រដ្ឋមន្ត្រីក្រសួងយុត្តិធម៌ លោក កើត រិទ្ធ នាព្រឹកថ្ងៃទី ៦ ខែតុលា ម្សិលមិញ បានដឹកនាំកិច្ចប្រជុំគណៈកម្មការជាតិ ពិនិត្យ និងសម្រេចលើបញ្ជីឈ្មោះទណ្ឌិត ដែលបានស្នើសុំបន្ធូរបន្ថយទោស និងលើកលែងទោស ក្នុងឱកាសពិធីបុណ្យអុំទូក បណ្តែតប្រទីប និងសំពះព្រះខែ អកអំបុក និងពិធីបុណ្យឯករាជ្យជាតិ ខាងមុខនេះ។
លោក គឹម សន្តិភាព អ្នកនាំពាក្យក្រសួងយុត្តិធម៌ បានឱ្យដឹងថា លោក កើត រិទ្ធ ដែលជាប្រធានគណៈកម្មការជាតិត្រួតពិនិត្យការបន្ធូរបន្ថយទោស និងលើកលែងទោសទណ្ឌិត ផងដែរនោះ បានដឹកនាំកិច្ចប្រជុំគណៈកម្មការជាតិ ពិនិត្យ និងសម្រេចលើបញ្ជីឈ្មោះទណ្ឌិត ដែលបានស្នើសុំបន្ធូរបន្ថយទោស និងលើកលែងទោសនេះ។
លោកបានលើកឡើងថា គណៈកម្មការថ្នាក់ជាតិបានទទួលសំណុំឯកសារពីបណ្តាពន្ធនាគាររាជធានី-ខេត្ត ចំនួន ២០ និងមណ្ឌលអប់រំកែប្រែទាំង ៤ ដែលបានស្នើសុំបន្ធូរបន្ថយទោស និងលើកលែងទោសដល់ទណ្ឌិតសរុបចំនួន ៦៨៣ នាក់ ក្នុងនោះមានស្រី ចំនួន ៦៤ នាក់។
លោក គឹម សន្តិភាព បានបញ្ជាក់ថា ៖ «ទណ្ឌិតសរុបចំនួន ៦៨៣ នាក់នោះ មានស្នើសុំបន្ធូរបន្ថយទោស ចំនួន ៦២៦ នាក់ (ស្រី ៥៥ នាក់) និងស្នើសុំលើកលែងទោស ចំនួន ៥៧ នាក់ (ស្រី ៩ នាក់)»។
មន្ត្រីជាន់ខ្ពស់នៃក្រសួងយុត្តិធម៌រូបនេះ បានបន្ថែមថា កិច្ចប្រជុំរបស់គណៈកម្មការថ្នាក់ជាតិ បានពិនិត្យបញ្ចប់ជាស្ថាពរលើបញ្ជីសរុបនាព្រឹកថ្ងៃដដែលនោះ ហើយកំពុងបន្តរៀបចំសំណុំឯកសារគោរពស្នើសុំការសម្រេចរបស់លោកនាយករដ្ឋមន្ត្រី ហ៊ុន សែន ដើម្បីទូលថ្វាយព្រះមហាក្សត្រផ្តល់ការអនុគ្រោះទោសដល់ទណ្ឌិតទាំងនេះ។
សូមបញ្ជាក់ថា ពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ ២០២២ នេះ នឹងប្រព្រឹត្តឡើង នាថ្ងៃទី ៧, ៨ និងថ្ងៃទី៩ ខែវិច្ឆិកា ប៉ុន្តែត្រូវបានប្រមុខរាជរដ្ឋាភិបាលកម្ពុជាសម្រេចផ្អាកការប្រារព្ធព្រះរាជពិធីនេះសម្រាប់ថ្នាក់ជាតិ ប៉ុន្តែពិធីទាំងនេះធ្វើនៅតាមបណ្តារាជធានីខេត្តទូទាំងប្រទេស តាមលទ្ធភាពដែលអាចធ្វើទៅបាន៕