.jpg)
លោក ឌិត ទីណា ដែលត្រូវបានលោកនាយករដ្ឋមន្ត្រី ហ៊ុន សែន ស្នើរដ្ឋសភាបោះឆ្នោតផ្តល់សេចក្ដីទុកចិត្ត ជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។ រូប ហ្វេសប៊ុក
ភ្នំពេញៈ លោកនាយករដ្ឋមន្ត្រី ហ៊ុន សែន ស្នើប្រធានរដ្ឋសភា លោក ហេង សំរិន រៀបចំការបោះឆ្នោតផ្តល់សេចក្តីទុកចិត្តរបស់រដ្ឋសភាដល់លោក ឌិត ទីណា ដែលជារដ្ឋលេខាធិការក្រសួងរ៉ែ និងថាមពល ជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទថ្មី ដែលត្រូវជំនួសលោក វេង សាខុន រដ្ឋមន្ត្រីក្រសួងកសិកម្ម ដែលទើប ត្រូវបានបញ្ចប់មុខតំណែង។
ក្នុងលិខិតទៅកាន់លោក ហេង សំរិន ដែល ភ្នំពេញ ប៉ុស្តិ៍ ទទួលបាន នាថ្ងៃទី ១០ ខែតុលា លោក ហ៊ុន សែន បញ្ជាក់ថា៖ «ខ្ញុំសូមស្នើសម្តេចប្រធានរដ្ឋសភា មេត្តាអនុញ្ញាតរៀបចំការបោះឆ្នោតផ្តល់សេចក្តីទុកចិត្តរបស់រដ្ឋសភា លើការបំពេញបន្ថែមសមាសភាពសមាជិកនៃរាជរដ្ឋាភិបាលដល់ឯកឧត្តម ឌិត ទីណា ជារដ្ឋមន្ត្រីក្រសួង កសិកម្ម រុក្ខាប្រមាញ់ និងនេសាទ»។
ការស្នើនេះ លោកនាយករដ្ឋមន្ត្រី ហ៊ុន សែន បានយោងតាមរដ្ឋធម្មនុញ្ញកម្ពុជា ច្បាប់ស្តីពីការរៀបចំ និងការប្រព្រឹត្តទៅនៃគណៈរដ្ឋមន្ត្រី ព្រមទាំងព្រះរាជក្រឹត្យស្តីពីការចាត់តាំងនាយករដ្ឋមន្ត្រីកម្ពុជា និងដោយយោងតាមតម្រូវការចាំបាច់របស់រាជរដ្ឋាភិបាល ក្នុងនាមជានាយករដ្ឋមន្ត្រីកម្ពុជា។
លោក ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភាកម្ពុជា មិនអាចទាក់ទង ដើម្បីសុំការបញ្ជាក់បន្ថែមបានទេ កាលពីថ្ងៃទី ១០ ខែតុលា។
លោក ផៃ ស៊ីផាន អ្នកនាំពាក្យរាជរដ្ឋាភិបាលប្រាប់ ភ្នំពេញ ប៉ុស្តិ៍ថា លោកមិនទទួលបានលិខិតផ្លូវការណាមួយនៅឡើយទេ ព្រោះការតែងតាំងនេះ គឺជាភារកិច្ចគណៈអចិន្រៃ្តយ៍របស់រាជរដ្ឋាភិបាល ដែលគណៈអចិន្រៃ្តយ៍នេះ មានឧបនាយករដ្ឋមន្ត្រីដែលមានភារកិច្ចក្នុងការធ្វើកិច្ចការទាំងអស់នេះ។
ទោះយ៉ាងណា លោកបន្តថា ចំពោះការតែងតាំងលោក ឌិត ទីណា នេះ គឺពិតជាស័ក្តិសមពីព្រោះលោកមានគុណវុឌ្ឍិខ្ពស់ព្រោះ លោកបានបញ្ចប់ការសិក្សាមកពីក្រៅប្រទេស ដែលធ្វើឱ្យគណៈកម្មការក្នុងការតែងតាំងពិនិត្យលើបញ្ហាទាំងអស់នេះ។ ក្រៅពីនេះក៏ដើម្បីដាក់បញ្ចូលយុវជនដែលមានចំណេះដឹងគ្រប់គ្រាន់សម្រាប់ជាការបន្តវេនផងដែរ។
