ភ្នំពេញៈ គ្រោះថ្នាក់ចរាចរណ៍ផ្លូវគោកទូទាំងប្រទេសក្នុងរយៈពេល ២ ថ្ងៃ គឺនៅថ្ងៃទី ៦ និងទី ៧ ខែតុលា បានបណ្តាលឱ្យមនុស្សស្លាប់និងរបួសចំនួន ២១ នាក់។
នៅថ្ងៃទី ៧ ខែតុលានេះ គ្រោះថ្នាក់ចរាចរណ៍ផ្លូវគោកទូទាំងប្រទេសបានបណ្តាលឱ្យមនុស្សស្លាប់យ៉ាងហោចណាស់ចំនួន ៦ នាក់ របួសធ្ងន់ ៦ នាក់ និងរបួសស្រាល ១ នាក់។
យោងតាមទិន្នន័យគ្រោះថ្នាក់ចរាចរណ៍ផ្លូវគោកទូទាំងប្រទេស ចេញដោយនាយកដ្ឋាននគរបាលចរាចរណ៍ និងសណ្តាប់សាធារណៈ នៃអគ្គស្នងការដ្ឋាននគរបាលជាតិ នៅថ្ងៃទី ៧ ខែតុលា បានបញ្ជាក់ថា គ្រោះថ្នាក់ដែលបង្កឱ្យមានមនុស្សស្លាប់និងរបួសចំនួន ១៣ នាក់ កើតឡើងដោយសារការប៉ះទង្គិចគ្នាចំនួន៧ លើក។
ចំណែកកាលពីថ្ងៃទី ៦ជតុលា គ្រោះថ្នាក់ចរាចរណ៍ផ្លូវគោកទូទាំងប្រទេសបានបណ្តាលឱ្យមនុស្សស្លាប់ ១ នាក់ របួសធ្ងន់ ៣ នាក់ (ស្រី ១ នាក់) និងរបួសស្រាល ៤ នាក់។
គ្រោះថ្នាក់ចរាចរណ៍ ដែលបង្កឱ្យមានមនុស្សស្លាប់ និងរបួសចំនួន ៨ នាក់នៅថ្ងៃទី ៦ តុលា គឺកើតឡើងដោយសារការប៉ះទង្គិចគ្នាចំនួន ៤ លើក៕