.jpg)
ការជួយសង្គ្រោះរថយន្តខូចលើផ្លូវល្បឿនលឿនភ្នំពេញ-ព្រះសីហនុ ពីថ្ងៃទី ៩ តុលា។ រូប FB
ភ្នំពេញៈ ក្រសួងសាធារណការ និងដឹកជញ្ជូន កំពុងបន្តជជែកជាមួយក្រុមហ៊ុន ដើម្បីកំណត់តម្លៃ ក្នុងការប្រើប្រាស់សេវាសង្គ្រោះជាផ្លូវការនៅលើផ្លូវល្បឿនលឿន បន្ទាប់ពីការកំណត់របស់ក្រុមហ៊ុន បណ្តោះអាសន្នក្នុងការប្រើប្រាស់សេវាស្ទូច និងអូសឡានមានតម្លៃពី ១០០ ដុល្លារឡើង ទទួលរងការរិះគន់ពីអ្នកបើកបរមួយចំនួន។ នេះបើតាមមន្ត្រីនាំពាក្យ។
កាលពីពេលថ្មីៗនេះ មានប្រតិកម្មពីអ្នកបើកបរមួយចំនួន ដែលបានជួបប្រទះនឹងបញ្ហាខូចរថយន្ត តាមផ្លូវល្បឿនលឿន ហើយត្រូវការ សេវាជួយសង្គ្រោះដោយស្ទូច និងអូសរថយន្ត ដែលមានតម្លៃចាប់ពី ១០០ ដុល្លារអាមេរិក ហើយគិតបន្ថែមក្នុងតម្លៃ ០,៣ ដុល្លារក្នុង ១ គីឡូម៉ែត្រ។
តាមរយៈវីដេអូ ដែលថតដោយអ្នកបើកបរ ក្នុងអំឡុងពេលខូចរថយន្ត ហើយត្រូវបានបង្ហោះចែកចាយនៅលើបណ្តាញសង្គមហ្វេសប៊ុក រៀបរាប់ថា៖ «អ្នករត់ឡានយើងទាំងអស់គ្នា កុំសប្បាយ ជាមួយផ្លូវល្បឿនលឿន។ នេះក្នុងអំឡុងពេលសាកល្បងទេ ឡានខ្ញុំខូចនៅច្រកចេញស្ទឹងហាវ ហើយចេញពីស្ទឹងហាវមកផ្លូវជាតិលេខ ៤ គឺ ១៤ គីឡូ ដែលគិតលុយជាង ១០០ ដុល្លារ។ ខ្ញុំមិនច្បាស់ទេ គ្រាន់តែដឹងថា ១០ គីឡូ គេគិតតម្លៃ ១០០ ដុល្លារ ហើយលើសពី ១ គីឡូទៅមុខទៀត គេគិត ០,៣ ដុល្លារ ឬស្មើ ១ ២០០ រៀល»។
លោក ហ៊ាង សុធាយុត្តិ អ្នកនាំពាក្យក្រសួងសាធារណការប្រាប់ ភ្នំពេញ ប៉ុស្តិ៍ នៅថ្ងៃទី ១១ តុលាថា ចំពោះតម្លៃនៃការប្រើប្រាស់សេវាសង្គ្រោះនៅលើផ្លូវល្បឿនលឿន ក្រសួងនឹងបន្តពិភាក្សាជាមួយក្រុមហ៊ុនដើម្បីកំណត់តម្លៃជាក់លាក់បន្ថែមទៀត។ ការកំណត់តម្លៃ នៃការប្រើប្រាស់សេវាជាផ្លូវការ នឹងត្រូវប្រកាសមុនថ្ងៃទី ១ វិច្ឆិកា មុននឹងដាក់ឱ្យប្រើផ្លូវល្បឿនលឿន ជាផ្លូវការក្នុងពេលខាងមុខ។
លោកបញ្ជាក់ថា៖ «ករណីកម្រៃអូស ក្រសួងនៅមិនទាន់មានការសម្រេចណាមួយនៅឡើយទេ។ បច្ចុប្បន្ន កំពុងធ្វើការពិភាក្សាជាមួយភាគីក្រុមហ៊ុន និងឈានទៅរកការសម្រេចក្នុងពេលឆាប់ៗ មុនថ្ងៃទី ១ វិច្ឆិកា ២០២២។ យើងខ្ញុំយល់ពីស្ថានភាពនៃការលើកឡើងរបស់ប្រជាពលរដ្ឋជាមូលដ្ឋានពិចារណា»។
លោក ហ៊ាង សុធាយុត្តិ ប្រកាសថា ការអនុវត្តតាមគោលការណ៍ផ្លូវល្បឿនលឿន រថយន្តចរាចរណ៍ពេលខូច ឬគាំងដោយប្រការណាមួយ ត្រូវសុំជំនួយពីលេខ ១៣៩៩ ហើយករណីរថយន្តខូច គឺមិនអាចអូសរថយន្តពីអ្នកដំណើរ ដូចគ្នាបានឡើយដើម្បីសុវត្ថិភាពខ្លួនឯង និងអ្នកដទៃ។ តាមការសិក្សាចម្ងាយអូសឆ្ងាយបំផុតត្រឹម ៧០ គីឡូម៉ែត្រ និងជាមធ្យម ៣០ គីឡូម៉ែត្រ ដើម្បីទៅដល់កន្លែងជួសជុល ឬសង្គ្រោះ។
