លោក ហ៊ុន សែន ក្នុងពិធីបើកសន្និសីទ «ចក្ខុវិស័យកម្ពុជាឆ្នាំ ២០២២»នៅថ្ងៃទី ៦ តុលា។ រូបថត SPM
ភ្នំពេញៈកម្ពុជាត្រូវបានចាត់ទុកថា ជាប្រទេសឈានមុខមួយ ដែលបានគ្រប់គ្រង និងងើបចេញពីវិបត្តិនៃជំងឺកូវីដ ១៩ រហូតឈានដល់ការបើកដំណើរការប្រទេសឡើងវិញ កាលពីដើមខែវិច្ឆិកា ឆ្នាំ ២០២១ ប៉ុន្តែទោះជាយ៉ាងនេះក្តី លោកនាយករដ្ឋមន្ត្រី ហ៊ុន សែន បានជំរុញឱ្យមានការរៀបចំប្រព័ន្ធសុខាភិបាលឱ្យរឹងមាំបន្ថែមទៀត។
នាពិធីបើកសន្និសីទ «ចក្ខុវិស័យកម្ពុជាឆ្នាំ ២០២២» ពិភាក្សាពីការស្តារកម្ពុជាក្រោយវិបត្តិជំងឺកូវីដ ១៩ កាលពីថ្ងៃទី ៦ ខែតុលា លោកនាយករដ្ឋមន្រ្តី បានលើកឡើងថា កម្ពុជាត្រូវបានចាត់ទុកជាប្រទេសឈានមុខមួយដែលបានគ្រប់គ្រង និងងើបចេញពីវិបត្តិនៃជំងឺកូវីដ ១៩ បានយ៉ាងល្អប្រសើរ។ ក្នុងបរិការណ៍ដែលប្រទេសជាច្រើន នៅជុំវិញពិភពលោកនៅបន្តជួបប្រទះនឹងការឆ្លងរាលដាលនៅឡើយរាជរដ្ឋាភិបាលកម្ពុជា បាននិងកំពុងព្យាយាមប្រែក្លាយវិបត្តិឱ្យទៅជាកាលានុវត្តភាព តាមរយៈការពន្លឿនការកែទម្រង់ស៊ីជម្រៅ ដើម្បីលើកកម្ពស់បរិយាកាសធុរកិច្ច និងពង្រឹងភាពប្រកួតប្រជែងរបស់កម្ពុជា។
លោក ហ៊ុន សែន មានប្រសាសន៍ថា ៖«បន្ថែមពីលើ ការចាក់វ៉ាក់សាំង រាជរដ្ឋាភិបាលនឹងជំរុញការវិនិយោគលើវិស័យសុខាភិបាល ដើម្បីរៀបចំប្រព័ន្ធសុខាភិបាលមួយដ៏រឹងមាំ ដែលអាចជួយ និងការពារប្រជាជនពីជំងឺកូវីដ ១៩ ក៏ដូចជាជំងឺរាតត្បាតផ្សេងទៀត ដែលអាចកើតមានឡើងជាយថាហេតុនាពេលអនាគត»។
ទាក់ទងនឹងជំងឺកូវីដ ១៩ នេះដែរ លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល បានលើកឡើងក្នុងកិច្ចប្រជុំថ្នាក់ដឹកនាំជាន់ខ្ពស់ នាសម័យប្រជុំមហាសន្និបាតអង្គការសហប្រជាជាតិលើកទី៧៧ កាលពីថ្ងៃទី ២៣ ខែកញ្ញា កន្លងទៅថា ការរាតត្បាតនៃវីរុសកូវីដ ១៩ នៅមិនទាន់ចប់នៅឡើយទេ ហើយពិភពលោកក៏កំពុងតែប្រឈម មុខទៅនឹងជំងឺរាតត្បាតនេះនៅឡើយដែរ។ លោកស្រីបានឱ្យដឹងថា ការទទួលយកការចាក់វ៉ាក់សាំងកូវីដ ១៩ ការធ្វើតេស្ត និងការព្យាបាលត្រូវបន្តផ្សព្វផ្សាយយ៉ាងសកម្ម ដើម្បីជំរុញការផ្លាស់ប្តូរឥរិយាបថក្នុងការថែរក្សាសុខភាពផ្ទាល់ខ្លួន ក្នុងការតាមដាន និងកំណត់បាននូវរោគសញ្ញាសម្រាប់ការសង្ស័យនៃការឆ្លងវីរុសកូវីដ ១៩។
