ភ្នំពេញៈ អគ្គលេខាធិការដ្ឋានក្រុមប្រឹក្សាជាតិគាំពារសង្គម ចេញផ្សាយគោលនយោបាយសង្ខេបស្តីពីការវាយតម្លៃដំណើរការអនុវត្ត កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ ឆ្នាំ បន្ទាប់ពីក្រសួងសង្គមកិច្ចរយៈពេលជាង ២ ឆ្នាំ បានបើកផ្តល់អត្ថប្រយោជន៍ដល់ស្ត្រីមានផ្ទៃពោះជាង ១៦ ម៉ឺននាក់ និងកុមារជាង ១០ ម៉ឺននាក់ ក្នុងទឹកប្រាក់ប្រមាណ ១៨,៦ លានដុល្លារ។
កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ ឆ្នាំ គឺជាកម្មវិធីជាតិជំនួយ សង្គមក្នុងផ្នែកការអភិវឌ្ឍមូលធនមនុស្សនៃក្របខ័ណ្ឌគោលនយោបាយជាតិគាំពារសង្គមឆ្នាំ ២០១៦ ដល់ ២០២៥។ កម្មវិធីនេះត្រូវបានដាក់ឱ្យអនុវត្តកាលពីថ្ងៃទី ១ មិថុនា ឆ្នាំ ២០១៩ ដោយផ្ដោតលើក្រុមគោលដៅជាស្ត្រីមានផ្ទៃពោះ និងកុមារអាយុក្រោម ២ ឆ្នាំ ដែលស្ថិតក្នុងគ្រួសារក្រីក្រ។
អគ្គលេខាធិការដ្ឋានក្រុមប្រឹក្សាជាតិគាំពារសង្គមឱ្យដឹងថា បច្ចុប្បន្នក្រសួងសង្គមកិច្ច អតីតយុទ្ធជន និង យុវនីតិសម្បទា កំពុងដឹកនាំអនុវត្ត ការបើកផ្តល់អត្ថប្រយោជន៍នៃកម្មវិធីនេះ ដោយមានការចូលរួមអនុវត្តពីក្រសួង-ស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិ ជាពិសេស រដ្ឋបាលឃុំ-សង្កាត់ និងមូលដ្ឋានសុខាភិបាលសាធារណៈ។
អគ្គលេខាធិការដ្ឋានក្រុមប្រឹក្សាជាតិគាំពារសង្គមបញ្ជាក់ថា៖ «ជាវឌ្ឍនភាព គិតចាប់ពីពេលដាក់ឱ្យដំណើរការរហូតដល់ខែឧសភា ឆ្នាំ ២០២២ កម្មវិធីនេះបានផ្ដល់អត្ថប្រយោជន៍ជូនស្ត្រីមានផ្ទៃពោះចំនួន ១៦៥ ៦១០ នាក់ និងកុមារចំនួន ១០២ ០៨៣ នាក់ ដោយបានចំណាយថវិកាជាតិសរុបចំនួន ៧៤ ប៊ីលានរៀល ឬស្មើនឹង ១៨,៦ លានដុល្លារអាមេរិក»។
ដោយកម្មវិធីនេះត្រូវបានដាក់ឱ្យដំណើរការអស់រយៈពេលជាង ២ ឆ្នាំមកហើយ ក្រុមប្រឹក្សាជាតិគាំពារសង្គម មើលឃើញពីភាពចាំបាច់ក្នុងការវាយតម្លៃអំពីប្រសិទ្ធភាពនៃដំណើរការអនុវត្តកម្មវិធី ដើម្បីពិនិត្យលទ្ធភាពកែលម្អយន្តការអនុវត្តតាមការចាំបាច់។
ព្រឹត្តិបត្រសង្ខេបគោលនយោបាយរបស់អគ្គលេខាធិការដ្ឋានក្រុមប្រឹក្សាជាតិគាំពារសង្គម ដែលត្រូវបានបង្ហាញជាសាធារណៈបញ្ជាក់ថា ការវាយតម្លៃនេះបានធ្វើឡើងដោយមានកិច្ចសហការពីក្រសួង-ស្ថាប័នពាក់ព័ន្ធ និងជំនួយ បច្ចេកទេសពីមូលនិធិសហប្រជាជាតិ ដើម្បីកុមារ (UNICEF)។ ការវាយតម្លៃដំណើរការអនុវត្តកម្មវិធីឧបត្ថម្ភសាច់ប្រាក់នេះត្រូវបានផ្តួចផ្តើមឡើងនៅពាក់កណ្តាល ឆ្នាំ ២០២១ ហើយក្រុមហ៊ុនស្រាវជ្រាវម៉ុនទ្រូសអន្តរជាតិ (Montrose International) ទទួលបានអាណត្តិក្នុងការរៀបចំការវាយតម្លៃ ក្រោមការដឹកនាំដោយក្រុមការងារបច្ចេកទេសអន្តរក្រសួង។