ជាមួយគ្នានេះក៏មានគណនីហ្វេសប៊ុក ឈ្មោះ Asmak Hosen បានបង្ហោះសំណេររបស់ខ្លួនពីថ្ងៃទី ៩ តុលា អមជាមួយរូបខូចរថយន្តជាច្រើនសន្លឹកលើផ្លូវល្បឿនលឿន ដោយចោទជាសំណួរ និងបានអះអាងថា ការទទួលសេវាសង្គ្រោះរបស់ខ្លួន បានជួបបញ្ហាធ្វើឱ្យរថយន្តរបស់ខ្លួនខូចខាត។
គណនីនោះបញ្ជាក់ថា៖ «ដូចថ្ងៃនេះ អ្នកស្ទូចអត់បច្ចេកទេស ស្ទូចឡានខ្ញុំបាក់កាងខាងក្រោយ តើអ្នកណាអ្នកទទួលខុសត្រូវ? សុំជួយប្រាប់ផង។ ថវិកាមិនច្រើនទេ តែខ្ញុំឆ្ងល់ ហើយខូចកាងក្រោយទើបវាធ្ងន់។ ដោយសារឈឺចិត្តឡានខ្មៅ មានរបស់ដោះដូរគ្រប់គ្រាន់ យល់ហើយទាន់ទេ? ខ្ញុំបានសួរទៅអ្នកស្ទូច ៣ នាក់នោះហើយ ហើយក៏មានចម្លើយដែរ? តែខ្ញុំត្រូវការបងប្អូន និងអ្នកគ្រប់គ្រងផ្លូវជួយឆ្លើយវិញ?»។
ករណីនេះ លោក ហ៊ាង សុធាយុត្តិ បកស្រាយថា ចំពោះបញ្ហាធ្វើឱ្យខូចខាតរថយន្តអ្នកដំណើរក្នុងពេលស្ទូចនោះលោក បានទាក់ទងដោយផ្ទាល់ជាមួយក្រុមហ៊ុន ដើម្បីដោះស្រាយជូនអ្នកបើកបរភ្លាមៗ។
លោកថា៖ «ករណីនេះយើងបានឯកភាពសងថ្លៃខូចខាតតាមរយៈក្រុមហ៊ុន ជូនលោកជំទាវហើយ។ គ្រាន់តែលោកជំទាវគាត់មានជំហរមិនចង់ឱ្យទទួល ដោយខ្លាចក្រុមហ៊ុនកាត់ប្រាក់ខែបុគ្គលិក ហើយយើងខ្ញុំបានសម្របសម្រួល ករណីនេះហើយ»។
តាមការបកស្រាយរបស់មន្ត្រីបម្រើសេវាលើផ្លូវល្បឿនលឿនតាមប្រព័ន្ធលេខ ១៣៩៩ ដែលសុំមិនបញ្ចេញឈ្មោះ ប្រាប់នៅថ្ងៃទី ១១ តុលាថា តាមការកំណត់ របស់ក្រុមហ៊ុន រាល់ការប្រើប្រាស់សេវាស្ទូចរថយន្តម្តង គឺមានតម្លៃ ១០០ ដុល្លារ។ អ្នកស្រីបន្តថា ក្រោយពីប្រើប្រាស់សេវាស្ទូចនេះហើយ រាល់ការប្រើប្រាស់សេវាអូសរថយន្ត គឺមានតម្លៃ ០,៣ ដុល្លារក្នុង ១ គីឡូម៉ែត្រ។
អ្នកស្រីបញ្ជាក់ថា៖ «ខ្ញុំនិយាយឱ្យច្បាស់បានន័យថា នៅពេលឡានស្ទូចហ្នឹង គាត់ចេញ ១ ជើងទៅលើក គេគិត ១០០ ដុល្លារ ចំពោះឡាន ៥ តោន។ និយាយថា ស្ទូច ១ ដង គឺតម្លៃ ១០០ ដុល្លារ ហើយគិតជាគីឡូ ពីកន្លែងគាត់ខូចឡានទៅដល់កន្លែងសុវត្ថិភាព មានចម្ងាយ ១០ គីឡូ គឺតម្លៃតែ ៣ ដុល្លារទេ ដោយ ១ គីឡូ ស្មើនឹង ០,៣ ដុល្លារ»។
ក្រសួងសាធារណការប្រកាសបើកដំណើរការសាកល្បងផ្លូវល្បឿនលឿន ភ្នំពេញព្រះសីហនុដោយឥតគិតថ្លៃចាប់ពីថ្ងៃទី ១ ដល់ថ្ងៃទី ៣១ ខែតុលា ហើយផ្លូវនេះនឹងត្រូវប្រកាសឱ្យប្រើប្រាស់ជាផ្លូវការ ចាប់ពីថ្ងៃទី ១ ខែវិច្ឆិកា តទៅ ដែលតម្លៃក្នុងការប្រើប្រាស់ម្តង គឺក្នុងចន្លោះចាប់ពី ១២ ដុល្លារ ទៅដល់ ៦០ ដុល្លារ។
ផ្លូវល្បឿនលឿននេះ មានប្រវែង ១៨៧,០៥ គីឡូម៉ែត្រ ដែលអ្នកដំណើរអាចចំណាយពេលប្រមាណ ២ ម៉ោងប៉ុណ្ណោះពីរាជធានីភ្នំពេញទៅក្រុងព្រះសីហនុ ខុសពីកន្លងមក ត្រូវចំណាយពេលពី ៥-៦ ម៉ោងតាមផ្លូវជាតិលេខ ៤។
ចាប់ពីថ្ងៃទី ១-៩ តុលា យានយន្តជាង ១០ ម៉ឺនគ្រឿង បានចូលប្រើប្រាស់ផ្លូវល្បឿនលឿនដោយក្នុង ១ ថ្ងៃៗមានរថយន្តពី ៩ ០០០ គ្រឿង ដល់ជាង ១៦ ០០០ គ្រឿង។ នេះបើតាមលោក ហ៊ាង សុធាយុត្តិ កាលពីថ្ងៃទី ១០ តុលា៕
វីដេអូ៖
