ភ្នំពេញៈ លោកនាយករដ្ឋមន្ត្រី ហ៊ុន សែន បានដាក់ចេញនូវបទបញ្ជាឱ្យលោក អូន ព័ន្ធមុនីរ័ត្ន រដ្ឋមន្ត្រីស្តីទីក្រសួងកសិកម្ម រុក្ខាប្រមាញ់ និងនេសាទចាត់មន្ត្រីជំនាញក្រសួង ចុះវាយតម្លៃការខូចខាតដំណាំស្រូវ និងដំណាំផ្សេងៗទៀតឱ្យបានឆាប់បំផុតដើម្បីរាជរដ្ឋាភិបាលអាចបញ្ចេញពូជស្រូវឱ្យបានលឿនទៅកាន់គោលដៅដែលខូចខាត បន្ទាប់ពី ឃុំចំនួនជាង ៧០០ បានលិចលង់ ដោយសារជំនន់ទឹកភ្លៀង។
តាមរយៈសារជាសំឡេងបន្ទាប់ពីចាត់តាំងលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជារដ្ឋមន្ត្រីស្តីទីក្រសួងកសិកម្ម លោក ហ៊ុន សែន បានថ្លែងកាលពីយប់ថ្ងៃទី ៨ តុលា ថា ខេត្តចំនួន ២២ ក្រុងស្រុកខណ្ឌចំនួន ៩៦ និង ៧៧០ ឃុំ បានលិចលង់ដោយសារជំនន់ទឹកភ្លៀង ដែលក្នុងនោះក៏បានបង្កឱ្យមានផលប៉ះពាល់ដល់ប្រជាជន ដែលមានស្លាប់ចំនួន ៤ នាក់ក្រៅពីនោះ ក៏មានការជម្លៀសប្រជាជនមកទីទួលសុវត្ថិភាព។ ក្រៅពីការខូចខាតផ្លូវ និងហេដ្ឋារចនាសម្ព័ន្ធមួយចំនួន ក៏មានការប៉ះពាល់ការសិក្សារបស់សិស្ស ដោយសារការលិចសាលារៀន និងការខូចខាតដល់ដំណាំកសិកម្មផងដែរ។
តាមតួលេខដែលបានផ្តល់ដោយលោក គន់ គីម ទេសរដ្ឋមន្ត្រី និងជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ (NCDM) លោកនាយករដ្ឋមន្ត្រី លើកឡើងថា ស្រូវទទួលរងការលិចទឹកមានជាង ១,៥ សែនហិកតា ដំណាំរួមផ្សំដែលបានលិចលង់មានជាង ៤ ម៉ឺនហិកតា ខណៈឥឡូវនេះទឹកនៅកន្លែងខ្លះក៏បានស្រក ហើយនៅកន្លែងខ្លះក៏បានឡើង។
លោក ហ៊ុន សែន បានលើកឡើងពីការព្យាករអាកាសធាតុដែលអាចឱ្យដឹងថា នឹងនៅមានទឹកភ្លៀងមួយចំនួនបន្ថែមទៀត ហើយសភាពការណ៍នៅឯមូលដ្ឋានគឺអាចគ្រប់គ្រងបាន តែអ្វីដែលជាកង្វល់នោះគឺមូលដ្ឋានមួយចំនួនជួបបញ្ហាខ្វះពូជស្រូវឬពូជដំណាំ ដែលទាមទារឱ្យថ្នាក់ជាតិត្រូវអន្តរាគមន៍ជាបន្ទាន់។
លោកថ្លែង៖ «ខ្ញុំព្រះករុណាខ្ញុំ សូមដាក់ចេញបទបញ្ជាទៅឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រីរដ្ឋមន្ត្រីស្តីទីក្រសួងកសិកម្ម រុក្ខាប្រមាញ់និងនេសាទ ចាត់មន្ត្រីជំនាញរបស់ក្រសួង ដែលមានរដ្ឋលេខាធិការអនុរដ្ឋលេខាធិការចុះធ្វើការជាមួយហ្នឹងនឹងខេត្ត ក៏ដូចជាគណៈកម្មការគ្រប់គ្រងគ្រោះមហន្តរាយ ដើម្បីវាយតម្លៃឱ្យបានឆាប់បំផុត តាមដែលអាចធ្វើទៅបាន អំពីការខូចខាតដែលទាក់ទងជាមួយនឹងដំណាំស្រូវ ក៏ដូចជាដំណាំផ្សេងទៀត ដើម្បីរាជរដ្ឋាភិបាលអាចបញ្ចេញយ៉ាងលឿន ទៅកាន់គោលដៅនៃស្រូវដែលត្រូវខូច ដើម្បីឱ្យប្រជាពលរដ្ឋរបស់យើងបានបង្កបង្កើនផលឡើងវិញ»។
