ក្រសួងការងារ និងបណ្តុះបណ្តាលវិជ្ជាជីវៈ បានបើកវគ្គបណ្តុះបណ្តាលជំនាញបច្ចេកទេសវិជ្ជាជីវៈរយៈពេលខ្លី ដោយឥតគិតថ្លៃ ជូនកម្មករ និងប្រជាពលរដ្ឋជាង ១៧ ឆ្នាំមកហើយ ប៉ុន្តែជំនាញនេះ ហាក់មិនសូវទទួលបានការចាប់អារម្មណ៍ច្រើនពីប្រជាពលរដ្ឋប៉ុន្មាននោះទេ ជាពិសេសយុវជន។
លោក ថង សាម៉ុន អគ្គនាយករងអប់រំបណ្តុះបណ្តាលបច្ចេកទេស និងវិជ្ជាជីវៈនៃក្រសួងការងារ និងបណ្តុះបណ្តាលវិជ្ជាជីវៈ បានផ្តល់បទសម្ភាសដល់ ភ្នំពេញ ប៉ុស្តិ៍ ជុំវិញបញ្ហានេះ និងពីសារប្រយោជន៍នៃការរៀនជំនាញបច្ចេកទេសវិជ្ជាជីវៈដែលមានខ្លឹមសារដូចតទៅ ៖
តើការបណ្តុះបណ្តាលជំនាញរយៈពេលខ្លីដល់ពលរដ្ឋ បង្កើតឡើងតាំងពីពេលណាមក?
ការបណ្តុះបណ្តាលជំនាញរយៈពេលខ្លីដល់ពលរដ្ឋ គឺមានជាយូរមកហើយ (អនុក្រឹត្យលេខ ៥២ អនក្រ.បក ចុះថ្ងៃទី ១ ខែមេសា ឆ្នាំ ២០០៥ ស្តីពីការរៀបចំ និងការប្រព្រឹត្តទៅរបស់ក្រសួងការងារ និងបណ្ដុះបណ្ដាលវិជ្ជាជីវៈ) ហើយក្រសួងការងារ បានធ្វើកិច្ចការងារនេះ បន្តរហូតមកតាំងពីឆ្នាំ ២០០៥។
តើការបណ្តុះបណ្តាលជំនាញរយៈពេលខ្លីមានសារប្រយោជន៍ដូចម្តេច?
ការផ្តល់ការបណ្តុះបណ្តាលជំនាញរយៈពេលខ្លីនេះ ខ្ញុំសុំញែកអត្ថប្រយោជន៍ជា ២ ដើម្បីធ្វើការបកស្រាយគឺ ១ សម្រាប់កម្មករកម្មការិនី និងទី២ សម្រាប់ពលរដ្ឋទូទៅ។ ការបណ្តុះបណ្តាលសម្រាប់កម្មករកម្មការិនី គឺចំពោះពួកគាត់ដែលគិតថា ចង់បានជំនាញថ្មីពីជំនាញដែលគាត់ធ្វើការងាររាល់ថ្ងៃ ដោយចាប់យកឱកាសនូវជំនាញថ្មីមួយទៀត។ ពេលគាត់មកចូលរៀនវគ្គបណ្តុះបណ្តាលជំនាញខ្លី ហើយនៅពេលគាត់ចេញទៅវិញ នឹងបង្កលក្ខណៈងាយស្រួលក្នុងការបំពេញការងារថ្មី ឬសម្រាប់គាត់ ដែលមានគោលបំណងចង់ផ្លាស់ប្តូរមុខរបរថ្មី ឬចង់បង្កើតមុខរបរថ្មី។ ពួកគាត់ អាចមានឱកាសចូលទីផ្សារការងារថ្មី ឬបង្កើតការងារថ្មី សម្រាប់ពួកគាត់ បន្ទាប់ពីរៀនជំនាញហើយ។
១ ទៀត កម្មករ-កម្មការិនីទៀតសោត បើសិនជាគាត់មករៀនជំនាញរយៈពេលខ្លីទាក់ទងនឹងការអភិវឌ្ឍជំនាញ បានន័យថា គាត់មកអ៊ីចឹង ធ្វើឱ្យជំនាញរបស់គាត់ល្អប្រសើរជាងមុន។ ពេលគាត់ទៅធ្វើការ ច្បាស់ជាផលិតភាពរបស់គាត់ បានកើនឡើងជាងមុន ហើយគាត់ប្រាកដជាទទួលបានប្រាក់ខែច្រើនជាងមុន ហើយអាចថា នឹងមានឱកាសឡើងតួនាទីសម្រាប់កន្លែងធ្វើការគាត់។ មាន ២ ចំណុចនេះ សម្រាប់អត្ថប្រយោជន៍របស់កម្មករ-កម្មការិនី ដែលទី១ គឺការរៀនជំនាញថ្មី សម្រាប់បង្កើតមុខរបរថ្មី និងទី២ គឺការអភិវឌ្ឍជំនាញរបស់ខ្លួន ដែលធ្វើឱ្យពួកគាត់ មានភាពប្រសើរជាងមុននៅកន្លែងធ្វើការចាស់។
ចុះជាមួយពលរដ្ឋធម្មតាវិញតើត្រូវទទួលចុះឈ្មោះចូលរៀនយ៉ាងដូចម្តេច?
