បាត់ដំបងៈ លោក ស ខេង រដ្ឋមន្ត្រី​ក្រសួង​មហាផ្ទៃ​ស្នើឱ្យ​រដ្ឋបាល​ខេត្ត​បាត់ដំបង​ និង​ស្ថាប័ន​ពាក់ព័ន្ធ​បន្ត​រៀបចំ​សួនច្បារ និង​ដាំ​ដើមឈើ​ឱ្យ​បាន​ច្រើន​នៅក្នុង​ក្រុង ជាពិសេស​នៅតាម​សងខាង​ដងស្ទឹង​សង្កែ ដើម្បី​បង្កើន​បរិយាកាស​បៃតង​ សម្រាប់​ទាក់ទាញ​ភ្ញៀវទេសចរ​ឱ្យ​មក​លេង​កម្សាន្ត​កាន់តែ​ច្រើន ខណៈ​ក្នុង​រដូវ​បុណ្យជាតិ​សំខាន់ៗ​ខេត្ត​បាត់ដំបង​ទទួល​បាន​ភ្ញៀវទេសចរ​ច្រើន​ជាងគេ​។

លោក ស ខេង ថ្លែង​នៅក្នុង​ពិធី​បិទបញ្ចប់​ពិធី​ប្រណាំងទូក បណ្ដែត​ប្រទីប អបអរ​បុណ្យ​ចេញ​ព្រះវស្សា​ខេត្ត​បាត់ដំបង នៅ​វេទិកា​អុំទូក​មាត់​ស្ទឹង​សង្កែ ក្រុង​បាត់ដំបង កាលពី​ថ្ងៃទី​ ១០ តុលា​ថា សក្ដានុពល​ស្ទឹង​សង្កែ មិន​ត្រឹមតែ​ជា​ប្រភព​ទឹក​ សម្រាប់​បង្ហូរ​ទៅ​តាម​ប្រឡាយ​នានា​បម្រើ​ឱ្យ​ពលរដ្ឋ​ធ្វើស្រែ​ប្រាំង​ប៉ុណ្ណោះ​ទេ ប៉ុន្តែ​ស្ទឹង​ដែល​ជា​សម្បត្តិ​សាធារណៈ​មួយ​នេះ ជា​ផ្នែក​ ១​ យ៉ាង​សំខាន់​ក្នុង​ការលើក​មុខមាត់​ក្រុង​បាត់ដំបង​ដូចដែល​បទចម្រៀង​សម័យ​ដើម​បាន​រៀបរាប់ ព្រមទាំង​លើកស្ទួយ​វិស័យ​ទេសចរណ៍​ផងដែរ​។

លោក​បាន​ស្នើឱ្យ​រដ្ឋបាល​ខេត្ត និង​ប្រជាពលរដ្ឋ​ទាំង​ក្រុង​បាត់ដំបង និង​បណ្ដា​ស្រុក​ផ្សេងៗ​ដែល​ស្ថិត​នៅជាប់​ស្ទឹង​សង្កែ សូម​ខិតខំ​ថែរក្សា​បរិស្ថាន អនាម័យ និង​កែច្នៃ​បន្ថែម​ទៀត ដើម្បី​លើក​កម្ពស់​សោភណភាព​ក្រុង​បាត់ដំបង​ពិសេស​ស្ទឹង​សង្កែ​នេះ​តែម្ដង​។ ជាមួយ​គ្នានេះ លោក​បាន​លើក​ទឹកចិត្ត​ឱ្យ​បន្ត​រៀបចំ​សួនច្បារ និង​ដាំ​ដើមឈើ​ឱ្យបាន​ច្រើន ទាំង​តាម​ដងស្ទឹង និង​តាម​បណ្ដោយ​ដងផ្លូវ ដើម្បី​បង្កើន​​បរិយាកាស​បៃតង​ផងដែរ​។

