ភ្នំពេញៈ លោកនាយករដ្ឋមន្ត្រី ហ៊ុន សែន ប្រកាសថា តាមការប៉ាន់ស្មានប្រជាជនប្រមាណ ៦០ ម៉ឺនគ្រួសារ ឬស្មើនឹងប្រមាណ ២ លាននាក់ ដែលរងផលប៉ះពាល់ពីអតិផរណាដោយសារវិបត្តិសង្គ្រាមរុស្ស៊ី-អ៊ុយក្រែន នឹងទទួលបាននូវការឧបត្ថម្ភសាច់ប្រាក់ពីរាជរដ្ឋាភិបាលក្នុងពេលឆាប់ៗខាងមុខនេះ។
កាលពីថ្ងៃទី ៥ ខែតុលា លោក ហ៊ុន សែន បានចុះហត្ថលេខាលើសេចក្តីសម្រេចប្រកាសដាក់ឱ្យដំណើរការកម្មវិធីឧបត្ថម្ភសាច់ប្រាក់ជូនគ្រួសារប្រជាពលរដ្ឋងាយរងហានិភ័យដើម្បីឆ្លើយតបនឹងសម្ពាធអតិផរណា ដែលជាយន្តការថ្មី នៃការផ្តល់សាច់ប្រាក់ជូនប្រជាពលរដ្ឋ។
លោកបានថ្លែងថា៖ «សេចក្តីសម្រេចនេះ ខ្ញុំបានចុះហត្ថលេខាពីម្សិលហើយសង្ឃឹមថា អង្គភាពដែលមានការពាក់ព័ន្ធនឹងធ្វើកិច្ចការងារនេះដោយរួសរាន់ ដែលប្រជាជននឹងអាចទទួលបាននូវលប្រយោជន៍ ក្នុងរយៈពេលដ៏ឆាប់។ ប្រជាពលរដ្ឋទាំងនេះអាចគ្របដណ្តប់រហូតដល់ទៅ ៦០ ម៉ឺនគ្រួសារ និងប្រជាជនប្រមាណ ២ លាននាក់ ដែលពួកគាត់រងផលប៉ះពាល់ចេញពីអតិផរណា»។
លោកនាយករដ្ឋមន្ត្រីថ្លែងដូច្នេះ ក្នុងពិធីបើកសន្និសីទ «ចក្ខុវិស័យកម្ពុជាឆ្នាំ ២០២២» ក្រោមមូលបទ «ការស្តារកម្ពុជាឡើងវិញ៖ ការអភិវឌ្ឍប្រកបដោយនិរន្តរភាព បន្ទាប់ពីវិបត្តិជំងឺកូវីដ ១៩» នៅសណ្ឋាគារសុខា រាជធានីភ្នំពេញ នាថ្ងៃទី ៦ ខែតុលា។
លោក ហ៊ុន សែន បន្តថា ប្រជាពលរដ្ឋរងផលប៉ះពាល់ពីអតិផរណានេះគឺរឿងនេះចាប់ផ្តើមពីសង្គ្រាមរុស្ស៊ីវាយលុកចូលអ៊ុយក្រែន និងចាប់ផ្តើមពីទណ្ឌកម្មហួសកម្រិតដែលធ្វើឱ្យពិភពលោកកំពុងតែជ្រួលច្របល់ទៅលើបញ្ហាអតិផរណា។ រាជរដ្ឋាភិបាលមិនអាចទុកឱ្យប្រជាពលរដ្ឋរងគ្រោះ ដោយសារតែអតិផរណានោះទេ។ ដូច្នេះ វាជាភ័ព្វសំណាងដែលរាជរដ្ឋាភិបាលមានសល់ទុនមួយចំនួននៅក្នុងដៃ ដើម្បីអន្តរាគមន៍ជួយប្រជាជនដែលរងផលប៉ះពាល់។
លោកថ្លែងថា៖ «ក្នុងហ្នឹង តាមការពិនិត្យរបស់យើង យើងអាចឃើញថា សេដ្ឋកិច្ចក្រៅប្រព័ន្ធអាចជាចំណែកមួយដ៏ធំនៃការទទួលបាននូវប្រាក់នោះតែម្តង។ ឧទាហរណ៍ការលក់ដូរតូចតាចមួយចំនួន ឬក៏ផ្នែកសេវាអាជីវកម្មមួយចំនួនមិនមែនជាសេដ្ឋកិច្ចក្នុងប្រព័ន្ធទេ។ ក៏ប៉ុន្តែគាត់ធ្លាប់លក់បានប៉ុនហ្នឹងកម្លាំងទិញរបស់ពួកគាត់នឹងត្រូវថមថយដោយសារអតិផរណា។ អ៊ីចឹងទេ ជម្រើសដែលល្អដើម្បីចៀសវាងកុំឱ្យប្រជាពលរដ្ឋរបស់យើងធ្លាក់ទៅក្នុងស្ថានភាពដ៏លំបាកនោះ រដ្ឋត្រូវធ្វើអន្តរាគមន៍តាមរយៈផ្តល់សាច់ប្រាក់ជូនពួកគាត់»។
