.jpg)
លោក វេង សាខុន អតីតរដ្ឋមន្ត្រីកសិកម្ម ដែលត្រូវបានតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី។ ហុង មិនា
ភ្នំពេញៈ ព្រះមហាក្សត្រ សម្តេចព្រះបរមនាថ នរោត្តម សីហមុនី តែងតាំងលោកវេងសាខុន រដ្ឋមន្ត្រីកសិកម្ម ដែលត្រូវបានបញ្ចប់តំណែងឱ្យមកធ្វើជារដ្ឋមន្ត្រីប្រតិភូអមនាយករដ្ឋមន្ត្រីតាមសំណើលោកនាយករដ្ឋមន្ត្រី ហ៊ុន សែន។ ព្រះរាជក្រឹត្យចុះថ្ងៃទី ១១ តុលា បញ្ជាក់ថា៖ «តែងតាំងមុខតំណែង ឯកឧត្តម វេង សាខុន ជារដ្ឋមន្ត្រីប្រតិភូអមនាយករដ្ឋមន្ត្រី។ សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាត្រូវទទួលបន្ទុកអនុវត្តព្រះរាជក្រឹត្យ នេះចាប់ពីថ្ងៃឡាយព្រះហស្តលេខាតទៅ»។
ក្នុងពិធីប្រគល់សញ្ញាបត្រដល់និស្សិតសាកលវិទ្យាល័យភ្នំពេញ-អន្តរជាតិ (PPIU) នាថ្ងៃទី ១១ ខែតុលា លោក ហ៊ុន សែន ថ្លែងថា៖ «សួរថា វេង សាខុន ទៅណា? បញ្ហាវាមិនស្ថិតទៅដល់ធ្ងន់ធ្ងរហួសហេតុទេ ក៏ប៉ុន្តែ អ្វីដែលខ្ញុំចង់បាន គឺវាមិនបានដូចបំណង។ ថ្ងៃនេះ ខ្ញុំធ្វើលិខិតចូលទៅព្រះបរមរាជវាំងតែងតាំង វេង សាខុន ជារដ្ឋមន្ត្រីប្រតិភូអមនាយករដ្ឋមន្ត្រី»។
លោកបន្ថែមថា៖ «យ៉ាងណា ក៏ជាសាច់ឈាមរបស់យើងជាមន្ត្រីដែលធ្វើការជាមួយយើង។ វេង សាខុន ចប់មហាវិទ្យាល័យហើយមកធ្វើការ។ ដូច្នេះ យើងអត់បោះបង់ចោលទៅណាទេ ប៉ុន្តែយើងត្រូវការ ការទទួលខុសត្រូវលើសពីនេះ ដើម្បីជំរុញវិស័យកសិកម្មឱ្យលឿនទៅមុខ តែប៉ុណ្ណឹងទេ»។ ជាមួយគ្នានេះ លោកក៏បានប្រតិកម្មទៅនឹងអ្នករិះគន់លោក ដែលលើកឡើងថា ការបញ្ចប់មុខតំណែងលោក វេង សាខុន គឺជារឿងត្រឹមត្រូវ តែវាផ្ទុយនឹងរដ្ឋធម្មនុញ្ញត្រង់មាត្រា ១១៩។ លោកបកស្រាយថា មាត្រា ១១៩ ចែងអំពីតែពីការបង្កើតរដ្ឋាភិបាលប៉ុណ្ណោះ តែមិនចែងពីការរំលាយរដ្ឋាភិបាលទេ។
លោក ហ៊ុន សែន ថា រដ្ឋធម្មនុញ្ញបានចង្អុលបង្ហាញមាត្រា ២១ សម្រាប់ព្រះមហាក្សត្រចេញព្រះរាជក្រឹត្យ ដើម្បីដំឡើងឋានៈ ឬហូតតំណែងរបស់មន្ត្រីជាន់ខ្ពស់ទាំងស៊ីវិល និងទាំងយោធាតាមសំណើរបស់គណៈរដ្ឋមន្ត្រី និងដកតំណែង ឬតែងតាំងផ្នែកតុលាការតាមសំណើរបស់ឧត្តមក្រុមប្រឹក្សានៃអង្គចៅក្រម។
ឆ្លើយតបនឹងអ្នករិះគន់ លោកនាយករដ្ឋមន្ត្រីបានដកស្រង់ច្បាប់ស្ដីពីការរៀបចំ និងការប្រព្រឹត្តទៅនៃគណៈរដ្ឋមន្ត្រីត្រង់មាត្រា ២០ ដោយលោកបញ្ជាក់ថា៖ «នាយករដ្ឋមន្ត្រីលើកសំណើថ្វាយព្រះមហាក្សត្រ ដើម្បីបញ្ចប់មុខតំណែងសមាជិករាជរដ្ឋាភិបាលដោយព្រះរាជក្រឹត្យ។ អាហ្នឹង គេចង្អុលចំទៅអ៊ីចឹងហ្មង រួចហើយដោយសារតែខ្វះការសិក្សា ខ្វះការចេះដឹង ហើយមានះដើម្បីបំផ្លាញយើង»។
លោកបានរំឭកឡើងវិញនូវអ្វីដែលលោកបង្ហោះក្នុងហ្វេសប៊ុក កាលពីពេលថ្មីៗនេះថា៖ «ដើម្បីរួមចំណែកដល់ការចេះដឹងសម្រាប់ពួកប្រឆាំងផ្កាប់មុខ ដើម្បីឈានទៅកាន់អំណាចនៅជាតិក្រោយ ខ្ញុំសូមផ្ដល់ឱ្យមើលអាមាត្រាហ្នឹង រួចហើយចុងក្រោយដាក់ថា ដើម្បីកាន់អំណាចនៅជាតិក្រោយ។ នេះជាបំណងល្អរបស់ខ្ញុំ សម្រាប់ពួកអាល្ងង់ និយាយវាអ៊ីចឹងហ្មង! រួចហើយវាថា ខ្ញុំជេរប្រមាថ ប៉ុន្តែដល់ពេលវាជេរឯងវិញ វាអត់គិតថា វាប្រមាថ»។
នៅថ្ងៃទី ១១ តុលាព្រះមហាក្សត្របានចេញព្រះរាជក្រឹត្យត្រាស់បង្គាប់តែងតាំងលោក វេង សាខុន ដែលត្រូវបានបញ្ចប់មុខតំណែងរដ្ឋមន្ត្រីក្រសួងកសិកម្ម ជារដ្ឋមន្ត្រីប្រតិភូអមនាយករដ្ឋមន្ត្រី បន្ទាប់ពីមានសំណើពីលោកនាយករដ្ឋមន្ត្រី។ «សម្តេចអគ្គមហាសេនាបតីតេជោ ហ៊ុន សែន ត្រូវទទួលបន្ទុកអនុវត្តព្រះរាជក្រឹត្យនេះចាប់ពីថ្ងៃឡាយព្រះហស្តលេខាតទៅ»៕