លោក ហ៊ុន សែន បានចាត់ទុកថា នេះជាអន្តរាគមន៍ចាំបាច់ ដើម្បីដោះស្រាយបញ្ហានៅចុងរដូវ ព្រោះទឹកមិនទាន់ស្រកអស់នៅឡើយទេ ដោយនៅកន្លែងមួយចំនួន នៅមានលទ្ធភាពអាចធ្វើស្រូវទៅបាន តែកន្លែងមួយចំនួនទៀតមិនអាចធ្វើស្រូវបាននោះ តែក៏អាចជំនួសទៅដោយពូជដំណាំមួយចំនួន ដែលរាជរដ្ឋាភិបាលបានបម្រុងទុក។
លោកអំពាវនាវឱ្យមានកិច្ចសហការជាបន្ទាន់រវាងក្រសួងកសិកម្ម អាជ្ញាធរថ្នាក់ក្រោមជាតិ ក៏ដូចជា NCDM ដោយត្រូវរួមគ្នាវាយតម្លៃផង និងត្រៀមបម្រុង ដើម្បី ដឹកចេញនូវពូជស្រូវ និងពូជដំណាំទៅកាន់គោលដៅផង។ លោកថា នេះជាកិច្ចការបន្ទាន់ដែលចាំបាច់ត្រូវធ្វើដោយមិនត្រូវបណ្ដែតបណ្ដោយឱ្យទឹកស្រកហួសនោះទេព្រោះមិនមានប្រភពទឹកដើម្បីបង្កបង្កើនផលបន្ថែម។
លោក ហ៊ុន សែន រំឭកថា កម្ពុជាមានបទពិសោធរួចមកហើយ បន្ទាប់ពីបានជួបប្រទះនូវបញ្ហានេះ កាលពី ១២ ឆ្នាំមុនគឺក្នុងឆ្នាំ ២០០០។ «ជារួមខ្ញុំព្រះករុណាខ្ញុំ អំពាវនាវឱ្យធ្វើសកម្មភាពជាបន្ទាន់ ដោយបែងចែកមន្ត្រីចុះធ្វើការ ហើយម្ខាងចុះទៅវាយតម្លៃរួមជាមួយខេត្ត និងគណៈកម្មការជាតិគ្រប់គ្រងគ្រោះមហន្តរាយ ដើម្បីវាយតម្លៃពីការខូចខាត និងម្ខាងទៀតត្រៀមរៀបចំពូជដើម្បីបញ្ចេញពីឃ្លាំងស្តុករបស់យើង ដែលស្តុកនៅភ្នំពេញក្តី និងស្តុកនៅតាមខេត្តក្ដី ដើម្បីបញ្ជូនពូជស្រូវទាំងនោះ ឬពូជដំណាំទាំងនោះ ទៅជូនប្រជាជនរបស់យើងដើម្បីដាំដុះសាជាថ្មី។ សូមឯកឧត្តម អូន ព័ន្ធមុនីរ័ត្ន និងឯកឧត្តម គន់ គីម សហការគ្នាដើម្បីធ្វើកិច្ចការងារនេះដើម្បីដោះស្រាយសម្រាប់ប្រជាពលរដ្ឋរបស់យើង»។
លោក គន់ គីម នាថ្ងៃទី ៩ តុលា បានចុះជួបប្រជុំជាមួយអាជ្ញាធរ និងមន្ទីរជំនាញតាមបណ្តាខេត្តជាប់បឹងទន្លេសាប។ ក្នុងកិច្ចប្រជុំជាមួយអាជ្ញាធរខេត្តកំពង់ធំ និងសៀមរាបលោកបានណែនាំដល់មន្ទីរកសិកម្មខេត្ត និងមន្ទីរធនធានទឹក និងឧតុនិយមខេត្តទាំង ២ នេះចាំបាច់ត្រូវសហការគ្នាសិក្សាឱ្យបានហ្មត់ចត់អំពីភូមិសាស្រ្តនីមួយៗដែលត្រូវស្តារឡើងវិញ ក្នុងពេលស្ថានភាពអាកាសធាតុបន្តប្រឈមនិងអាចអូសបន្លាយរងគ្រោះដោយទឹកជំនន់។
លោក អូន ព័ន្ធមុន្នីរ័ត្ន បានចេញសេចក្ដីសម្រេចផ្ទៃក្នុងមួយ នៅថ្ងៃទី ៩ តុលាដើម្បីធានាប្រក្រតីភាព នៃការប្រព្រឹត្តទៅរបស់ក្រសួងកសិកម្មដែលលោកទើបតែទទួលដឹកនាំបន្ទាប់ពី រដ្ឋមន្ត្រីចាស់ត្រូវបានព្រះមហាក្សត្របញ្ចប់តំណែង តាមសំណើរបស់លោកហ៊ុន សែន៕