ភ្នំពេញៈ គណៈកម្មាធិការសម្របសម្រួលរបស់ក្រសួងសាធារណការ និងដឹកជញ្ជូនកាលពីថ្ងៃទី ៦ តុលាបានបើកកិច្ចប្រជុំលើកទី ៣ នៃគម្រោងអភិវឌ្ឍន៍សមត្ថភាពរបស់រដ្ឋបាលរាជធានីភ្នំពេញលើការគ្រប់គ្រងប្រព័ន្ធលូទឹកកខ្វក់។
កិច្ចប្រជុំនេះត្រូវបានថ្លែងបើកដោយលោក តូច ចាន់កុសល រដ្ឋលេខាធិការ ក្រសួងសាធារណការ និងបិទកម្មវិធីដោយលោករដ្ឋលេខាធិការ រស់ វណ្ណា សហប្រធានអង្គប្រជុំ និងមានការចូលរួមពីលោក Kuribayashi Takanori លេខាទី ១ នៃស្ថានទូតជប៉ុនប្រចាំកម្ពុជា លោក ស៊ុយ សិរិទ្ធ អភិបាលរងរាជធានីភ្នំពេញ លោកស្រី Kamei Haruko ប្រធានតំណាងការិយាល័យទីភ្នាក់ងារ សហប្រតិបត្តិការអន្តជាតិជប៉ុន (JICA) ប្រចាំកម្ពុជា និងថ្នាក់ដឹកនាំ អគ្គនាយកដ្ឋាន មន្ត្រីជំនាញបច្ចេកទេសទទួលបន្ទុក និងមន្ទីរសាធារណការ និងដឹកជញ្ជូនរាជធានី-ខេត្ត រួមទាំងអង្គភាពពាក់ព័ន្ធនានា សរុបប្រមាណ ៧២ រូប។
បើតាមហ្វេសប៊ុកក្រសួងសាធារណការដែលចេញផ្សាយទៅថ្ងៃទី ៧ តុលា អង្គប្រជុំបានពិភាក្សាអំពីរចនាសម្ព័ន្ធ និងស្ថានភាពនៃការគ្រប់គ្រងទឹកកខ្វក់ ការធ្វើអនាម័យទីក្រុង ការប្រើប្រាស់ធនធានសម្រាប់អនុវត្តកិច្ចការងារ ភាពចាំបាច់នៃគោលកាណ៍ផ្សព្វផ្សាយណែនាំ សម្រាប់បំពេញតម្រូវការដល់ប្រជាពលរដ្ឋ ព្រមទាំងការខិតខំពង្រឹងពន្លឿនរៀបចំបទដ្ឋានស្តង់ដាបច្ចេកទេស លិខិតបទដ្ឋានគតិយុត្ត សេចក្តីព្រាងច្បាប់ និងយន្តការក្នុងការទ្រទ្រង់វិស័យទឹកកខ្វក់នៅកម្ពុជា។
អង្គប្រជុំក៏បានពិភាក្សាផ្តោតលើការធ្វើបច្ចុប្បន្នភាពអំពីគម្រោង សកម្មភាពការងារដែលកំពុងអនុវត្ត ការសម្របសម្រួលជាមួយដៃគូអភិវឌ្ឍនានាដែលធ្វើការពាក់ព័ន្ធក្នុងវិស័យនេះ ដើម្បីធានាដល់ការអភិវឌ្ឍ ប្រកបដោយចីរភាព។
