.jpg)
លោក កើត រិទ្ធ រដ្ឋមន្ត្រីក្រសួងយុត្តិធម៌។ រូបថត ក្រសួងយុត្តិធម៌
មន្ត្រីជាន់ខ្ពស់នៃក្រសួងយុត្តិធម៌ បានលើកឡើងថា រដ្ឋមន្ត្រីក្រសួងយុត្តិធម៌ លោក កើត រិទ្ធ បានដាក់ចេញនូវផែនការ និងដឹកនាំយុទ្ធនាការដោះស្រាយការកកស្ទះសំណុំរឿង នៅតាមសាលាដំបូងរាជធានី-ខេត្ត ក្នុងគោលដៅ ពង្រឹងសមត្ថភាពស្ថាប័ន និងលើកកម្ពស់ការផ្តល់សេវាយុត្តិធម៌ឱ្យកាន់តែល្អប្រសើរឡើង ដែលរួមចំណែកក្នុងការដោះស្រាយភាពចង្អៀតណែននៅតាមពន្ធនាគារ។
លោក នាក់ សើគីរីន រដ្ឋលេខាធិការក្រសួងយុត្តិធម៌បានលើកឡើងដូចនេះ ក្នុងសន្និសីទសារព័ត៌មាននៃក្រសួងយុត្តិធម៌ នាថ្ងៃទី ៧ ខែតុលា ស្តីពីសមិទ្ធផលសម្រេចបានរយៈពេល ៥ ឆ្នាំនៃក្រសួងយុត្តិធម៌ ដោយក្រសួងបានដាក់ចេញនូវយុទ្ធនាការដោះស្រាយការកកស្ទះសំណុំរឿង ដោយប្រើរយៈពេល ១ ឆ្នាំ និង ១ ខែ ដែលហៅថា «យុទ្ធនាការ ៣៩៥ ថ្ងៃ»។
លោកបានឱ្យដឹងថា៖ «កត្តាដែលនាំឱ្យមានការកកស្ទះសំណុំរឿងនេះ គឺដោយសារតែការគិតគូររបស់រាជរដ្ឋាភិបាលក្នុងការផ្តល់នូវភាពសុខសាន្តជូនប្រជាពលរដ្ឋ ពិសេសការពារសណ្តាប់ធ្នាប់ សាធារណៈ, រដ្ឋាភិបាលបានដាក់ចេញនូវយុទ្ធនាការប្រឆាំងនឹងបទល្មើសនានា ពិសេសបទល្មើសគ្រឿងញៀន ធនធានធម្មជាតិ និងបទល្មើសព្រៃឈើ»។
ការអនុវត្តនូវយុទ្ធនាការនេះ គឺទទួលបានជោគជ័យជាបន្តបន្ទាប់ និងមានការសាទរពីគ្រប់មជ្ឈដ្ឋាន ហើយទន្ទឹមនឹងភាពជោគជ័យនេះ ក៏មានការប្រឈមនឹងការកើនឡើងនៃសំណុំរឿងព្រហ្មទណ្ឌ ដែលកើតមានឡើងនៅតាមសាលាដំបូងរាជធានីខេត្ត និងមានចំនួនអ្នកជាប់ឃុំក្នុងពន្ធនាគារ ដែលបង្កឱ្យមានភាពចង្អៀតណែនផងដែរ។
លោក នាក់ សើគីរីន បានបញ្ជាក់ថា ដើម្បីធានាឱ្យយុទ្ធនាការប្រព្រឹត្តទៅប្រកបដោយប្រសិទ្ធភាព ស្របតាមផែនការដែលបានដាក់ចេញ ក្រសួងយុត្តិធម៌ បានរៀបចំឱ្យមានជាយន្តការមួយ ដើម្បីដឹកនាំការអនុវត្តយុទ្ធនាការដោះស្រាយការកកស្ទះសំណុំរឿងនៅតាមតុលាការ ដោយបានបង្កើត គ.យ.ក.ស. ដែលមានក្រុមការងារចំនួន ៤។
ក្រុមការងារទាំងអស់បានអនុវត្តយុទ្ធនាការជាបន្តបន្ទាប់តាមតំបន់ទទួលខុសត្រូវនៅសាលាដំបូងទូទាំងប្រទេសក្នុងស្មារតី និងឆន្ទៈប្រកបដោយការទទួលខុសត្រូវរបស់ខ្លួន។ នេះបើតាមលោក នាក់ សើគីរីន។
យោងតាមការស្រង់ទិន្នន័យ និងបូកសរុបរបាយការណ៍របស់តុលាការទូទាំងប្រទេស នៅក្នុងរយៈពេលយុទ្ធនាការបានចូលរួមចំណែកក្នុងការកាត់បន្ថយភាពចង្អៀតណែននូវបុគ្គលសរុបចំនួនប្រមាណ ៣៩ ៣១០ នាក់។
ក្រសួងយុត្តិធម៌បានឱ្យដឹងពីលទ្ធផលសរុបរួមនៃយុទ្ធនាការនេះថា សំណុំរឿងព្រហ្មទណ្ឌកកស្ទះ ដែលបានចាត់ការរួចនៅតាមសាលាដំបូងរាជធានី-ខេត្ត ទូទាំងប្រទេសទាំងដំណាក់កាលអយ្យការ ទាំងដំណាក់កាលស៊ើបសួរ និងដំណាក់កាលជំនុំជម្រះចំនួនសរុបជាង ៣៧ ៩០០ សំណុំរឿង ស្មើនឹង ៩៦% នៃសំណុំរឿងព្រហ្មទណ្ឌ ដែលបានកកស្ទះសរុបជាង ៣៩ ៥០០ សំណុំរឿង។
សំណុំរឿងដែលត្រូវបានជំនុំជម្រះរួចមានចំនួនជាង ១២ ៦០០ សំណុំរឿង ស្មើនឹង ៩៧% នៃសំណុំរឿងសរុបជាង ១៣ ០០០ សំណុំរឿងបន្ថែមពីនេះ សាលាដំបូងរាជធានី-ខេត្ត ទូទាំងប្រទេសក៏បានដោះស្រាយសំណុំរឿងព្រហ្មទណ្ឌ ដែលចូលថ្មីចំនួនជាង ៦២ ៨០០ សំណុំរឿង ស្មើនឹង ៧៨% នៃចំនួន សំណុំរឿងចូលថ្មីសរុបជាង ៨០ ៤០០ សំណុំរឿង៕
