សៀមរាបៈ គិតចាប់ពីថ្ងៃចាប់ឆ្នោតដំបូងនៅថ្ងៃទី ២៥ ខែសីហា ឆ្នាំ ២០២២ រហូតមកដល់ថ្ងៃទី ១២ ខែតុលា ឆ្នាំ ២០២២ មានប្រជាពលរដ្ឋសរុបចំនួន ៨ ៤៩៤ គ្រួសារហើយ ដែលបានស្ម័គ្រចិត្តចាប់ឆ្នោតប្តូរទីតាំងពីតំបន់អង្គរទៅរស់នៅតំបន់ទីប្រជុំជនរុនតាឯក និងពាក់ស្នែង។ នេះបើតាមលោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។
លោក ជា សុផារ៉ា បានឱ្យដឹងតាមរយៈហ្វេសប៊ុកនៅថ្ងៃទី ១២ ខែតុលាថា ប្រជាពលរដ្ឋបានស្ម័គ្រចិត្តចាប់ឆ្នោតផ្លាស់ប្តូរទីលំនៅពីតំបន់អង្គរទៅនៅតំបន់ដែលរដ្ឋាភិបាលបានរៀបចំចាត់ចែងជូនជាបន្តបន្ទាប់។
ជាក់ស្តែង នៅថ្ងៃទី ១២ ខែតុលា ក្រុមការងារតម្រង់ទិសរៀបចំឱ្យពលរដ្ឋដែលស្ម័គ្រចិត្តប្តូរទីលំនៅពីភូមិរហាល សង្កាត់នគរធំ, ភូមិគោកតាចាន់ ភូមិខ្វៀន ភូមិវាល ភូមិត្រពាំងសេះ ភូមិទក្សិណត្បូង សង្កាត់គោកចក, ភូមិទ្រាំង ភូមិអញ្ជោញ ភូមិមណ្ឌល ៣ សង្កាត់ស្លក្រាម ស្ថិតក្នុងក្រុងសៀមរាប ដែលមានចម្ងាយ ៥៥៨ ម៉ែត្រពីប្រាសាទអង្គរវត្ត ទៅរស់នៅតំបន់អភិវឌ្ឍន៍ពាក់ស្នែងស្ថិតនៅភូមិពាក់ស្នែងចាស់ ឃុំពាក់ស្នែង ស្រុកអង្គរធំ ដែលមានចម្ងាយប្រមាណ ១៩ គីឡូម៉ែត្រពីប្រាសាទអង្គរវត្ត បន្ថែមចំនួន១៦៨គ្រួសារ។
លោកបញ្ជាក់ថា៖ «គិតចាប់ពីថ្ងៃចាប់ឆ្នោតដំបូង នាថ្ងៃទី ២៥ ខែសីហា រហូតមកដល់ថ្ងៃទី ១២ ខែតុលា ឆ្នាំ ២០២២ នេះ មានប្រជាពលរដ្ឋសរុបចំនួន ៨ ៤៩៤ គ្រួសារហើយ ដែលបានមកចាប់ឆ្នោត»។
លោកស្រី ឈួន អឹម មេឃុំរុនតាឯកប្រាប់ ភ្នំពេញ ប៉ុស្តិ៍ នៅថ្ងៃទី ១៣ តុលាថា ប្រជាពលរដ្ឋដែលបានចាប់ឆ្នោតទៅរស់នៅតំបន់ភូមិធម្មជាតិរុនតាឯក ស្ថិតក្នុងភូមិតានី ឃុំរុនតាឯក ស្រុកបន្ទាយស្រី មិនទាន់បានរុះរើផ្ទះទៅនៅតំបន់ថ្មីនេះនៅឡើយទេ ដោយសារតែទីតាំងថ្មីកំពុងត្រូវបានឈូសឆាយសម្អាតឱ្យបានស្អាត។
លោកស្រីបន្តថា ដោយឡែកការរៀបចំបណ្ណសមធម៌ ជូនប្រជាពលរដ្ឋគឺបានផ្តល់ជូនចំនួន ៤ ០០០ គ្រួសារ។
