ភ្នំពេញៈ រដ្ឋសភានឹងបើកកិច្ចប្រជុំបោះឆ្នោតផ្តល់សេចក្តីទុកចិត្តលើលោក ឌិត ទីណា ជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នាថ្ងៃទី ១៤ តុលានេះ តាមសំណើរបស់លោកនាយករដ្ឋមន្ត្រី ហ៊ុន សែន ក្រោយពីគណៈកម្មាធិការអចិន្រៃ្តយ៍នៃរដ្ឋសភា បានប្រជុំ ក្រោមអធិបតីភាពលោក ហេង សំរិន ប្រធានរដ្ឋសភាពីម្សិលមិញ។
គណៈកម្មាធិការអចិន្រៃ្តយ៍រដ្ឋសភា បានអនុម័តកាលបរិច្ឆេទបន្តសម័យប្រជុំរដ្ឋសភាលើកទី៨ នីតិកាលទី៦ នៅថ្ងៃទី ១៤ តុលា ឆ្នាំ ២០២២ វេលាម៉ោង ៨:០០នាទី ដោយមានរបៀបវារៈ ការបោះឆ្នោតផ្តល់សេចក្តីទុកចិត្តលើការបំពេញបន្ថែមសមាសភាពសមាជិកនៃរាជរដ្ឋាភិបាលដល់លោក ឌិត ទីណា ជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
សេចក្តីប្រកាសរបស់រដ្ឋសភា បញ្ជាក់ថា៖ «អង្គប្រជុំបានធ្វើការពិភាក្សា និងអនុម័តយល់ព្រមសំណើសុំបោះឆ្នោតផ្តល់សេចក្តីទុកចិត្តលើការបំពេញបន្ថែមសមាសភាពសមាជិកនៃរាជរដ្ឋាភិបាលដល់ឯកឧត្តម ឌិត ទីណា ជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដើម្បីដាក់ជូនរដ្ឋសភាបោះឆ្នោតផ្តល់សេចក្តីទុកចិត្តក្នុងសម័យប្រជុំរដ្ឋសភានាពេលខាងមុខ»។
កាលពីថ្ងៃទី ៨ ខែតុលា ឆ្នាំ ២០២២ លោកនាយករដ្ឋមន្ត្រី ហ៊ុន សែន បានស្នើទៅលោក ហេង សំរិន ប្រធានរដ្ឋសភា ដើម្បីរៀបចំការបោះឆ្នោត ផ្តល់សេចក្តីទុកចិត្តលើការបំពេញបន្ថែមសមាជិករាជរដ្ឋាភិបាល។ លោកបានស្នើលោក ឌិត ទីណា ជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បន្ទាប់ពីព្រះមហាក្សត្រ ចេញព្រះរាជក្រឹត្យបញ្ចប់មុខតំណែងលោក វេង សាខុន ពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ តាមសំណើរបស់លោក។
លោក ឌិត ទីណា បច្ចុប្បន្ន កំពុងកាន់តំណែងជារដ្ឋលេខាធិការ នៃក្រសួងរ៉ែ និងថាមពល និងជាអតីតរដ្ឋលេខាធិការក្រសួងពាណិជ្ជកម្មផងដែរ។ លោក ឌិត ទីណា ជាបញ្ញវន្តបន្តវេន ១ រូប នៃគណបក្សប្រជាជនកម្ពុជា និងបានបញ្ចប់ការសិក្សាថ្នាក់បាក់ឌុបពីវិទ្យាល័យព្រះស៊ីសុវត្ថិ នៅឆ្នាំ ១៩៩៤ ហើយបានចេញទៅបន្តការសិក្សានៅប្រទេសបារាំងចាប់ពីឆ្នាំ ១៩៩៦ រហូតដល់ឆ្នាំ ២០០២។ លោកកើតនៅថ្ងៃទី ៧ មករា ឆ្នាំ ១៩៧៩ នាទីក្រុងភ្នំពេញ។
អំឡុងឆ្នាំ ២០០២ លោកក៏បានបញ្ចប់ការសិក្សាពីសាលាជាតិជាន់ខ្ពស់ផ្នែករ៉ែ នៅទីក្រុងប៉ារីស ប្រទេសបារាំង Ecole Nationale superieure des mines de Paris ដោយទទួលសញ្ញាបត្រវិស្វកររ៉ែ។ ក្រៅពីសញ្ញាបត្រវិស្វកររ៉ែ លោកបានបញ្ចប់ការសិក្សាថ្នាក់បរិញ្ញាបត្រជាន់ខ្ពស់ផ្នែករូបវិទ្យាពីសាកលវិទ្យាល័យ Orsay, Paris Sud នៅឆ្នាំ ២០០០។
