ភ្នំពេញៈ រយៈពេល ៥១ ថ្ងៃ សមត្ថកិច្ចរកឃើញទីតាំងល្បែងស៊ីសងខុសច្បាប់ចំនួនជាង ១០០ ទីតាំង និងបានអនុវត្តវិធានការច្បាប់ ដោយកសាងសំណុំរឿងបញ្ជូនទៅតុលាការលើបុគ្គលចំនួនជាង ២៥០ នាក់។
គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) បញ្ជាក់ក្នុងសេចក្តីប្រកាសព័ត៌មាន នាថ្ងៃទី ៧ ខែតុលា ថា៖ «កងកម្លាំងមានសមត្ថកិច្ចនានាបានបើកប្រតិបត្តិការត្រួតពិនិត្យទីតាំងមានការសង្ស័យប្រព្រឹត្តល្បែងស៊ីសងខុសច្បាប់គ្រប់ប្រភេទ ចំនួន ៩ ៦២២ ទីតាំង ក្នុងនោះបានរកឃើញ និងអនុវត្តវិធានការច្បាប់ ចំនួន ១១៦ ទីតាំង និងលើបុគ្គល ចំនួន ២៥៣ នាក់ ព្រមទាំងបានកសាងសំណុំរឿងបញ្ជូនទៅតុលាការដើម្បីអនុវត្តនីតិវិធីបន្ត»។
គ.ជ.ប.ជ បន្តថា ក្នុងរយៈពេល ៥១ ថ្ងៃនេះ ដោយគិតចាប់ពីថ្ងៃទី ១៨ ខែសីហា ដល់ថ្ងៃទី ៤ ខែតុលា អាជ្ញាធរ និងកម្លាំងសមត្ថកិច្ចបានចុះធ្វើការផ្សព្វផ្សាយច្បាប់ស្តីពីការបង្ក្រាបល្បែងស៊ីសងនៅតាមមូលដ្ឋានភូមិនិងឃុំ សង្កាត់ អំពីផលប៉ះពាល់នៃល្បែងស៊ីសងខុសច្បាប់។
គ.ជ.ប.ជ ដែលមានលោក ស ខេង រដ្ឋមន្ត្រីក្រសួងមហាផ្ទៃជាប្រធាន បញ្ជាក់ថា ក្នុងរយៈពេល ៥១ ថ្ងៃនេះ អាជ្ញាធរ និងសមត្ថកិច្ច បានបន្តតាមដានទីតាំងដែលធ្លាប់ប្រព្រឹត្តល្បែងស៊ីសង បន្តស្រាវជ្រាវរកទីតាំងដែលនៅតែបន្តប្រព្រឹត្តល្បែងស៊ីសង និងបន្តក្តាប់មុខសញ្ញាបើកល្បែង និងលេងល្បែងស៊ីសងខុសច្បាប់៕