.jpg)
គ.ជ.ប បានរៀបចំវគ្គអប់រំផ្សព្វផ្សាយ និងបញ្ជ្រាបការយល់ដឹងស្តីពី “សារៈសំខាន់នៃការបោះឆ្នោត”ជូនដល់សិស្ស និស្សិត នៅខេត្តបន្ទាយមានជ័យ កាលពីថ្ងៃទី ៨ ខែតុលា ឆ្នាំ ២០២២។ រូបថត គ.ជ.ប
ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) បានរៀបចំវគ្គអប់រំផ្សព្វផ្សាយ និងបញ្ជ្រាបការយល់ដឹងស្តីពី “សារៈសំខាន់នៃការបោះឆ្នោត”ជូនដល់សិស្ស និស្សិត ចំនួនប្រមាណ ៦០០ នាក់នៅតាមគ្រឹះស្ថានសិក្សារដ្ឋ និងឯកជនដោយចាប់ផ្ដើមពីខេត្តឧត្ដរមានជ័យ និងខេត្តបន្ទាយមានជ័យ ដើម្បីលើកកម្ពស់ការយល់ដឹងរបស់យុវជនក្នុងសង្គមលទ្ធិប្រជាធិបតេយ្យឱ្យបានទូលំទូលាយ។
តាមសេចក្តីប្រកាសព័ត៌មានរបស់ គ.ជ.ប កាលពីថ្ងៃទី ៨ ខែតុលា ឱ្យដឹងថា ដោយមានការផ្តល់កិច្ចសហការពីក្រសួងអប់រំយុវជននិងកីឡា គ.ជ.ប បានរៀបចំវគ្គអប់រំផ្សព្វផ្សាយនិងបញ្ជ្រាបការយល់ដឹងស្តីពី “សារៈសំខាន់នៃការបោះឆ្នោត” ជូនដល់សិស្សនិស្សិតនៅតាមគ្រឹះស្ថានសិក្សារដ្ឋ និងឯកជនក្នុងរាជធានីខេត្តទាំង ២៥ ជាបន្តបន្ទាប់ ដោយចាប់ផ្តើមពីខេត្តឧត្ដរមានជ័យនៅថ្ងៃទី៦ខែតុលា និងខេត្តបន្ទាយមានជ័យនៅថ្ងៃទី ៨ ខែតុលាឆ្នាំ ២០២២ ដើម្បីជំរុញការចូលរួមរបស់យុវជនក្នុងព្រឹត្តិការណ៍នៃការបោះឆ្នោតឱ្យកាន់តែមានប្រសិទ្ធភាពខ្ពស់។
លោក ម៉ុក ដារ៉ា អគ្គលេខាធិការរង គ.ជ.ប ថ្លែង តាមរយៈសេចក្តីប្រកាសព័ត៌មាននេះថា វគ្គអប់រំផ្សព្វផ្សាយនេះមានគោលបំណងបញ្ជ្រាបការយល់ដឹងដល់យុវជនអំពីមូលដ្ឋានគ្រឹះនៃសិទ្ធិបោះឆ្នោតតាមរយៈភាពមានឈ្មោះក្នុងបញ្ជីបោះឆ្នោតឆ្ពោះទៅរកការសម្រេចចិត្តបោះឆ្នោតជ្រើសរើសតំណាងរបស់ខ្លួន ព្រោះការបោះឆ្នោតគឺជាស្នូលនៃលទ្ធិប្រជាធិបតេយ្យ។
លោកថ្លែថា៖ «វគ្គអប់រំផ្សព្វផ្សាយនេះនឹងក្លាយជាផ្នែកមួយជួយជំរុញដល់យុវជនដែលគ្រប់អាយុបោះឆ្នោតក្នុងការមកចុះឈ្មោះបោះឆ្នោតតាមពេលវេលាកំណត់របស់ គ.ជ.ប ។ ចំពោះការចុះឈ្មោះបោះឆ្នោតឆ្នាំនេះនឹងប្រព្រឹត្តទៅចាប់ពីថ្ងៃទី ២០ ខែតុលា រហូតដល់ថ្ងៃទី ៨ ខែធ្នូឆ្នាំ ២០២២ ខាងមុខនេះ»។
