ភ្នំពេញៈ ព្រះករុណាព្រះបាទសម្តេចព្រះបរមនាថ នរោត្តម សីហមុនី បានចេញព្រះរាជក្រឹត្យត្រាស់បង្គាប់បញ្ចប់មុខតំណែងលោក វេង សាខុន ពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ តាមសំណើរបស់លោកនាយករដ្ឋមន្ត្រី ហ៊ុន សែន។
ព្រះរាជក្រឹត្យចុះថ្ងៃទី ៨ ខែតុលា បញ្ជាក់ថា៖ «បញ្ចប់មុខតំណែងឯកឧត្តម វេង សាខុន ពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ត្រូវទទួលបន្ទុកអនុវត្តព្រះរាជក្រឹត្យនេះចាប់ពីថ្ងៃឡាយព្រះហស្ថលេខាតទៅ»។
លោកនាយករដ្ឋមន្ត្រីកាលពីថ្ងៃទី ៨ ខែតុលាបានចេញសេចក្តីសម្រេចចាត់តាំងលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជារដ្ឋមន្ត្រីស្តីទីនៃក្រសួងកសិកម្មបន្ថែមលើមុខងារ បច្ចុប្បន្ន រហូតដល់មានការតែងតាំងជាផ្លូវការនូវរដ្ឋមន្ត្រីក្រសួងកសិកម្មថ្មី។
សេចក្តីសម្រេចបញ្ជាក់ថា៖ «រដ្ឋមន្រ្តីស្តីទីនៃក្រសួងកសិកម្ម រុក្ខាប្រមាញ់ និងនេសាទ ដែលទទួលបានការចាត់តាំងខាងលើ ប្រើប្រាស់សិទ្ធិអំណាចទាំងអស់ស្របតាមច្បាប់ និងលិខិតបទដ្ឋានគតិយុត្តជាធរមាន ដើម្បីដឹកនាំ និងគ្រប់គ្រងការងាររបស់ក្រសួងអង្គភាពចំណុះរបស់ក្រសួង ព្រមទាំងមន្ត្រីរាជការ និងបុគ្គលិកដែលជាភ្នាក់ងាររដ្ឋបាលនៅក្រោមឱវាទរបស់ខ្លួន»។
ក្នុងពេលកាន់តំណែងជារដ្ឋមន្ដ្រី លោក វេង សាខុន ធ្លាប់រងការស្ដីបន្ទោសពីលោក ហ៊ុន សែន ក្នុងពិធីសាធារណៈជាច្រើនលើកច្រើនសា។ កាលពីខែកុម្ភៈនៅក្នុងពិធីបិទសន្និបាតបូកសរុបការងារឆ្នាំ ២០២១ និងលើកទិសដៅការងារឆ្នាំ ២០២២ របស់ក្រសួងមហាផ្ទៃ លោក ហ៊ុន សែន បានស្ដីបន្ទោសលោក វេង សាខុន ខ្លាំងៗថា ជារដ្ឋមន្ដ្រី «ជិះសេះមើលផ្កា» និងធ្វើការងារ មិនព្រមសហការជាមួយក្រសួង និងស្ថាប័នដទៃទៀត។
លោកថ្លែងថា៖ «មើលខុនឯងបង្កើនកិច្ចសហការបន្តិចមើល។ ខ្ញុំសូមចង្អុលបង្ហាញថា ក្នុងចំណោមរដ្ឋមន្ត្រី គឺរដ្ឋមន្ត្រីដែលមិនព្រមសហការជាមួយអ្នកដទៃគឺរដ្ឋមន្ត្រីកសិកម្មហ្នឹងឯង។ រដ្ឋមន្ត្រីកសិកម្មអត់សូវសហការជាមួយរដ្ឋមន្ត្រីណាទាំងអស់»។
ក្នុងពិធីបិទសន្និបាតនោះ លោក ហ៊ុន សែន ក៏បានដាស់តឿនដល់រដ្ឋមន្ត្រីនានា បន្តធ្វើជារដ្ឋមន្ត្រីឱ្យបានពេញអាណត្តិ ដោយលោកបញ្ជាក់ថា ការបញ្ចប់តំណែងរដ្ឋមន្ត្រីវាមិនពិបាកនោះទេ គឺលោកត្រូវការយ៉ាងយូរ ២៤ ម៉ោងដែលការដកតំណែងរដ្ឋមន្ត្រីនេះគឺធ្វើឡើងដោយព្រះរាជក្រឹត្យ។
លោក វេង សាខុន មិនអាចទាក់ទងដើម្បីសុំការបញ្ជាក់បានទេកាលពីថ្ងៃទី ៩ ខែតុលា។