លោកស្រី ឱ វណ្ណឌីន បញ្ជាក់ថា៖ «ត្រូវវិនិយោគលើការត្រៀមលក្ខណៈនៅថ្ងៃនេះ ដូច្នេះ យើងនឹងមិនមានការសោកស្តាយនៅថ្ងៃស្អែកឡើយ។ ការត្រៀមលក្ខណៈទុកជាមុន គឺជាមធ្យោបាយដ៏ល្អប្រសើរបំផុត ដើម្បីកាត់បន្ថយផលប៉ះពាល់សុខភាព សង្គម និងសេដ្ឋកិច្ច»។
លោកស្រីបន្តទៀតថា ត្រូវតែមានកំណែទម្រង់ វិនិយោគ និងពង្រឹងប្រព័ន្ធសុខាភិបាលសម្រាប់អនាគត។ ការអនុវត្តកម្មវិធីជំរុញការថែទាំសុខភាពបឋមគឺជាការវិនិយោគដ៏ល្អបំផុត សម្រាប់ការសម្រេចបាននូវសុខភាពសម្រាប់ទាំងអស់គ្នា។ លោកស្រីថា៖ «ប្រព័ន្ធសុខាភិបាលរឹងមាំគឺជាលក្ខខណ្ឌចាំបាច់ជាមុន (pre-condition) សម្រាប់ការគ្រប់គ្រងការរាតត្បាតជំងឺកូវីដ ១៩ និងសម្រាប់សង្គ្រោះបន្ទាន់ផ្នែកសុខភាពនាពេលអនាគត»។
ជាមួយគ្នានេះដែរ នាយកប្រចាំតំបន់ប៉ាស៊ីហ្វិកខាងលិចរបស់អង្គការសុខភាពពិភពលោក លោកតាកេស៊ី កាសៃ បានលើកឡើងដោយកោតសរសើរកម្ពុជា ក្នុងការឆ្លើយតបនឹងជំងឺកូវីដ ១៩ និងការប្តេជ្ញាចិត្តក្នុងការវិនិយោគលើវិស័យសុខាភិបាល សម្រាប់ពេលអនាគតផងដែរ។ លោកបានលើកឡើងដូចនេះ ក្នុងអំឡុងពេលលោកបានមកបំពេញទស្សនកិច្ចក្នុងប្រទេសកម្ពុជា រយៈពេល ៨ ថ្ងៃ កាលពីចុងខែមិថុនា និងដើមខែកក្កដា កន្លងមក។ លោក កាសៃ បានឱ្យដឹងថា ការរាតត្បាតនៃជំងឺកូវីដ ១៩ បានបង្រៀនឱ្យគ្រប់គ្នាដឹងថា ពេលដែលសុខភាពប្រឈមនឹងហានិភ័យអ្វីៗទាំងអស់ក៏ប្រឈមនឹងហានិភ័យដែរ។
លោកថ្លែងថា៖ «ដោយផ្អែកលើមូលដ្ឋានគ្រឹះដ៏រឹងមាំ និងមេរៀនបទពិសោធដែលទទួលបានពីការឆ្លើយតបនឹងការរាតត្បាតនៃជំងឺកូវីដ ១៩ កន្លងមក កម្ពុជាទទួលបានការគាំទ្រពី WHO ដើម្បីពង្រឹងសនិ្តសុខសុខភាព និងការត្រៀមលក្ខណៈឆ្លើយតបទុកជាមុនបន្ថែមទៀត ព្រមទាំងពង្រឹងប្រព័ន្ធសុខាភិបាលទាំងនៅថ្នាក់ជាតិ ទាំងថ្នាក់ក្រោមជាតិ ក្នុងគោលបំណងធានាឱ្យកម្ពុជាមានសុខភាព និងសុខុមាលភាពល្អបំផុតតាមដែលអាចសម្រេចបាន ក្នុងពេលអនាគត»៕
.jpg)
