ភ្នំពេញៈ លោកទិន ពន្លក រដ្ឋលេខាធិការក្រសួងបរិស្ថាន ណែនាំឱ្យអ្នកអនុវត្តគម្រោង «ការប្រើប្រាស់ និងផលិតកម្មដោយនិរន្តរភាព (SCP)» ធ្វើការតាមដានពិនិត្យឱ្យបានល្អិតល្អន់ចំពោះលទ្ធផលនៃការអនុវត្តគម្រោង កុំមានលទ្ធផលត្រឹមតែកម្រិតរបាយការណ៍ ត្រូវប្រាកដថា ពេលចប់គម្រោងស្ថាប័នទទួលបន្ទុករបស់អាជ្ញាធរថ្នាក់ក្រោមជាតិអាចទទួលយកទៅអនុវត្តបន្តបាន។
លោក ទិន ពន្លក ដែលក៏ជាអនុប្រធានទី២ នៃក្រុមប្រឹក្សាជាតិអភិវឌ្ឍន៍ ដោយចីរភាព បានធ្វើការណែនាំបែបនេះនៅក្នុងពិធីសម្ពោធគម្រោងស្តីពី «ការប្រើប្រាស់ និងផលិតកម្មដោយនិរន្តរភាព» និងការដាក់ឱ្យប្រើប្រាស់ផែនទីបង្ហាញផ្លូវស្តីពី «ការប្រើប្រាស់ និងផលិតកម្មដោយនិរន្តរភាពនៅកម្ពុជា ២០២២-២០៣៥» នៅក្រសួងបរិស្ថានកាលពីថ្ងៃទី ១១ ខែតុលា។
លោកថ្លែងថា៖ «និរន្តរភាពនៃគម្រោងនេះសំខាន់ណាស់សូមឱ្យមើលឃើញលទ្ធផល នៃការអនុវត្តគម្រោងនេះកុំឱ្យត្រឹមកម្រិតរបាយការណ៍ កម្រិត pilot សូមឱ្យមើលថា តើ pilot project របស់យើង នៅពេលដែលចប់គម្រោងទៅ ស្ថាប័នទទួលបន្ទុករបស់អាជ្ញាធរក្រោមជាតិ នៃរាជរដ្ឋាភិបាលហ្នឹង អាចយកទៅដើម្បីអនុវត្តបន្តដើម្បីពង្រីកការអនុវត្តនៅកន្លែងផ្សេងបានឬអត់?»។
លោកបានលើកឡើងថា គម្រោង «ការប្រើប្រាស់ និងផលិតកម្មដោយនិរន្តរភាព (SCP)» គឺជាផ្នែកសំខាន់មួយក្នុងការអភិវឌ្ឍសេដ្ឋកិច្ច និងសង្គមបៃតងរយៈពេលវែងរបស់ប្រទេសកម្ពុជាដែលមានក្នុងគោលនយោបាយជាតិស្តីពីការអភិវឌ្ឍបៃតង និងផែនការយុទ្ធសាស្រ្តជាតិស្តីពីការអភិវឌ្ឍបៃតងឆ្នាំ ២០១៣-២០៣០ ផងដែរ។
គម្រោងនេះក៏ជាឱកាសផ្សព្វផ្សាយបន្ថែមអំពីគោលនយោបាយ និងផែនការយុទ្ធសាស្ត្រជាតិ ដើម្បីលើកទឹកចិត្តឱ្យមានការចូលរួមចំណែក ពីគ្រប់វិស័យក្នុងការលើកកម្ពស់សេដ្ឋកិច្ចបៃតង និងសុខុមាលភាពសង្គមរបស់កម្ពុជាដោយផ្សារភ្ជាប់ យ៉ាងជិតស្និទ្ធជាមួយនឹងគុណភាពបរិស្ថាន និងធនធានធម្មជាតិ។
លោកថ្លែងថា៖ «ខ្ញុំក៏សូមសំណូមពរផងដែរ ដល់តួអង្គពាក់ព័ន្ធសំខាន់ៗរួមមានក្រសួង ស្ថាប័នពាក់ព័ន្ធ វិស័យឯកជន ផលិតករ អង្គការសង្គមស៊ីវិល និងជាពិសេសសហគមន៍ ចូលរួមគាំទ្រការអនុវត្តគម្រោង SCP នេះ ដើម្បីជាការរួមចំណែកដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការសម្រេចបានគោលដៅអភិវឌ្ឍន៍ដោយចីរភាព» ។
សេចក្តីប្រកាសព័ត៌មានរួមរបស់ក្រសួងបរិស្ថានថ្ងៃទី ១១ ខែតុលា បញ្ជាក់ថា គម្រោង «ការប្រើប្រាស់ និងផលិតកម្មដោយនិរន្តរភាព IKI SCP Asia» ដំណាក់កាល២ នឹងកៀរគរការចូលរួមពីភាគីពាក់ព័ន្ធ និងផ្តោតលើការជំរុញតំបន់ផលិតកម្មនៅក្នុងខេត្តមណ្ឌលគិរី និងទីប្រជុំជនសំខាន់ៗ រួមទាំងរាជធានីភ្នំពេញ ឱ្យអនុវត្តលើការផ្សារភ្ជាប់ទំនាក់ទំនងរវាងផលិតកម្មដែលមាននិរន្តភាពទៅនឹងការប្រើប្រាស់ប្រកបដោយការទទួលខុសត្រូវ ដើម្បីកែប្រែឥរិយាបថ ដែលមានចំពោះប្រព័ន្ធចំណីអាហារក្នុងវិស័យកសិកម្ម និងបរិស្ថាន ពីសំណាក់តួអង្គពាក់ព័ន្ធដូចជា ផ្នែកផលិតកម្ម ផ្នែកទីផ្សារ និងអ្នកប្រើប្រាស់។
