ភ្នំពេញៈទីភ្នាក់ងារជាតិមុខរបរនិងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ សហការជាមួយ ស.ស.យ.ក រាជធានីភ្នំពេញ និងសមាគមរោងចក្រកាត់ដេរនៅកម្ពុជា (GMAC) នឹងរៀបចំពិព័រណ៍ការងារ និងផលិតភាពជាតិឆ្នាំ ២០២២ រយៈពេល ២ ថ្ងៃនៅចុងខែនេះ ដែលនឹងផ្តល់ឱកាសការងារជាង ២ ម៉ឺនកន្លែងពីក្រុមហ៊ុនធំៗ និងល្បីៗចំនួន ១៥០។
ក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងនៅថ្ងៃទី ៩ តុលាថា យុវជន សិស្សនិស្សិត និងអ្នកស្វែងរកការងារ នឹងទទួលបានឱកាសការងារជាង ២ ម៉ឺនកន្លែងពីក្រុមហ៊ុនធំៗនិងល្បីៗចំនួន ១៥០ នៅក្នុងមហាព្រឹត្តិការណ៍ការងារដ៏ធំជាងគេប្រចាំឆ្នាំ។
ក្រសួងបានបញ្ជក់ថា «ការរកការងារ ការរើសបុគ្គលិក និងការសម្ភាសភ្លាមៗ នឹងមាននៅក្នុងពិព័រណ៍ការងារ និងផលិតភាពជាតិឆ្នាំ ២០២២ ដែលសហការរៀបចំឡើងនៅអគារពិព័រណ៍កោះពេជ្ររយៈពេល ២ ថ្ងៃគឺថ្ងៃទី ២៨-២៩ ខែតុលាឆ្នាំ ២០២២ ចាប់ពីម៉ោង ៨ ព្រឹក ដល់ម៉ោង ៨ យប់»។
លោក ហៃ ហ៊ុនឡេង ប្រធានទីភ្នាក់ងារជាតិមុខរបរ និងការងារ (NEA) បានប្រាប់ភ្នំពេញប៉ុស្តិ៍ថា ពិព័រណ៍ការងារនេះ ត្រូវបានរៀបចំឡើងក្នុងគោលដៅបង្កើតឱ្យមានវេទិកាការងារដ៏ធំជួបជុំគ្នានៅ ១ កន្លែងសម្រាប់ផ្តល់ភាពងាយស្រួលរវាងអ្នកស្វែងរកការងារ និយោជក អ្នកផ្តល់ការអប់រំបណ្តុះបណ្តាល និងដៃគូពាក់ព័ន្ធនានា។ លោកបន្តថា ពិព័រណ៍នេះ ក៏ដើម្បីបង្កើតឱកាសឱ្យពួកគេផ្លាស់ប្តូរនិងចែករំលែកព័ត៌មានទីផ្សារការងារ លើកកម្ពស់ការយល់ដឹង និងបណ្តុះគំនិតអំពីការបង្កើនផលិតភាពផងដែរ។
លោកបានបញ្ជាក់ថា៖ «ពិព័រណ៍ការងារថ្នាក់ជាតិនេះ នឹងត្រូវបានរៀបចំនៅអគារពាណិជ្ជកម្ម និងពិព័រណ៍កោះពេជ្រដ៏ធំទូលាយនឹងអាចទាក់ទាញនិងកៀរគរអ្នកចូលរួមទស្សនាប្រមាណជាង ៣០ ០០០ នាក់។នាំមកនូវក្រុមហ៊ុន សហគ្រាស គ្រឹះស្ថានអប់រំបណ្តុះបណ្តាលល្បីឈ្មោះ អង្គការជាតិ-អន្ដរជាតិ ព្រមទាំងក្រសួង ស្ថាប័នរដ្ឋាភិបាលចំនួន ១៥០ ចូលរួមដាក់តាំងបង្ហាញអំពីតម្រូវការជ្រើសរើសកម្លាំងពលកម្មប្រមាណជាង ២ ម៉ឺនកន្លែងដែលនឹងចូលរួមតាំងបង្ហាញអំពីតម្រូវការជ្រើសរើសកម្លាំងពលកម្មមគ្គុទ្ទេសក៍ និងបទពិសោធ សម្រាប់ឈានចូលទីផ្សារការងារព្រមទាំងឱកាសបណ្តុះបណ្តាលជំនាញ»។