សម្រាប់ពលរដ្ឋខ្មែរទូទៅ ដែលពួកគាត់មករៀនជំនាញរយៈពេលខ្លីៗនេះ គឺគាត់អាចចូលរៀនមិនខុសពីកម្មករកម្មការិនីនោះទេ ដោយក្រសួងយើងតែងផ្តល់ជូនគាត់អាចចូលរៀន ដើម្បីទទួលបានវិជ្ជាជីវៈមួយច្បាស់លាស់ ដែលធ្វើឱ្យគាត់ចូលទៅក្នុងទីផ្សារការងារ ដោយអាចទទួលបានឱកាស និងទទួលបានប្រាក់ខែល្អប្រសើរជាងគាត់ទៅធ្វើការអត់មានជំនាញ។ អ៊ីចឹងគាត់មករៀនរយៈពេលខ្លី គាត់ចំណាយការសិក្សាក៏មិនច្រើនដែរ ដែលគាត់ចំណាយពេលតែ ៤ ខែ ទៅ ៦ ខែ គឺគាត់នឹងទទួលបានជំនាញមួយដែលទទួលបានប្រាក់ខែខ្ពស់ជាងអ្នកអត់មានជំនាញ (មិនចេះអ្វីសោះ)។
បន្ថែមពីនេះតាមរយៈការទទួលបានការបណ្តុះបណ្តាលជំនាញវិជ្ជាជីវៈរយៈពេលខ្លីនេះ ទោះបីជាគាត់ ចូលបម្រើការងារទទួលបានប្រាក់ខែប្រហាក់ប្រហែលគេ ប៉ុន្តែគាត់អាចមានឱកាសទទួលបានការឡើងប្រាក់ខែជាងអ្នកដែលមិនមានជំនាញដែរ។ ពិសេសជាងនេះទៀត ពលរដ្ឋខ្មែរទូទៅ ក៏អាចយកចំណេះដែលទទួលបានពីការបណ្តុះបណ្តាលជំនាញខ្លីនេះ ទៅប្រកបរបរដោយខ្លួនឯងបាន។ ឧទាហរណ៍ទៅធ្វើជាជាងឡាន ឬធ្វើជាជាងថែទាំ និងជួសជុលម៉ាស៊ីនត្រជាក់ជាដើម។
នៅពេលដែលសិក្ខាកាម ទទួលបានការបណ្តុះបណ្តាលជំនាញវិជ្ជាជីវៈបន្ថែមពីលើការងារដែលពួកគាត់មានស្រាប់ ឬគ្មាន តើក្រសួង ជួយដល់ពួកគាត់យ៉ាងដូចម្តេច ក្នុងការចាប់យកឱកាសការងារនៅលើទីផ្សារ?
