.jpg)
លោក ហ៊ុន សែន ពេលអញ្ជើញជាអធិបតីក្នុងពិធីចែកសញ្ញាបត្រដល់និស្សិតនៅសាកលវិទ្យាល័យ (PPIU) ពីថ្ងៃ ១១ តុលា។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន ប្រកាសថា រាជរដ្ឋាភិបាលបានផលិតនាឡិកាចំនួន ២៥ គ្រឿង សម្រាប់ចែកជាកាដូជូនដល់ថ្នាក់ដឹកនាំកំពូលនៃបណ្តាប្រទេសអាស៊ាន និងដៃគូអាស៊ានដែលនឹងមកចូលរួមកិច្ចប្រជុំកំពូលអាស៊ានដែលគ្រោងធ្វើនៅខែក្រោយនៅរាជធានីភ្នំពេញ ហើយកម្ពុជាក៏បានអញ្ជើញថ្នាក់ដឹកនាំកំពូលជាច្រើនមកពីប្រទេសនានាមកចូលរួមកិច្ចប្រជុំកំពូលអាស៊ាននេះផងដែរ។
ក្នុងពិធីប្រគល់សញ្ញាបត្រដល់និស្សិតសាកលវិទ្យាល័យភ្នំពេញអន្តរជាតិ (PPIU) នៅថ្ងៃទី ១១ ខែតុលា លោកថ្លែងថា ពិធីបុណ្យអុំទូកនៅឆ្នាំនេះត្រូវបានលើកពេលដោយសារការរៀបចំកិច្ចប្រជុំកំពូលអាស៊ានដែលចាំបាច់ត្រូវតែមានវិធានការការពារថ្នាក់ដឹកនាំកំពូលដែលមកពីប្រទេសនានាដែលឆ្នាំនេះ កម្ពុជាបានអញ្ជើញជាច្រើននាក់។
លោក ហ៊ុន សែន ថ្លែងថា៖ «យើងផលិតនាឡិការហូតទៅដល់ ២៥ គ្រឿង សម្រាប់ថ្នាក់ដឹកនាំកំពូល និងស្ថាប័នកំពូលផងដែរ។ ដាក់ [ម៉ាក] អាស៊ានតែម្តង ប៉ុន្តែ Made in Cambodia (ផលិតនៅកម្ពុជា) ឱ្យគេដឹងថា ខ្មែរបច្ចុប្បន្ននេះអាចផលិតបាននាឡិកា ហើយខ្ញុំនឹងចែកជាកាដូជូនចំពោះប្រមុខរដ្ឋ ប្រមុខរដ្ឋាភិបាល ហើយថ្ងៃនោះខ្ញុំនឹងពាក់នាឡិកាម៉ាកអាស៊ានតែម្តង»។
លោកបន្ថែមថា៖ «យើងមានអាស៊ានតែ ១០ ទេ ប៉ុន្តែយើងអញ្ជើញដៃគូច្រើន។ ដៃគូក្រៅពីរដ្ឋដោយសារយើងធ្វើ Global Dialogue (កិច្ចសន្ទនាសកលលើកទី២)។ យើងបានអញ្ជើញតាំងពីប្រធានធនាគារពិភពលោក អគ្គនាយក IMF ប្រធានធនាគារអភិវឌ្ឍន៍អាស៊ី (ADB) អគ្គនាយកអង្គការពាណិជ្ជកម្មពិភពលោក អគ្គនាយកអង្គការសុខភាពពិភពលោក ប្រធានក្រុមប្រឹក្សាអឺរ៉ុប ប្រធានអង្គការសហប្រតិបត្តិការសៀងហៃ និងប្រធានវេទិកាសេដ្ឋកិច្ចពិភពលោកមកចូលរួមវេទិកាទាក់ទិនជាមួយនឹងកិច្ចសន្ទនាសកលលើកទី២»។
លោកនាយករដ្ឋមន្ត្រីថ្លែងថាកិច្ចប្រជុំកំពូលអាស៊ាននេះគឺត្រូវមានព្រឹត្តិការណ៍អមយ៉ាងច្រើនដែលធ្វើឱ្យរដ្ឋាភិបាលមមាញឹកណាស់ក្នុងការរៀបចំ។ លោកជំរុញឱ្យអាជ្ញាធរធានាឱ្យបាននូវសន្តិសុខសម្រាប់កិច្ចប្រជុំកំពូលអាស៊ាននេះ ដែលមានប្រមុខរដ្ឋ ប្រមុខរដ្ឋាភិបាល និងមេដឹកនាំនៃស្ថាប័នអន្តរជាតិធំៗជាច្រើនដែលនឹងមកចូលរួម។
លោកប្រកាសថា រដ្ឋាភិបាលនឹងយកសណ្ឋាគារសុខាភ្នំពេញដែលមាន ៧០០ បន្ទប់ សម្រាប់កិច្ចប្រជុំកំពូលនេះ ដោយគណៈប្រតិភូមួយចំនួននឹងស្នាក់នៅសណ្ឋាគារនេះផងដែរ ហើយលោកក៏នឹងត្រូវស្នាក់នៅសណ្ឋាគារនេះផងដែរ ក្នុងអំឡុងពេលកិច្ចប្រជុំនេះ។
លោកថ្លែងថា៖ «ព្រោះខ្ញុំត្រូវឆ្លងកាត់ក្រុង ត្រូវបិទចុះបិទឡើង [ចរាចរណ៍]។ អ៊ីចឹងទេ ពេលហ្នឹងខ្ញុំសុំប្រពន្ធខ្ញុំមកដេក ប៉ុន្តែប្រពន្ធខ្ញុំក៏ត្រូវតែមកជាមួយដែរ ព្រោះក្រែងលោភរិយារបស់ប្រមុខរដ្ឋ ប្រមុខរដ្ឋាភិបាលនៃប្រទេសដទៃមក គាត់ត្រូវតែមានវត្តមានដែរ។ អ៊ីចឹងទេ បានមកសម្រាកអូតែលនៅកន្លែងហ្នឹងម្តង។ លើកមុនមកសម្រាកម្តងហើយ ដូចជា ប្រជុំ World Economic Forum (វេទិកាសេដ្ឋកិច្ចពិភពលោក) ធ្វើនៅហ្នឹង»។
កម្ពុជាមិនអញ្ជើញមេដឹកនាំយោធាមីយ៉ាន់ម៉ា លោក មីន អ៊ុងឡាំង (Min Aung Hlaing) មកចូលរួមកិច្ចប្រជុំកំពូលអាស៊ានលើកទី៤០ និង ៤១ និងកិច្ចប្រជុំពាក់ព័ន្ធ ដែលគ្រោងធ្វើនៅថ្ងៃទី ៨-១៣ ខែវិច្ឆិកា នោះទេ តែកម្ពុជានៅរក្សាជំហរអញ្ជើញតំណាងមិននយោបាយរបស់ប្រទេសនេះមកចូលរួមជំនួសវិញ ខណៈប្រទេសនេះ ត្រូវបានគេមើលឃើញថា មានការវិវឌ្ឍតិចតួចក្នុងការអនុវត្តកិច្ចព្រមព្រៀងជាឯកច្ឆន្ទ (កុងសង់ស៊ីស) ៥ ចំណុចរបស់មេដឹកនាំអាស៊ាន៕
