ភ្នំពេញៈ រដ្ឋសភាបានកំណត់យកថ្ងៃទី ១៤ តុលា ដើម្បីបើកកិច្ចប្រជុំបោះឆ្នោតផ្តល់សេចក្តីទុកចិត្តលើលោក ឌិត ទីណា ជារដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ តាមសំណើរបស់លោកនាយករដ្ឋមន្ត្រីហ៊ុន សែន។
ការសម្រេចកំណត់យកថ្ងៃស្អែក ដើម្បីធ្វើការបោះឆ្នោតផ្តល់សេចក្តីទុកចិត្តនេះ បានធ្វើឡើងក្នុងអំឡុងពេល គណៈកម្មាធិការអចិន្ត្រៃយ៍រដ្ឋសភា បានបើកកិច្ចប្រជុំក្រោមអធិបតីភាពលោក ហេង សំរិន ប្រធានរដ្ឋសភា នៅថ្ងៃទី ១៣ ខែតុលា ឆ្នាំ ២០២២ នៅសាលប្រជុំគណៈកម្មាធិការអចិន្រៃ្តយ៍រដ្ឋសភា។
សេចក្តីប្រកាសរបស់រដ្ឋសភាបានបញ្ជាក់ថា៖ «អង្គប្រជុំបានធ្វើការពិភាក្សា និងអនុម័តយល់ព្រម សំណើសុំបោះឆ្នោតផ្តល់សេចក្តីទុកចិត្តលើការបំពេញបន្ថែមសមាសភាពសមាជិកនៃរាជរដ្ឋាភិបាលដល់ឯកឧត្តម ឌិត ទីណា ជារដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ដើម្បីដាក់ជូនរដ្ឋសភាបោះឆ្នោតផ្តល់សេចក្តីទុកចិត្ត ក្នុងសម័យប្រជុំរដ្ឋសភានាពេលខាងមុខ»។
អង្គប្រជុំក៏បានអនុម័តកាលបរិច្ឆេទ បន្តសម័យប្រជុំរដ្ឋសភា លើកទី៨ នីតិកាលទី៦ នៅព្រឹកថ្ងៃសុក្រ ៤ រោច ខែអស្សុជ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី ១៤ ខែតុលា ឆ្នាំ ២០២២ វេលាម៉ោង ៨ ព្រឹក ដោយមានរបៀបវារៈ ការបោះឆ្នោតផ្តល់សេចក្តីទុកចិត្ត លើការបំពេញបន្ថែមសមាសភាពសមាជិកនៃរាជរដ្ឋាភិបាលដល់ លោក ឌិត ទីណា ជារដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ។ នេះបើតាមសេចក្តីប្រកាសរបស់រដ្ឋសភានៅព្រឹកនេះ។
កាលពីថ្ងៃទី ០៨ ខែតុលា ឆ្នាំ ២០២២ លោកនាយករដ្ឋមន្ត្រី ហ៊ុន សែន បានស្នើទៅកាន់ លោក ហេង សំរិន ប្រធានរដ្ឋសភា ដើម្បីរៀបចំការបោះឆ្នោតផ្តល់សេចក្តីទុកចិត្តលើការបំពេញបន្ថែមសមាជិករាជរដ្ឋាភិបាល ដែលលោកបានស្នើលោក ឌិត ទីណា ជារដ្ឋមន្ត្រីក្រសួង កសិកម្ម រុក្ខាប្រមាញ់ និងនេសាទ បន្ទាប់ពីព្រះមហាក្សត្រ បានចេញព្រះរាជក្រឹត្យបញ្ចប់មុខតំណែងលោក វេង សាខុន ពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ តាមសំណើរបស់លោក កាលពីថ្ងៃទី ៨ ខែតុលា។
លោក ឌិត ទីណា បច្ចុប្បន្នកំពុងកាន់តំណែងជារដ្ឋលេខាធិការនៃក្រសួងរ៉ែ និងថាមពល និងជាអតីតរដ្ឋលេខាធិការក្រសួងពាណិជ្ជកម្មផងដែរ។
លោក ឌិត ទីណា កើតនៅថ្ងៃទី ៧ ខែមករា ឆ្នាំ ១៩៧៩ ។ លោក ជាបញ្ញវន្តបន្តវេន ១ រូប នៃគណបក្សប្រជាជនកម្ពុជា និងបានបញ្ចប់ការសិក្សាថ្នាក់បាក់ឌុបពីវិទ្យាល័យព្រះស៊ីសុវត្ថិនៅឆ្នាំ ១៩៩៤ ហើយបានចេញទៅបន្តការសិក្សានៅប្រទេសបារាំងចាប់ពីឆ្នាំ ១៩៩៦ រហូតដល់ឆ្នាំ ២០០២។
ក្នុងអំឡុងឆ្នាំ ២០០២ លោកក៏បានបញ្ចប់ការសិក្សាពីសាលាជាតិជាន់ខ្ពស់ផ្នែករ៉ែ នៅទីក្រុងប៉ារីស ប្រទេសបារាំង Ecole Nationale superieure des mines de Paris ដោយទទួលសញ្ញាបត្រវិស្វកររ៉ែ។
ក្រៅពីសញ្ញាបត្រវិស្វកររ៉ែ លោកបានបញ្ចប់ការសិក្សាថ្នាក់បរិញ្ញាបត្រជាន់ខ្ពស់ផ្នែករូបវិទ្យាពីសាកលវិទ្យាល័យ Orsay,Paris Sud នៅឆ្នាំ ២០០០៕