ដើម្បីឱ្យពួកគាត់ អាចចូលទីផ្សារការងារបានជាធម្មតាគ្រឹះស្ថានបណ្តុះបណ្តាល គឺគាត់មានដៃគូសហការជាមួយវិស័យឯកជន។ អ៊ីចឹងយើងអាចតម្រង់គាត់ នៅពេលរៀនចប់ គឺពួកគាត់អាចរកការងារធ្វើបានដ៏ល្អ ហើយយើងអាចប្រឹក្សាយោបល់ជូនគាត់ក្នុងការចូលទីផ្សារការងារ និងពីរបៀបរបបទំនាក់ទំនងដើម្បីស្វែងរកការងារ ក៏ដូចជាការចុះកម្មសិក្សាជាដើម។
បន្ថែមពីនេះ យើងក៏បានណែនាំពួកគាត់ ពីរបៀបរបបនៃការបើកអាជីវកម្មផ្ទាល់ខ្លួន ចំពោះបងប្អូនណាដែលគាត់មានបំណងចង់ក្លាយជាសហគ្រិនភាព គឺយើងអាចតម្រង់ទិសគាត់បាន។ អ្វីទាំងនេះ គឺបានចូលរួមផ្តល់ឱកាសដល់ពួកគាត់ ដែលជាអ្នកទទួលបានការបណ្តុះបណ្តាលជំនាញខ្លី។
បន្ថែមពីនេះ សម្រាប់ការចូលទីផ្សារការងារ យើងបានសហការជាមួយទីភ្នាក់ងារជាតិ និងមុខរបរ និងការងារ ដើម្បីសហការគ្នា ក្នុងការផ្តល់ព័ត៌មានការងារ និងជួយរៀបចំសរសេរប្រវត្តិរូបការងារ (CV) រួមទាំងផ្តល់ព័ត៌មានផ្សេងៗទៅដល់សិក្ខាកាមដើម្បីឱ្យពួកគាត់ មានទីផ្សារការងារបានលឿន ហើយទៅរកទីផ្សារការងារ ដែលត្រូវនឹងជំនាញដែលគាត់រៀន។ ការទទួលបានទីផ្សារការងារត្រូវជំនាញ គឺជាឱកាសមួយដែលចូលរួមបង្កើនផលិតភាព និងប្រាក់ខែខ្ពស់សម្រាប់ពួកគាត់ជាងការទទួលបានការងារដែលខុសជំនាញ។
នៅពេលកម្ពុជា មានកម្មករជំនាញកាន់តែច្រើន តើនឹងជួយអ្វីខ្លះដល់សេដ្ឋកិច្ចជាតិ?
គឺប្រាកដណាស់ នឹងចូលរួមជួយដល់សេដ្ឋកិច្ចជាតិយ៉ាងច្រើន។ បានន័យថា សេដ្ឋកិច្ចជាតិយើងរីកចម្រើនបានអាស្រ័យទៅលើវិស័យជាច្រើន។ ខ្ញុំលើកតែវិស័យវិនិយោគឧស្សហកម្មមួយមកនិយាយ។ បើសិនជាយើងមានអ្នកជំនាញច្រើនក្នុងវិស័យនេះ នោះអ្នកវិនិយោគ នឹងបង្កើតរោងចក្រ បង្កើតសហគ្រាសតាមជំនាញដែលយើងមានហ្នឹង គឺអាចថា កើនឡើងជាងមុន។ អ៊ីចឹងយើងយកអ្នកដែលរកស៊ីថ្មីមកបង្កើតអាជីវកម្ម បង្កើតសហគ្រាសរោងចក្រនៅកម្ពុជាយើង ប្រាកដជាមានអ្នកវិនិយោគច្រើន មានរោងចក្រច្រើន បង្កើតការនាំចេញទៅក្រៅច្រើន នឹងទទួលបានចំណូលចូលសេដ្ឋកិច្ចជាតិ។