នៅក្នុងអង្គប្រជុំ លោក តូច ចាន់កុសល បានគូសបញ្ជាក់អំពីសាវតារខ្លះៗនៃការសាងសង់អាងប្រព្រឹត្តកម្មទឹកកខ្វក់នៅខេត្តព្រះសីហនុ ខេត្តសៀមរាប រាជធានីភ្នំពេញ និងខេត្តមួយចំនួនទៀតដែលកំពុងសាងសង់ និងខ្លះទៀតកំពុងលើកផែនការ ដែលជាការបញ្ជាក់យ៉ាងច្បាស់ពីការយកចិត្តទុកដាក់ខ្ពស់របស់រាជរដ្ឋាភិបាលជាមួយការខិតខំប្រឹងប្រែងរបស់ក្រសួងសាធារណការ និងដឹកជញ្ជូន ក្រោមកិច្ចសហការពីដៃគូអភិវឌ្ឍន៍ទីភ្នាក់ងារសហប្រតិបត្តិការអន្តជាតិជប៉ុន (JICA) ប្រចាំកម្ពុជា និងជាពិសេសអង្គភាពពាក់ព័ន្ធបានចូលរួមលើកកម្ពស់ការគ្រប់គ្រងអនាម័យ និងទឹកកខ្វក់ ប្រកបដោយប្រសិទ្ធភាព និងនិរន្តរភាព។
លោក តូច ចាន់កុសល បានថ្លែងការកោតសរសើរដល់ទីភ្នាក់ងារសហប្រតិបត្តិការ អន្តជាតិជប៉ុន (JICA) ប្រចាំកម្ពុជា និងជាពិសេសសាលារាជធានីភ្នំពេញ អាជ្ញាធរមូលដ្ឋាន អង្គភាពពាក់ព័ន្ធ ដែលបានចូលរួមសហការលើកកម្ពស់ការគ្រប់គ្រងអនាម័យ និងទឹកកខ្វក់នៅតាមរាជធានី-ខេត្ត ក៏ដូចជាក្នុងមូលដ្ឋាន ដើម្បីកែលម្អ ការពារទឹកជំនន់ ការកកស្ទះលូ និងការប៉ះពាល់បរិស្ថាន ដោយបានបង្កើតគម្រោងអភិវឌ្ឍន៍ប្រព័ន្ធលូ អាងប្រព្រឹត្តកម្មចម្រោះប្រព័ន្ធទឹកកខ្វក់ និងវិធានអនាម័យផ្សេងៗ សំដៅធ្វើយ៉ាងណាអាចគ្រប់គ្រងលើប្រតិបត្តិការ សម្រេចគោលនយោបាយ និងយុទ្ធសាស្ត្រនានាទាក់ទងនឹងការគ្រប់គ្រង អភិវឌ្ឍប្រព័ន្ធចម្រោះទឹកកខ្វក់នៅកម្ពុជាឱ្យទទួលបាននូវសោភ័ណភាពទីក្រុង (ទីក្រុងបៃតង) និងភាពទាក់ទាញផងដែរ។
នៅទីបញ្ចប់ លោក រស់ វណ្ណា សហប្រធានអង្គប្រជុំបានថ្លែងអំណរគុណដល់អង្គប្រជុំ ដែលបានពិភាក្សាយ៉ាងផុលផុសក្នុងការបង្ហាញមតិយោបល់ ចែករំលែកបទពិសោធការងារផ្តល់ការសហប្រតិបត្តិការ ជាពិសេស ទីភ្នាក់ងារសហប្រតិបត្តិការអន្តជាតិជប៉ុន (JICA) ប្រចាំកម្ពុជា មន្ទីរសាធារណការ និងដឹកជញ្ជូនរាជធានី-ខេត្ត (DPWT) និងសាលារាជធានីភ្នំពេញ (PPCA) ដែលបានខិតខំប្រឹងប្រែងជាបន្តបន្ទាប់ ក្នុងការសម្រេចបាននូវគម្រោងអភិវឌ្ឍន៍សមត្ថភាព របស់រដ្ឋបាលរាជធានីភ្នំពេញ និងក្រសួងសាធារណការលើការគ្រប់គ្រងប្រព័ន្ធលូទឹកកខ្វក់ កើតឡើងនៅថ្ងៃនេះ ដើម្បីផលប្រយោជន៍ រួមចំណែកក្នុងការទ្រទ្រង់វិស័យទឹកកខ្វក់ និងអនាម័យក្នុងទីក្រុង ព្រមទាំងកិច្ចសហការគ្នាបានយ៉ាងល្អប្រសើរនាពេលកន្លងមក និងបន្តទៅអនាគត៕