព្រោះវាជារឿងមិនត្រឹមត្រូវ ដែលរដ្ឋាភិបាលមិនត្រូវធ្វើជាដាច់ខាត។
គិតមកដល់ខែតុលា ឆ្នាំ ២០២២ នេះ រាជរដ្ឋាភិបាល បានឧបត្ថម្ភសាច់ប្រាក់ចំពោះប្រជាពលរដ្ឋដែល ដែលរងផលប៉ះពាល់ពីជំងឺកូវីដ ១៩ ដោយរដ្ឋបានចំណាយថវិកាជាតិប្រមាណ ៨០០ លានដុល្លារសហរដ្ឋអាមេរិក៕