ភ្នំពេញៈ ឱសថទឹកសេរ៉ូក្អក ចំនួន ៤ ប្រភេទ របស់ឥណ្ឌា ដែលអង្គការសុខភាពពិភពលោក (WHO) ប្រកាសអាសន្ន និងហាមប្រើប្រាស់ ក្រោយពីរកឃើញឱសថទាំងនោះជាប់ពាក់ព័ន្ធនឹងការស្លាប់របស់កុមារជិត ៧០ នាក់ នៅប្រទេសហ្គាំប៊ី គឺមិនមានចុះបញ្ជិកានាំចូលមកកម្ពុជានោះឡើយ។ នេះបើតាមមន្ត្រីជាន់ខ្ពស់សុខាភិបាល។
កាលពីដើមខែតុលា WHO បានប្រកាសអាសន្នសកលមួយ និងព្រមានពីការប្រើប្រាស់ឱសថទឹកសេរ៉ូក្អកទាំង ៤ ប្រភេទ ដែលផលិតដោយក្រុមហ៊ុនឥណ្ឌាមួយមានឈ្មោះ Maiden Pharmaceuticals ដោយថា ឱសថនោះ ពុំបានផ្តល់ការធានាអំពីសុវត្ថិភាពឱសថឡើយ។
ឱសថទឹកសេរ៉ូក្អកចំនួន ៤ ប្រភេទនោះ មានដូចជា Promethazine Oral Solution, Kofexmalin Baby Cough Syrup, Makoff Baby Cough Syrup and Magrip N Cold Syrup ដោយអង្គការសុខភាពពិភពលោក អះអាងថា ឱសថទាំងនេះអាចជាប់ពាក់ព័ន្ធនឹងការស្លាប់របស់កុមារចំនួន ៦៦ នាក់នៅប្រទេសហ្គាំប៊ី។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល បានប្រាប់ភ្នំពេញប៉ុស្តិ៍នៅថ្ងៃទី ៧ តុលាថា ថ្នាំទាំង ៤ ប្រភេទដែលជាផលិតផលរបស់ក្រុមហ៊ុន Maiden Pharmaceutical នេះ គឺមិនមានចុះបញ្ចិកា នៅក្រសួងសុខាភិបាលឡើយ ហើយប្រភេទថ្នាំទាំងនេះ ក៏មិនមានការចរាចរស្របច្បាប់នៅលើទីផ្សារកម្ពុជានោះដែរ។
លោកស្រីបានបញ្ជាក់ថា៖ «យើងមិនមានថ្នាំប្រភេទខាងលើនេះ ចុះបញ្ជិកានៅក្រសួងនោះឡើយ»។
អង្គការ WHO បានឱ្យដឹងថា យោងតាមការវិភាគមន្ទីរពិសោធន៍ រកឃើញថា ទឹកសេរ៉ូក្អកទាំង ៤ ប្រភេទនេះ មានផ្ទុកនូវបរិមាណមិនអាចទទួលយកបាន នៃ diethylene glycol និង ethylene glycol ដែលវា គឺជាសារធាតុម្យ៉ាង ដែលមានជាតិពុលដល់មនុស្ស និងអាចស្លាប់នៅពេលទទួលទាន។
WHO និយាយថា៖ «រហូតមកដល់ពេលនេះ ផលិតផលត្រូវបានគេកំណត់អត្តសញ្ញាណនៅក្នុងប្រទេសហ្គាំប៊ី។ ប៉ុន្តែពួកគេប្រហែលជាត្រូវបានចែកចាយទៅកាន់ប្រទេសផ្សេងទៀតតាមរយៈទីផ្សារក្រៅផ្លូវការ»។
ទោះយ៉ាងណា រដ្ឋាភិបាលឥណ្ឌា បានអះអាងថា ខ្លួនបាននាំចេញឱសថសេរ៉ូក្អកទាំង៤ប្រភេទនេះ ទៅតែប្រទេស Gambia តែប៉ុណ្ណោះ។ នេះបើតាមការចុះផ្សាយរបស់សារព័ត៌មាន BBC កាលពីថ្ងៃទី ៨ តុលា។
ចំណែកការចុះផ្សាយរបស់សារព័ត៌មាន Reuters បានឱ្យដឹងថា ក្រុមហ៊ុន Maiden Pharmaceuticals មានមូលដ្ឋាននៅរដ្ឋ Haryana ភាគខាងជើងនៃប្រទេសឥណ្ឌា បាននាំចេញផលិតផលរបស់ខ្លួនទៅកាន់បណ្តាប្រទេសជាច្រើននៅតំបន់អាស៊ី អាហ្វ្រិក និងអាមេរិកឡាទីន។
លោក ផាន អូន ប្រតិភូរាជរដ្ឋាភិបាលទទួលបន្ទុកអគ្គនាយក នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ក.ប.ប. ប្រាប់ភ្នំពេញប៉ុស្តិ៍នៅថ្ងៃទី ៩ តុលាថា ក្រសួងសុខាភិបាល ច្បាស់ជាបានធ្វើការយ៉ាងហ្មត់ចត់ហើយចំពោះករណីនេះ បន្ទាប់ពីក្រសួងបានប្រកាសថា មិនមានការផ្តល់បញ្ជិកា ឱ្យនាំចូលថ្នាំប្រភេទនេះមកកម្ពុជា។
ទោះយ៉ាងណា ក្នុងនាមអគ្គនាយកដ្ឋាន ក.ប.ប.លោកអះអាងថា ក.ប.ប. នឹងនៅតែបន្តឃ្លាំមើលនៅតាមបណ្តាទីផ្សារ ដើម្បីឱ្យប្រាកដថា គ្មានការចរាចរដោយសុខច្បាប់ចំពោះឱសថទាំង ៤ នេះ ចៀងវាងបង្កផលប៉ះពាល់ដល់សុខភាពប្រជាពលរដ្ឋ ជាពិសេសកុមារតូចៗ។
លោកបញ្ជាក់ថា៖ «ក.ប.ប. នឹងឃ្លាំមើល ក្រែងមានករណីចៃដន្យណាមួយជាយថាហេតុ នៅតាមបណ្តាទីផ្សារ និងតាមបណ្តាកន្លែងលក់តូចតាចណា ដែលមានការឆកល្វែងណាមួយ។ យើងបន្ថែមពីលើអ្វីដែលក្រសួងមានសមត្ថកិច្ចលោកបានប្រកាសជាផ្លូវការហើយ។
នៅពេល ក.ប.ប. ចុះទៅតាមម៉ាត ឬដេប៉ូផ្សេងៗនោះ ក.ប.ប. នឹងឆ្លៀតមើលដែរ ដើម្បីជាការស្រាវជ្រាវបន្ថែមកុំឱ្យមានផលិតផលទាំង ៤ ប្រភេទនេះដាក់ចរាចរ»៕