លោក វេង សាខុន ត្រូវបានតែងតាំងជារដ្ឋមន្ដ្រីក្រសួងកសិកម្ម កាលពីឆ្នាំ ២០១៦។ មុនពេលចូលទៅដឹកនាំក្រសួងកសិកម្ម លោក វេង សាខុន ធ្លាប់បម្រើការងារនៅក្រសួងធនធានទឹក និងឧតុនិយម ក្នុងតំណែងជាអនុរដ្ឋលេខាធិការពីឆ្នាំ ១៩៩៨ ដល់ឆ្នាំ ២០០៤ និងជារដ្ឋលេខាធិការក្រសួងធនធានទឹក និងឧតុនិយមពីឆ្នាំ២០០៤ ដល់ឆ្នាំ ២០១៦។
នាថ្ងៃទី ៨ ខែតុលា នៅមុនការបញ្ចប់តំណែងលោក លោក វេង សាខុន បានបង្ហោះសារក្នុងហ្វេសប៊ុក ថា ក្រោយពីបានបំពេញបេសកកម្មការងារនៅអឺរ៉ុប ១ សប្តាហ៍ទាក់ទងទៅនឹងការពង្រឹងសុវត្ថិភាពស្បៀងជាសកល និងការស្វះស្វែងរកការគាំទ្រគម្រោងពង្រឹងការផលិតផលិតផលកសិកម្មប្រកបដោយសុវត្ថិភាពស្របតាមស្តង់ដាអឺរ៉ុប នៅកម្ពុជា លោក និងសហការីបានវិលត្រឡប់មកដល់ប្រទេសថៃ នៅវេលាម៉ោង ២ និង ៣០ នាទី ហើយកំពុងរង់ចាំចេញដំណើរត្រឡប់ទៅកម្ពុជានៅវេលាម៉ោង ៤ និង ៣០ នាទី។
លោក អូន ព័ន្ធមុនីរ័ត្ន នាថ្ងៃទី ៩ ខែតុលា បានចេញសេចក្តីណែនាំដល់គ្រប់អង្គភាពទាំងអស់ចំណុះក្រសួងកសិកម្ម ត្រូវបន្តការពាររាល់ឯកសារការងារទាំងអស់ដែលស្ថិតនៅក្រោមសមត្ថកិច្ច និងការទទួលខុសត្រូវរបស់ខ្លួនឱ្យបានត្រឹមត្រូវប្រកបដោយសុវត្ថិភាព។
លោកបញ្ជាក់ថា៖ «ខុទ្ទកាល័យអតីតរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទត្រូវថែរក្សា និងការពារឯកសារទាំងអស់ឱ្យបានត្រឹមត្រូវ ដើម្បីត្រៀមផ្ទេរប្រគល់ជូនខុទ្ទកាល័យរដ្ឋមន្រ្តីថ្មី ដែលនឹងត្រូវបានតែងតាំង និងចូលកាន់តំណែងនាពេលខាងមុខ»។
ចំពោះមុខ លោក អូន ព័ន្ធមុនីរ័ត្ន ណែនាំដល់ខុទ្ទកាល័យអតីតរដ្ឋមន្ត្រីក្រសួងកសិកម្មត្រូវប្រគល់ត្រារបស់ក្រសួងនេះជូនមកខុទ្ទកាល័យរដ្ឋមន្រ្តីស្តីទី ដែលមានទីតាំងនៅក្រសួងសេដ្ឋកិច្ច និងហិរញ្ញវត្ថុ ដើម្បីគ្រប់គ្រងជាបណ្តោះអាសន្ន ចាប់ពីពេលនេះរហូតដល់រដ្ឋមន្រ្តីថ្មីត្រូវបានតែងតាំងចូលកាន់តំណែងជាផ្លូវការ។
លោកបន្ថែមថា ចំពោះរាល់ឯកសារ ឬលិខិតបទដ្ឋានគតិយុត្តដែលត្រូវការនូវការពិនិត្យ និងការសម្រេចរបស់រដ្ឋមន្ត្រីស្តីទី ខុទ្ទកាល័យ និងថ្នាក់ដឹកនាំរបស់ក្រសួងកសិកម្ម ត្រូវបញ្ជូនមកខុទ្ទកាល័យរដ្ឋមន្ត្រីស្តីទីដែលមានទីតាំងនៅក្រសួងសេដ្ឋកិច្ច និងហិរញ្ញវត្ថុ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាថ្លែងថា វាជារឿងធម្មតាដែលសមាជិករដ្ឋាភិបាលអាចត្រូវបានជំនួសក្នុងកាលៈទេសៈជាក់លាក់ណាមួយ សម្រាប់អភិបាលកិច្ចសាធារណៈកាន់តែប្រសើរ ហើយប្រជាជនសង្ឃឹមថា រដ្ឋមន្ត្រីថ្មីនឹងធ្វើការផ្លាស់ប្តូរយ៉ាងសំខាន់ក្នុងវិស័យកសិកម្ម៕