ភ្នំពេញៈ លោកនាយករដ្ឋមន្ត្រី ហ៊ុន សែន បានទទួលជួប លោក Stefan Anton Messerer ឯកអគ្គរដ្ឋទូតអាល្លឺម៉ង់ថ្មីប្រចាំកម្ពុជា នៅវិមានសន្តិភាព កាលពីថ្ងៃទី ១០ ខែតុលា ឆ្នាំ ២០២២ ដើម្បីពិភាក្សាលើកិច្ចសហប្រតិបត្តិការ និងជំរុញទំនាក់ទំនងទ្វេភាគីលើការអភិវឌ្ឍនៅកម្ពុជាឱ្យកាន់តែរីកចម្រើន។
លោក អ៊ាង សុផល្លែត ជំនួយការលោកនាយករដ្ឋមន្ត្រី ហ៊ុន សែន ប្រាប់អ្នកសារព័ត៌មានក្រោយជំនួបនេះថា លោក Stefan បានគោរពសម្ដែងនូវការរីករាយដែលបានមកបំពេញបេសកកម្មការទូតនៅកម្ពុជាតាមបំណងរបស់លោក ហើយលោកក៏បានសម្ដែងនូវការអបអរសាទរជូនចំពោះលោក ហ៊ុន សែន ដែលបានដឹកនាំកម្ពុជាឱ្យមានការអភិវឌ្ឍយ៉ាងឆាប់រហ័ស។
លោកបញ្ជាក់ថា៖ «ក្នុងបេសកកម្មការទូតនេះ ឯកឧត្តម Stefan នឹងប្រឹងប្រែងឱ្យអស់ពីសមត្ថភាព ធ្វើយ៉ាងណាជំរុញទំនាក់ទំនងរវាងប្រទេសទាំង ២ ជំរុញកិច្ចសហប្រតិបត្តិការរវាងប្រទេសទាំង ២ ជាពិសេស នឹងប្រឹងប្រែងជំរុញឲ្យមានការវិនិយោគកាន់តែខ្លាំងឡើងមកកាន់កម្ពុជា»។
លោក អ៊ាង សុផល្លែត ថ្លែងថា នៅក្នុងកិច្ចពិភាក្សានោះ លោក Stefan បានវាយតម្លៃខ្ពស់ចំពោះការសម្រេចចិត្តរបស់កម្ពុជា ប្រឆាំងនឹងការឈ្លានពានរបស់រុស្ស៊ី មកលើប្រទេសអ៊ុយក្រែន និងបានសម្ដែងនូវការវាយតម្លៃខ្ពស់ផងដែរ ចំពោះការចូលរួមដោយផ្ទាល់របស់លោក ហ៊ុន សែន ចំពោះការជួយស្វែងរកដំណោះស្រាយនៅប្រទេសមីយ៉ាន់ម៉ា។
លោក សុផល្លែត ថ្លែងថា លោក ហ៊ុន សែន បានស្វាគមន៍និងសម្ដែងនូវការអបអរសាទរចំពោះលោក Stefan ដែលត្រូវបានតែងតាំងជាឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋសហព័ន្ធអាល្លឺម៉ង់ ប្រចាំកម្ពុជា។
លោកបានថ្លែងថា លោកនាយករដ្ឋមន្ត្រី បានថ្លែងអំណរគុណចំពោះប្រជាជន និងរដ្ឋាភិបាលអាល្លឺម៉ង់ ដែលបានជួយដល់កម្ពុជារាល់ការអភិវឌ្ឍដែល មិនអាចកាត់ផ្ដាច់ជំនួយរបស់ប្រទេសអាល្លឺម៉ង់ទេ ជាពិសេស ថ្មីៗនេះ ជំនួយរបស់អាល្លឺម៉ង់ បានជួយកម្ពុជាយើងក្នុងការទប់ស្កាត់ការរីករាលដាលនៃជំងឺកូវីដ ១៩។
លោក អ៊ាង សុផល្លែត ថ្លែងថា លោកហ៊ុន សែន បានលើកឡើងថា ការឈ្លានពានរបស់រុស្ស៊ី ទៅលើប្រទេសអ៊ុយក្រែន គឺជារឿងមួយ តែករណីដាក់ទណ្ឌកម្មហួសហេតុពេកចំពោះរុស្ស៊ីធ្វើឱ្យមានការប៉ះពាល់មិនត្រឹមតែរុស្ស៊ី និងអឺរ៉ុបទេ គឺថែមទាំងប៉ះពាល់ដល់ពិភពលោកទាំងមូលផង ក្នុងនោះ ក៏រួមទាំងកម្ពុជាផងដែរ។ លោកថា ចំពោះករណីនេះ គប្បីណាមានការពិនិត្យមើលឡើងវិញ។
លោក សុផល្លែត ថ្លែងថា ចំពោះករណីប្រទេសមីយ៉ាន់ម៉ាវិញ លោក ហ៊ុន សែន បញ្ជាក់ថា រាល់ការប្រឹងប្រែងទាំងអស់របស់កម្ពុជាគឺដើម្បីសេចក្ដីសុខសន្តិភាពសម្រាប់ប្រជាជនមីយ៉ាន់ម៉ាផង សម្រាប់តំបន់ផងនិងពិភពលោកផង។ លោក ហ៊ុន សែន ថ្លែងទៅកាន់លោក Stefan ថា ដំណើរទស្សនកិច្ចរបស់លោកផ្ទាល់ ទៅកាន់ប្រទេសមីយ៉ាន់ម៉ាគឺដើម្បីជំរុញឱ្យមានការឈប់បាញ់គ្នា ចង់ឱ្យមានការជួយផ្ដល់ជំនួយមនុស្សធម៌ទៅដល់ប្រជាជនមីយ៉ាន់ម៉ា ដែលកំពុងតែត្រូវការ និងជំរុញឱ្យមានកិច្ចពិភាក្សាគ្នាផ្នែកនយោបាយ តែពុំទទួលបានជោគជ័យ ប៉ុន្តែត្រូវតែមានការអត់ធ្មត់និងប្រឹងប្រែងបន្តទៀត។
បើយោងតាមក្រសួងសេដ្ឋកិច្ច និងហិរញ្ញវត្ថុក្នុងរយៈពេលប្រមាណ ៣០ ឆ្នាំ នេះប្រទេសអាល្លឺម៉ង់ គឺជាដៃគូអភិវឌ្ឍន៍ដ៏សំខាន់ដែលបានសន្យាផ្តល់ហិរញ្ញប្បទានឥតសំណងច្រើនជាងគេដល់កម្ពុជាបើប្រៀបធៀបនឹងបណ្តាប្រទេសជាសមាជិកសហភាពអឺរ៉ុបដទៃទៀត។
គិតចាប់ពីឆ្នាំ ១៩៩២ ដល់ដំណាច់ឆ្នាំ ២០២១ រដ្ឋាភិបាលសាធារណរដ្ឋសហព័ន្ធអាល្លឺម៉ង់បានផ្ដល់ហិរញ្ញប្បទានសហប្រតិបត្តិការដល់កម្ពុជាប្រមាណ ៧២០ លានដុល្លារអាមេរិក ក្នុងនោះឥណទានសម្បទាន ៧០ លានដុល្លារ និងហិរញ្ញប្បទានឥតសំណងចំនួន ៦៥០ លានដុល្លារ៕