តាមរយៈលិខិតរបស់លោក ហាក់ សុធារ៉ា ប្រធានមន្ទីរផែនការខេត្តសៀមរាប ចុះថ្ងៃទី ១៣ ខែតុលា ដែលជម្រាបជូនដល់គណៈអភិបាលស្រុកបន្ទាយស្រីបានឱ្យដឹងថា មន្ទីរផែនការខេត្តសហការជាមួយក្រសួងផែនការ គ្រោងនឹងបើកយុទ្ធនាការសម្ភាសផ្តល់បណ្ណសមធម៌ (បណ្ណក្រ ១) វគ្គទី២ ចាប់ពីថ្ងៃទី ១៧ ខែតុលា ឆ្នាំ ២០២២ ខាងមុខនេះ។
ហេតុនេះដើម្បីឱ្យដំណើរការសម្ភាសន៍ ផ្តល់បណ្ណសមធម៌ជូនប្រជាពលរដ្ឋបានទាន់ពេលវេលា និងទទួលបានលទ្ធផលល្អប្រសើរ លោកបានជម្រាបជូនទៅគណៈអភិបាលស្រុកធ្វើការចាត់ចែងសម្រួលឱ្យក្រុមការងារឃុំរុនតាឯកបានចូលរួមក្នុងយុទ្ធនាការនេះ។
លោកបញ្ជាក់ថា៖ «សូមឱ្យគណៈអភិបាលស្រុក មេត្តាជូនដំណឹងដល់បងប្អូនប្រជាពលរដ្ឋដែលស្ម័គ្រចិត្តរុះរើលំនៅឋានទៅកាន់តំបន់អភិវឌ្ឍន៍ធម្មជាតិរុនតាឯក ឱ្យមកចូលរួម សម្ភាសនៅទីតាំង ប៉ូលីសបេតិកភណ្ឌមុខប្រាសាទអង្គរវត្ត»។
លោកស្រីមេឃុំរុនតាឯកបានឱ្យដឹងថា តំបន់អភិវឌ្ឍន៍រុនតាឯកត្រូវបានរៀបចំឡើងតាំងពីឆ្នាំ ២០០៤ ដំបូងឡើយសម្រាប់ប្រជាពលរដ្ឋនៅតំបន់អង្គរដែលត្រូវបែកគ្រួសារដោយស្នើសុំអាជ្ញាធរអប្សរាទៅរស់នៅទីនោះ។
លោកស្រីបន្តថា មានប្រជាពលរដ្ឋបែកគ្រួសារពីតំបន់អង្គរចំនួនប្រមាណ ៩០ គ្រួសារ ទទួលបានផ្ទះ ១៥ គុណ ២៥ ម៉ែត្រ និងទទួលបានការឧបត្ថម្ភឈើសម្រាប់ធ្វើផ្ទះគ្រប់គ្រាន់ហើយផ្ទះនោះ ត្រូវធ្វើតាមគំរូដូចៗគ្នា និងបានដីចំនួន ១ ហិកតា ក្នុង១ គ្រួសារសម្រាប់បង្កបង្កើនផលផងដែរ។
លោកស្រីបញ្ជាក់ថា៖ «សម្រាប់ក្រុមគ្រួសារដែលគាត់បែកផ្ទះ ត្រូវស្នើសុំអាជ្ញាធរជាតិអប្សរាទៅរស់នៅផ្ទះគំរូនៅរុនតាឯកបាន តែគេមានលក្ខខណ្ឌលម្អិតណាស់ទម្រាប់បានដី ១ ឡូត៍នៅទីនោះ»។
លោកស្រីបន្ថែមថា ក្រៅពីប្រជាពលរដ្ឋដែលបែកគ្រួសារនោះ ក្រោយមកទើបមានប្រជាពលរដ្ឋផ្លាស់មកពីមាត់ស្ទឹងសៀមរាបជាង ៥០០ គ្រួសារ និងប្រជាពលរដ្ឋនៅមុខប្រាសាទអង្គរទទួលបានដី ២០ គុណ ៣០ ម៉ែត្រ និងមានការឧបត្ថម្ភថវិកា បណ្ណក្រីក្រប្រភេទ ១ និងសម្ភារប្រើប្រាស់ចាំបាច់ក្នុងការទៅរស់នៅដំបូង៕