.jpg)
ភ្នំពេញៈ នៅព្រឹកថ្ងៃទី ១៤ ខែតុលានេះ រដ្ឋសភាបានបោះឆ្នោតផ្តល់សេចក្តីទុកចិត្តលើលោក ឌិត ទីណា ជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដោយសំឡេង ១១១ លើ ១១១ តាមសំណើរបស់លោកនាយករដ្ឋមន្ត្រី ហ៊ុន សែន។
សេចក្តីប្រកាសព័ត៌មានរដ្ឋសភាបញ្ជាក់នាថ្ងៃទី ១៤ ខែតុលាថា៖ «សម័យប្រជុំរដ្ឋសភានាឱកាសនេះមានរបៀបវារៈតែមួយ ដោយបានបោះឆ្នោតផ្តល់សេចក្តីទុកចិត្តលើការបំពេញបន្ថែមសមាសភាពសមាជិកនៃរាជរដ្ឋាភិបាលដល់ ឯកឧត្តម ឌិត ទីណា ជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដោយទទួលបានសំឡេងព្រមចំនួន ១១១ សំឡេង»។
គួររំឭកផងដែរ កាលពីថ្ងៃទី ៨ ខែតុលា លោកនាយករដ្ឋមន្ត្រី ហ៊ុន សែន បានស្នើទៅកាន់ លោក ហេង សំរិន ប្រធានរដ្ឋសភា ដើម្បីរៀបចំការបោះឆ្នោតផ្តល់សេចក្តីទុកចិត្តលើការបំពេញបន្ថែមសមាជិករាជរដ្ឋាភិបាល ដែលលោកបានស្នើលោក ឌិត ទីណា ជារដ្ឋមន្ត្រីក្រសួង កសិកម្ម រុក្ខាប្រមាញ់ និងនេសាទ បន្ទាប់ពីព្រះមហាក្សត្រ បានចេញព្រះរាជក្រឹត្យបញ្ចប់មុខតំណែងលោក វេង សាខុន ពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ តាមសំណើរបស់លោក កាលពីថ្ងៃទី ៨ ខែតុលា។
លោក ឌិត ទីណា បច្ចុប្បន្នកាន់តំណែងជារដ្ឋលេខាធិការនៃក្រសួងរ៉ែ និងថាមពល ហើយលោកជាអតីតរដ្ឋលេខាធិការនៃក្រសួងពាណិជ្ជកម្មផងដែរ។
លោកលោក ឌិត ទីណា កើតនៅថ្ងៃទី ៧ មករា ឆ្នាំ ១៩៧៩។ លោកជាបញ្ញវន្តបន្តវេន ១ រូប នៃគណបក្សប្រជាជនកម្ពុជា និងបានបញ្ចប់ការសិក្សាថ្នាក់បាក់ឌុបពីវិទ្យាល័យព្រះស៊ីសុវត្ថិនៅឆ្នាំ ១៩៩៤ ហើយបានចេញទៅបន្តការសិក្សានៅប្រទេសបារាំងចាប់ពីឆ្នាំ ១៩៩៦ រហូតដល់ឆ្នាំ ២០០២។
ក្នុងអំឡុងឆ្នាំ ២០០២ លោកក៏បានបញ្ចប់ការសិក្សាពីសាលាជាតិជាន់ខ្ពស់ផ្នែករ៉ែ នៅទីក្រុងប៉ារីស ប្រទេសបារាំង Ecole Nationale superieure des mines de Paris ដោយទទួលសញ្ញាបត្រវិស្វកររ៉ែ។
ក្រៅពីសញ្ញាបត្រវិស្វកររ៉ែលោកបានបញ្ចប់ការសិក្សាថ្នាក់បរិញ្ញាបត្រជាន់ខ្ពស់ផ្នែករូបវិទ្យាពីសាកលវិទ្យាល័យ Orsay, Paris Sud នៅឆ្នាំ ២០០០។
លោក ឌិត ទីណា បានថ្លែងអំណរគុណតាមរយៈហ្វេសប៊ុករបស់លោកថា៖ «ខ្ញុំបាទ ឌិត ទីណា សូមថ្លែងអំណរគុណដ៏ជ្រាលជ្រៅបំផុតជូនចំពោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានផ្តល់សេចក្តីទុកចិត្ត និងឱកាសដល់រូបខ្ញុំ បានបម្រើជាតិ និងមាតុភូមិ នៅក្នុងនាមជារដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ»។
លោកបានបន្តថា៖ «ខ្ញុំបាទក៏សូមថ្លែងអំណរគុណជូនចំពោះ សម្ដេចអគ្គមហាពញាចក្រី ហេង សំរិន ប្រធានរដ្ឋសភា ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ នៃរដ្ឋសភា និងលោកជំទាវកិត្តិសង្គហបណ្ឌិត ឃួន សុដារី អនុប្រធានទី២ នៃរដ្ឋសភា ព្រមទាំងគណៈកម្មាធិការអចិន្ត្រៃយ៍រដ្ឋសភា ដែលបានដាក់បញ្ចូលការបោះឆ្នោតផ្ដល់សេចក្ដីទុកចិត្តលើការបំពេញបន្ថែមសមាសភាពនៃរាជរដ្ឋាភិបាលដល់រូបខ្ញុំបាទ ទៅក្នុងរបៀបវារៈនៃសម័យប្រជុំរដ្ឋសភា លើកទី៨ នីតិកាលទី៦ នាថ្ងៃសុក្រ ទី១៤ ខែតុលា ឆ្នាំ ២០២២»។
លោកក៏បានថ្លែងអំណរគុណជូនចំពោះសមាជិក សមាជិកា នៃរដ្ឋសភាដ៏ឧត្តុង្គឧត្តម ដែលផ្ដល់កិត្តិយសចូលរួមក្នុងការបោះឆ្នោតផ្ដល់និងបានបោះឆ្នោតផ្តល់សេចក្ដីទុកចិត្តដល់រូបលោកចូលជាសមាជិករាជរដ្ឋាភិបាល ក្នុងនាមជារដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ ដោយសំឡេង ព្រម ចំនួន ១១១/១១១។
លោកថ្លែងថា ការបោះឆ្នោតយល់ព្រមពីសំណាក់អង្គសភាដ៏ឧត្តុង្គឧត្តម គាំទ្រដល់រូបលោក គឺជាការផ្ដល់កិត្តិយស និងការទទួលខុសត្រូវ ក៏ដូចជាកម្លាំងចិត្តយ៉ាងធំធេងដល់រូបលោក ដើម្បីបំពេញបេសកកម្មបម្រើប្រជាជន និងប្រជាជាតិ ក្នុងវិស័យកសិកម្ម រុក្ខាប្រមាញ់ និងនេសាទ៕