នេះសម្រាប់សហគ្រាសថ្មី។ សម្រាប់សហគ្រាសដែលមានស្រាប់ នៅពេលដែលគាត់មានកម្មករជំនាញច្បាស់លាស់ ផលិតភាពការងាររបស់កម្មករហ្នឹង នឹងខ្ពស់ជាងមុន ដែលធ្វើឱ្យខ្សែចង្វាក់ផលិតកម្ម និងការផលិតរបស់គាត់ មានគុណភាពល្អជាងមុន និងបានច្រើនជាងមុន។ នៅពេលបែបនេះ គឺនឹងនាំឱ្យរោងចក្រសហគ្រាស ឬវិស័យឯកជនមានលទ្ធភាពនាំចេញផលិតផលទៅក្រៅបានច្រើនជាងមុន ដែលនឹងចូលរួមជួយបង្កើនប្រាក់ចំណេញដល់ក្រុមហ៊ុន និងជួយដល់ប្រាក់ខែរបស់បុគ្គលិក និងកម្មករបានច្រើនដូចគ្នា។
ទន្ទឹមនឹងនេះដែរ បើយើងមានកម្លាំងពលកម្មជំនាញច្រើន យើងអាចធ្វើអ្វីបានច្រើនសម្រាប់ប្រទេសជាតិយើង។ យើងអាចរៀបចំជាផែនការអភិវឌ្ឍន៍វិស័យឧស្សហកម្ម វិស័យសេវាកម្ម វិស័យកសិកម្ម វិស័យទេសចរណ៍ ។ល។ អីហ្នឹង បានល្អ និងមានភាពទាក់ទាញអ្នកវិនិយោគបានច្រើនជាងមុន។ ទាំងនោះហើយ ដែលបានចូលរួមជួយសេដ្ឋកិច្ចជាតិ ហើយកាលណាយើងមានកម្លាំងពលកម្មជំនាញច្រើន ផលិតភាពការងារក៏ខ្ពស់ ហើយពួកគាត់ ក៏ទទួលបានប្រាក់ខែច្រើន។
នៅពេលកម្មករជំនាញ ទទួលបានប្រាក់ខែច្រើន ពួកគាត់នឹងយកប្រាក់ខែទាំងនោះ ទៅប្រើប្រាស់ផ្ទាល់ខ្លួន ដែលនាំឱ្យមានអ្នកទទួលបានផលប្រយោជន៍ដោយប្រយោលជាច្រើនទៀត មានទាំងសហគមន៍គាត់ និងអាជីវកម្មផ្សេងៗ ដែលគាត់ នឹងទៅប្រើប្រាស់។ ឧទាហរណ៍ នៅពេលពលកម្មជំនាញ គាត់មានថវិកាច្រើន គាត់ទៅចំណាយទៅលើសម្ភារផ្សេងៗ ដូចជាសម្លៀកបំពាក់ដែលទាំងនេះ គឺនឹងជួយដល់សេដ្ឋកិច្ចជាតិតាមរយៈបែបនេះ។
តើការចូលរៀនវគ្គបណ្តុះបណ្តាលវិជ្ជាជីវៈ របស់ក្រសួងការងារមានបង់ប្រាក់ដែរទេ?
សម្រាប់កម្មវិធីបណ្តុះបណ្តាលរយៈពេលខ្លីៗនេះ ក្រសួងការងារ បានផ្តល់អាហារូបករណ៍ ១០០ ភាគរយ ជូនពួកគាត់ សម្រាប់រយៈពេល ៤ ខែ ឬ ១ ខែឬក៏ ១ សប្តាហ៍ ទៅតាមជំនាញ និងវគ្គនីមួយៗ។ ទន្ទឹមនឹងនេះ យើងក៏មានវគ្គបណ្តុះបណ្តាលពិសេសៗជូនពួកគាត់ផ្សេងទៀត ដែលក្រសួងបានផ្តល់អាហារូបករណ៍ជាប្រចាំជូនពួកគាត់ដោយឥតបង់ថ្លៃ។
អ្វីដែលពិសេសនោះ គឺមានជំនាញជាអាទិភាពមួយចំនួនគឺយើងបានផ្តល់ប្រាក់ហូបចុកប្រចាំថ្ងៃ ដោយមាន ១៦ ម៉ឺនរៀលក្នុង ១ ខែ ឬខ្លះក៏ ២០ ម៉ឺនរៀលក្នុង ១ ខែ។ ទន្ទឹមនឹងហ្នឹងក៏យើងបានផ្តល់កន្លែងស្នាក់នៅជូនពួកគាត់ទៀត ព្រោះសាលាបច្ចេកទេសរបស់យើងមួយចំនួនមានអន្តេវាសិកដ្ឋាន។ ដូច្នេះបើសាលាណាដែលមានអន្តេវាសិកដ្ឋាន យើងនឹងផ្តល់កន្លែងស្នាក់នៅជូនគាត់ដោយឥតគិតថ្លៃ។
តើជំនាញដែលសិក្ខាកាម ចាប់យកសិក្សាច្រើនជាងគេ មានអ្វីខ្លះ?