បើតាម​លោក ស ខេង ​តាមរយៈ​ការងារ​ខាងលើ​នេះ​នឹង​ចូលរួម​ទាក់ទាញ​ភ្ញៀវទេសចរ​ជាតិ និង​អន្តរជាតិ​ឱ្យ​មក​លេង​កម្សាន្ត​ និង​ផ្តល់​ចំណូល​ដល់​ប្រជាពលរដ្ឋ​នៅក្នុង​ក្រុង​បាត់ដំបង និង​ធ្វើឱ្យ​ជីវភាព​ប្រជាពលរដ្ឋ​បាន​ធូរធារ​តាមរយៈ​ការបង្កើត​មុខរបរ​ផ្សេងៗ ដូចជា​ភោជនីយដ្ឋាន ផ្ទះសំណាក់ និង​រមណីយដ្ឋាន​ជាដើម​។ ក្នុង​ដំណាក់កាល​ទី​ ១ លោក ស្នើឱ្យ​រដ្ឋបាលខេត្ត​យកចិត្ត​ទុកដាក់​នូវ​​កំណាត់​ច្រាំង​ស្ទឹង​ពីមុខ​សាលាខេត្ត​មកដល់​ស្ពានថ្ម​ផ្លូវជាតិ​លេខ​ ៥ នេះ​ ដែល​ជា​អាទិភាព​ និង​សំខាន់​បំផុត​ ដើម្បី​លើកកម្ពស់​នូវ​សោភណភាព​ទីក្រុង តាមរយៈ​ការធ្វើ​សួនច្បារ ការរៀបចំ​ផ្លូវ​ដើរ​សម្រាប់​ប្រជាពលរដ្ឋ និង​ការដាំ​ដើមឈើ​ឱ្យ​បាន​កាន់តែ​ច្រើន​។

លោក​ថ្លែង​ថា​៖ «​ខ្ញុំ​សង្ឃឹមថា អនាគត​នេះ​ខេត្ត​បាត់ដំបង​របស់​យើង​តាមរយៈ​ការខិតខំ​ប្រឹងប្រែង​កន្លង​មកនេះ យើង​ទទួល​បាន​ជា​ទីក្រុង​បៃតង​បន្តបន្ទាប់ ដូច្នេះ យើង​នឹង​ខិតខំ​បន្តទៀត​ ដើម្បី​រក្សា​តំណែង​ជា​ទីក្រុង​បៃតង​ជា​ទីក្រុង​ខៀវ ដែល​មានន័យថា ជា​ទីក្រុង​មួយ​មាន​ដើមឈើ​ស្រស់ស្អាត​។ កាលណា​មាន​ដើមឈើ​ស្រស់ស្អាត​វា​អាច​ជួយ​បរិស្ថាន ស្រូប​យក​ធាតុ​ក្តៅ ឬ សារធាតុពុល​ផ្សេងៗ ជាពិសេស​ជួយ​ដល់​សុខភាព​មនុស្ស​»​។

លោក សុខ លូ អភិបាលខេត្ត​បាត់ដំបង​ប្រាប់​ ភ្នំពេញ​ ប៉ុស្តិ៍​ នៅ​ថ្ងៃទី​ ១១​ តុលា​ថា លោក ស ខេង ​តែងតែ​ណែនាំ​ជាប្រចាំ​ឱ្យ​រដ្ឋបាល​ខេត្ត​គិតគូរ​ពី​បញ្ហា​ដាំ​ដើមឈើ និង​ការការពារ​បរិស្ថាន ដើម្បី​ឱ្យ​ទីក្រុង​ទាំងមូល​ក្លាយ​ជា​ទីក្រុង​បៃតង​។ តាមរយៈ​ការណែនាំ​នេះ រដ្ឋបាលខេត្ត​នឹង​ចាប់ផ្តើម​រៀបចំ​ធ្វើ​នៅពេល​ខាងមុខ​ដ៏ខ្លី​។ ម្យ៉ាង​កន្លងមកនេះ​រដ្ឋបាល​ខេត្ត​ក៏ធ្លាប់​បាន​ធ្វើ​ចលនា​ឱ្យ​មហាជន​ចូលរួម​ដាំ​ដើមឈើ ឱ្យបាន​ច្រើន​នៅតាម​ទីសាធារណៈ​នានា​ដូចជា​ទីតាំង​វត្ត​អារាម តាម​ដងផ្លូវ​ថ្នល់ និង​មួយទៀត ក៏​នឹង​រៀបចំ​តាម ដងស្ទឹង​សង្កែ​នេះ​ឱ្យ​មាន​ផ្លូវ​ដើរ រៀបចំ​សួន និង​ដាំ​ដើមឈើ​បន្ថែម​ទៀត​ផងដែរ​។

