បាត់ដំបង/ពោធិ៍សាត់ៈ បុរសចំណាស់ ២ នាក់ បានលង់ទឹកស្លាប់កាលពីថ្ងៃទី ៦ កញ្ញា នៅក្នុងស្រុកថ្មគោលខេត្តបាត់ដំបង និងនៅស្រុកក្រគរ ខេត្តពោធិ៍សាត់ នៅពេលដែលពួកគាត់បានផឹកស្រាស្រវឹង ហើយដើរធ្លាក់ទឹកស្រះ និងទឹកអូរ ខណៈដែលទឹកជំនន់កំពុងតែជន់លិច។
ជនរងគ្រោះទី ១ មានឈ្មោះ រឿន ណាវ ភេទប្រុស អាយុ ៥០ ឆ្នាំ មានទីលំនៅភូមិអូរតាគី ឃុំអូរតាគី ស្រុកថ្មគោល ខេត្តបាត់ដំបង។
លោកវរសេនីយ៍ទោ សេង លុច អធិការនគរបាលស្រុកថ្មគោលបានចាត់កម្លាំងចុះពិនិត្យទីកន្លែងកើតហេតុ និងសាកសព ព្រមទាំងសាកសួរបំភ្លឺពីសាក្សីនៅជុំវិញកន្លែងកើតហេតុ។
ក្រុមការងារបានធ្វើការសន្និដ្ឋានថា ជនរងគ្រោះពិតជាស្លាប់ដោយសារលង់ទឹកពិតប្រាកដមែន ។ មូលហេតុ ដោយសារផឹកស្រាស្រវឹងដើរឆ្លងទឹកអូរ ហើយបានដួលធ្លាក់ចូលទៅក្នុងទឹកអូរកាលពីព្រឹកថ្ងៃទី ៦ ខែតុលា។
បច្ចុប្បន្ន សាកសពជនរងគ្រោះត្រូវបានប្រគល់ជូនទៅឱ្យក្រុមគ្រួសារធ្វើបុណ្យតាមប្រពៃណី។
ចំណែក បុរសម្នាក់ទៀតវ័យ ៦៦ ឆ្នាំបានផឹកស្រាស្រវឹង ហើយដើរធ្លាក់ទឹកស្រះបណ្តាលឱ្យលង់ស្លាប់ផងដែរ។
ករណីនេះកើតឡើងនៅភូមិចេកចៅ ឃុំកំពង់ពោធិ៍ ស្រុកក្រគរ ខេត្តពោធិ៍សាត់ កាលពីរសៀលថ្ងៃទី ០៦ ខែតុលា ឆ្នាំ ២០២២។
យោងតាមកំណត់ហេតុបំភ្លឺរបស់ឈ្មោះ ប្រាជ្ញ វិចិត្រ ភេទប្រុស អាយុ ២៨ ឆ្នាំ រស់នៅភូមិឃុំកើតហេតុខាងលើបានឱ្យដឹងថា នៅរសៀលថ្ងៃទី ៦ ខែតុលា ខ្លួនបានជិះម៉ូតូមកពីផ្ទះមិត្តភក្តិនៅឯភូមិកំពង់ឡ មកដល់ផ្ទះភ្លាមកូនស្រីរបស់ខ្លួនឈ្មោះ ព្រឿន សុបញ្ញា អាយុ ០៥ ឆ្នាំ បានប្រាប់ថា មានមនុស្សលង់ទឹកក្នុងស្រះខាងក្រោយផ្ទះ ដែលមានកាន់ឈើច្រត់ និងពាក់មួកខ្មៅ។
នៅពេលនោះលោក វិចិត្រ បានប្រកូកប្រកាសហៅអ្នកភូមិឱ្យមកជួយចុះរាវរកក្នុងទឹកស្រះនោះ ក៏ឃើញសពលោក ញឹក ឈន ហៅ ម៉ៃ ភេទប្រុសអាយុ ៦៦ ឆ្នាំ។
យោងតាមកំណត់ហេតុស្តាប់ការបំភ្លឺឈ្មោះ ក្រាញ់ រ៉េត អាយុ ៦៩ ឆ្នាំ ត្រូវជាប្រពន្ធសពបានបំភ្លឺថា ប្ដីរបស់ខ្លួនឈ្មោះ ញឹក ឈន ហៅ ម៉ៃ នៅពេលព្រឹកតែងតែចេញពីផ្ទះបាត់ៗមិនដឹងទៅផឹកស្រានៅឯណាទេ។
លោកវរសេនីយ៍ទោ មោក ភារម្យ អធិការ នគរបាលស្រុកក្រគរ បានបញ្ជាក់ឱ្យដឹងថា ជនរងគ្រោះ មានមុខរបរជាកសិករមានទីលំនៅក្នុងភូមិ ឃុំកើតហេតុខាងលើពិតជាស្លាប់ដោយសារស្រវឹងស្រា ហើយធ្លាក់ទឹកស្រះលង់ស្លាប់ប្រាកដមែន ដោយការធ្វើកោសល្យវិច្ឆ័យ និងពិនិត្យកន្លែងកើហេតុ ពុំឃើញមានពាក់ព័ន្ធនឹងអំពើឃាតកម្មទេ។
ចំពោះសពជនរងគ្រោះ សមត្ថកិច្ចបានធ្វើកំណត់ហេតុ និងបានប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ៕