.jpg)
សមាជិក គជប ប្រជុំស្តីពីកិច្ចការសន្តិសុខសម្រាប់ការចុះឈ្មោះបោះឆ្នោត ជាមួយស្ថាប័នពាក់ព័ន្ធ នាថ្ងៃទី១០ តុលា។ រូបថត ហុង មិនា
ភ្នំពេញៈ គណៈកម្មាធិការជាតិរៀបចំការបោះឆ្នោត (គជប) ស្នើឱ្យអាជ្ញាធរគ្រប់លំដាប់ថ្នាក់ដែលទទួលខុសត្រូវការងារសន្តិសុខ សណ្តាប់ធ្នាប់សាធារណៈ និងវិស័យការងារឯទៀត ត្រូវផ្តល់កិច្ចសហប្រតិបត្តិការដល់ គ.ជ.ប. និងគណៈកម្មការរៀបចំការបោះឆ្នោតគ្រប់លំដាប់ថ្នាក់ ដើម្បីរក្សាសុវត្ថិភាព សន្តិសុខ សណ្តាប់ធ្នាប់សាធារណៈ របៀបរៀបរយ សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត ដែលនឹងចាប់ផ្ដើមពីថ្ងៃទី ២០ ខែតុលា រហូតដល់ថ្ងៃទី ៨ ខែធ្នូ ឆ្នាំ ២០២២។
ក្នុងកិច្ចប្រជុំជាមួយភាគីពាក់ព័ន្ធ ដើម្បីផ្សព្វផ្សាយលើផែនការចំនួន ៣ រួមមាន ការងារសន្ដិសុខសម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត វិធានការបង្ការ និងទប់ស្កាត់ការរីករាលដាលនៃជំងឺកូវីដ ១៩ នៅតាមការិយាល័យចុះឈ្មោះបោះឆ្នោត និងការចុះឈ្មោះភ្នាក់ងារគណបក្សនយោបាយ។
លោកឌឹម សុណ្ណារុំ សមាជិក គ.ជ.ប.ថ្លែងថា ដើម្បីសម្រេចបានវត្ថុបំណងដ៏មានសារៈសំខាន់នេះ ក្រសួងមហាផ្ទៃ ក្រសួងការពារជាតិ និង គ.ជ.ប. បានដាក់ចេញផែនការអន្តរស្ថាប័នលេខ ០១០ ផ.ក ចុះថ្ងៃទី ២៥ ខែតុលា ឆ្នាំ ២០២១ ស្តីពីកិច្ចការពារការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ និងការបោះឆ្នោតថ្នាក់ជាតិ-ថ្នាក់ក្រោមជាតិចាប់ពីឆ្នាំ ២០២២ ដល់ឆ្នាំ ២០២៤។
លោកបញ្ជាក់ថា ក្នុងផែនការអន្តរស្ថាប័ននេះ បានឆ្លុះបញ្ចាំងនូវផែនការ ក៏ដូចជាយន្តការ ការពារការពិនិត្យបញ្ជីឈ្មោះ និងការចុះឈ្មោះបោះឆ្នោត និងដំណាក់កាលសំខាន់ៗឯទៀតក្នុងដំណើរការរៀបចំការបោះឆ្នោត។
លោកបន្តថា មុខសញ្ញាដែលត្រូវការពារ រួមមាន សមាជិក គ.ជ.ប. និងមន្ត្រីបោះឆ្នោតគ្រប់លំដាប់ថ្នាក់ ក្រុមចុះឈ្មោះបោះឆ្នោត និងក្រុមប្រឹក្សាឃុំ-សង្កាត់ ប្រជាពលរដ្ឋទៅពិនិត្យបញ្ជីឈ្មោះ និងចុះឈ្មោះបោះឆ្នោត និងអ្នកសង្កេតការណ៍បោះឆ្នោត នៃសមាគម និងអង្គការមិនមែនរដ្ឋាភិបាលជាតិ អន្តរជាតិ តំណាង ឬភ្នាក់ងារគណបក្សនយោបាយ ដែលទទួលបានការអនុញ្ញាតពី គ.ជ.ប.។