លោក​ថ្លែង​ថា​៖ «​ទីក្រុង​បៃតង គឺមាន​ភាពចាំបាច់​ណាស់​ក្នុង​ការធ្វើ​ ដើម្បី​ទាក់ទាញ​ភ្ញៀវទេសចរ ដូច​សម្តេច​ក្រឡាហោម​បាន​លើកឡើង​អ៊ីចឹង គឺ​ខេត្ត​បាត់ដំបង​មាន​បងប្អូន​មកលេង​កម្សាន្ត​ច្រើន​ជាងគេ ក្នុង​ឱកាស​បុណ្យជាតិ​សំខាន់ៗ​។ ជាមួយ​គ្នានេះ​សម្តេច​ក៏​ឱ្យ​ខេត្ត​សិក្សា​ពី​ចំណុច​ខ្លាំង ដែល​ធ្វើឱ្យ​មាន​ភាពទាក់ទាញ​ទេសចរ​ ដើម្បី​ឱ្យ​យើង​ពង្រឹង​បន្ថែមទៀត​»​។

បើតាម​លោក សុខ លូ លោក ស ខេង បាន​ណែនាំ​ឱ្យ​ខេត្ត​យកចិត្ត​ទុកដាក់​រៀបចំ​សួន ដាំ​ដើមឈើ​ និង​ថែរក្សា​អានាម័យ​បរិស្ថាន​នៅតាម​មាត់​ស្ទឹង​សង្កែ​ពីមុខ​រដ្ឋបាល​ខេត្ត​បាត់ដំបង​ទៅ​ដល់​ចំណុច​ស្ពាន​ផ្លូវជាតិ​លេខ ​៥ ដែល​មាន​ប្រវែង​ប៉ាន់ស្មាន​ប្រហែល​ជាង​ ២ ​គីឡូម៉ែត្រ​ជាមុន​។ លោក​ ​សុខ លូ នឹង​បើក​កិច្ចប្រជុំ​ដើម្បី​ពិភាក្សា​ជាមួយ​នឹង​មន្ត្រី និង​ស្ថាប័ន​ជំនាញ​នៅក្នុង​ខេត្ត ដើម្បី​ចាប់ផ្តើម​កែលម្អ​ឱ្យ​មាន​សោភណភាព​ និង​ដាំ​ដើមឈើ​នៅតាម​តំបន់​នេះ​ឱ្យមាន​ភាពស្រស់​បំព្រង​តាម​ការស្នើ​របស់​លោក​ ស ខេង ។

របាយការណ៍​របស់​ក្រសួង​ទេសចរណ៍​ឱ្យ​ដឹងថា ភ្ញៀវទេសចរ​ដែល​បានធ្វើ​ដំណើរ​កម្សាន្ត​នៅតាម​គោលដៅ​ទេសចរណ៍​នានា​ទូទាំង​ប្រទេស ក្នុង​រយៈពេល​ ៣ ​ថ្ងៃ ចាប់ពី​ថ្ងៃទី ​១៦-១៨ កញ្ញា ឆ្នាំ​ ២០២០ អំឡុង​ពេល​បុណ្យ​ភ្ជុំបិណ្ឌ​មាន​ប្រមាណ​ ១ ១១២ ៤០៣ នាក់ ក្នុង​នោះ​ខេត្ត​បាត់ដំបង​ឈរ​នៅ​លំដាប់​លេខ​រៀង​ទី​ ១ គឺមាន​ចំនួន​ ១៣៤ ៤៤០ ​នាក់​៕