.jpg)
រថយន្តធ្វើដំណើរលើផ្លូវល្បឿនលឿនពីថ្ងៃទី១ ខែតុលា ឆ្នាំ២០២២។ រយៈពេល ៩ ថ្ងៃនៃការដាក់ឱ្យដំណើរការសាកល្បងប្រើប្រាស់ផ្លូវល្បឿនលឿន មានយានយន្តជាង ១០ ម៉ឺនគ្រឿងបានធ្វើដំណើរឆ្លងកាត់។ រូប ក្រសួងសាធារណការ
ភ្នំពេញៈ រយៈពេល ៩ ថ្ងៃ នៃការដាក់ឱ្យដំណើរការសាកល្បងប្រើប្រាស់ផ្លូវល្បឿនលឿន មានយានយន្តជាង ១០ ម៉ឺនគ្រឿងបានធ្វើដំណើរឆ្លងកាត់ ដែលមន្ត្រីអះអាងថា សកម្មភាពបើកបរលើផ្លូវ ១ ខ្សែនេះមានការកើនឡើងជាបន្តបន្ទាប់ ដែលនាំឱ្យខេត្តព្រះសីហនុមានកំណើនភ្ញៀវទេសចរដល់ជាង ១០ ម៉ឺននាក់ នៅថ្ងៃចុងសប្តាហ៍។
កាលពីថ្ងៃទី ៩ ខែតុលា រដ្ឋបាលខេត្តព្រះសីហនុបានប្រកាសថា ភ្ញៀវទេសចរជាតិ និងអន្តរជាតិបានមកលេងកម្សាន្ត ក្នុងក្រុងព្រះសីហនុនៅចុងសប្ដាហ៍ (សៅរ៍-អាទិត្យ) មានប្រមាណ ១១០ ០០០ នាក់។
កំណើនភ្ញៀវទេសចរនេះ ក្រោយមានការដាក់ឱ្យដំណើរការសាកល្បងផ្លូវល្បឿនលឿនភ្នំពេញ-ព្រះសីហនុ ចាប់ពីថ្ងៃទី ១ តុលាមក ដោយមិនមានការបង់ប្រាក់ ខណៈការអភិវឌ្ឍហេដ្ឋារចនាសម្ព័ន្ធ ការរៀបចំការពារសន្តិសុខ សណ្តាប់ធ្នាប់ អនាម័យ បរិស្ថានបានយ៉ាងល្អប្រសើរ ដែលជាការទាក់ទាញភ្ញៀវទេសចរជាតិ និងអន្តរជាតិចង់មកកម្សាន្តក្នុងខេត្តព្រះសីហនុ។ នេះបើតាមការអះអាងរបស់លោក ឡុង ឌីម៉ង់ អភិបាលរងខេត្តព្រះសីហនុ។
លោក ឡុង ឌីម៉ង់ បានប្រាប់ភ្នំពេញប៉ុស្តិ៍នៅថ្ងៃទី ១០ តុលាថា៖ «មានការចាប់អារម្មណ៍ច្រើនពីសំណាក់ប្រជាពលរដ្ឋយើង ជាពិសេសម្នាក់ៗមាននិន្នាការចង់ស្គាល់ ឬចង់សាកល្បងផ្លូវល្បឿនលឿន ដែលធ្វើឱ្យពួកគាត់បន្តដំណើរហួសមកដល់ខេត្តព្រះសីហនុ។ ឃើញថា ពលរដ្ឋមានការសប្បាយចិត្តនឹងធ្វើដំណើរតាមផ្លូវនេះ ទេសភាពក៏ស្រស់ស្អាត សុវត្ថិភាពក្នុងការធ្វើដំណើរក៏ល្អទៀត ធ្វើឱ្យការធ្វើដំណើរមកខេត្តព្រះសីហនុកាន់តែលឿន»។
លោក ឡុង ឌីម៉ង់ បានអះអាងថា កំណើនភ្ញៀវទេសចរកើនដល់ជាង ១០ ម៉ឺននាក់បែបនេះគឺមិនធ្លាប់មាននោះទេ សម្រាប់ថ្ងៃធម្មតា ព្រោះកន្លងមកកំណើនភ្ញៀវទេសចរកើនបែបនេះ គឺមានសម្រាប់តែថ្ងៃឈប់សម្រាកក្នុងឱកាសបុណ្យជាតិធំៗតែប៉ុណ្ណោះ។ បន្ថែមពីកំណើនភ្ញៀវទេសចរនេះ លោកនិយាយថា រដ្ឋបាលខេត្តបានណែនាំដល់មន្ត្រីជំនាញ និងមន្ទីរស្ថាប័នទាំងអស់ឱ្យយកចិត្តទុកដាក់បន្ថែមទៀតក្នុងការការពារសុវត្ថិភាពដល់ប្រជាពលរដ្ឋ ដែលមកកម្សាន្តនៅក្នុងខេត្តព្រះសីហនុ។
ផ្លូវល្បឿនលឿនដែលទើបបើកឱ្យដំណើរការសាកល្បង។ រូបថត ក្រសួងសាធារណការ
