ភ្នំពេញៈ លោកនាយករដ្ឋមន្ត្រី ហ៊ុន សែន ផ្ញើលិខិតទៅកាន់លោក ប្រាយុធ ចាន់-អូចា (Prayut Chan-o-cha) នាយករដ្ឋមន្ត្រីថៃ ដោយចូលរួមរំលែកទុក្ខចំពោះការបាត់បង់អាយុជីវិតមនុស្សជិត ៤០ នាក់ ដែលភាគច្រើនជាកុមារ ដោយសារការបាញ់ប្រហារនៅឯមជ្ឈមណ្ឌលថែទាំកុមារមួយកន្លែង នៅប្រទេសថៃ នាពេលថ្មីៗនេះ។
លោកបានសម្ដែងសេចក្តីតក់ស្លុត និងក្រៀមក្រំយ៉ាងខ្លាំង ដោយបានទទួលព័ត៌មានអំពីការបាញ់រះសម្លាប់រង្គាលនៅមជ្ឈមណ្ឌលថែទាំកុមារ ក្នុងខេត្តណងប៊ូឡាំភូ (Nong Bua Lam Phu) ភាគឦសាន នៃប្រទេសថៃ កាលពីថ្ងៃទី ៦ ខែតុលា ដែលបានឆក់យកជីវិតមនុស្សជិត ៤០ នាក់ នេះ ដែលភាគច្រើនជាកុមារ និងមានអ្នករងរបួសមួយចំនួន។
លោកនាយករដ្ឋមន្ត្រី ហ៊ុន សែន បញ្ជាក់ក្នុងលិខិតចុះថ្ងៃទី ៨ ខែតុលាថា៖ «ក្នុងកាលៈទេសៈដ៏សែនសោកសៅនេះ ក្នុងនាមរាជរដ្ឋាភិបាល និងប្រជាជន នៃព្រះរាជាណាចក្រកម្ពុជា ខ្ញុំសូមសម្ដែងនូវសមានចិត្តយ៉ាងជ្រាលជ្រៅ និងសូមចូលរួមរំលែកទុក្ខយ៉ាងក្រៀមក្រំបំផុត ជូនចំពោះឯកឧត្តម រាជរដ្ឋាភិបាល និងប្រជាជន នៃព្រះរាជាណាចក្រថៃ ជាពិសេសក្រុមគ្រួសារនៃសព និងជនរងគ្រោះ»។
លោកបន្តថា កម្ពុជាស្ថិតនៅជាមួយថៃក្នុងខណៈពេលដ៏សោកសង្រេងនៃឧប្បត្តិហេតុសម្លាប់រង្គាលនេះ ហើយលោកបានបួងសួងឱ្យអ្នកដែលទទួលរងរបួសឆាប់បានជាសះស្បើយ ។
គួរបញ្ជាក់ថា មនុស្សយ៉ាងហោចណាស់ជិត ៤០ នាក់ រួមទាំងក្មេងៗ និងមនុស្សធំ ត្រូវបានខ្មាន់កាំភ្លើងបាញ់សម្លាប់ក្នុងការបាញ់ប្រហារដ៏ធំមួយ នៅឯមជ្ឈមណ្ឌលថែទាំកុមារ កាលពីម៉ោងប្រហែល ១២ ជិត ១ រសៀល នាទី ៦ ខែតុលា ក្នុងស្រុក Uthaisawan Na Klang នៃខេត្ត Nong Bua Lamphu។
ប៉ូលិសថៃបានធ្វើការកំណត់អត្តសញ្ញាណខ្មាន់កាំភ្លើង ដែលមានវ័យ ៣៤ ឆ្នាំ និងជាអតីតប៉ូលិស ឈ្មោះ Panya Kamrab៕