លោកបានថ្លែងថា៖ «បន្ទាប់ពីនិយាយពីគុណវុឌ្ឍិ ក៏និយាយពីអ្នកដែលមានចំណេះខ្ពស់មកពីក្រៅប្រទេសដែរ។ ចំពោះរដ្ឋាភិបាលយើងកំពុងធ្វើការអភិវឌ្ឍទៅជារដ្ឋាភិបាលវ័យក្មេង។ បើនិយាយពីជំនាន់ខ្ញុំ វាខ្ទង់ ៧០ ឬ ៨០ អស់ហើយ ដូច្នេះត្រូវដាក់អ្នកបន្តវេនហ្នឹងហើយ ដែលជាគោលនយោបាយរបស់សម្តេចតេជោ ហ៊ុន សែន»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា សម្តែងក្តីសង្សឹមថា រដ្ឋមន្ត្រីថ្មីនេះ ពិតជាស័ក្តិសមហើយ ព្រោះក្នុងការផ្លាស់ប្តូរសមាជិករដ្ឋាភិបាល គឺមិនអាចផ្លាស់ប្តូរអ្នកដែលមិនមានគុណវុឌ្ឍិគ្រប់គ្រាន់នោះទេ ហើយថា តួនាទីថ្មីរបស់រដ្ឋមន្ត្រីថ្មីនេះ នឹងធ្វើឱ្យវិស័យកសិកម្មរបស់ប្រទេសកម្ពុជាកាន់តែមានការរីកចម្រើន។
លោកប្រាប់ថា៖ «អ្វីដែលប្រជាពលរដ្ឋសង្ឃឹមចង់បានខ្លាំងនោះ គឺធ្វើម៉េចឱ្យកសិករមានទីផ្សារកសិផលរបស់គាត់។ ធ្វើម៉េចឱ្យប្រជាពលរដ្ឋមានបច្ចេកទេសកសិកម្ម មានពូជដំណាំគ្រប់គ្រាន់ មានទឹកធ្វើស្រែគ្រប់រដូវ គួរតែកុំឱ្យស្ថិតក្នុងស្ថានភាពកសិកម្មតាមបែបយថាផលយូរអង្វែងពេក ព្រោះប្រទេសយើងប្រទេសកសិកម្ម វាគួរតែកសិកម្មហ្នឹងវាជឿនលឿនឡើង»។
ព្រះមហាក្សត្រ កាលពីថ្ងៃទី ៨ ខែតុលា បានចេញព្រះរាជក្រឹត្យបញ្ចប់មុខតំណែងលោក វេង សាខុន ពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ តាមសំណើរបស់លោកនាយករដ្ឋមន្ត្រី ហ៊ុន សែន។ លោក ហ៊ុន សែន ក៏បានចាត់តាំងលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជារដ្ឋមន្ត្រីស្តីទីនៃក្រសួងកសិកម្ម រុក្ខាប្រមាញ់ និងនេសាទ បន្ថែមលើមុខងារ បច្ចុប្បន្ន រហូតដល់មានការតែងតាំងជាផ្លូវការនូវរដ្ឋមន្ត្រីក្រសួងកសិកម្ម។
ទាក់ទងនឹងការបញ្ចប់មុខតំណែង និងតែងតាំងសមាជិករដ្ឋាភិបាលនេះ ក្នុងពិធីបិទសន្និបាតកាយរឹទ្ធិជាតិកម្ពុជាអាណត្តិទី៤ កាលពីថ្ងៃទី ១០ ខែតុលា លោក ហ៊ុន សែន បានពន្យល់ថា មាត្រា ២១ នៃរដ្ឋធម្មនុញ្ញចង្អុលបង្ហាញថា ព្រះមហាក្សត្រគឺទ្រង់នឹងឡាយព្រះហស្តលេខាដើម្បីបញ្ចប់មុខតំណែង ឬតែងតាំងសម្រាប់អង្គនីតិប្រតិបត្តិតាមសំណើគណៈរដ្ឋមន្ត្រី និងសម្រាប់អង្គតុលាការតាមរយៈសំណើរបស់ឧត្តមក្រុមប្រឹក្សានៃអង្គចៅក្រម។
លោកនាយករដ្ឋមន្ត្រីបានបន្ថែមថា ប៉ុន្តែច្បាប់ស្តីពីការរៀបចំ និងការប្រព្រឹត្តទៅនៃគណៈរដ្ឋមន្ត្រី ចង្អុលត្រង់តែម្តង គឺនាយករដ្ឋមន្ត្រីលើកសំណើថ្វាយព្រះមហាក្សត្រ ដើម្បីបញ្ចប់មុខតំណែងសមាជិករដ្ឋាភិបាល។
ឆ្លើយតបទៅនឹងអ្នករិះគន់ លោកបានបញ្ជាក់ថា៖ «នៅពេលដែលយើងធ្វើសកម្មភាពមួយត្រូវតាមរដ្ឋធម្មនុញ្ញ ត្រូវតាមច្បាប់ វាថាយើងរំលោភលើមាត្រា ១១៩ នៃរដ្ឋធម្មនុញ្ញ។ មាត្រា ១១៩ និយាយពីការតែងតាំងរដ្ឋាភិបាលទេណា អត់មាននិយាយរឿងដកទេណា សូមបញ្ជាក់។ មើលឱ្យច្បាស់»៕