បើតាម លោក លោក ម៉ុក ដារ៉ា ក្នុងវគ្គអប់រំ ផ្សព្វផ្សាយនេះមានការធ្វើបទបង្ហាញដោយមន្ត្រីជាន់ខ្ពស់របស់ គ.ជ.ប ទៅលើប្រធានបទចំនួន ៤ រួមមាន ប្រវត្តិ និងដំណើរការនៃការបោះឆ្នោត ការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ សារៈសំខាន់នៃការបោះឆ្នោត តាមរយៈការចូលរួមរបស់យុវជនក្នុងសង្គមប្រជាធិបតេយ្យ និងការចូលរួមរបស់យុវជនក្នុងដំណាក់កាលនៃការបោះឆ្នោត ។
លោក សំ គន្ធាមី នាយកប្រតិបត្តិអង្គការនិកហ្វិក ប្រាប់ភ្នំពេញប៉ុស្តិ៍នៅថ្ងៃទី ៩ ខែតុលាថា ការបើកវគ្គផ្សព្វផ្សាយរបស់ គ.ជ.ប នៅពេលនេះ ពិតជារួមចំណែកក្នុងការលើកស្ទួយលទ្ធិប្រជាធិតេយ្យនៅក្នុងប្រទេស តាមរយៈការចូលរួមបោះឆ្នោតរបស់សិស្សនិស្សិតកម្ពុជា ជាពិសេស ជំរុញឱ្យពលរដ្ឋដែលទើបគ្រប់អាយុ ១៨ ឆ្នាំ និងអ្នកដែលមិនទាន់ចុះឈ្មោះឱ្យទៅចូលរួមចុះឈ្មោះបោះឆ្នោត និងអ្នកដែលមានឈ្មោះរួចហើយទៅពិនិត្យ និងផ្ទៀងផ្ទាត់ឈ្មោះរបស់ខ្លួន ឱ្យបានត្រឹមត្រូវនៅក្នុងបញ្ជីបោះឆ្នោតថ្មីឆ្នាំ ២០២២។
លោកបន្តថា កាលពីអាណត្តិមុន គ.ជ.ប ក៏បានបើកវគ្គផ្សព្វផ្សាយ និងបញ្ជ្រាបព័ត៌មាននេះជូនដល់និស្សិត នៅតាមសាកលវិទ្យាល័យមួយចំនួន ប៉ុន្តែលើកនេះ គ.ជ.ប គ្រោងធ្វើគ្រប់រាជធានីខេត្តទាំង ២៥ ដើម្បីធ្វើយ៉ាងណា ឱ្យពួកគេយល់ដឹងពីសារៈសំខាន់នៃការបោះឆ្នោត និងដំណើការលទ្ធិប្រជាធិតេយ្យនៅក្នុងប្រទេសឱ្យកាន់តែទូលំទូលាយមួយកម្រិតទៀត។
លោកថ្លែងថា៖ « កាលពួកគេចូលរួមកាន់តែសកម្មនៅក្នុងការបោះឆ្នោត វានឹងចូលរួមលើកកម្ពស់លទ្ធិប្រជាធិតេយ្យ និងសិទ្ធមនុស្ស នៅកម្ពុជា។ ម្យ៉ាងពួកគាត់គឺជាម្ចាស់ស្រុក ដែលត្រូវតែចូលរួមបោះឆ្នោតជ្រើសរើសមេដឹកនាំប្រទេស តាមរយៈគណបក្សដែលពួកគាត់ពេញចិត្ត»។
បើតាម លោក សំ គន្ធាមី ការរៀបចំវគ្គអប់រំ និងបញ្ជ្រាបព័ត៌មានពីសារៈសំខាន់នៃការបោះឆ្នោត ជូនដល់សិស្សនិស្សិតកម្ពុជា មិនទាន់គ្រប់គ្រាន់នោះទេ គ.ជ.ប គួរតែពង្រីកវិសាលភាព ក្នុងការរៀបចំវេទិកាសាធារណៈ ឱ្យបានទូលំទូលាយបន្ថែមទៀត ដើម្បីផ្តល់ព័ត៌មានជូនដល់ប្រជាពលរដ្ឋទូទៅពីដំណើការនៃការបោះឆ្នោតនៅក្នុងប្រទេស ដើម្បីធ្វើយ៉ាងណា ឱ្យពួកគេ ដែលជាម្ចាស់ប្រទេសបានចូលរួមកាន់តែច្រើនថែមទៀត ក្នុងការបោះឆ្នោត ជ្រើសរើសមេដឹកនាំដែលពួកគេស្រឡាញ់ពេញចិត្ត៕