លោក សេង ទៀក នាយកអង្គការ WWF-កម្ពុជា ថ្លែងថា តាមរយៈគម្រោង និងផែនទីបង្ហាញផ្លូវដែលដាក់ឱ្យប្រើប្រាស់ជាផ្លូវការនេះ រំពឹងថា នឹងជំរុញផលិតកម្មដែលមាននិរន្តរភាព ស្របនឹងការប្រើប្រាស់ប្រកបដោយការទទួលខុសត្រូវ ក្នុងប្រព័ន្ធចំណីអាហារ ក្នុងវិស័យកសិកម្ម ដោយផ្តល់នូវការអនុវត្តបទដ្ឋាននិរន្តរភាព រាប់ចាប់ពីខ្សែចង្វាក់ផ្គត់ផ្គង់ ផលិតកម្ម រហូតដល់ការប្រើប្រាស់ចុងក្រោយ រវាងតួអង្គសំខាន់ៗ ដូចជាសហគមន៍មូលដ្ឋាន អ្នកផលិត អ្នកលក់រាយ អ្នកប្រើប្រាស់ ស្ថាប័នរដ្ឋាភិបាល និងឯកជនជាដើម។
លោកថ្លែងថា៖ «គម្រោងនេះមានរយៈពេល ៤ ឆ្នាំ ហើយដែលជាគម្រោងមួយអនុវត្តសហការជាមួយប្រទេសថៃផងដែរ។ ដំណាក់កាលទី១ បានអនុវត្តនៅប្រទេសថៃ អ៊ីចឹងដំណាក់កាលទី២ នេះ ជាការរួមគ្នាមួយ ដែលផ្តោតលើប្រទេសកម្ពុជាដោយយកបទពិសោធដែលអនុវត្តជោគជ័យនៅប្រទេសថៃ ទាក់ទងនឹងការប្រើប្រាស់ និងផលិតកម្មដែលមាននិរន្តរភាព»។
លោក UlfD.Jaeckel ប្រធានការិយាល័យការសម្របខ្លួនរបស់អឺរ៉ុប និងអន្តរជាតិ ចំពោះការប្រែប្រួលអាកាសធាតុ របស់ក្រសួង បរិស្ថានអភិរក្សធម្មជាតិសុវត្ថិភាពនុយក្លេអ៊ែរ និងកិច្ចការពារអ្នកប្រើប្រាស់ នៃសាធារណរដ្ឋសហព័ន្ធអាល្លឺម៉ង់ បានលើកឡើងថាក្រសួងកិច្ចសហប្រតិបត្តិការបរិស្ថានការ អភិរក្សធម្មជាតិសុវត្ថិភាពនុយក្លេអ៊ែរនិងកិច្ចការពារអ្នកប្រើប្រាស់ នៃរដ្ឋាភិបាល សហព័ន្ធអាល្លឺម៉ង់ មានមោទនភាពក្នុងការគាំទ្រគម្រោងនេះនៅប្រទេសកម្ពុជា និងថៃ តាមរយៈភាពជាដៃគូ ១ ជាមួយនឹងអង្គការ WWF-អាល្លឺម៉ង់ ដោយឃើញថា គម្រោងនេះពិតជាមានសារៈសំខាន់ក្នុងការដើរតួនាទី វាស់វែង ភាពធន់ និងការសម្របខ្លួនទៅនឹងផលប៉ះពាល់នៃការប្រែប្រួលអាកាសធាតុ។
លោកបន្តថា គម្រោងនេះអនុវត្តស្របតាមគោលដៅអភិវឌ្ឍន៍ប្រកបដោយចីរភាព ក្នុងការចូលរួមចំណែកលើកកម្ពស់ការអនុម័តនៅក្នុងក្របខ័ណ្ឌ ពហុភាគី និងកិច្ចព្រមព្រៀងនៃ "និរន្តរភាពប្រព័ន្ធចំណីអាហារ" ស្របតាមយន្តការអភិបាលកិច្ច បរិយាប័ន្នជាសកល លើកកម្ពស់ចំណេះដឹង និងការយល់ដឹងរបស់អ្នកប្រើប្រាស់នៅទីក្រុងអំពីទំនាក់ទំនងរវាងជម្រើសនៃការ ប្រើប្រាស់ និងផលប៉ះពាល់បរិស្ថាន។
លោកបញ្ជាក់ថា៖ «គម្រោងនេះផ្តល់ឱកាសនិងមធ្យោបាយជំរុញការផ្លាស់ប្តូរឥរិយាបថ លើកទឹកចិត្តអាជីវកម្មគំរូដែលប្រកប ដោយនវានុវត្តន៍ និងយុទ្ធសាស្រ្តសហការដើម្បីបញ្រ្ជាបវិធានការ ការប្រើប្រាស់ និងផលិតកម្មដោយនិរន្តរភាព (SCP) ព្រមទាំង ផ្តល់ចំណេះដឹង និងព័ត៌មានអំពីគំរូនៃការអនុវត្តល្អៗដល់តួអង្គសំខាន់ៗ ក្នុងខ្សែចង្វាក់តម្លៃ និងអ្នកពាក់ព័ន្ធផ្សេងទៀត»៕