ព្រះសីហនុៈ រដ្ឋបាល​ខេត្ត​ព្រះសីហនុ​បាន​ចេញ​សេចក្តី​ណែនាំ​លើ​ការគ្រប់គ្រង​កាស៊ីណូ សណ្ឋាគារ ភោជនីយដ្ឋាន អគារ​ស្នាក់​នៅរួម និង​អាជីវកម្ម​នានា ខណៈ​ការ​បង្ក្រាប​ល្បែង​ស៊ីសង​ខុស​ច្បាប់​ទូទាំង​ប្រទេស​ធ្វើ​ឡើង​បាន​ជិត ១​ ម៉ឺន​ទីតាំង ក្នុង​នោះ​មនុស្ស​ជាង​ ២៥០​ នាក់​ត្រូវ​បាន​បញ្ជូន​ទៅ​តុលាការ។

សេចក្តី​ណែនាំ​របស់​រដ្ឋបាល​ខេត្ត​ព្រះសីហនុ​ចុះថ្ងៃ​ទី ៧ តុលា បាន​ឱ្យ​ដឹង​ថា ក្នុង​រយៈពេល​កន្លង​មក អាជ្ញាធរ​បាន​សង្កេត​ឃើញ​មាន​ទីតាំង​អាជីវកម្ម​ ក្រោយពី​បាន​ទទួល​សិទ្ធិ​ប្រកប​អាជីវកម្ម​ពី​រាជរដ្ឋាភិបាល ឬ​ពី​ក្រសួង ស្ថាប័ន​មាន​សមត្ថកិច្ច​រួច​ហើយ​ មិន​បាន​ជូន​ដំណឹង​អំពី​ការ​បើក​ដំណើរការ​អាជីវកម្ម​របស់​ខ្លួន​មក​រដ្ឋបាល​ខេត្ត​ ឬសមត្ថកិច្ច​ពាក់ព័ន្ធ​ និង​មិន​បាន​លើក​ស្លាក​សម្គាល់​ឈ្មោះ​ទីតាំង​ប្រកប​អាជីវកម្ម​របស់​ខ្លួន​នៅ​ឡើយ​។

រដ្ឋបាល​ខេត្ត​បន្ថែម​ថា៖ «មាន​ទីតាំង​ខ្លះ​ទៀត​បាន​ហ៊ុមព័ទ្ធ​របង​បិទ​បាំង​ ដែល​ធ្វើ​ឱ្យ​អាជ្ញាធរ​មាន​សមត្ថកិច្ច ពិបាក​ក្នុង​ការត្រួតពិនិត្យ​ទីតាំង​នីមួយៗ​ និង​ម៉្យាង​ទៀត បង្ក​លក្ខណៈ​ដល់​ជនឆ្លៀត​ឱកាស​ប្រព្រឹត្ត​បទល្មើស​ផ្សេងៗ​រួម​មាន​ការ​បង្ខាំង​មនុស្ស​ ដើម្បី​កេង​ប្រវ័ញ្ច​កម្លាំង​ពលកម្ម​ ការជួញដូរ​មនុស្ស ​ការធ្វើ​អាជីវកម្ម​ផ្លូវ​ភេទ និង​ការ​ប្រព្រឹត្ត​អំពើ​ល្មើស​ច្បាប់​នៃ​ព្រះរាជាណាចក្រ​កម្ពុជា​»។

ក្នុង​ន័យ​នេះ ដើម្បី​រក្សា​សន្តិសុខ​ សណ្តាប់​ធ្នាប់​សាធារណៈ និង​ការ​គ្រប់គ្រង​អាជីវកម្ម​ទាំងនោះ​ឱ្យ​បាន​ល្អ​ប្រសើរ​ និង​ស្រប​ទៅ​តាម​ច្បាប់ ឬ​លិខិត​បទដ្ឋាន​គតិយុត្ត​នានា រដ្ឋបាល​ខេត្ត​ព្រះសីហនុ សូម​ធ្វើការ​ណែនាំ​ម្ចាស់​កាស៊ីណូ ត្រូវ​ស្នើសុំ​លិខិត​អនុញ្ញាត​បើក​ទីតាំង​អាជីវកម្ម​របស់​ខ្លួន​ពី​រដ្ឋបាល​ខេត្ត​ព្រះសីហនុ មុន​សុំ​អាជ្ញាប័ណ្ណ​ពី​ក្រសួង​សេដ្ឋកិច្ច និង​ហិរញ្ញវត្ថុ។ ​

