.jpg)
រូប ក្រសួងមហាផ្ទៃ
ភ្នំពេញៈ រយៈពេល ៥១ ថ្ងៃ សមត្ថកិច្ចបានរកឃើញក្រុមហ៊ុនចំនួន ៩ នៅខេត្តព្រះសីហនុដែលសង្ស័យជាប់ពាក់ព័ន្ធបទល្មើសជួញដូរមនុស្ស និងបានសម្រេចបិទទីតាំងទាំងស្រុង ៥ ក្រុមហ៊ុន និងផ្អាកអាជីវកម្មបណ្ដោះអាសន្នចំនួន ៤ ក្រុមហ៊ុន។
គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) ដែលមានលោក ស ខេង រដ្ឋមន្ត្រីក្រសួងមហាផ្ទៃជាប្រធាន បញ្ជាក់ក្នុងសេចក្តីប្រកាសព័ត៌មាននាថ្ងៃទី ៧ ខែតុលា ថា ក្នុងរយៈពេល ៥១ ថ្ងៃ គិតចាប់ពីថ្ងៃទី ១៨ ខែសីហា ដល់ថ្ងៃទី ៤ ខែតុលា សមត្ថកិច្ចបានស្រាវជ្រាវលើបណ្តឹងដែលអះអាងថា ជាករណីរងគ្រោះដោយអំពើជួញដូរមនុស្សចំនួន ៤២០ ករណី។
ផ្អែកលើបណ្ដឹងទាំងនេះ សមត្ថកិច្ចបានបើកប្រតិបត្តិការស្រាវជ្រាវ និងស៊ើបបញ្ជាក់ ដោយបានរកឃើញ ២២៩ ករណី មានការពាក់ព័ន្ធនឹងបទល្មើសផ្សេងៗពាក់ព័ន្ធនឹងអំពើជួញដូរមនុស្ស ក្នុងនោះ ១១៨ នាក់ដែលមាន ៥ សញ្ជាតិជាជនរងគ្រោះនៃបទល្មើស ដូចជា ការបង្ខាំងជំរិតទារប្រាក់ ការធ្វើទារុណកម្ម អំពើជួញដូរមនុស្ស សញ្ចារកម្មល្បែងអនឡាញខុសច្បាប់ ជាដើម។
ប្រភពដដែលបន្តថា ទន្ទឹមនេះ សមត្ថកិច្ចបានឃាត់ខ្លួនជនសង្ស័យជាជនជាតិខ្មែរ និងជនបរទេសចំនួន ៦៧ នាក់ និងកសាងសំណុំរឿងបញ្ជូនទៅតុលាការ។
សេចក្តីប្រកាសព័ត៌មានបញ្ជាក់ថា៖ «ទន្ទឹមនេះ កិច្ចប្រតិបត្តិការក៏បានរកឃើញក្រុមហ៊ុនចំនួន ៩ មានទីតាំងស្ថិតនៅក្នុងខេត្តព្រះសីហនុ ដែលសង្ស័យពាក់ព័ន្ធបទល្មើស និងបានសម្រេចបិទទីតាំងទាំងស្រុង ៥ ក្រុមហ៊ុន និងផ្អាកអាជីវកម្មបណ្ដោះអាសន្នចំនួន ៤ ក្រុមហ៊ុន ដើម្បីបន្តនីតិវិធីស្រាវជ្រាវ និងស៊ើបអង្កេតបន្ថែម»៕