ជំនាញដែលកម្មករ កម្មការិនី និងពលរដ្ឋទូទៅ ចាប់យកច្រើនជាងគេ ក្នុងចំណោមជំនាញដែលក្រសួងបានផ្តល់ឱ្យគឺសម្រាប់បុរសៗ គាត់ច្រើនចាប់យកជំនាញពាក់ព័ន្ធនឹងការងារវិស័យសំណង់។ ក្នុងសំណង់មានច្រើន ដែលយើងដឹងហើយថា មានការងារកំបោរ ការងាររៀបឥដ្ឋ ការងារលាបថ្នាំ ការងារពិតាន និងការងារសរសៃដែកអីផ្សេងៗ។ អ៊ីចឹងមានការងារច្រើន ជាពិសេសគឺការងារក្នុងវិស័យសំណង់ ប្រភេទការងារ ក្នុងវិស័យអគ្គិសនី មេកានិក អេឡិចត្រូនិក វិស័យបរិក្ខារត្រជាក់ ឬម៉ាស៊ីនត្រជាក់។ វិស័យទាំងនេះ គឺបុរសៗ គាត់ចូលចិត្តរៀនច្រើន ហើយសម្រាប់នារីៗ ក៏មានដែរ ប៉ុន្តែក៏មិនមានច្រើននៅឡើយទេ។
សម្រាប់នារីៗ គឺគាត់ចូលចិត្តផ្នែក ជំនួញ ICT ( ICT គឺជាពាក្យផ្លូវការ ១ មកពីពាក្យពេញ Information Communication Technology ដែលក្ដោបយកក្រុមនៃឧបករណ៍ ឬកម្មវិធីអាចទំនាក់ទំនងគ្នាបាន ក្នុងនោះមានដូចជា វិទ្យុ ទូរទស្សន៍ ប្រព័ន្ធកុំព្យូទ័រ ឧបករណ៍កុំព្យូទ័រ និងកម្មវិធីកុំព្យូទ័រ» ឬទាក់ទងនឹងវិស័យធុរកិច្ច និងព័ត៌មានវិទ្យា ចុងភៅ និងវិស័យទាក់ទងនឹងជំនាញទេសចរណ៍។ មានជំនាញមួយចំនួន ដែលយើងបណ្តុះបណ្តាលនៅក្នុងសហគមន៍ ដែលមានទាំងបុរស និងស្ត្រី អាចរៀនបានដូចគ្នា វគ្គកសិកម្មខ្លីៗ ទាក់ទងនឹងការកែច្នៃម្ហូបអាហារ ការថែទាំ ដាំដំណាំ និងការចិញ្ចឹមសត្វជាដើម។
តើលោកមានសារអ្វីទៅកាន់ពលរដ្ឋដើម្បីជំរុញឱ្យពួកគាត់មានការចាប់អារម្មណ៍មករៀនយកជំនាញវិជ្ជាជីវៈ?
អ្វីដែលខ្ញុំចង់សំណូមពរថា ឱ្យយុវជនយើង ឬក៏ប្រជាពលរដ្ឋយើង ក៏ដូចជាកម្មករ-កម្មការិនីយើង ងាកមកសិក្សាជំនាញបច្ចេកទេសឱ្យបានច្រើនជាងនេះ ដោយសារតែតម្រូវការទីផ្សារការងារក្នុងពេលបច្ចុប្បន្ន គឺមានចំនួនខ្ពស់ ហើយទៅពេលអនាគត ក៏មានតម្រូវការខ្ពស់ដែរ។ ជំនាញបច្ចេកទេសនេះទៀតសោត នឹងជួយដល់ការអភិវឌ្ឍសេដ្ឋកិច្ចប្រទេសជាតិ និងជួយអភិវឌ្ឍដល់ខ្លួនផ្ទាល់ អាចថា ចូលបម្រើការឱ្យគេក៏បាន ប្រកបរបររកស៊ីខ្លួនឯងក៏បាន។
ខ្ញុំចង់ឱ្យយុវជន កម្មករ-កម្មការិនី មកចាប់អារម្មណ៍ ឬក៏ងាកមកសិក្សាជំនាញបច្ចេកទេសនេះព្រោះយើងមានការផ្តល់អាហារូបករណ៍ ហើយកន្លែងខ្លះ មានផ្តល់កន្លែងស្នាក់នៅជាដើម។ ជាពិសេសនោះ យើងក៏បានជួយតម្រង់ទិសឱ្យពួកគាត់ ទទួលបានការងារផ្សេងៗ និងការប្រឹក្សាយោបល់ផងដែរ។
តើមានកម្មករ ឬពលរដ្ឋច្រើនទេទៅរៀនវគ្គបណ្តុះបណ្តាលបច្ចេកទេសវិជ្ជាជីវៈ?
ក្នុងរយៈពេល ៥ ឆ្នាំចុងក្រោយនេះក្រសួងបានបណ្តុះបណ្តាលជំនាញរយៈពេលខ្លីដល់សិក្ខាកាមជាមធ្យមប្រមាណ ៣ ម៉ឺននាក់ក្នុង ១ ឆ្នាំហើយសរុបរយៈពេល ៥ ឆ្នាំនេះ មានសិក្ខាកាម សរុបយ៉ាងតិច ១៥ ម៉ឺននាក់បានទទួលការបណ្តុះបណ្តាលជំនាញខ្លីពីក្រសួង៕