ពោធិ៍សាត់ៈ ជនសង្ស័យ ៤ នាក់ត្រូវបាននគរបាលក្រុងពោធិ៍សាត់ឃាត់ខ្លួន កាលពីថ្ងៃទី ៦ តុលា ខណៈពួកគេកំពុងធ្វើសកម្មភាពលួចឆក់ត្រីនៅចំណុចអូរកាទិន ស្ថិតនៅភូមិរលាប សង្កាត់រលាប ក្រុងពោធិ៍សាត់។ នេះបើយោងតាមការចុះផ្សាយរបស់អគ្គស្នងការដ្ឋាននគរបាលជាតិនៅថ្ងៃទី ៧ តុលា។
យោងតាមរបាយការណ៍របស់លោកវរសេនីយ៍ឯក កែវ សារិ អធិការនគរបាលក្រុងពោធិ៍សាត់បានឱ្យដឹងថា ជនសង្ស័យទាំង ៤ នាក់ ដែលត្រូវបានសមត្ថកិច្ចឃាត់ខ្លួននោះរួមមាន ១- ឈ្មោះ ផាត សំណាង ភេទប្រុស អាយុ ២០ ឆ្នាំ រស់នៅភូមិតាកុយ សង្កាត់បន្ទាយដី ក្រុងពោធិ៍សាត់ ខេត្តពោធិ៍សាត់។
២- ឈ្មោះ ក្រង អឿន ភេទប្រុស អាយុ ៥២ ឆ្នាំ រស់នៅភូមិបាក់ត្រកួន ឃុំលាច ស្រុកភ្នំក្រវ៉ាញ ខេត្តពោធិ៍សាត់។
៣- ឈ្មោះ ខុម ស្រស់ ភេទប្រុស អាយុ ២៣ ឆ្នាំ រស់នៅភូមិអូរថ្កូវ សង្កាត់រលាប ក្រុងពោធិ៍សាត់ និង ៤- ឈ្មោះ មុត ភ័ណ្ឌ ភេទប្រុស អាយុ ៣៣ ឆ្នាំ រស់នៅភូមិស្តុកស្វាយ ឃុំស្នាមព្រះ ស្រុកបាកាន ខេត្តពោធិ៍សាត់។
វត្ថុតាងដែលត្រូវបានសមត្ថកិច្ចចាប់ឃាត់មានគោយន្តចំនួន ១ គ្រឿង ម៉ូតូចំនួន ៣ គ្រឿង អាគុយចំនួន ៥ គ្រឿង និងដងឆក់ត្រីចំនួន ១។
បច្ចុប្បន្នជនសង្ស័យរួមទាំងវត្ថុតាងត្រូវបានសមត្ថកិច្ចឃាត់ខ្លួនបណ្តោះអាសន្ន នៅអធិការដ្ឋាននគរបាលក្រុង ពោធិ៍សាត់ រង់ចាំការដោះស្រាយតាមនីតិវិធី៕