.jpg)
ក្រុមគ្រូពេទ្យពិនិត្យ និងព្យាបាលជំងឺភ្នែកដល់មនុស្សចាស់។ រូបថត សហការី
ភ្នំពេញៈ កម្ពុជាមានមហិច្ឆតាកាត់បន្ថយអត្រាប្រេវ៉ាឡង់នៃភាពពិការភ្នែកឱ្យនៅត្រឹម ០,៣៥ % នៅឆ្នាំ ២០៣០ ខណៈសមិទ្ធផលនៃ «ការបង្ការ និងគ្រប់គ្រងភាពពិការភ្នែក» ចាប់ពីឆ្នាំ ១៩៩៥ ដល់ ២០១៩ កម្ពុជាសម្រេចបានអត្រាពិការភ្នែកថយចុះពី ១,២% មកនៅត្រឹម ០,៣៧%។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាល។
សេចក្តីប្រកាសព័ត៌មានរបស់ក្រសួងសុខាភិបាលស្តីពីទិវាសុខភាពភ្នែកពិភពលោក ១៣ តុលា ២០២២ បានឱ្យដឹងថា ក្រសួងកំពុងបង្កើនផែនការយុទ្ធសាស្ត្រសំដៅដល់ការបង្ការ និងពិនិត្យភាពពិការភ្នែក ដោយមានគោលដៅចម្បងធ្វើយ៉ាងណាកាត់បន្ថយការពិការភ្នែកឱ្យធ្លាក់ចុះមកនៅត្រឹម ០,៣៥% នៅឆ្នាំ ២០៣០ ខាងមុខ។
ក្រសួងបញ្ជាក់ថា៖ «ក្រសួងសុខាភិបាលបានបង្កើតផែនការយុទ្ធសាស្ត្រជាតិទី៣ សម្រាប់ការបង្ការ និងត្រួតពិនិត្យភាពពិការភ្នែកឆ្នាំ ២០២១ -២០៣០ មានគោលដៅមហិច្ឆតារបស់ខ្លួនគឺ "ដើម្បីកាត់បន្ថយអត្រាប្រេវ៉ាឡង់នៃភាពពិការភ្នែកឱ្យនៅត្រឹម ០,៣៥% នៅ ឆ្នាំ ២០៣០»។
ប្រភពដដែលបានឱ្យដឹងទៀតថា នៅប្រទេសកម្ពុជា បញ្ហាពិការភ្នែក និងគំហើញចុះខ្សោយ គឺកំពុងស្ថិតនៅជាបញ្ហាសុខភាព សាធារណៈដែលតម្រូវឱ្យគ្រប់គ្នាយកចិត្តទុកដាក់កាត់បន្ថយឱ្យនៅកម្រិតទាបបំផុតតាមតែអាចធ្វើទៅបាន ព្រោះថា ៩០% នៃភាពពិការភ្នែក និងគំហើញចុះខ្សោយ គឺអាចចៀសវាង និងអាចព្យាបាលបាន។
ក្រសួងបញ្ជាក់ទៀតថា៖ «ក្រោមការដឹកនាំប្រកបដោយគតិបណ្ឌិត និងភាពឈ្លាសវៃ ដែលធ្វើឱ្យកម្ពុជាមានសន្តិភាពបរិបូរណ៍ រីកចម្រើនរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សមិទ្ធផលនៃ «ការបង្ការ និងគ្រប់គ្រងភាពពិការភ្នែក» សម្រេចបានអត្រាភាពពិការភ្នែកមានការថយចុះ ១,២% នៅឆ្នាំ ១៩៩៥ មកត្រឹម ០,៣៧% នៅឆ្នាំ ២០១៩»។
ក្រសួងសុខាភិបាលបានបង្ហាញសមិទ្ធផលលេចធ្លោដែលរាជរដ្ឋាភិបាលសម្រេចបានក្នុងរយៈពេល ២៧ ឆ្នាំកន្លងមកនេះ មានធនធានមនុស្សជាច្រើនកំពុងធ្វើការងាររួមចំណែកក្នុងការបង្ការ និងគ្រប់គ្រងភាពពិការភ្នែក ក្នុងនោះមានអ្នកឯកទេសជាន់ខ្ពស់ចក្ខសាស្ត្រមានចំនួន ៦០ រូប ចក្ខុបណ្ឌិតមានចំនួន ១០៣ រូប ចក្ខុគិលានុបដ្ឋាកមានចំនួន ១៥៨ រូប ចក្ខុមាត្រការីមានចំនួន ១០៥ រូប ហើយក៏មានការបណ្តុះបណ្តាលសុខភាពភ្នែកបឋមដល់មន្ត្រីនៅថ្នាក់មណ្ឌលសុខភាព និងមានវគ្គសិក្សារយៈពេលខ្លី វះកាត់ជំងឺបាយភ្នែកមុខតូច និងការអភិវឌ្ឍជំនាញវិជ្ជាជីវៈផងដែរ។