ម្ចាស់​អាជីវកម្ម​ត្រូវ​ដាក់​តាំង​ស្លាក​ឈ្មោះ​បង្ហាញ​អំពី​អាជីវកម្ម​របស់​ខ្លួន​ ដែល​មាន​អក្សរ​ខ្មែរ​ធំ​ជាង​អក្សរ​បរទេស​ ហើយ​អក្សរ​ខ្មែរ​ត្រូវ​ស្ថិត​នៅ​ជួរ​លើគេ​បំផុត​ឱ្យបាន​ត្រឹមត្រូវ​ស្រប​តាម​ខ្លឹមសារ​នៃ​អាជ្ញាប័ណ្ណ និង​ដាក់​បង្ហាញ​គ្រប់​អាជ្ញាប័ណ្ណ​នៅ​កន្លែង​ទទួល​ភ្ញៀវ។ ម្ចាស់​អាជីវកម្ម​ កាស៊ីណូ សណ្ឋាគារ ភោជនីយដ្ឋាន អគារ​ស្នាក់នៅ​រួម​ ឬ​បុគ្គល​ណា​មួយ មិន​ត្រូវ​យក​លិខិត​ឆ្លង​ដែន ​ឬបណ្ណការងារ​ ឬ​ឯកសារ​បញ្ជាក់​អត្តសញ្ញាណ​បុគ្គលិក​របស់​ខ្លួន​មក​រក្សា​ទុក​ជា​ដាច់​ខាត។

រដ្ឋបាល​ខេត្ត​គូសបញ្ជាក់​ថា ក្នុង​ករណី​ដែល​អាជ្ញាធរ​មាន​សមត្ថកិច្ច​រកឃើញ​ថា លិខិត​ឆ្លងដែន ឬ​បណ្ណ​ការងារ​ ឬ​ឯកសារ​បញ្ជាក់​អត្តសញ្ញាណ​របស់​បុគ្គលិក​ត្រូវ​បាន​រក្សាទុក​នៅ​ម្ចាស់​អាជីវកម្ម ​ឬ​បុគ្គល​ណាមួ​យនោះ ម្ចាស់​អាជីវកម្ម​នឹង​ត្រូវ​ទទួល​ខុសត្រូវ​ចំពោះ​មុខ​ច្បាប់​ជា​ធរមាន។

រដ្ឋបាល​ខេត្ត​ណែនាំ​បន្ត​ថា​ចំពោះ​ទីតាំង​អាជីវកម្ម​ត្រូវ​បើក​ចំហ​ដោយ​មិន​ត្រូវ​បិទបាំង​ ឬ​ហ៊ុមព័ទ្ធ​សំណាញ់ ​ឬ​របង​បន្លា​លួស​ និង​មិន​ត្រូវ​បិទ​សិទ្ធិ​សេរីភាព​របស់​កម្មករ​ និយោជិត ​ក្នុង​ការចេញ-ចូល ​ហើយ​ម្ចាស់​អាជីវកម្ម​ត្រូវ​រៀបចំ​បញ្ជី​ឈ្មោះ​កម្មករ និយោជិត ​និង​បញ្ជី​បើកប្រាក់​ខែ​ឱ្យ​បាន​ច្បាស់លាស់​ត្រឹមត្រូវ​តាម​​កិច្ចសន្យា​ការងារ​។

រដ្ឋបាល​ខេត្ត​ព្រះសីហនុ​សង្កត់ធ្ងន់​ថា៖ «ក្នុង​ករណី ​ម្ចាស់​អាជីវកម្ម​មិន​អនុវត្ត​តាម​ខ្លឹមសារ​នេះ​ រដ្ឋបាល​ខេត្ត​នឹង​គោរព​ស្នើសុំ​គោលការណ៍​ពី​រាជរដ្ឋាភិបាល​ ឬ​ពី​ក្រសួង​ស្ថាប័ន​មាន​សមត្ថកិច្ច ដើម្បី​បិទ​អាជីវកម្ម​ជា​ស្ថាពរ​»។

ជាមួយ​គ្នា​នេះ​ដែរ អភិបាល​ខេត្ត​ព្រះសីហនុ​លោក គួច ចំរើន​កាល​ពី​ថ្ងៃទី ៨ ខែ​តុលា បាន​បើក​​កិច្ចប្រជុំ​មួយ​ជាមួយ​សមត្ថកិច្ច​ពាក់ព័ន្ធ ដើម្បី​ផ្សព្វផ្សាយ​លទ្ធផល​កិច្ចប្រជុំ​បូក​សរុប​ការងារ​​ប្រយុទ្ធ​ប្រឆាំង​គ្រប់​ទម្រង់​នៃ​ការជួញដូ​មនុស្ស ជួញដូរ​កម្លាំង​ពលកម្ម អាជីវកម្ម​ផ្លូវភេទ និង​ល្បែង​ស៊ីសង​គ្រប់​ប្រភេទ ​និង​បាន​ដាក់​ចេញ​នូវ​វិធានការ​មួយ​ចំនួន​។

