.jpg)
ផ្នែកនៃទិដ្ឋភាពដើមឈើ និងវាលស្មៅ ដែលត្រូវបានដាំឡើងវិញ ក្រោយពីមានការឈូសឆាយ នៅតំបន់ភ្នំតាម៉ៅ។ រូបថត FB
តាកែវៈ កម្លាំងបញ្ជាការដ្ឋានអង្គរក្សដែលលោកនាយករដ្ឋមន្ត្រី ហ៊ុន សែន ចាត់ឱ្យទៅរៀបចំឈូសឆាយដី និងដាំដុះកូនឈើឡើងវិញ នៅតំបន់ភ្នំតាម៉ៅបានប្រកាសភាពជោគជ័យ ដែលបានដាំដើមឈើសរុបជាង ១៥ ម៉ឺនដើម ជីកស្រះ និងធ្វើរបង ហើយបានធ្វើលិខិតប្រគល់-ទទួលការគ្រប់គ្រងបន្តទៅរដ្ឋបាលខេត្ត រដ្ឋបាលព្រៃឈើ និងអាជ្ញាធរមូលដ្ឋានធ្វើការគ្រប់គ្រងបន្ដ នៅថ្ងៃទី ៧ ខែតុលា តទៅ។
លោក ហ៊ីង ប៊ុនហៀង អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការបញ្ជាការដ្ឋានអង្គរក្ស ឱ្យដឹងថា បន្ទាប់ពីបានទទួលបទបញ្ជារបស់លោកនាយករដ្ឋមន្ត្រី ហ៊ុន សែន កាលពីថ្ងៃទី ១០ ខែសីហា ឆ្នាំ ២០២២ ដែលបានបញ្ជាឱ្យបញ្ជាការដ្ឋានអង្គរក្សបញ្ជូនកម្លាំងចំនួន ១ ២២៥ នាក់ និងគ្រឿងចក្ររាប់សិបគ្រឿង ចុះឈូសឆាយ កាយកប់ សម្អាតដី ដាំកូនឈើប្រណីតឡើងវិញ ជីកស្រះ និងអាងស្តុកទឹក ដែលអាចស្រោចស្រពកូនឈើនៅរដូវប្រាំង ព្រមទាំង ដាំបង្គោលថ្ម និងព័ទ្ធលួសបន្លាជុំវិញផ្ទៃដី៥៣០ហិកតានៅតំបន់ភ្នំតាម៉ៅនោះ ទីបំផុតបេសកកម្មនេះបានបញ្ចប់ដោយជោគជ័យ។
លោកបញ្ជាក់ថា៖ «ដាំកូនឈើបានចំនួន ១៥៧ ៩៥១ ដើម សម្អាតដីបានចំនួន ៥៣០ ហិកតា ជីកស្រះបានចំនួន ២ កន្លែង ជីកអាងស្តុកទឹកបានចំនួន ១ កន្លែង ធ្វើរបងដាំបង្គោលថ្មបានចំនួន ៥ ០២៩ ដើម និងព័ទ្ធលួសបន្លាបានប្រវែង ៥០ ២៨០ ម៉ែត្រ»។
លោកឱ្យដឹងទៀតថា ក្រោយពីបានបញ្ចប់បេសកកម្មយ៉ាងល្អដោយជោគជ័យរបស់បញ្ជាការដ្ឋានអង្គរក្ស និងដោយមានចំណារបានឃើញ និងកោតសរសើរពីលោកនាយករដ្ឋមន្ត្រីលើរបាយការណ៍ចុះថ្ងៃទី ៣ ខែតុលា ឆ្នាំ ២០២២ រួចមក បញ្ជាការដ្ឋានអង្គរក្ស បានរៀបចំកម្លាំង និងគ្រឿងចក្រដើម្បីត្រឡប់ចូលអង្គភាពវិញ នៅថ្ងៃទី ៨ ខែតុលា ដោយប្រគល់ជូនការងារបន្តទៅរដ្ឋបាលខេត្តតាកែវ មន្ទីរកសិកម្ម និងរដ្ឋបាលព្រៃឈើខេត្តតាកែវ និងអាជ្ញាធរមូលដ្ឋាន។