ទន្ទឹមនឹងនេះលោក ហៃ ហ៊ុនឡេង បានអះអាងទៀតថា កម្មវិធីពិព័រណ៍ការងារថ្នាក់ជាតិនេះ ក៏នឹងមានរួមបញ្ចូលសិក្ខាសាលាស្តីពីផលិតភាពថ្នាក់ជាតិក្នុងគោលបំណងដើម្បីលើកកម្ពស់ការយល់ដឹង និងបណ្ដុះគំនិតអំពីការបង្កើនផលិតភាពតាមរយៈការចែករំលែកចំណេះដឹង និងបទពិសោធល្អៗពីសំណាក់វាគ្មិនជំនាញៗទៀតផង។
លោកបានបញ្ជាក់ថា៖ «អ្នកចូលរួម ក៏អាចស្វែងយល់ពីការបង្កើនផលិតភាពការងារតាមរយៈការចែករំលែកចំណេះដឹងដោយវាគ្មិនជាតិ និងអន្តរជាតិល្បីៗនៅក្នុងសិក្ខាសាលាផងដែរ។ កុំភ្លេចត្រៀម CV ឱ្យបានច្រើន ដើម្បីដាក់ពាក្យស្នើសុំការងារបានច្រើនជម្រើស»។
តាមការប្រកាសនៅលើគេហទំព័ររបស់ទីភ្នាក់ងារជាតិមុខរបរ និងការងារបានឱ្យដឹងថាឱកាសការងារជាង ២ ម៉ឺនកន្លែង គឺមានដូចជា ក្នុងវិស័យកសិកម្ម និងធនធានធម្មជាតិ ស្ថាបត្យកម្ម និងសំណង់ សិល្បៈ សំឡេង/វីដេអូ និងទំនាក់ទំនង ការគ្រប់គ្រងពាណិជ្ជកម្មនិងរដ្ឋបាល ការអប់រំ និងបណ្តុះបណ្តាលហិរញ្ញវត្ថុព្រមទាំងវិស័យរដ្ឋបាលសាធារណៈជាដើម។
ក្រៅពីនោះ ឱកាសការងារក្នុងវិស័យវិទ្យាសាស្ត្រសុខាភិបាល បដិសណ្ឋារកិច្ច និងទេសចរណ៍ សេវាកម្ម ព័ត៌មានវិទ្យា កម្មន្តសាល ទីផ្សារ ដឹកជញ្ជូន ចែកចាយ និងភ័ស្តុភារ ព្រមទាំងផ្នែកសុវត្ថិភាពសាធារណៈ និងសន្តិសុខ ក៏កំពុងមានតម្រូវការនៃការជ្រើសរើសក្នុងឱកាសនោះដែរ។
កាលពីថ្ងៃទី ៤ ទី៥ ខែវិច្ឆិកា ឆ្នាំ ២០២១ កន្លងទៅ តម្រូវការកម្លាំងពលកម្មសរុបចំនួន ២៣ ១៤០ ត្រូវបានប្រកាសជ្រើសរើសពី ១០៩ ក្រុមហ៊ុនដោយក្នុងនោះផ្នែករដ្ឋបាលសាធារណៈមានច្រើនជាងគេគឺមានដល់ ៧ ៤៤២ កន្លែង និងផ្នែកកម្មន្តសាលគឺឈរក្នុងលំដាប់ខ្ពស់ទី ២ គឺមានតម្រូវការចំនួន ៥ ៣៥៩ កន្លែង និងបន្ទាប់មកគឺផ្នែកគ្រប់គ្រងពាណិជ្ជកម្មនិងរដ្ឋបាលចំនួន ២ ៩៤៦ កន្លែង ខណៈផ្នែកព័ត៌មានវិទ្យាមានចំនួន ២ ៥៥៨ កន្លែង។ នេះបើតាមការប្រកាសរបស់ NEA។
លោក កាំង មូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជា បានថ្លែងថា នេះជាពិព័រណ៍ការងារជាតិ ដូច្នេះគ្របដណ្តប់លើគ្រប់វិស័យ។ លោកបានថ្លែងថា៖«យើងចូលរួមជាចម្បងជាមួយក្រសួងលើការផ្សព្វផ្សាយអំពីព្រឹត្តិការណ៍នេះដល់ទាំងក្រុមហ៊ុនដែលមានបំណងធ្វើការជ្រើសរើសបុគ្គលិក និងដល់អ្នកដែលកំពុងមានតម្រូវការស្វែងរកការងារធ្វើ។ បន្ថែមពីលើនេះ យើងបានសហការរៀបចំសិក្ខាសាលាដែលពាក់ព័ន្ធដល់ការលើកកម្ពស់ផលិតភាពការងារ។ កាលណាយើងនិយាយពីការងារ យើងមិនអាចមិននិយាយពីកម្រិតផលិតភាពការងារឡើយ»៕