ភ្នំពេញៈលោកនាយករដ្ឋមន្ត្រី ហ៊ុន សែន បានឯកភាពលើគោលការណ៍ផ្លាស់ប្តូរទីតាំងតំបន់រុនតាឯក និងទីតាំងទាំងឡាយ ដែលប្រជាពលរដ្ឋស្ម័គ្រចិត្តទៅរស់នៅតាមការកំណត់របស់រាជរដ្ឋាភិបាលត្រូវកំណត់ជាទីប្រជុំជនដូចគ្នា និងជំរុញឱ្យប្រញាប់ផ្តល់ជូនប្រាក់ឧបត្ថម្ភដោយប្តូរពីអត្រាក្នុងទីជនបទទៅអត្រាទីប្រជុំជនជូនប្រជាពលរដ្ឋឱ្យបានឆាប់។
ចំណាររបស់លោកនាយករដ្ឋមន្ត្រីនៅលើរបាយការណ៍នោះបញ្ជាក់ថា៖ «សូមប្រញាប់បើកផ្តល់ដោយប្តូរពីអត្រាក្នុងទីជនបទមកអត្រាក្នុងទីប្រជុំជន។ អ្នកស្ម័គ្រចិត្តទៅរស់នៅតំបន់រុនតាឯក និងពាក់ស្នែងត្រូវ៖១ទទួលបណ្ណក្រីក្រ ១ ដូចគ្នាទាំងអស់ ២ យកអត្ត្រាឧបត្ថម្ភនៅក្នុងទីប្រជុំជនទាំងអស់ដូចៗគ្នា»។
ការឯកភាពលើគោលការណ៍នេះធ្វើឡើងនៅថ្ងៃទី ៨ ខែតុលា បន្ទាប់ពីលោកវង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទាបានស្នើសុំតាមរយៈរបាយការណ៍សង្ខេបស្តីពីការអនុវត្តការផ្ទៀងផ្ទាត់បណ្ណសមធម៌ថ្មីប្រភេទក្រីក្រ ១ និងប្តូរបណ្ណក្រីក្រថ្មីប្រភេទ ១ នៅក្នុងភូមិតានី ឃុំរុនតាឯក ស្រុកបន្ទាយស្រី ខេត្តសៀមរាប។
លោក វង សូត បានឱ្យដឹងតាមរយៈរបាយការណ៍ថា បណ្ណសមធម៌ក្រីក្រ ១ បែងចែកការឧបត្ថម្ភជា ២ គឺសម្រាប់អ្នកនៅទីប្រជុំជន និងសម្រាប់អ្នកនៅទីជនបទ។ អត្រាឧបត្ថម្ភនៅក្នុងទីប្រជុំជនក្នុង ១ គ្រួសារទទួលបាន ១២ ម៉ឺនរៀល សមាជិកក្នុងគ្រួសារម្នាក់ ៤ ម៉ឺនរៀល កុមារអាយុត្រឹម ៥ ឆ្នាំ ក្នុងម្នាក់ ៤ ម៉ឺនរៀល ជនមានពិការភាពក្នុងម្នាក់ ៤ ម៉ឺនរៀល មនុស្សចាស់ចាប់ពី ៦០ ឆ្នាំឡើងក្នុងម្នាក់ ៤ ម៉ឺនរៀល និងគ្រួសារមានអ្នកផ្ទុកមេរោគអេដស៍ ៤ ម៉ឺនរៀល។
ចំណែកអត្រាឧបត្ថម្ភនៅក្នុងទីជនបទ ក្នុង ១ គ្រួសារ ៨ ម៉ឺនរៀល សមាជិកក្នុងគ្រួសារ កុមារអាយុត្រឹម ៥ ឆ្នាំ ជនមានពិការភាព និងមនុស្សចាស់ចាប់ពី៦០ឆ្នាំឡើង ក្នុងម្នាក់ ព្រមទាំងគ្រួសារមានផ្ទកមេរោគអេដស៍ទទួលបាន
២៤ ០០០ រៀល។
រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទាបានឱ្យដឹងទៀតថា បន្ទាប់ពីមានការណែនាំរបស់លោកនាយករដ្ឋមន្ត្រី នៅថ្ងៃទី ១ ខែតុលា ក្រុមការងារមូលនិធិជាតិជំនួយសង្គមនៃក្រសួងសង្គមកិច្ច សហការ ជាមួយមន្ទីរ អង្គភាព ស្ថាប័នពាក់ព័ន្ធទាំងអស់បានចាប់ផ្តើមផ្ទៀងផ្ទាត់ឈ្មោះជូនប្រជាពលរដ្ឋស្ម័គ្រចិត្តទៅរស់តំបន់រុនតាឯក ដើម្បីទទួលបានប្រាក់ឧបត្ថម្ភពីកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ ១៩ ចាប់ពីថ្ងៃទី ៦ ដល់ថ្ងៃទី ៨ ខែតុលាដោយគ្រួសារក្រីក្រទទួលបានបណ្ណក្រីក្រថ្មីបានផ្ទៀងផ្ទាត់ និងបើកប្រាក់បានចំនួនជាង ៣ ពាន់គ្រួសារ។
លោកបញ្ជាក់ថា៖ «សរុបក្នុងរយៈពេល៣ថ្ងៃនេះ ១- គ្រួសារក្រីក្រទទួលបានបណ្ណក្រីក្រថ្មីបានផ្ទៀងផ្ទាត់ និងបើកប្រាក់បានចំនួន៣ ១៥៧គ្រួសារ ចំណាយអស់ទឹកប្រាក់សរុប ៦០២ ៥៤៤ ០០០ រៀល ២- គ្រួសារកំពុងទទួលផល ដែលប្តូរបណ្ណថ្មីចំនួន ១ ០២១ បណ្ណ»។
លោកបញ្ជាក់បន្ថែមថា ចំពោះគ្រួសារកំពុងទទួលផលដែលប្តូរបណ្ណថ្មីនឹងត្រូវទៅផ្ទៀងផ្ទាត់ ដើម្បីទទួលបានប្រាក់ឧបត្ថម្ភសម្រាប់ខែតុលាចាប់ពីថ្ងៃទី ២៥ ខែតុលាឆ្នាំ ២០២២ តទៅ ដោយសារគ្រួសារទាំងនោះបានបើកប្រាក់ សម្រាប់ខែកញ្ញាឆ្នាំ ២០២២ រួចហើយ។
លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់បានឱ្យដឹងតាមរយៈហ្វេសប៊ុកនៅថ្ងៃទី ៨ ខែតុលាថា គិតចាប់ពីថ្ងៃចាប់ឆ្នោតដំបូងនាថ្ងៃទី ២៥ ខែសីហា រហូតមកដល់ថ្ងៃទី ៧ ខែតុលា ឆ្នាំ២០២២ មានប្រជាពលរដ្ឋសរុបចំនួន ៧ ៥០០ គ្រួសារហើយដែលបានមកចាប់ឆ្នោត។ ដោយឡែកនៅថ្ងៃទី ៨ ខែតុលា មានប្រជាពលរដ្ឋចំនួន ៥៧៤ គ្រួសារបន្ថែមទៀតយល់ព្រមទៅរស់នៅតំបន់អភិវឌ្ឍន៍ពាក់ស្នែង។
លោកបញ្ជាក់ថា៖ «ប្រជាពលរដ្ឋស្ម័គ្រចិត្តប្តូរលំនៅពីភូមិមណ្ឌល៣ ទក្សិណត្បូង ត្រពាំងសេះ ទ្រាំង អញ្ចាញ វាល ខ្វៀន គោកតាចាន់ និងភូមិរហាល ស្ថិតក្នុងក្រុងសៀមរាប ខេត្តសៀមរាប ដែលមានចម្ងាយ ៥៥៨ ម៉ែត្រពីប្រាសាទអង្គរវត្ត ចាប់ឆ្នោតទៅរស់នៅតំបន់អភិវឌ្ឍន៍ពាក់ស្នែង បន្ថែមចំនួន ៥៧៤ គ្រួសារ នាថ្ងៃទី ៨ ខែតុលា ឆ្នាំ ២០២២ នេះ»៕