លោកបញ្ជាក់ថា៖ «សូមប្រគល់ជូនទៅអាជ្ញាធរដែនដី រួមមាន រដ្ឋបាលខេត្តតាកែវ រដ្ឋបាលព្រៃឈើនៃក្រសួងកសិកម្ម មន្ទីរកសិកម្ម រុក្ខាប្រមាញ់ និងនេសាទខេត្តតាកែវ រដ្ឋបាលស្រុកបាទី រដ្ឋបាលឃុំក្រាំងឆ្នង់ និងរដ្ឋបាលឃុំកណ្ដឹង ដើម្បីគ្រប់គ្រងថែទាំបន្ត» ។
លោក លី សាវេត អភិបាលរងខេត្តតាកែវ ប្រាប់ភ្នំពេញប៉ុស្តិ៍នៅថ្ងៃទី ៩ ខែតុលាថា បន្ទាប់ពីបានចូលរួមប្រជុំ ដើម្បីប្រគល់ និងទទួលការគ្រប់គ្រងបន្តនៅតំបន់ភ្នំតាម៉ៅ ស្ថិតនៅឃុំក្រាំងធ្នង់ និងឃុំកណ្តឹង ស្ថិតក្នុងភូមិសាស្ត្រស្រុកបាទី ខេត្តតាកែវ កាលពីរសៀលថ្ងៃទី ៧ ខែតុលារួចមក អាជ្ញាធរខេត្តនៅមិនទាន់បានប្រជុំ ដើម្បីរៀបចំចាត់ចែងផែនការគ្រប់គ្រងបន្តទៀតយ៉ាងណានៅឡើយទេ។ លោកបន្តថា នៅថ្ងៃអង្គារ ឬថ្ងៃពុធ នៃសប្តាហ៍ថ្មីនេះ លោកអភិបាលខេត្តអាចនឹងដឹកនាំកិច្ចប្រជុំ ដើម្បីរៀបចំចាត់ចែងការគ្រប់គ្រងនៅតំបន់នេះ។
លោកថ្លែងថា៖ «ឥឡូវនេះត្រូវធ្វើយ៉ាងម៉េចទៅមុខទៀតហ្នឹង យើងមិនទាន់មានអីជាផ្លូវការទេ ចាំមើលមានតែរង់ចាំឯកឧត្តម [អ៊ូច ភា] អភិបាលខេត្តលោកដឹកនាំការប្រជុំបន្តទៀត»។
លោក លី សាវេត ប្រាប់ថា តាមដែលលោកទៅឃើញជាក់ស្តែងនៅទីតាំងដាំដើមឈើឡើងវិញក្នុងតំបន់ភ្នំតាម៉ៅនោះ គឺមានការរៀបចំបានល្អ មានសោភណភាពស្រស់ស្អាតជាទីទាក់ទាញ។ លោកថា ដើមឈើនៅទីនោះ នឹងដុះលូតលាស់ធំបញ្ចេញភាពស្រស់បំព្រងជាមួយនឹងដើមឈើដែលមានស្រាប់នៅជុំវិញនោះ ធ្វើឱ្យកន្លែងនោះជាទីមនោរម្យថ្មីមួយមិនខាន។
លោកថ្លែងថា៖ «មើលទៅស្អាត ហើយកូនឈើល្អៗយើងដាំមានជួរមានបន្ទាត់ ហើយនៅថ្ងៃខាងមុខខ្ញុំគិតថា ប្រហែលជាយ៉ាងយូរ ៣ ឆ្នាំទៀតគឺកន្លែងហ្នឹងទៅជាកន្លែងល្អមែនទែន ព្រោះកូនឈើនោះ ជាកូនឈើល្អទាំងអស់។ មើលទៅតំបន់ដែលឈូសឆាយហ្នឹង ជាព្រៃយើងដាំ ហើយតំបន់ផ្សេងទៀតហ្នឹងវាព្រៃបែបធម្មជាតិ»។
លោកបញ្ជាក់ថា នៅទីនោះមានធ្វើផ្លូវចេញ-ចូល ធ្វើទ្វារ ធ្វើរបងព័ទ្ធជុំវិញ ដែលនាំឱ្យទីកន្លែងនោះមានសុវត្ថិភាពបន្ថែមទៀតផងដែរ។ បច្ចុប្បន្នមានអ្នកប្រចាំការដើម្បីមើលថែទាំកូនឈើ។ ប៉ុន្តែយ៉ាងណាក៏ដោយ ការស្រោចទឹកនៅក្នុងរដូវនេះ មិនសូវជាចាំបាច់ខ្លាំងទេ សម្រាប់កូនៗឈើតូចៗ។ ការស្រោចទឹក គឺផ្តោតសំខាន់លើដើមឈើធំៗមួយចំនួនដែលដាំលម្អប៉ុណ្ណោះ៕
