.jpg)
ពោធិ៍សាត់ៈ របាយការណ៍បង្ហាញថា ដំណាំស្រូវជាង ២០០ ហិកតា នៅក្រុងពោធិ៍សាត់ និងដំណាំស្រូវជិត ៧០០ ហិកតា នៅស្រុកកណ្តៀង ខេត្តពោធិ៍សាត់ បានខូចខាតដោយសារទឹកជំនន់ បន្ទាប់ពីមានភ្លៀងធ្លាក់ខ្លាំងជាប់ៗគ្នារយៈពេល ៥ ថ្ងៃក្នុងភូមិសាស្ត្រខេត្តពោធិ៍សាត់។
លិខិតរដ្ឋបាលខេត្តពោធិ៍សាត់នាថ្ងៃទី ៨ ខែតុលា បានដកស្រង់របាយការណ៍គណៈកម្មាធិការគ្រប់គ្រងគ្រោះមហន្តរាយខេត្តពោធិ៍សាត់ថា បន្ទាប់ពីទទួលរងឥទិ្ធពលសម្ពាធទាប (ITCZ) និងមានភ្លៀងធ្លាក់ខ្លាំងជាប់ៗគ្នានោះ ក្នុងភូមិសាស្ត្រខេត្តពោធិ៍សាត់ គិតចាប់ពីថ្ងៃទី ៣ ដល់ថ្ងៃទី ៧ ខែតុលា គឺបានបង្កឱ្យមានគ្រោះទឹកជំនន់ដងស្ទឹងពោធិ៍សាត់ នៅក្នុងក្រុងពោធិ៍សាត់ និងស្រុកកណ្តៀង។
លិខិតដដែលបន្តថា៖ «ក្រុងពោធិ៍សាត់ ទទួលរងប៉ះពាល់៖ ប្រជាពលរដ្ឋ ចំនួន ១ ១៣៨ ខ្នងផ្ទះ (ទឹកចូលក្រោមផ្ទះ) ដំណាំស្រូវ ចំនួន ៤០០ ហិកតា និងខូចខាត ២១៧ ហិកតា និងដំឡូងមី ៤,៥០ ហិកតា។ ស្រុកកណ្តៀង ទទួលរងប៉ះពាល់៖ ប្រជាពលរដ្ឋ ចំនួន ៣៦០ គ្រួសារ (ទឹកចូលក្រោមផ្ទះ) ខូចខាតស្រូវ ចំនួន ៦៩៦ ហិកតា»។
បើតាមលិខិតដដែល គិតត្រឹមព្រឹកថ្ងៃទី ៨ ខែតុលា ទឹកស្ទឹងពោធិ៍សាត់ មានកម្ពស់ ៥,៤៥ ម៉ែត្រ បានស្រកចំនួន ៥ ហ៊ុន ខណៈកម្ពស់ប្រកាសអាសន្នគឺ ៥ ម៉ែត្រ។ ស្ទឹងភ្នំក្រវាញ មានកម្ពស់ ៣,៤៥ ម៉ែត្រ បានស្រកចំនួន ០,៥ ម៉ែត្រ ខណៈកម្ពស់ប្រកាសអាសន្នគឺ ៦ ម៉ែត្រ។ ស្ទឹងវាលវែង មានកម្ពស់ ១,៤០ ម៉ែត្រ បានស្រកចំនួន ០,៥ ម៉ែត្រ ខណៈកម្ពស់ប្រកាសអាសន្នគឺ ៩ ម៉ែត្រ)៕