ព្រឹត្តិបត្រសង្ខេបគោលនយោបាយ ដែលមាន ៨ ទំព័រឱ្យដឹងថា៖ «ការវាយតម្លៃនេះ ធ្វើឡើងនៅខេត្តគោលដៅចំនួន ៦ រួមមានរាជធានីភ្នំពេញ ខេត្តបាត់ដំបង កំពត ស្វាយរៀង មណ្ឌលគិរី និងខេត្តស្ទឹងត្រែង ដែលបានជ្រើសរើស ដោយចេតនា ដើម្បីឱ្យមានការសម្ភាស និងប្រមូលទិន្នន័យពីទីតាំង ភូមិសាស្ត្រចម្រុះក្នុងប្រទេសកម្ពុជាដាក់បញ្ចូលឱ្យមានតំណាងជនជាតិភាគតិច និងមានសមាមាត្រប្រជាជនមានបណ្ណសមធម៌ខ្ពស់»។
ព្រឹត្តិបត្របន្តថា៖ «ជារួម កិច្ចសម្ភាសន៍ជាមួយអ្នកផ្តល់ព័ត៌មាន គន្លឹះមានចំនួន ១០២ នាក់ កិច្ចពិភាក្សាជាក្រុមមានចំនួន ៤៩ ក្រុម និងករណីសិក្សាចំនួន ១៦ ករណី។ សរុបអ្នកចូលរួមផ្តល់កិច្ចសម្ភាសន៍ ទាំងអស់មានចំនួន ៤៤៧ នាក់ ក្នុងនោះស្ត្រីមានចំនួន ២៩៨ នាក់ និងជនមានពិការភាពចំនួន ១១ នាក់។ ក្នុងចំណោមសកម្មភាពខាងលើ កិច្ចពិភាក្សាជាក្រុមចំនួន ២៥ ក្រុម និងករណីសិក្សាទាំងអស់ ត្រូវបានធ្វើឡើងដោយផ្ទាល់។ ចំណែកសកម្មភាពក្រៅពីនេះ ត្រូវបានធ្វើឡើងដោយការជួបពីចម្ងាយតាមប្រព័ន្ធឌីជីថល»។
បន្ទាប់ពីប្រើប្រាស់ក្របខ័ណ្ឌវាយតម្លៃរបស់អង្គការ សម្រាប់កិច្ចសហប្រតិបត្តិការ និងការអភិវឌ្ឍសេដ្ឋកិច្ច (OECD) អគ្គលេខាធិការដ្ឋានក្រុមប្រឹក្សាជាតិគាំពារសង្គមអះអាងថា តាមលទ្ធផលនៃការវាយតម្លៃបង្ហាញឱ្យឃើញពីការជាប់ពាក់ព័ន្ធ ស័ក្តិសិទ្ធិភាព ប្រសិទ្ធភាព ភាពស៊ីចង្វាក់គ្នា និងផលប៉ះពាល់ដំបូងរបស់កម្មវិធីលើសុខភាព អាហារូបត្ថម្ភ និងសុខុមាលភាពទូទៅរបស់អ្នកទទួលផលពីកម្មវិធី និងបានផ្តល់ជាអនុសាសន៍ ដើម្បីកែលម្អយន្តការអនុវត្តកម្មវិធីផងដែរ។
អគ្គលេខាធិការដ្ឋានក្រុមប្រឹក្សាជាតិគាំពារសង្គមបញ្ជាក់ថា៖ «អនុសាសន៍ចំនួន ៩ ចំណុច ត្រូវលើកឡើងដើម្បីឱ្យកម្មវិធី ធ្វើការពង្រឹង និងពង្រីកគោលនយោបាយរបស់ខ្លួនទៅដល់ពលរដ្ឋ ដូចជាការប្រើប្រាស់បច្ចេកវិទ្យាគ្រប់គ្រងព័ត៌មានរបស់កម្មវិធី បង្កើនលទ្ធភាពប្រើប្រាស់សេវាទូទាត់សាច់ប្រាក់ឱ្យបានច្រើនប្រភព និងពង្រឹងសមត្ថភាពបុគ្គលិក ភ្នាក់ងារ និងអ្នកផ្តល់សេវាជូនពលរដ្ឋជាដើម»។
កម្មវិធីជាតិជំនួយសង្គមនេះមានគោលបំណងលើកកម្ពស់សុខុមាលភាពមាតា និងទារក ដើម្បីរួមចំណែកដោះស្រាយបញ្ហាកង្វះអាហារូបត្ថម្ភរបស់កុមារក្នុងគ្រួសារក្រីក្រ តាំងពីកូនក្នុងផ្ទៃដល់អាយុ ២ ឆ្នាំដើម្បីជំរុញការលូតលាស់ ទាំងកាយសម្បទា និងបញ្ញាស្មារតីរយៈពេល ១ ០០០ ថ្ងៃដំបូងនៃជីវិត៕