ដោយឡែក គោលដៅការពារជាអាទិភាព រួមមាន ទីស្តីការ គ.ជ.ប. និងទីស្នាក់ការ លធ.ខប។ ការិយាល័យពិនិត្យបញ្ជីឈ្មោះ និងចុះឈ្មោះបោះឆ្នោត និងកន្លែងរក្សាទុក ឬការដឹកជញ្ជូនសម្ភារ បរិក្ខារ និងសង្ហារិមបម្រើឱ្យការពិនិត្យបញ្ជីឈ្មោះ និងចុះឈ្មោះបោះឆ្នោតពីគោលដៅ ១ ទៅគោលដៅ ១ ដែលកំណត់ដោយ គ.ជ.ប. ឬគណៈកម្មការរៀបចំការបោះឆ្នោតគ្រប់លំដាប់ថ្នាក់។
បើតាមលោក ឌឹម សុវណ្ណារុំ គណៈអភិបាលរាជធានី-ខេត្ត ដែលជាគណៈបញ្ជាការឯកភាពរដ្ឋបាលដែលមានស្រាប់ ត្រូវបានកំណត់ជាយន្តការ និងរចនាសម្ព័ន្ធសន្តិសុខបោះឆ្នោតថ្នាក់រាជធានី-ខេត្ត ដើម្បីការពារការរៀបចំ ការពិនិត្យបញ្ជីឈ្មោះ និងការចុះឈ្មោះបោះឆ្នោត ដោយបំពេញមុខងារតាមឋានៈ តួនាទី និងការទទួលខុសត្រូវក្នុងសមត្ថកិច្ចដែនដី នៃរាជធានី-ខេត្តរៀងៗខ្លួន។ គណៈបញ្ជាការឯកភាពរដ្ឋបាលរាជធានី-ខេត្តដែលមានស្នងការនគរបាលរាជធានី-ខេត្ត ធ្វើជាសេនាធិការ ត្រូវគ្រប់គ្រង ដឹកនាំ និងបញ្ជាគ្រប់យន្តការ និងរចនាសម្ព័ន្ធក្រោមឱវាទរាជធានី-ខេត្ត ដោយសហការត្រួតពិនិត្យលើការងាររៀបចំចាត់តាំងភ្នាក់ងារសន្តិសុខបោះឆ្នោតឱ្យបានត្រឹមត្រូវតាមផែនការដែលបានកំណត់។
លោកថ្លែងថា៖ «ក្រៅពីផែនការអន្តរស្ថាប័នដែលខ្ញុំបានជម្រាបជូន គ.ជ.ប. ក៏បានស្នើសុំបន្តកិច្ចសហការពីអគ្គស្នងការនគរបាលជាតិ ដើម្បីឱ្យដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២២នេះប្រព្រឹត្តទៅក្នុងបរិយាកាសសន្ដិសុខល្អប្រសើរ ធានាបាននូវសណ្ដាប់ធ្នាប់ របៀបរៀបរយ និងសុវត្ថិភាពសង្គម ចៀសផុតពីការរំខានអុកឡុក ការបំភិតបំភ័យ ការគំរាមកំហែង និងគ្មានអំពើហិង្សាផ្សេងៗ»។
លោក ទេព នីថា អគ្គលេខាធិការ គ.ជ.ប. ថ្លែងថា សម្រាប់ការការពារសន្តិសុខ សុវត្ថិភាព និងសណ្តាប់ធ្នាប់ក្នុងអំឡុងពេលការពិនិត្យបញ្ជីឈ្មោះ និងចុះឈ្មោះបោះឆ្នោត និងការបោះឆ្នោត ត្រូវបានអនុវត្តចាប់ពីពេលនេះ ដែលកិច្ចការនេះ ត្រូវបាន គ.ជ.ប.សហការជាមួយក្រសួងមហាផ្ទៃ និងក្រសួងការពារជាតិ។ ដោយឡែក សម្រាប់ការការពារសន្តិសុខ សុវត្ថិភាព និងសណ្តាប់ធ្នាប់ក្នុងអំឡុងពេលការពិនិត្យបញ្ជីឈ្មោះ និងចុះឈ្មោះបោះឆ្នោត អាស្រ័យទៅលើឃុំ-សង្កាត់នីមួយៗ រៀបចំ ព្រោះកម្មវិធីពិនិត្យបញ្ជី និងចុះឈ្មោះបោះឆ្នោតនេះ ធ្វើឡើងនៅតាមឃុំ-សង្កាត់នោះ។