ដោយឡែកផ្នែកហេដ្ឋារចនាសម្ព័ន្ធ ក្នុងពេលបច្ចុប្បន្ននេះ កម្ពុជាមានអគារចក្ខុរោគត្រូវបានដាក់ឱ្យដំណើរការនៅក្នុងរាជធានីភ្នំពេញ និងបណ្តាខេត្តក្រុង ដែលក្នុងនោះនៅរាជធានីភ្នំពេញមានមន្ទីរពេទ្យចំនួន ៤ ផ្តល់សេវាចក្ខុរោគ និងមានមន្ទីរឯកទេសភ្នែកជាន់ខ្ពស់នៅមន្ទីរពេទ្យថ្នាក់ជាតិ។ ចំណែកនៅតាមបណ្តាខេត្ត មានមន្ទីរពេទ្យខេត្តចំនួន ២២ និង មណ្ឌលថែទាំភ្នែកត្រូវបានដាក់ឱ្យដំណើរការចំនួន ១៨ កន្លែង។
ក្រសួងសុខាភិបាលបានឱ្យដឹងថា នៅឆ្នាំ ២០២១ បានផ្តល់សេវាពិនិត្យ និងព្យាបាលបានចំនួន ៤១៥ ៥០២ នាក់ និងវះកាត់ ចំនួន ៣២ ៩០៥ នាក់ ចំណែកជំងឺកង្វះជីវជាតិអា ត្រូវបានលុបបំបាត់ ហើយជំងឺត្រាក់កូម មិនមែនជាបញ្ហាសុខភាពសាធារណៈតទៅទៀតទេ។
តាមរយៈសេចក្តីប្រកាសព័ត៌មានក្នុងឱកាសនៃទិវាសុខភាពភ្នែកពិភពលោកថ្ងៃទី ១៣ ខែតុលា ឆ្នាំ ២០២២ ក្រសួងអំពាវនាវឱ្យប្រជាពលរដ្ឋគ្រប់រូបទៅពិនិត្យភ្នែកនៅតាមអគារផ្តល់សេវាចក្ខុរោគនៅក្នុងរាជធានីភ្នំពេញ និងបណ្តាខេត្ត-ក្រុង នៅក្នុងព្រះរាជាណាចក្រកម្ពុជា យ៉ាងហោចណាស់ឱ្យបានរៀងរាល់ ២ ឆ្នាំម្តង។
សម្រាប់់អ្នកមានអាយុចាប់ពី ៤០ ឆ្នាំ ឡើងទៅមានប្រវត្តិគ្រួសារនៃជំងឺទឹកដក់ក្នុងភ្នែក (សម្ពាធភ្នែកឡើងខ្ពស់ ឬមានផលវិបាកប៉ះពាល់ដល់គំហើញ) មានជំងឺទឹកនោមផ្អែម ឬលើសឈាម មានប្រវត្តិនៃការជក់បារីយូររ៉ាំរ៉ៃ ពាក់វ៉ែនតារួចហើយ កម្រិតម្ញ៉ូបខ្ពស់ជាដើម ត្រូវតែទៅរកគ្រូពេទ្យពិនិត្យភ្នែកជារៀងរាល់ឆ្នាំ។
ដើម្បីអបអរសាទរដល់ទិវាសុខភាពភ្នែកពិភពលោក ១៣ តុលានេះ មន្ទីរពេទ្យមិត្តភាពខ្មែរ-សូវៀត បានប្រកាសផ្តល់ជូនការពិនិត្យព្យាបាលជំងឺភ្នែកជូនប្រជាជនដោយឥតគិតថ្លៃចាប់ពីថ្ងៃទី ១៣ ខែតុលា ដល់ថ្ងៃទី ១៤ ខែតុលា ឆ្នាំ ២០២២ នេះ។
លោកស្រី សុខ ខេង អ្នកគ្រប់គ្រងកម្មវិធីពិនិត្យ និងព្យាបាលជំងឺភ្នែកកុមារ នៃមន្ទីរពេទ្យមិត្តភាពខ្មែរ-សូវៀតឱ្យដឹងថា ការពិនិត្យព្យាបាលជំងឺភ្នែកដោយមិនគិតថ្លៃនេះពេលព្រឹកចាប់ផ្តើមពីម៉ោង ៨ ដល់ម៉ោង ១២ ថ្ងៃត្រង់ និងពេលរសៀលចាប់ផ្តើមពីម៉ោង ២ រហូតដល់ម៉ោង ៥ ល្ងាច។
លោកស្រីបានឱ្យដឹងថា នៅថ្ងៃទី ១៣ ខែតុលានេះ ចំនួនប្រជាជនមកពិនិត្យព្យាបាលជំងឺភ្នែកដោយមិនគិតថ្លៃ នៅមន្ទីរពេទ្យមិត្តភាពខ្មែរសូវៀត អាចមានចន្លោះពី ៦០ ទៅ ៨០ នាក់។
លោកស្រីបញ្ជាក់ថា៖ «ប្រភេទជំងឺដែលគាត់មកធ្វើការពិនិត្យព្យាបាលហ្នឹង ក្នុងនោះមានជំងឺភ្នែកឡើងបាយ ជំងឺកន្ទុយថ្លែន ជំងឺទឹកដក់ក្នុងភ្នែក ជំងឺបាតភ្នែកដែលកើតឡើងដោយសារគាត់មានជំងឺទឹកនោមផ្អែម ហើយ និងជំងឺភ្នែកកុមារ»៕