លោកបានបញ្ជាក់ថា៖ «និន្នាការខុសគ្នានេះ គឺខុសគ្នាដាច់តែម្តង ព្រោះកន្លងមកយើងទទួលភ្ញៀវចាប់ពី ១០ ម៉ឺននាក់ឡើងទៅ ច្រើនតែជាថ្ងៃឈប់សម្រាកបុណ្យជាតិធំៗ។ ដោយឡែកថ្ងៃចុងសប្តាហ៍ធម្មតាបែបនេះ មិនដែលមានកំណើនបែបហ្នឹងទេ។ នេះគឺជានិន្នាការមួយថ្មី បន្ទាប់ពីផ្លូវល្បឿនលឿនយើងបានដាក់ដំណើរការជាសាធារណៈ ទោះជាក្នុងពេលបណ្តោះអាសន្នមិនយកកម្រៃ តែឃើញពលរដ្ឋយើងសប្បាយរីករាយ»។
ផ្លូវល្បឿនលឿនភ្នំពេញ-ព្រះសីហនុ ត្រូវបានក្រសួងសាធារណការ និងដឹកជញ្ជូនប្រកាសបើកដំណើរការសាកល្បងដោយឥតគិតថ្លៃចាប់ពីថ្ងៃទី ១ ដល់ថ្ងៃទី ៣១ ខែតុលា ដោយអ្នកដំណើរអាចចំណាយពេលប្រមាណ ២ ម៉ោងប៉ុណ្ណោះពីរាជធានីភ្នំពេញទៅក្រុងព្រះសីហនុ ដែលខុសពីកន្លងមកត្រូវចំណាយពេលពី ៥ ទៅ ៦ ម៉ោងតាមផ្លូវជាតិលេខ ៤។
លោក ហ៊ាង សុធាយុត្តិ អ្នកនាំពាក្យក្រសួងសាធារណការបានប្រាប់ភ្នំពេញប៉ុស្តិ៍ នៅថ្ងៃទី ១០ តុលាថា គិតចាប់ពីថ្ងៃទី ១ ដល់ថ្ងៃទី ៩ តុលា មានយានយន្តជាង ១០ ម៉ឺនគ្រឿងបានចូលប្រើប្រាស់លើផ្លូវល្បឿន-លឿនដោយក្នុង ១ ថ្ងៃៗមានកំណើនចាប់ពី ៩ ០០០ គ្រឿង ដល់ជាង ១៦ ០០០ គ្រឿង។
លោកថា ការប្រើប្រាស់ផ្លូវល្បឿន-លឿននេះគឺបន្តមានកំណើនទៅមុខជាមួយនឹងការចង់សាកល្បង រួមទាំងការចង់ធ្វើដំណើរបង្ហួសទៅទស្សនាខេត្តព្រះសីហនុផងដែរ។
លោកបានបញ្ជាក់ថា៖ «ចំពោះបញ្ហាវិញកាលពីថ្ងៃសៅរ៍ ថ្ងៃអាទិត្យ វាមានការកកស្ទះបន្តិចនៅដើមផ្លូវច្រកចូលរបស់យើងទាំងខាងភ្នំពេញ ដោយសារតែបងប្អូនយើងសម្រុកទៅលេងខេត្តព្រះសីហនុ ស្របពេលច្រកចូលរបស់យើងបើកតែចំនួន ២ ប៉ុណ្ណោះ ក្នុងចំណោមច្រកចូលចំនួន ៧ ទៅ ៨ ច្រក។ ការបើកច្រកចូលតែ ២ ទៅ ៣ ច្រកនេះ ដោយសារតែយើងស្ថិតក្នុងពេលសាកល្បង ហើយបុគ្គលិកយើងបានធ្វើការណែនាំពីសុវត្ថិភាពផ្សេងៗ ដែលត្រូវចំណាយពេលវេលាបន្តិច»។
ក្រៅពីការចង្អៀតណែនតាមច្រកចូលនៅថ្ងៃចុងសប្តាហ៍ លោក ហ៊ាង សុធាយុត្តិ បានឱ្យដឹងថា បាតុភាពមិនប្រក្រតី និងបញ្ហាកត្តាយានយន្តអ្នកធ្វើដំណើរនៅតែបន្តកើតមានក្នុងករណីតិចតួចប៉ុណ្ណោះ ដែលបញ្ហាទាំងនេះ ក្រុមការងារបានចូលរួមដោះស្រាយបានយ៉ាងល្អ។
លោកបានបន្ថែមថា៖ «បញ្ហាផ្សេងៗគឺសង្កេតឃើញនៅតែមានតិចតួចដូចជា បញ្ហាការដែលមានសត្វពាហនៈចេញ-ចូល ហើយយើងខិតខំណែនាំបងប្អូនប្រជាពលរដ្ឋយើងកុំឱ្យលែងសត្វពាហនៈមក ឬក៏មិនឱ្យមានការកាត់របងផ្សេងៗក្តី។ ការអប់រំនេះ យើងត្រូវការពេលវេលា និងមានការយោគយល់ក្នុងឥរិយាបថទន់ភ្លន់ផងដែរក្នុងនាមអាជ្ញាធរ»៕