លោកថា មួយវិញទៀត ឃុំ-សង្កាត់នីមួយៗ ក៏មានកម្មវិធីរបស់ខ្លួនក្នុងការចុះឈ្មោះប្រជាពលរដ្ឋនៅតាមភូមិមួយចំនួនក្នុងឃុំ-សង្កាត់នោះ។ដូច្នេះ ការពិនិត្យឈ្មោះ និងការចុះឈ្មោះអ្នកបោះឆ្នោតនេះ គឺ គ.ជ.ប. ប្រើប្រាស់កម្លាំងសន្តិសុខ នគរបាល និងប្រជាការពារភូមិនៅទីនោះ ជាអ្នកការពារសុវត្ថិភាព។ រីឯចំនួនទៀតសោត ក៏មិនត្រូវបានកំណត់ដែរ អាស្រ័យលើក្រុមប្រឹក្សាឃុំ-សង្កាត់ និងលេខាធិការដ្ឋានរាជធានី-ខេត្តរៀបចំការបោះឆ្នោត ជាអ្នករៀបចំ។
លោកថ្លែងថា៖ «នៅពេលដែលគាត់ចុះចល័តទៅតាមភូមិ នឹងមានកម្លាំងការពារចំនួនពី ២ រូប ទៅ ៣ ទៅតាមផងដែរ និងទៅតាមស្ថានភាពផងដែរ។ ប៉ុន្តែឥឡូវនេះ មានបញ្ហាសម្រាប់យើង គឺមានឃុំ-សង្កាត់មួយចំនួន ត្រូវបានទឹកជំនន់លិច យើងកំពុងសិក្សាឡើងវិញ ឱ្យពិនិត្យមើលស្ថានភាពនៅថ្ងៃទី ២០ ខាងមុខហ្នឹង អាចរកទីទួលមានសុវត្ថិភាព ដើម្បីការងារនេះ។ ដូច្នេះ ទីតាំងដែលមិនជាកន្លែងនៅឃុំ-សង្កាត់ កម្លាំងការពារ នឹងត្រូវបន្ថែម អាស្រ័យលើស្ថានភាពជាក់ស្តែង»។
លោក យ៉ូវ សេងគុណ នាយករដ្ឋបាល និងជាអ្នកនាំពាក្យរដ្ឋបាលខេត្តកំពង់ធំ ប្រាប់ ភ្នំពេញ ប៉ុស្តិ៍ នៅថ្ងៃទី ១០ ខែតុលាថា កន្លងមកនេះ គជប បានស្នើមករដ្ឋបាលខេត្ត ដើម្បីជួយសហការ និងសម្របសម្រួល ជាពិសេសការពារសុវត្ថិភាព សន្តិសុខ និងសណ្តាប់ធ្នាប់ក្នុងពេលពិនិត្យបញ្ជីឈ្មោះ និងការចុះឈ្មោះបោះឆ្នោត។ ជាមួយគ្នានេះរដ្ឋបាលខេត្តបានឆ្លើយតប និងបានធ្វើលិខិតណែនាំបន្តទៅរដ្ឋបាលក្រុង-ស្រុក និងបន្តទៅឃុំ-សង្កាត់ ឱ្យមានការសហការ និងសម្របសម្រួលជាមួយមន្ត្រីគជប និងប្រជាពលរដ្ឋទៅពិនិត្យបញ្ជីឈ្មោះ និងចុះឈ្មោះបោះឆ្នោតផងដែរ។
លោកថ្លែងថា៖ «នៅក្នុងគណៈបញ្ជាការខេត្ត ឯកឧត្តមអភិបាលខេត្ត ក៏បានឱ្យរដ្ឋបាលក្រុង-ស្រុក ឱ្យយកចិត្តចិត្តទុកដាក់ក្នុងការធ្វើកិច្ចការនេះផងដែរ ដើម្បីធ្វើយ៉ាងណា ឱ្យដំណើរការនេះប្រព្រឹត្តទៅដោយរលូន និងទទួលបានជោគជ័យ។ មួយវិញទៀត សម្រាប់កម្លាំងការពារ គឺអាស្រ័យទៅតាមស្ថានភាពជាក់ស្តែងនៅក្នុងឃុំ-សង្កាត់ និងក្រុង-ស្រុកនីមួយៗ ជាអ្នកចាត់ចែងក្នុងការការពារនេះ»។
បើតាម គជប តាមប្រតិទិននៃការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ ២០២២ បញ្ជីបោះឆ្នោតផ្លូវការ ឆ្នាំ ២០២១ (បញ្ជីបោះឆ្នោតចុងក្រោយ) និងបញ្ជីឈ្មោះទីតាំងការិយាល័យចុះឈ្មោះបោះឆ្នោត និងការិយាល័យបោះឆ្នោត សម្រាប់បម្រើឱ្យការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ ២០២២ ត្រូវបានបិទផ្សាយជាសាធារណៈនៅតាមបណ្ដាឃុំ-សង្កាត់ទូទាំងប្រទេស នៅថ្ងៃទី ១០ ខែតុលា ឆ្នាំ ២០២២៕