លោក​បាន​ជំរុញ​ដល់​អាជ្ញាធរ​បន្ត​រុករក​ស្រាវជ្រាវ​ទីតាំង​នានា ​តាម​ពាក្យ​បណ្តឹង​ដែល​​នៅ​សេសសល់​ ឬ​​បណ្តឹង​​ថ្មីៗ​ ឬ​សង្ស័យ​មាន​ការ​ជួញដូរ​មនុស្ស​ ការធ្វើ​ទារុណកម្ម ជួញដូរ​ពលកម្ម​ អាជីវកម្ម​ផ្លូវភេទ ទោះ​​ទីតាំង​នោះ​មាន​អាជ្ញាប័ណ្ណ​ ឬគ្មាន​អាជ្ញាប័ណ្ណ​ក្តី​។​ លោក​ថា៖ ​«អាជ្ញាធរ​ កងកម្លាំង​ត្រូវ​ធ្វើការ​គ្រប់គ្រង​តាមដាន​ត្រួតពិនិត្យ​ជា​ប្រព័ន្ធ ដើម្បី​ធានា​ថា​ ទីតាំង​មុខសញ្ញា​ដែល​ប្រព្រឹត្ត​បទល្មើស​ល្បែង​ភ្នាល់​អនឡាញ​ខុសច្បាប់​មិន​ឱ្យ​កើត​មាន​សា​ជាថ្មី​ ឬ​លួចលាក់​ល្បែង​អនឡាញ​ថ្មីៗ​បន្ថែមទៀ​ត»។

ជាមួយ​គ្នា​នោះ​លោក​ណែនាំ​ឱ្យ​អាជ្ញាធរ​ពង្រឹង​ច្រក​ទ្វារ​ព្រំដែន​សំដៅ​ទប់ស្កាត់​បទល្មើស​នានា​ឆ្លងកាត់​ព្រំដែន​ ពិសេស​សហការ​គ្រប់គ្រង​សន្តិសុខ​ និង​ការ​ចេញ​ចូល​តាម​លម្ហសមុទ្រ​សំដៅ​មិន​ឱ្យ​មាន​ការលបលួច​នាំ​ពលករ​បរទេស​ចូល​តាម​ច្រក​សមុទ្រ​មក​ធ្វើការ​មិន​ស្រប​ច្បាប់​នៅ​កម្ពុជា និង​បទល្មើស​នានា​ក្នុង​លម្ហ​សមុទ្រ​។

សេចក្តី​ប្រកាស​ព័ត៌មាន​របស់​គណៈកម្មាធិការ​ប្រយុទ្ធ​ប្រឆាំង​នឹង​អំពើ​ជួញដូរ​មនុស្ស​កម្ពុជា​ចុះថ្ងៃ​ទី​ ៧ ខែ​តុលា ឆ្នាំ ២០២២ បាន​ឱ្យ​ដឹង​ថា ក្នុង​ប្រតិបត្តិការ​បង្ក្រាប​ល្បែង​ស៊ីសង​ខុស​ច្បាប់​ចាប់​ពីថ្ងៃទី​ ១៧ ខែ​កញ្ញា​មក​បង្ក្រាប​បាន​ ៩ ៦២២ ទីតាំង ក្នុង​នោះ​អនុវត្ត​វិធានការ​ច្បាប់​ ១១៦ ​ទីតាំង​​ និង​បុគ្គល​ចំនួន ២៥៣ នាក់ ត្រូវ​បាន​កសាង​សំណុំ​រឿង​បញ្ជូន​ទៅ​តុលាការ។

ក្នុង​នោះ ​សមត្ថកិច្ច​ចុះ​ត្រួតពិនិត្យ​ជនបរទេស​នៅ​ទីតាំង​ចំនួន​ ១០ ក្នុង​ខេត្ត​ព្រះសីហនុ​រក​ឃើញ​ជនបរទេស​ចំនួន ២ ៧៦០​ ​នាក់​មាន ១៤ សញ្ជាតិ​ក្នុង​នោះ​ជនបរទេស​គ្មាន​បណ្ណការងារ​ចំនួន​ ១ ៥១២​ នាក់ ហើយ​ត្រូវ​​បាន​ផាក​ពិន័យ​មុន​អនុញ្ញាត​ឱ្យ​ចាកចេញ​ពី​ទីតាំង​ក្រុមហ៊ុន​។

ជាមួយ​គ្នា​នេះ​ក្រុម​ការងារ​បាន​រៀបចំ​បែបបទ​បណ្ដេញ​ចេញ​ជនបរទេស​ចំនួន​ ៦ ​៨៥ ​នាក់​មាន​​ ១០​ ​សញ្ជាតិ ​និង​កំពុង​ស្នាក់នៅ​ក្នុង​ទីស្នាក់ការ​ត្រៀម​បណ្តេញ​ចេញ​ចំនួន ​៩២០ នាក់​៕