លោក អ៊ឹង ឌីប៉ូឡា អគ្គនាយកនៃអគ្គនាយកដ្ឋានធនធានរ៉ែ នៃក្រសួងរ៉ែ និងថាមពល និយាយថា បើមើលទៅលើការងារលោក ឌិត ទីណា គឺជាថ្នាក់ដឹកនាំ ១ រូបមានការទទួលខុសត្រូវខ្ពស់ ដោយគិតពីផលប្រយោជន៍រួម និងជាតិជាធំ។ ភាពម៉ឺងម៉ាត់ ហ្មត់ចត់ តែទន់ភ្លន់នៅលើគ្រប់កិច្ចការរបស់លោក ឌិត ទីណា នឹងអាចដឹកនាំវិស័យកសិកម្មឱ្យឆ្ពោះទៅមុខបានដោយជោគជ័យ។ លោកថា លោក ឌិត ទីណា ជាថ្នាក់ដឹកនាំ ១ រូបតែងតែខិតខំ ពុះពារគ្រប់ឧបសគ្គ ដើម្បីបណ្តុះបណ្តាល ណែនាំ ជំរុញ និងផ្តល់ឱកាសដល់គ្រប់មន្ត្រីក្រោមឱវាទ ជាពិសេសយុវជន។
លោកថ្លែងថា៖ «ក្នុងរយៈពេលដែលលោកបំពេញការងារ ជារដ្ឋលេខាធិការ នៅក្រសួងរ៉ែ និងថាមពល លោកតែងតែគោរពនូវគំនិតយោបល់អ្នកបច្ចេកទេសដោយមិនធ្វើការរំលោភបំពានអំណាច។ លោកបំពេញការងារជាអ្នកនយោបាយ និងលើកយោបល់ជាអ្នកនយោបាយ ដោយទុកឱ្យមានការទទួលខុសត្រូវតាមផ្នែកនីមួយៗ ធ្វើការងាររបស់ខ្លួនដោយការទទួលខុសត្រូវខ្ពស់»។
លោកបញ្ជាក់ថា៖ «បើយើងមើលទៅលើលក្ខណៈបុគ្គលរបស់គាត់ គាត់ជាមនុស្សសាមញ្ញ ស្មោះត្រង់ រួសរាយ រាក់ទាក់ និងយកអាសាអ្នកដទៃ។ គាត់ពិតជាថ្នាក់ដឹកនាំយុវជនគំរូ ១ រូប»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា សម្តែងនូវក្តីសង្សឹមថា រដ្ឋមន្ត្រីថ្មី នឹងធ្វើឱ្យវិស័យកសិកម្មរបស់ប្រទេសកម្ពុជាកាន់តែមានការរីកចម្រើន តាមរយៈ ការដោះស្រាយបញ្ហាប្រឈមនានារបស់ពលរដ្ឋ ក្នុងពេលលោកកាន់តំណែង។
លោកបញ្ជាក់ថា៖ «អ្វីដែលប្រជាពលរដ្ឋ សង្ឃឹមចង់បានខ្លាំងនោះ គឺធ្វើម៉េចឱ្យកសិករមានទីផ្សារកសិផលរបស់គាត់។ ធ្វើម៉េចឱ្យប្រជាពលរដ្ឋមានបច្ចេកទេសកសិកម្ម មានពូជដំណាំគ្រប់គ្រាន់ មានទឹកធ្វើស្រែគ្រប់រដូវ។ គួរតែកុំឱ្យស្ថិតក្នុងស្ថានភាពកសិកម្មតាមបែបយថាផលយូរអង្វែងពេក ព្រោះប្រទេសយើងជាប្រទេសកសិកម្ម វាគួរតែកសិកម្មហ្នឹងវាជឿនលឿនឡើង»។
ជាមួយគ្នានេះដែរ លោក ហេង ចាន់ធួន រដ្ឋលេខាធិការនៅក្រសួងរ៉ែ និងថាមពលជាមួយលោក ឌិត ទីណា ដែរនោះ បានថ្លែងថា៖ «ខ្ញុំជឿជាក់ថា នៅក្នុងមុខតំណែងថ្មីរបស់គាត់ ជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ប្រជាពលរដ្ឋដែលអាស្រ័យលើមុខរបរកសិកម្ម នឹងទទួលបានប្រាក់ចំណូលខ្ពស់បន្ថែមទៀត»៕