លោកនាយករដ្ឋមន្ត្រីបន្តថា ទាំងការរ៉ាប់រងលើការបន្តឧបត្ថម្ភជាសាច់ប្រាក់ដល់ប្រជាជនដែលរងផលបះពាល់ពីជំងឺកូវីដ ១៩ និងពីអតិផរណា រាជរដ្ឋាភិបាលទទួលបន្ទុក ក្នុងការប៉ះប៉ូវដល់ប្រជាជនជិត ៥ លាននាក់ដើម្បីកុំឱ្យពួកគាត់ធ្លាក់ទៅក្រោមបន្ទាត់ភាពក្រីក្រ។ ស្ថានភាពនេះទាមទារឱ្យរាជរដ្ឋាភិបាលមានការទទួលខុសត្រូវក្នុងការប្រើប្រាស់នូវហិរញ្ញវត្ថុដែលប្រមូលឱ្យបាន ហើយឆ្ពោះទៅកាន់អ្នកក្រីក្រ។
លោកមាស នី អ្នកស្រាវជ្រាវការអភិវឌ្ឍសង្គម សាទរ និងគាំទ្រផែនការដែលលើកឡើងរបស់រដ្ឋាភិបាលក្នុងពេលនេះ ដើម្បីជួយដល់ពលរដ្ឋដែលរងគ្រោះពីវិបត្តិអតិផរណានេះ ប៉ុន្តែលោកស្នើឱ្យរដ្ឋាភិបាលគិតគូរយន្តការមួយបន្ថែមទៀតនោះគឺ ការកាត់បន្ថយអត្រាពន្ធលើផលិតផល ឬមុខទំនិញដែលដាក់លក់លើទីផ្សារ ដែលប្រទេសផ្សេងៗធ្លាប់បានអនុវត្តជោគជ័យរួចទៅហើយក្រៅពីការឧបត្ថម្ភសាច់ប្រាក់ដល់ពលរដ្ឋ។
លោកចង់ឱ្យរដ្ឋាភិបាលគិតគូរយន្តការកាត់បន្ថយអាត្រាពន្ធលើមុខទំនិញនានា ដើម្បីអាចជួយសម្រាលបន្ទុកដល់ពលរដ្ឋទូទាំងប្រទេស ពីវិបត្តិអតិផរណាជាសកលមួយនេះ។
កាលពីថ្ងៃទី ៥ ខែតុលា រាជរដ្ឋាភិបាល បានប្រកាសបន្តឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ ១៩ ក្នុងរយៈពេល ៣ ខែបន្តទៀត ដែលបានអនុវត្តរយៈពេល ១០ ជុំរួចមកហើយ។
លោក ហ៊ុន សែន ថ្លែងបន្តថា រាជរដ្ឋាភិបាល នឹងពិនិត្យបញ្ហានេះក្នុងរយៈពេល ៣ ខែម្តង។ ប្រជាជនដែលធ្លាប់បានទទួលរួចមកហើយ ក៏នឹងបន្តទទួលទៅទៀតនូវប្រាក់ឧបត្ថម្ភនេះ ដើម្បីទ្រទ្រង់ប្រជាពលរដ្ឋ ដែលមិនទាន់រួចផុតពីស្ថានភាពនៃភាពក្រីក្រ កុំឱ្យធ្លាក់កាន់តែធ្ងន់។ ជំនួយនេះបានចូលរួមចំណែកជួយដល់ប្រជាជនបានជិត ៧០ ម៉ឺនគ្រួសារ និងប្រជាជនជិត ៣លាន នាក់ ដោយចំណាយថវិកាប្រមាណ ៨០០ លានដុល្លារ។
លោកបន្តថា៖ «ខ្ញុំគួរតែប៉ាន់ស្មានទុកជាមុនថា ហោចណាស់ជំនួយនេះនឹងត្រូវធ្វើរយៈពេលប្រមាណជាង ១ ឆ្នាំទៀតយ៉ាងតិច ហើយនៅពេលមានការដកថយក៏មិនអាចដកថយភា្លមទាំងស្រុងនោះដែរ»។
លោកនាយករដ្ឋមន្ត្រី បានណែនាំឱ្យ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុត្រូវសិក្សាបញ្ហានេះ ហើយប្រសិនបើមានការដកថយ ក៏មិនអាចដកថយពី ១០០ ភាគរយ មកដល់ ០ ភាគរយតែម្តងនោះទេ តែត្រូវមានវិធីដកថយតាមជំហាន ឧទាហរណ៍ ពី ១០០ ភាគរយមក ៧០ ភាគរយ និងពី ៧០ ភាគរយមក ៥០ ភាគរយ និងបន្តបន្ទាប់មកទៀត ដើម្បីចៀសវាងប្រជាពលរដ្ឋទាំងនោះបាត់បង់នូវចំណូលភ្លាមៗ ដែលធ្វើឱ្យពួកគាត់ជួបការលំបាក៕