សៀមរាបៈ ស្ពានថ្មីនៅប្រាសាទនាគព័ន្ធត្រូវបានអាជ្ញាធរជាតិអប្សរា បើកឱ្យភ្ញៀវទេសចរធ្វើដំណើរឆ្លងកាត់ចូលទៅទស្សនាប្រាសាទនាគព័ន្ធ ជាពិសេសទស្សនាទិដ្ឋភាពដ៏ស្រស់ស្អាតនៅលើផ្ទៃទឹកនៃបារាយណ៍ជ័យតដាក ឬនាគព័ន្ធ (បារាយណ៍ខាងជើង) ធ្វើឱ្យភ្ញៀវទេសចរបានសម្តែងនូវភាពសប្បាយរីករាយពេលឆ្លងកាត់ស្ពាននេះ។ នេះបើយោងតាមហ្វេសប៊ុកអាជ្ញាធរជាតិអប្សរា។
លោក វិចិត្រ ប្រជាពលរដ្ឋមកពីខេត្តបន្ទាយមានជ័យបានឱ្យដឹងថា នេះជាលើកទី ១ ហើយ ដែលរូបលោកបាននាំក្រុមគ្រួសារចូលមកទស្សនាប្រាសាទនាគព័ន្ធ ដោយសារធ្វើដំណើរឆ្លងកាត់បានឃើញស្ពានថ្មីមួយ ទើបតែសាងសាងរួចរាល់ មានរូបរាងស្រស់ស្អាត ទើបចាប់ចិត្តចង់ចូលទស្សនាទិដ្ឋភាពនៅទីនេះ។
លោកបន្តថា នៅពេលបានឆ្លងកាត់លើស្ពានថ្មីនេះ ពិតជាមិនខកបំណងឡើយ ព្រោះមានទេសភាពស្រស់ស្អាត ផ្ទៃទឹកខៀវស្រងាត់ ព្រមជាមួយសត្វស្លាបហោះហើរឆ្លងកាត់ព្រោងព្រាតជាទីចាប់អារម្មណ៍សម្រាប់អ្នកទេសចរ។
ចំណែកលោក សេង គុណ ប្រជាពលរដ្ឋមកពីស្រុកប្រាសាទបាគងបាននិយាយថា ក្រោយទទួលបានព័ត៌មានអំពីការជួសជុលស្ពានថ្មី នៅមុខប្រាសាទនាគព័ន្ធបានរួចរាល់ ហើយអនុញ្ញាតឱ្យភ្ញៀវទេសចរឆ្លងកាត់ហើយនោះ លោកក៏បានសម្រេចចិត្តមកទស្សនាប្រាសាទនាគព័ន្ធ។
ក្នុងនោះលោកសង្កេតឃើញ ស្ពានថ្មីនេះមានភាពរឹងមាំ ស្រស់ស្អាត និងធំទូលាយជាងមុន។ លោកក៏រំពឹងថា និងមានភ្ញៀវទេសចរមកទស្សនា ប្រាសាទនាគព័ន្ធនេះកាន់តែច្រើនថែមទៀត។
លោក សេង គុណ ក៏បានថ្លែងអំណរគុណដល់អាជ្ញាធរជាតិអប្សរា ដែលបានយកចិត្តទុកដាក់ក្នុងការស្ថាបនាស្ពានថ្មីនេះ ក៏ដូចជាការអភិវឌ្ឍរមណីយដ្ឋានអង្គរ ឱ្យកាន់តែមានភាពស្រស់ស្អាត ស័ក្ដិសមជាសម្បត្តិបេតិកភណ្ឌពិភពលោក។
បើតាមអាជ្ញាធរជាតិអប្សរា បារាយណ៍ជ័យតដាក ឬនាគព័ន្ធ (បារាយណ៍ខាងជើង) ស្ថាបនាឡើងក្នុងរាជ្យព្រះបាទជ័យវរ្ម័នទី ៧ អស់រយៈកាលជិត ១ ពាន់ឆ្នាំមកហើយ បារាយណ៍នេះមានបណ្តោយ ៣ ៦០០ ម៉ែត្រ និងទទឹង ៩៣០ ម៉ែត្រ ។
ដោយសារភាពរីងស្ងួតអស់កាលជាយូរឆ្នាំមកហើយ នៅក្នុងឆ្នាំ ២០០៥ អាជ្ញាធរជាតិអប្សរាបានចាប់ផ្តើម ការងារជួសជុលប្រព័ន្ធធារាសាស្ត្របុរាណឡើងវិញ មានទំនប់ និងប្រឡាយបង្ហូរទឹក ដើម្បីអាចរក្សាទឹកក្នុងបារាយណ៍បាន ហើយនៅក្នុងឆ្នាំ ២០០៧ អាជ្ញាធរជាតិអប្សរាក៏បានបង្ហូរទឹកចូលមកធ្វើឱ្យបារាយណ៍ជ័យតដាក មានជីវិតសាជាថ្មីម្តងទៀត។
បច្ចុប្បន្នបារាយណ៍នេះបានដើរតួយ៉ាងសំខាន់ ដើម្បីផ្គត់ផ្គង់ទឹក សម្រាប់ប្រើប្រាស់ក្នុងវិស័យកសិកម្ម និងដល់មនុស្ស ក្នុងរាជធានីអង្គរធំ នាគព័ន្ធ និងនៅប្រាសាទព្រះខ័ន៕